ಮತ್ತಾಯ 23

ಯೆಸು ಶಾಸ್ತ್ರಿಯೊನೆ ಪರಿಸಾಯರೊನೆ ಭುಚ್ಕಾಡಲ

(ಮಾರ್ಕ 12:38-39; ಲುಕ 20:45-47)

1ತೆ ಥಯಲ್ಪರ ಯೆಸು ಮನಕ್ಹೊನಾ ಗುಂಪನೆ ವರಿ ತಿನಾ ಶಿಷ್ಯಾವೊನೆ ಸು ಕದ್ಯೊ ಕದ್ಯಾಮ, 2ಶಾಸ್ತ್ರಿಯೊ ವರಿ ಫರಿಸಾಯರೊ ಮೊಶೆನಾ ಜ಼ಗಾಪರ ಬೈಟ್ಯಾಸ; 3ತಿನಾಹುತಿ ತ್ಯುನೆ ಸು ಆಗನ್ಯಾ ಕವಸ ತುಮೆ ಕ್ಹಾರಾ ಚಲೈಲಿನ ಜಾ಼ವೊ; 4ತ್ಯುನೆ ಕ್ಹಾರು ವಜ್ಜು ಭಾಂದಿನ ಮನಕ್ಹೊನಾ ಖಾಂದಾವೊಪರ ಉಚಾ಼ವಾ ಲಗಾಡಸ; ತ್ಯುನೆತೊ ಯಕ್ಕ ಬೊಟಬಿ ಲಗಾಡತಾ ನೈ. 5ತ್ಯುನೆ ಕರಾನು ಕಾಮ ಕ್ಹಾರು ಮನಕ್ಹೊ ದೆಕು ಕೈನ ಕರಸ. ತ್ಯುನೆ ಭಾಂದಿಲಿವಾನಿ ಷೆ ಮ್ಹೆಲ್ಲಿವಾನಿ ಪಟ್ಟಿಯೊ ತ್ಯುನೆ ಮ್ಹೊಟಿ ಕರಸ. ತ್ಯುನೆ ಘಲ್ಲಿದಲ ವಣ್ಣಾವೊನಾ ಗೊಂಡಾ ಮ್ಹೊಟಾ ಕರಲಿವಸ. 6ತೆಕ್ಲುಜ಼ ನೈಸೊ ಉತ್ಸವ ರ‍್ಹಯಲ ಜ಼ಗಾ ಖಾಸ ಮರ್ಯಾದಿ ದ್ಯು ವರಿ ಸಭಾಮಂದಿರ್ಮಾ ಖಾಸ ಖುರ್ಚಿಯೊ ಬೈಟಾನೆ ದ್ಯು; 7ವಾನಿವಾಯೊಮಾ ರಸ್ತಾವೊಪರ ಪಗೆ ಪಡೈಲಿವಾನು ಮನಕ್ಹೊನಾ ಹತೆ ಗುರುವೊ ಕೈನ ಕವೈಲಿವಾನು; ಹೌ ಕ್ಹಾರುಜ಼ ತ್ಯುನೊನೆ ಪಸಂದ ವ್ಹೈ. 8ವರಿಬಿ ತುಮೆ ಭೊದಕೊ ಕೈನ ಕವೈಲಿವೊ ನಕೊ; ಕಾ ಕದ್ಯಾಮ ಕ್ರಿಸ್ತ ಯಕ್ಕಲೊಜ಼ ತುಮಾರೊ ಭೊದಕ ವ್ಹೈ. ವರಿ ತುಮೆ ಕ್ಹಾರಾ ಭಾಯೊಜ಼ ವ್ಹೈ. 9ಯಕ್ಲುಜ಼ ಭೊಲೊಕಪರ ಕಿನೆಜ಼ ತುಮಾರೊ ಬಾಪ ವ್ಹೈ ಕೈನ ಕವೊ ನಕೊ; ಕಾ ಕದ್ಯಾಮ ಪರಲೊಕ್ಮಾ ರ‍್ಹಯಲವಾಲೊ ಯಕ್ಕಜ಼ ತುಮಾರೊ ಬಾ ವ್ಹೈ. 10ವರಿ ಗುರು, ಕೈನ ಕವೈಲಯವೊನಕೊ; ಕಾ ಕದ್ಯಾ ತುಮಾರೊ ಗುರು ಕ್ರಿಸ್ತ ಯಕ್ಲೊಜ಼ ವ್ಹೈ. 11ತೆನೈಸೊ ತುಮೊಮಾ ಮ್ಹೊಟೊ ಕೈನ ಕವೈಲಿವಾಲೊ ತುಮಾರೊ ಸೆವಕ ಥೈನ ರ‍್ಹೌ. 12ತಿನಾಕ್ಹು ತಿನೆ ಮ್ಹೊಟೊ ಕೈನ ಕವೈಲಿವಾಲೊ ತೆ ನ್ಹಾನೊ ಥೈನ ತಗ್ಗಿನ ರ‍್ಹೌ, ತಿನಾಕ್ಹುತೆ ತಗ್ಗಿನ ರ‍್ಹವಾಲೊ ತೆ ಮ್ಹೊಟೊ ಥೈನ ರ‍್ಹವಸ.

13ಅಯ್ಯೊ ಕಪಟಿಯೊ ಶಾಸ್ತ್ರಯೊ, ಫರಿಸಾಯರೊ, ಪರಲೊಕ ರಾಜ್ಯ ನು ಬಾಕಲ ಮನಕ್ಹೊನಾ ಕ್ಹಾಮಾ ಝಾಕಿಪಾಡೊಸಿತುಮೆತೊ ಮ್ಹೈ ನೈ ಜಾ಼ತಾ. ಮ್ಹೈ ಜಾ಼ವಾಲಾವೊನೆಬಿ ಜಾ಼ವಾನೆ ದೆತಾ ನೈ. 14ಅಯ್ಯೊ, ಕಪಟಿಯೊ ಥಯಲ ಶಾಸ್ತ್ರಿಯೊ, ಫರಿಸಾಯರೊ ಮನಕ್ಹೊ ದೆಕು ಕೈನ ಮ್ಹೊಟಿಯೊ ಪ್ರಾಥನಾ ಕರೊಸಿ. ತುಮೆ ಮಾಟಿಯೊ ಮರಲ ಬಾಕ್ಡಿಯೊನಾ ಘರೊಮಾ ಹೊಕ್ಕಿನ ನಾಟಕ ಕರಿಸಿ. ತಿನಾಹುತಿ ತುಮೊನೆ ಮ್ಹೊಟಿ ಶಿಕ್ಷಾ ಮಳಸ. 15ಅಯ್ಯೊ, ಕಪಟಿಯೊ ಥಯಲ ಶಾಸ್ತ್ರಿಯೊ, ಫರಿಸಾಯರೊತುಮೆ ಯಕ್ಕ ಮನಕ್ಹನೆ ಮತಾಂತರ ಕರಾನಾಹುತಿ ಜಿಮಿನ ವರಿ ಸಮುದ್ರನೆ ಸುತ್ತ ಮಾರಿನ ಆವೊಶಿ; ತೆ ತುಮೊಮಾ ಮಳಿನ ತೆ ತುಮೊತಿಬಿ ಜಾ಼ಸ್ತಿ ಬೆ ಯಕ್ಲಿ ನರಕ್ಮಾ ಶಿಕ್ಷಾ ಮಳಸ. 16ಅಯ್ಯೊ, ವಾಟಾದೆಕಾಡಾಲಾ ಕುಡ್ಡಾವೊಯಕ್ಲೊ ದೆವಾಲಯಪರ ಕ್ಹಮ್ಮ ಘಾಲ್ಯೊಮ ತೆಜ಼ ಘಮ್ಮ ವ್ಹೈ ಕವೊಶಿ.ಯಕ್ಲೊ ದೆವಾಲಯಮಾ ರ‍್ಹಯಲ ಕ್ಹೊನಾಪರ ಕ್ಹಮ್ಮ ತೆ ಪುರಾ ಕರುಜ಼ ಕೈನ ಕವೊಶಿ. 17ಕುಡ್ಡಾವೊ, ಪಿಸಾಳಾವೊ, ಕಯೊ ಖಾಸ ವ್ಹೈ? ಕ್ಹೊನುಸು, ಕ್ಹೊನಾಕ್ಹು ಕರಲ ದೆವಾಲಯ ವ್ಹೈ ಸು? 18ವರಿ ಯಕ್ಲೊ ಬಲಿ ದಿವಾನಾ ಕಟ್ಟಾಪರ ಕ್ಹಮ್ಮ ಘಾಲ್ಯೊಮ ತೆ ಕ್ಹಮ್ಮ ನ್ಹವೈ ಕವೊಶಿ, ತೆನೈಸೊ ತಿಮಾ ರ‍್ಹಯಲ ಕಾಣಿಕೆಪರ ಕ್ಹಮ್ಮ ಘಾಲ್ಯಾಮ ತೆ ಪುರಾ ಕರುಜ಼ ಕೈನ ಕವೊಶಿ. 19ಕುಡ್ಡಾವೊ, ಪಿಸಾಳಾವೊ, ಕಯು ಜಾಸ್ತಿ ವ್ಹೈ? ಕಾಣಿಕೆ ವ್ಹೈಸುನೈತೊ ತೆ ಕಾಣಿಕೆನೆ ಪ್ರತ್ಠಾಕರಾನಿ ಬಲಿನೊ ಕಟ್ಟೊಸು? 20ಇಮ ರ‍್ಹಯುಮ ಕಯೊಬಿ ಬಲಿನಾ ಕಟ್ಟಪರ ಕ್ಹಮ್ಮ ಘಾಲ್ಯೊ ತಿಪರ ತಿಮಾ ರ‍್ಹಯಲ ಕ್ಹಾವೊಪರ ಕ್ಹಮ್ಮ ಘಲಲನಿಂಗ ಥಯೊ. 21ವರಿ ಕಯೊಬಿ ದೆವಾಲಯಪರ ಕ್ಹಮ್ಮ ಗಾಲ್ಯೊಮ ತಿನಾ ಉಪ್ಪರ, ತಿಮಾ ರ‍್ಹಯಲವಾಲಾಪರ ಕ್ಹಮ್ಮ ಘಾಲಲನಿಂಗತ ಥಯು. 22ವರಿ ಪರಲೊಕಪರ ಕ್ಹಮ್ಮ ಘಾಲ್ಯಾಮ ಕ್ಹುದಾನಿ ಸಂಹಾಸನಪರ ತಿಪರ ಬೈಟಲವಾಲಾಪರ ಕ್ಹಮ್ಮ ಘಾಲಲನಿಂಗತ ಥಯು. 23ಅಯ್ಯೊ, ಕಪಟಿಯೊ ಥಯಲ ಶಾಸ್ತ್ರಿಯೊ, ಫರಿಸಾಯರೊ ತುಮೆ ಪುದಿನ, ಮರುಗ ಪತ್ರಿ , ಸಬಸಗಿ ಸೊಪ್ಪ, ಜಿರಾಮಾ ದಕ್ಹವಾ ಭಾಗ ದಿವೊಸಿ ಕ್ಹರಿ, ತೆನೈಸೊ ಧರ್ಮನಾ ನಿಯಮ್ಮಾ ಖಾಸ ರ‍್ಹಯಲ ಕದ್ಯಾಮ ನ್ಯಾಯ ಮರಗಾ ಬರೊಕ್ಹೊ ಛೊಡಿಪಾಡ್ಯಾಸ. ಇ ಕ್ಹಾರು ಕರು; ಎ ಕ್ಹಾರು ಛೊಡು ನೈ. 24ವಾಟ ದೆಕಾಡಾಲಾ ಕುಡ್ಡಾವೊ, ತುಮೆ ಭಕ್ತಾರಾ ಸೊಸಾಲಾ ವ್ಹೈ. ತೆನೈಸೊ ಹುಂಟ ಗಳಾಲಾ ವ್ಹೈ. 25ಅಯ್ಯೊ, ಕಪಟಿಯೊ ಥಯಲ ಶಾಸ್ತ್ರಿಯೊ, ಫರಿಸಾಯರೊತುಮೆ ತಾಂಬಿಯಾ ವಾಟಕಾ ತುಮೆ ಭಾರಾ ಎಕ್ಹಾರು ಧವೊಸಿ ತೆನೈಸೊ ತ್ಯುನಾ ಮ್ಹೈ ದರಾಎ ಚೊ಼ರಿ ಕರಾನು ಕ್ಹು ಭರಲ ರ‍್ಹವಸ. 26ಕುಡ್ಡೊ ರ‍್ಹಯಲ ಫರಿಸಾಯರ, ಪೈಲಾ ತೆ ಸಾಮನೊ ಕ್ಹಾರಾ ಮ್ಹೈತಾ ವಾಗಾತಿ ಕರ, ತೆಳಾಮಾ ತೆ ಭಾರಾತಾಬಿ ವಾಗಾತಿ ಥಾವಸ. 27ಅಯ್ಯೊ, ಕಪಟಿಯೊ ಥಯಲ ಶಾಸ್ತ್ರಿಯೊ, ಫರಿಸಾಯರೊ ತುಮೆ ಚು಼ನ್ನೊ ಮಾರಲ ಮಜಾ಼ರೊ ನಿಂಗತ ಛೆ. ಎ ಭಾರಾತು ವಾಗಾತಿ ದಿಕ್ಹಸ. ಮ್ಹೈತು ದೆಕ್ಯಾಮ ಮರಲವಾಲಾವೊನಾ ಹಡಕಾ ವರಿ ಗಲಿಜಿ ಭರಲ ರ‍್ಹವಸ. 28ಇನಾನಿಂಗತಜ಼ ತುಮೆಬಿ ಭಾರಾತಾ ಮನಕ್ಹೊನೆ ಕ್ಹರಿನಾ ವ್ಹೈ ಕೈನ ದಿಕ್ಹೊಶಿ. ತೆನೈಸೊ ಮ್ಹೈ ಕಪಟ ವರಿ ಜ಼ಬರದಸ್ತವಾಲಾ ರ‍್ಹವೊಶಿ. 29ಅಯ್ಯೊ, ಕಪಟಿಯೊ ಥಯಲ ಶಾಸ್ತ್ರಿಯೊ, ಫರಿಸಾಯರೊ, ತುಮೆ ಪ್ರವಾದಿಯೊನಿಯೊ ಮಾಜಾ಼ರೊ ಭಾಂದಿನ, ಕ್ಹರಿಕ್ಹು ರ‍್ಹಯಲವಾಲಾವೊನಿಯೊ ಮಾಜಾ಼ರೊ ಶ್ರಿಂಗಾರ ಕರೊಸಿ. 30ಹಮೆ ಹಮಾರಾ ಶಾನಾವೊನಾ ಕಾಲಮಾ ರ‍್ಹವತ್ತೊ ಪ್ರಾವಾದಿಯೊನೆ ಖಲಾಸ ಕರಲ ಪಾಪಮಾ ವಾಟೊಲಿವಾಲಾ ಥಾತಾ ನ್ಹೊತಾ, ಕವೊಶಿ. 31ತಿಮ ರ‍್ಹಯುಮ ಪ್ರಾದಿಯೊನೆ ಖಲಾಸ ಕರಲ ವಾಲಾವೊನಾ ಬಚ್ಚಾ಼ ವ್ಹೈ ಕೈನ ಕವಾನಿಕ್ಹು ಸಾಕ್ಷಿಯೊ ಥಯಾಸ. 32ಚೊ಼ಕು ವ್ಹೈ, ತುಮೆ ತುಮಾರಾ ಶಾನಾವೊನು ಪಾಪನಿ ಅಳತಿ ಪುರಾ ಕರೊಸಿ. 33ಕ್ಹಾಪೊ, ಕ್ಹಾಪನಿ ಜಾ಼ತನಾವೊ, ನರಕನಿ ಶಿಕ್ಷಾಕ್ಹು ನ ತುಮೆ ಕಿಮ್ಮ ವಾಚ್ಚೊಸಿ. 34ತಿನಾಹುತಿ ದೆಕೊ, ಮಿ ತುಮೊಕನ ಪ್ರವಾದಿಯೊನೆ, ಗ್ಯಾನಿಯೊನೆ ಶಾಸ್ತ್ರಿಯೊನೆ ಮೊಕ್ಲುಸ; ತುಮೆ ತಿಮಾನಾ ದಕ್ಹಾಜ಼ನಾವೊನೆ ಖಲಾಸ ಕರೊಸಿ, ಶಿಲುಬಿಪರ ಗಾಲೊಶಿ; ದಕ್ಹಾಜ಼ನಾವೊನೆ ತುಮಾರಿ ಸಭಾಮಂದಿರೊಮಾ ಬಾರಕೊಲೊಕ್ಹು ಮಾರಿನ ಗಮ್ತಾ ಭಾರಾ ಘಾಲೊಸಿ. 35ಇಮ್ಮಜ಼ ನಿತಿವಂತವಾಲೊ ಹೆಬಲನು ರಗತ ಪೈಲಾ ತುಮೆ ದೆವಾಲಯನೆ ಬಲಿನಾ ಕಟ್ಟಲಕ್ಕಾ ವಚ್ಮಾ಼ ಖಲಾಸ ಕರಲ ಬರಕಿನೊ ದಿಕ್ರಾಒ ತಯಲ ಜರಕಿನಾ ರಗತಲಕ್ಕಾ ಜಿಮಿನಪರ ಚು಼ವಾಯಲ ಕ್ಹಾರಾ ನಿತಿವಂತ ವಾಲಾವೊನು ರಗತ ಚು಼ವಾಯಲ ಅಪರಾಧ ತುಮಾರಾ ಮಾತಾವೊಪರ ಆವಸ. 36ಎ ಕ್ಹಾರಾ ಅ ಸಂತತಿವಾವಾಲಾವೊಪರ ಅವಸ ಕೈನ ಮಿ ತುಮೊನೆ ಕ್ಹರಿಮಾಜ಼ ಕೌಸ. 37ಯೆರುಸಲೆಮ, ಯೆರುಸಲೆಮ! ಪ್ರವಾದಿ ಜ಼ಲಮ ಕಾಡಾಲಿ, ಕ್ಹುದಾ ತುಕನ ಮೊಕ್ಳವಾಲಾವೊನೆ ದಗ್ಡಾ ಮಾರಿನ ಖಲಾಸ ಕರಾಲಿ! ಕುಕಡಿಯೊ ತಿನಾ ಬಚ್ಚಾ಼ವೊನೆ ರೆಕ್ಯಾಮಾ ಝಾಕಿಲಿದಲನಿಂಗತ ತಿನಾನಿಂಗತ ತಾರಾ ಬಚ್ಚಾ಼ವೊನೆ ಮಿ ಝಾಕಿಲಿವಾನೆ ಮನೆ ಘನ್ನು ಮನಸ ವ್ಹತು. 38ದೆಕೊ, ತುಮಾರು ಘರ ಖಾಲಿ ಖಾಲಿ ಲಾಗಸ. 39ಹಮ್ನಾತಾಜ಼, ಕರ್ತಾನಾ ನಾಮಪರ ಆವಾಲಾ ಧನ್ಯ ವ್ಹೈ ತುಮಾರಾಕ್ಹು ತುಮೆಜ಼ ಕಯೆಲಕ್ಕಾ ತುಮೆ ಮನೆ ದೆಕ್ತಾಜ಼ ನೈ ಕೈನ ಮಿ ತುಮೊನೆ ಕೌಸ.