ಮತ್ತಾಯ 22

ಹಿವಾನು ಔತಣನು ಸಾಮ್ಯ

(ಲುಕ 14:15-24)

1ಯೆಸು ವರಿ ತ್ಯುನಾ ಕ್ಹಾತೆ ಬೊಲ್ತೊ ಸಾಮ್ಯ ಲಿನ ತ್ಯುನೊನೆ ಸು ಕದ್ಯೊ ಕದ್ಯಾಮ, 2ಸ್ವರ್ಗನೊ ರಾಜ್ಯ ತಿನಾ ದಿಕ್ರಾನಾ ಹಿವಾನು ಖಾವಾನು ಅನ್ನ ತಯ್ಯಾರ ಕರಲ ಯಕ್ಕ ರಾಜಾ಼ನೆ ಹೊಲಿಕೆ ಥೈಸ. 3ತೆ ಹಿವಾಮಾ ಆಯಲವಾಲಾವೊನೆ ಬಲಾವಾನಾಹುತಿ ತಿನಾ ಆಳೊನೆ ಮೊಕಲ್ಯೊ, ತೆಕ್ಲು ರ‍್ಹೈತಬಿ ತ್ಯುನೊನೆ ಆವಾನೆ ಮನಸ ನ್ಹೊತು. 4ತೆ ರಾಜೊ಼ ಬಿಜಾ಼ ಆಳೊನೆ ಬಲೈನ, ತುಮೆ ಹಿವಾನು ಅನ್ನ ಖಾವಾನೆ ಆಯಲ ಮನಕ್ಹೊಕನ ಗೈನ ದೆಕೊ, ಖಾವಾನು ಅನ್ನ ತಯ್ಯಾರ ಥಯುಸ; ಮಾರಿಯೊ ಬೈಲೊ, ಚ಼ರಬಿಯೊ ರ‍್ಹಯಲ ಹೊರಿಯೊನೆ ಕತರ‍್ಯೊಸ; ಕ್ಹಾರುಜ಼ ತಯ್ಯಾರ ಛೆ; ಹಿವಾನು ಅನ್ನ ಖಾವಾನೆ ಆವೊ ಕೈನ ತ್ಯುನೊನೆ ಕವೊ ಕೈನ ಮೊಕಲ್ಯೊ. 5ವರಿಬಿ ತ್ಯುನೆ ಮಿ ಬಲಾಯಲನೆ ಠುಕರೈನ ಯಕ್ಲೊ ತಿನಾ ಖೆತ್ರೆ ಯಕ್ಲೊ ವ್ಯಾಪಾರ ಕರಾನಾ ಹುತಿ ಗೈ ಪಡ್ಯೊ. 6ಉಗ್ರಲವಾಲಾ ತಿನಾ ಆಳೊನೆ ಧರಿನ ಮರಿಯಾದಿ ಕಾಡಿನ ಖಲಾಸ ಕರಿಪಾಡ್ಯಾ. 7ರಾಜೊ಼ ಎ ಕ್ಹಾರು ಐಕಿನ, ತಿನಾ ಸೈನಿಕೊನೆ ಮೊಕ್ಲಿನ ಖಲಾಸ ಕರಲವಾಲಾವೊನೆ ತ್ಯುನೆ ಖಲಾಸ ಕರಿನ ತ್ಯುನು ಗಾಮ ಬಾಳಿಪಾಡ್ಯಾ. 8ತೆಳಾಮಾ ತಿನಾ ಆಳೊನೆ, ಹಿವಾನು ಅನ್ನ ತಯ್ಯಾರ ಛೆ ತೆನೈಸೊ ತೆ ಅನ್ನ ಖಾವಾನೆ ತೆ ಮನಕ್ಹೊ ಯಗ್ಯ ನತ್ತಿ. 9ತಿನಾಹುತಿ ತುಮೆ ಹಮ್ನಾ ಖಾಸ ರ‍್ಹಯಲ ರಸ್ತೆ ಗೈನ ದಿಕ್ಹಲ ದಿಕ್ಹಲ ಕ್ಹಾರಾ ಮನಕ್ಹೊನೆ ಹಿವಾನು ರ‍್ಹಯಲ ಅನ್ನ ಖಾವಾನೆ ಬಲಾವೊ. 10ತಿನಾನಿಂಗತಜ಼ ಆಳೊ ಗೈನ ಕೆಟ್ಟ ರ‍್ಹೈನೆಕಾ ಚೊ಼ಕಾ ರ‍್ಹೈನೆಕಾ ಕಿನೆಜ಼ ದೆಕ್ಯಾವಾಚಿ. ಕ್ಹಾರಾವೊನೆ ಮಳೈನ ಕ್ಹಾರಾವೊನೆ ಬಲೈಲಾಯಾ. ಇನಾನಿಂಗ ಹಿವಾನು ಘರ ಮನಕ್ಹೊಕ್ಹು ಭರಿಗಯು. 11ತೆಳಾಮಾ ರಾಜೊ಼ ಹಿವಾಮಾ ಆಯಲ ಮನಕ್ಹೊನೆ ದೆಕಾನಾಹುತಿ ಮ್ಹೈ ಆಯೊ, ಹಿವಾಮಾ ತಿನಾ ತಕ್ಕ ವಣ್ಣಾ ನೈ ಘಲ್ಲಿದಲ ಯಕ್ಕ ಮನಕ್ಹನೆ ರಾಜೊ಼ ದೆಕ್ಯೊ. 12ತಿನೆ ದೊಸ್ತ’ ಹಿವಾನಾ ಚೊ಼ಕಾ ವಣ್ಣಾ ನೈಸೊ ತು ಕಿಮ್ಮ ಮ್ಹೈ ಆಯೊ?, ಕೈ ಪುಚ್ತಾ಼ಮಾ ತೆ ಗಪ್ಪಜ಼ ವ್ಹತೊ. 13ತೆಳಾಮಾ ರಾಜೊ಼ ಆಳೊನೆ ಬಲೈನ, ತಿನಾ ಹತೊ ಪಗೊ ಭಾಂದಿನ ಭಾರಾ ಅಂದಾರಮಾ ನಾಕೊ ಕೈನ ಕದ್ಯೊ. ತ್ಯಾ ರವಾನು ಕಟ್ಟ ಕಟ್ಟ ದಾತೊ ಖಾವಾನು ರ‍್ಹವಸ. 14ಇಮ್ಮ ಬಲಾಯವಾಲಾವೊಮಾ ಘನ್ನ ಜ಼ನಾ, ಇನಿಲಿದಲವಾಲಾ ದಕ್ಹಾಜ಼ ಜ಼ನಾ ವ್ಹೈ.

ಭು ಭಾಡಾನಾಹುತಿ ಸವಾಲ ಕರ‍ಲ

(ಮಾರ್ಕ 12:13-37; ಲುಕ 20:20-44)

15ತೆ ಥಯಲ್ಪರ ಫರಿಸಾಯರೊ ಗೈನ ಯೆಸುನೆ ವಾತೊಮಾ ಕಿಮ್ಮ ಧರಿಯೆ ಕೈನ ವಿಚಾರ ಕರ್ತಾ 16ತಿಕನ ತ್ಯುನಾ ಶಿಷ್ಯಾವೊಎ ಯಹುದ್ದಿಯೊನಾ ಕ್ಹಾತೆ ಮಳೈನ ಮೊಕಲ್ಯಾ. ತ್ಯುನೆ ಯೆಸುನೆ, ಗುರು, ತು ಕ್ಹರಿನೊ ವ್ಹೈ ಕ್ಹುದಾನಿ ವಾಟ ದೆಕಾಡಾಲೊ ವ್ಹೈ, ಕಿನೆಜ಼ ಭುಚಕ್ತೊ ನೈ; ತು ಮನಕ್ಹೊನಾ ಮ್ಹೊಡಾ ದೆಕಿನ ಬೊಲಾಲೊ ನ್ಹವೈ ಕೈ ಹಮೊನೆ ಗ್ವತ್ತ ಛೆ. 17ಇಮ್ಮ ರ‍್ಹಯುಮ ಕೈಸರನೆ ಭು ಭಾಡೊ ದಿವಾನು ಪದ್ದತ ವ್ಹೈ ಸು?ತುನೆ ಕಿಮ್ಮ ದಿಕ್ಹಸ? ಹಮೊನೆ ಕೆ ಕೈನ ಕದ್ಯೊ. 18ಯೆಸು ತ್ಯುನೆ ಕವಾನು ಕ್ಹಾರು ಕೆಟ್ಟ ತಿಳದಿಲಿನ ಕಪಟಿಯೊ, ಮನೆ ಕಾ ಪರಿಕ್ಷ್ಯಾ ಕರಾಡ್ಯಾಸ? 19ಟ್ಯಾಕ್ಸನೆ ದಿವಾನೊ ಬಿಲ್ಲೊ ಮನೆ ದೆಕಾಡೊ ಕತಾಮಾ ತ್ಯುನೆ ತಿನೆ ಯಕ್ಕ ಬಿಲ್ಲೊ ಲೈನ ದಿದ್ಯಾ. 20ತೆಳಾಮಾ ತೆ, ಬಿಲ್ಲಾನೊ ಶಿಕ್ಕೊ ಕಿನೊ ವ್ಹೈ? ಕೈನ ಪುಚ಼ಲ ಹುತಿ 21ತ್ಯುನೆ, ಕೈಸರನೊ ವ್ಹೈ ಖಯನ ಕದ್ಯಾ. ತೆಳಾಮಾ ತೆ ತ್ಯುನೊನೆ, ಕೈಸರನೆ ರ‍್ಹಯಲ ಕೈಸರನೆ ದಿವೊ; ಕ್ಹುದಾನು ರ‍್ಹಯಲ ಕ್ಹುದಾನೆ ದಿವೊ.ಕೈನ ಕದ್ಯೊ. 22ತ್ಯುನೆ ಎ ವಾತೊ ಐಕಿನ ಘಾಬ್ರಾ ಥೈನ ತಿಕಂತಾ ಗೈಪಡ್ಯಾ.

ಪುನರುತ್ಥಾನನಾಹುತಿ ಸವಾಲ ಕರ‍ಲ

23ತೆಜ಼ ದಿನ್ಮಾ ಪುನರುತ್ಥಾನ ನತ್ತಿ ಕೈ ಕವಾಲಾ ದಕ್ಹಾ ಸದ್ದು ಕಾಯರೊ ತಿಕನ ಐಯಾ. 24ಇವ್ನೆ ತಿನೆ, ಗುರು, ಯಕ್ಲೊ ಬಚ್ಚಾ಼ ನೈಸೊ ಮರ‍್ಯೊಮ ತಿನಿ ಬೈಕೊನೆ ತಿನೊ ನ್ಹಾನೊ ಭೈ ಹಿನಾ ಕರಿಲಿದ್ಯೊಮ ತಿನಾ ಮ್ಹೊಟಾ ಬೈನಾ ಬಚ್ಚಾ಼ ಪಡ್ದಿಲ್ಯು ಕೈನ ಮೊಶೆ ಕದ್ಯೊಸ. 25ತೆನೈಸೊ ಹಮೊಮಾ ಕ್ಹಾತ ಭಾಯೊ ವ್ಹತಾ. ಪೈಲಾನೊ ಹಿವಾಕರಿಲಿನ ಮರಿಗಯೊ. ತಿನೆ ಬಚ್ಚಾ಼ ನೈಸೊಕ್ಹು ಬೈಕೊನೆ ತಿನಾ ಭೈನೆ ಛೊಡಿನೆ ದದ್ಯೊ; 26ತಿನಾನಿಂಗತಜ಼ ಬೆವಾವಾಲೊ ತನ್ವಾವಾಲೊ ತಿನಾನಿಂಗತಜ಼ ಕ್ಹಾತ್ವಾಲಕ್ಕಾ ಕರ್ಯಾ. 27ತ್ಯುನೆಕ್ಹಾರಾ ಮರಲ್ಪರ ತೆ ಬಾಕ್ಡಿಬಿ ಮರಿಗೈ. 28ತಿಮ ರ‍್ಹಯುಮ ಪುನರುತ್ಥಾನಮಾ ತೆ ಕ್ಹಾತ ಜ಼ನಾವೊಮಾ ಕಿನಿ ಬೈಕೊ ಥೈನ ರ‍್ಹವಸ? ತೆ ಕ್ಹಾತೆ ಜ಼ನಾವವೊನೆ ಹಿವಾಕರಿಲಿದಿಸ ಕೈನ ಪುಚ್ಯಾ. 29ತೆ ವಾತೆ ಯೆಸು ತ್ಯುನೊನೆ, ತುಮೆ ಕ್ಹುದಾನಿ ವಾಕ್ಯಾ ವರಿ ಕ್ಹುದಾನಿ ತಾಕತನೆ ಕ್ಹರಿಮಾಜ಼ ನೈ ತಿಳದಿಲಿದ್ಯಾವಾಚಿ ತಪ್ಪ ಅಬಿಪ್ರಾಯಮಾ ಛೆ. 30ಪುನರುತ್ಥಾನ ಥಯಲ್ಪರ ಹಿವಾ ಕರಿಲೆತಾ ನೈ, ಹಿವಾ ಕರಿನ ದೆತಾಬಿ ನೈ; ಪರಲೊಕಮಾ ದೆವದುತೊ ನಿಂಗತ ರ‍್ಹವಸ. 31ಮರಲವಾಲಾವೊನಾ ಹುತಿ ಪುನರುತ್ಥಾನಾ ಹುತಿ ಕೌ ಕದ್ಯಾಮ, 32ಮಿ ಅಬ್ರಹಾಮನೊ ಕ್ಹುದಾ, ಇಸಾಕನು ಕ್ಹುದಾ, ಯಾಕೊಬನೊ ಕ್ಹುದಾ, ಕೈನ ಕ್ಹುದಾ ತುಮೊನೆ ಕದ್ಯೊಸ ಕೈನ ತುಮೆ ಒದ್ಯಾ ನತ್ತಿಸು, ತೆ ಮರಲವಾಲಾವೊನೆ ಕ್ಹುದಾ ನ್ಹವೈ. ತೆನೈಸೊ ಜಿವ್ತಾರ‍್ಹಯಲವಾಲಾವೊನೆ ಕ್ಹುದಾ ವ್ಹೈ ಕೈನ ಕದ್ಯೊ. 33ಮನಕ್ಹೊನು ಗುಂಪ ತೆ ಕ್ಹಾರು ಐಕಿನ ಘಾಬ್ರಾಥಯಾ.

ಕ್ಹಾಸ ರ‍್ಹಯಲ ಆಗನ್ಯಾ

34ಯೆಸು ಸದ್ದುಕಾಯರೊನೆ ಮ್ಹೊಡುಜ಼ ಬಂದ ಕರಾಯೊಸ ಕೈನ ಫರಿಸಾಯರೊ ಐಕಿನ ತ್ಯಾ ಮಳಿನ ಆಯಾ. 35ತ್ಯುನೊಮಾನೊ ಯಕ್ಲೊ ಧರ್ಮುಪದೆಶಕ ತಿನೆ ಪರಿಕ್ಷಾ ಲ್ಯು ಕೈನ, 36ಗುರು, ಧರ್ಮನಾ ನಿಯಮ್ಮಾ ಕಯು ಆಗನ್ಯಾ ಖಾಸ ವ್ಹೈ ತಿನೆ ಪುಚ಼ಲಹುತಿ 37ಯೆಸು ತಿನೆ, ತಾರೊ ಕ್ಹುದಾ ಥಯಲ ಕರ್ತಾನೆ ತಾರಾ ಪುರಾ ಮನಸಕ್ಹು ತಾರು ಪುರಾ ಜ಼ಲಮಕ್ಹು ಮಯಾ ಕರು, 38ಕವಾನಿ ಆಗನ್ಯಾ ಖಾಸ ವ್ಹೈ ವರಿ ಪೈಲಾ ವ್ಹೈ. 39ಇನೆ ಸರಿ ಸಮಾನ ಬೆವಾ ಆಗನ್ಯಾ ಕೈ ವ್ಹೈ ಕದ್ಯಾಮ, ತಾರಾ ಆಜು಼ ಬಾಜು಼ವಾಲಾನೆ ಖುದ್ದನಾನಿಂಗತ ಮಯಾಕರು ಕವಾನುಜ಼ ವ್ಹೈ. 40ಎ ಬೆ ಅಗನ್ಯಾ ಕ್ಹಾರಾ ಧರ್ಮ ನಿಯೊಮೊನಾ ಪ್ರವಾದಿಯೊನಾ ಗ್ರಂಥೊನೆ ಆಧಾರ ಥೈನ ಛೆ.

ಮೆಸ್ಸಿಯಾನಾ ಹುತಿ ಸವಾಲ

41ಫರಿಸಾಯರೊ ಮಳಿನ ಆಯಲ ಹುತಿ ಯೆಸು ತ್ಯುನೊನೆ, 42ಆವಾನೊ ರ‍್ಹಯಲ ಕ್ರಿಸ್ತಾನಾ ಹುತಿ ತುಮೊನೆ ಕಿಮ ದಿಕ್ಹಸ? ತೆ ಕಿನೊ ದಿಕ್ರೊ ವ್ಹೈ?ಕೈನ ಪುಚ಼ಲ ಹುತಿ 43ತ್ಯುನೆ ತಿನೆ, ದಾವಿದನೊ ದಿಕ್ರೊ ವ್ಹೈ ಕೈನ ಕದ್ಯಾ. ತೆ ವಾತೆ ತೆ, ತಿಮ್ಮ ರ‍್ಹಯುಮ ದಾವಿದಜ಼, ಪವಿತ್ರ ಆತ್ಮಾನಿ ಪ್ರೆರಣಾಕ್ಹು ತಿನೆ ಕರ್ತಾ ಕೈನ ಕದ್ಯೊಸ್ತೊ ಎ ಕಿಮ ವ್ಹೈ? 44ಮಿ ತಾರಾ ವಿರೊದಿಯೊನೆ ತಾರಾ ಪಗ್ಮಾ ಘಾಲೆಲಕ್ಕಾ ತು ಮಾರಾ ಶಿದಾ ಹತ ಬಗಲ ಬೈಟ, ಕೈನ ಕರ್ತಾನೆ ಮಾರೊ ಮಾಲಕನೆ ಕದ್ಯೊ. 45ಎ ವಾತಮಾ ದಾವಿದಜ಼ ತಿನೆ ಕರ್ತಾ ವ್ಹೈ ಕೈನ, ಕದಲ್ಪರ ತೆ ತಿನೊ ದಿಕ್ರೊ ಕಿಮ್ಮ ವ್ಹೈ? ಕದ್ಯೊ. 46ತೆ ವಾತೆ ಯಕ್ಲೊಬಿ ತಿನೆ ಯಕ್ಕ ವಾತಬಿ ಪುಚ್ಯಾವಾಚಿ ಗಯಾ. ತೆಳಾಮಾತಾ ತಿನೆ ಕುನ್ನಸ ಸುಜ಼ ಪುಚ಼ಾನೆ ಧೈರ್ಯ ಥೈ ನೈ.