ಮತ್ತಾಯ 24

ಯೆರುಸೆಲೆಮ ಹಾಳ ಥಾವಾನು ಯೆಸು ಪೈಲಾಜ಼ ಕದಲ

(ಮಾರ್ಕ 13:1-31; ಲುಕ 21:5-6)

1ತೆ ಥಯಲ್ಪರ ಯೆಸು ದೆವಾಲಯಮಾತೊ ಜಾ಼ತಾಮಾ ತಿನಾ ಶಿಷ್ಯಾ ದೆವಾಲಯನಾ ಕಟ್ಟಡೊ ದೆಕಾಡಾನಾ ಹುತಿ ತಿನಾ ನಜಿಕ ಆಯಾ. 2ತೆಳಾಮ ಯೆಸು ತ್ಯುನೊನೆ ಎ ಮ್ಹೊಟ ಗೊಡಿಯೊ ದೆಕಾಡ್ಯಾಸು? ಮಿ ತುಮೊನೆ ಕ್ಹರಿಮಾಜ಼ ಕೌಸ ನ್ಹ್ಯಾ ದಗ್ಡಾಪರ ದಗ್ಡೊ ಹುಬ್ರೆತು ನೈ, ಕ್ಹಾರುಜ಼ ಪಾಡಾಲಗಾಡಸ. 3ಪಾಚಾ಼ತೊ ತೆ ತೆಲನಾ ಝಾಡೊನಾ ಡೊಂಗರಪರ ಬೈಟಲ ರ‍್ಹತಾಮಾ ತಿನಾ ಶಿಶ್ಯಾ ತಿಕನ ಐನ, ಎ ಕ್ಹಾರು ಕೆಳಾಮಾ ಥಾವಸ? ತು ಪ್ಹರಿನ ಆವಾನು ದುನಿಯಾ ಖಲಾಸ ಥಾವಾನು ವಳಕ ಸು ವ್ಹೈ? 4ಯೆಸು ತ್ಯುನೊನೆ ಸು ಕದ್ಯೊ ಕದ್ಯಾಮ, ಕುನಬಿ ತುಮೊನೆ ಮೊಸ ಕರ‍್ಯಾವಾಚಿ ದೆಕಿಲಿವೊ. ಹುಶಾರ ರ‍್ಹವೊ. 5ಕಾ ಕದ್ಯಾಮ ಮಾರಾ ನಾಮಪರ ಘನ್ನಾ ಜ಼ನಾ ಐನ ಮಿಜ಼ ಕ್ರಿಸ್ತ ವ್ಹೈ ಮಿಜ಼ ಕ್ರಿಸ್ತ ವ್ಹೈ ಕೈನ ಘನ್ನಾ ಜ಼ನಾವೊನೆ ಮೊಸ ಕರಸ. 6ಯಕ್ಲೊಜ಼ ನೈಸೊ ಯುದ್ದೊ ಥಾವಾನಿಯೊ ವಳಕ ಸುದ್ದಿಯೊ ತುಮೆ ಐಕೊಶಿ. ಕಳವಳಥಯಾವಾಚಿ ದೆಕಿಲಿವೊ, ಇಮ್ಮ ಥಾವಾನು ಜ಼ರುರತ್ತ ಛೆ. ವರಿಬಿ ತೆ ಅಂತ್ಯಕಾಲ ನ್ಹವೈ. 7ಇಮ್ಮ ಥಾತಾಮಾ ಮನಕ್ಹೊನಾ ವಿರುದ್ದ ಮನಕ್ಹೊ, ರಾಜ್ಯನಾ ವಿರುದ್ದ ರಾಜ್ಯ ಉಟಸ; ವರಿ ತ್ಯಾ ತ್ಯಾ ಬರಗಾಲ, ತ್ಯಾ ತ್ಯಾ ಭುಕಂಪೊ ಥಾವಸ. 8ಎ ಕ್ಹಾರು ತ್ರಾಸ ಥಾವಾನು ಚಾಲು ವ್ಹೈ. 9ತೆಳಾಮಾ ತುಮೊನೆ ತ್ರಾಸ ಕರಿನ ಖಲಾಸ ಕರಸ; ಮಾರಾ ಹುತಿ ತುಮೊನೆ ಕ್ಹಾರಾ ಮನಕ್ಹೊ ದ್ವೆಶಕರಸ. 10ತೆಳಾಮಾ ಘನ್ನಾ ಜ಼ನಾ ಭುಚ಼್ಕಿನ ಪಾಚಾಸರ್ಕಿನ ಯಕ್ಲಾನೆ ಯಕ್ಲೊ ಧರಿನ ದಿವಸ; ಯಕ್ಲಾಪರ ಯಕ್ಲೊ ದ್ವೆಶ ಕರಸ. 11ಘನ್ನಾ ಸುಳ್ಳ ಪ್ರವಾದಿಯೊ ಉಟಿನ ಘನ್ನಾ ಮನಕ್ಹೊನೆ ಮೊಸ ಕರಸ. 12ಯಕ್ಲುಜ಼ ನೈಸೊ ಅಧರ್ಮ ಜಾಸ್ತಿ ಥಯಲಹುತಿ ಘನ್ನಾ ಮನಕ್ಹೊನಿ ಮಯಾಜ಼ ಥಂಡಿ ಥೈ ಜಾ಼ವಸ. 13ವರಿಬಿ ಲಾಸ್ಟಲಕ್ಕಾ ತಡ್ದಿಲಿವಾಲೊ ರಕ್ಷಣೆ ಹೊಂದಿಲಿವಸ. 14ಯಕ್ಲುಜ಼ ನೈಸೊ ರಾಜ್ಯನಿ ಎ ಸುವಾರ್ತೆ ಕ್ಹಾರಿಜ಼ ದುನಿಯಾಮಾ ಕ್ಹಾರಾ ಮನ್ಕಹೊನೆ ಸಾಕ್ಷಿನಾಹುತಿ ಪೈಲಾವಸ; ತೆಳಾಮಾ ಅಂತ್ಯಕಾಲ ಅವಸ. 15ಪ್ರಾವಾದಿ ದಾನಿಯಲ ಕದಲ ತಿಮ್ಮಜ಼ ಹಾಳ ಕರಾನು ಕೆಟ್ಟ ವಸ್ತು ಪವಿತ್ರ ಜ಼ಗಾಪರ ಹುಬ್ರಯಲ ತುಮೆ ದೆಕ್ತಾಮಾ 16ಯುದಾಯಮಾ ರ‍್ಹಯಲವಾಲಾ ಕ್ಹಾರಾಜ಼ ದೊಂಗರ್ಪರ ನ್ಹಾಟಿ ಜಾ಼ವಾದೆ; 17ಮ್ಹಾಡಿಪರ ರ‍್ಹಯಲವಾಲೊ ತಿನಾ ಘರ್ಮಾ ರ‍್ಹಯಲ ಸುಜ಼ ಸಾಮನ ಲಿವಾನೆ ಜ಼ೌ ನೈ. 18ಖೆತರ್ಮಾ ರ‍್ಹಯಲವಾಲೊ ತಿನಾ ವಚ್ಚಾ಼ನಾ ಲಿವಾನಾ ಹುತಿ ಜೌ಼ನೈ. 19ತೆ ದಿನೊಮಾ ಪೆಟೆ ರ‍್ಹಯಲವಾಲಿಯೊನೆ, ಬಾಣತಿಯೊ ರ‍್ಹಯಲ ಹೆಣ್ಣ ಮನಕ್ಹೊ ಅಯ್ಯೊ. 20ತುಮೊನೆ ಎಕ್ಹಾರು ಥಂಡನಾ ದಿನೊಮಾ ಸಬ್ಬತದಿನೊಮಾ ರ‍್ಹವಾ]ಎ ಥೌ ನೈ ಕೈನ ಪ್ರಾಥನಾ ಕರೊ. 21ಕಾ ಕದ್ಯಾಮ ದುನಿಯಾ ಶುರುತಿಬಿ ಆಜ಼ಲಕ್ಕಾ ನೈ ಥಯಲ, ಇತ್ತಿ ಉಪ್ಪರ ನೈಸೊ ಥಾವಾನು ಮ್ಹೊಟೊ ತರಾಸ ತೆಳಾಮಾ ಥಾವಸ. 22ಕರ್ತಾ ದಿನೊ ಕಮ್ಮ ನೈ ಕರ‍್ಯೊಮ ಯಕ್ಲೊಬಿ ಉಗರ್ತೊ ನೈ; ವರಿಬಿ ತೆ ಇನಿಲಿದಲವಾಲಾವೊನಾ ಹುತಿ ತೆ ದಿನೊ ಕಮ್ಮ ಕರಸ. 23ತೆಳಾಮಾ ತೊಮೊನೆ ಕುನಬಿ ಕ್ರಿಸ್ತ ನ್ಹ್ಯಾ ಛೆ ಕ್ರಿಸ್ತ ನ್ಹ್ಯಾ ಛೆ ಕೈನ ಕದ್ಯಾಮ ತುಮೆ ನಂಬೊ ನಕೊ. 24ಸುಳ್ಳ ಕ್ರಿಸ್ತೊ, ಸುಳ್ಳ ಪ್ರವಾದಿಯೊ ಉಟಿನ ಸಾಧ್ಯ ಥಯುಮ ಕ್ಹುದಾ ಇನಿಲಿದಲ ಮನಕ್ಹೊನೆ ಬಿ ಮೊಸ ಕರಾನಾ ಹುತಿ ಮ್ಹೊಟಾ ಸುಚಕ ಕಾಮೊ ಘಾಬ್ರಾ ಥಾವಾನಾ ಕಾಮೊ ಕರಿನೆ ದೆಕಾಡಸ. 25ದೆಕೊ, ಮಿ ಪೈಲಾಜ಼ ಮಿ ಕವಾಡ್ಯೊಸ. 26ತಿನಾಹುತಿ ಕುನಬಿ ತುಮೊನೆ ಕುನಬಿ, ದೆಕೊ, ಕ್ರಿಸ್ತ ರಾನಮಾ ಛೆ. ಕೈನ ಕದ್ಯಾಮ ತುಮೆ ರಾನ್ಮಾ ಗೈ ಪಡೊನಕೊ; ದೆಕೊ ಮ್ಹೈನಾ ಘರ್ಮಾ ಛೆ ಕೈನ ಕದ್ಯಾಮ ಬರೊಕ್ಹೊ ಕರೊ ನಕೊ. 27ಕಿಮ್ಮ ಬಿಜಲಿ ಪುರ್ವಮಾ ಹುಟ್ಟಿನ ಪಶ್ಚಿಮ ಲಕ್ಕಾ ಉಜಾಲು ದಿಕ್ಹಸ ತಿನಾ ನಿಂಗತಜ಼ ಮನಕ್ಹೊನೊ ದಿಕ್ರೊ ಆವಾನು ಥಾವಸ. 28ಮುರ್ದೊ ಪಡಲ ಜ಼ಗಾ ಹದ್ದೊ ಮಳಸ. 29ತೆ ತ್ರಾಸನಾ ದಿನೊ ಮುಗ್ದಲ್ಪರ ಸುರ್ಯೊ ಅಂದಾರು ಥಾವಸ, ಚ಼ಂದಪ್ಪಾ ಉಜಾಲು ದಿದ್ಯಾವಾಚಿ ರ‍್ಹವಸ, ಚಿಕ್ಕಯೊ ಹಬಾಳಮಾತಿಯೊ ಪಡಸ, ಹಬಾಳಮಾ ರ‍್ಹಯಲ ತಾಕತೊ ಹಲ್ಲಸ. 30ತೆಳಾಮಾ ಮನಕ್ಹೊನೊ ದಿಕ್ರೊ ಕದಲ ವಳಕ ಹಬಾಳಮಾ ದಿಕ್ಹಿನ ಆವಸ. ತೆಳಾಮಾ ಭುಲೊಕ್ಪರ ರ‍್ಹಯಲ ಕ್ಹಾರಾ ಮನಕ್ಹೊ ಛಾತಿ ಬಡೈಲಿವಸ, ವರಿ ಮನಕ್ಹನೊ ದಿಕ್ರಾನಿ ತಾಕತಕ್ಹು, ಘನ್ನಿ ಮಹಿಮಾಕ್ಹು ಹಬಾಳನಾ ಮ್ಹಾಡಪರ ಆವಾನು ದಿಕ್ಹಸ. 31ತೆ ತಿನಾ ದುತೊನೆ ಪೊಂಗಾವೊನಿ ಮ್ಹೊಟಿ ಅವಾಜ಼ನಾ ಕ್ಹಾತೆ ಮೊಕ್ಲಸ. ತ್ಯುನೆ ತೆ ಇನಿಲಿದಲವಾಲಾವೊನೆ ಹಬಾಳನಾ ಯಕ್ಕ ಬಗಲ್ತೊ ಚಾ಼ರೆ ದಿಕ್ಕ ಬಗಲ್ತೊ ಮಳಾವಸ. 32ಅಂಜುರ್ನಾ ಝಾಡನಿ ದೃಷ್ಟಾಕ್ಹು ಗ್ಯಾನ ಶಿಕ್ಕೊ. ತಿನಿಯೊ ಠೊಂಗಿಯೊ ಹಜು಼ನ ಕುಳಿಯೊ ರ‍್ಹತಾಮಾಜ಼ ಪಾಲೊ ಛೊಡ್ತಾಮ ತಡಕಾನೊ ದಿನ್ನ ನಜಿಕ ಐಯೊಸ ಕೈನ ತಿಳದಿಲಿವೊಸಿತೊ. 33ತಿಮ್ಮಜ಼ ತುಮೆ ಎ ಕ್ಹಾರು ದೆಕ್ತಾಮಾ ತೆ ದಿನ್ನ ನಿಜಕ ಆಯೊಸ ಕೈನ ತಿಲದಿಲಿವೊ. 34ಎ ಕ್ಹಾರು ಥಾಯೆಲಕ್ಕಾ ಎ ಸಂತತಿ ಮಿಟೈಜಾ಼ತಿ ನೈ ಕೈನ ತುಮೊನೆ ಕ್ಹರಿಮಾಜ಼ ಕೌಸ. 35ಜಿಮಿನ ಹಬಾಲ ಮಿಟೈಜಾ಼ತು ನೈ, ತೆನೈಸೊ ಮಾರಿ ವಾಕ್ಯ ಹಮೆಶಾಬಿ ರ‍್ಹವಸ. 36ತೆನೈಸೊ ತೆ ದಿನೊ ವರಿ ತೆ ಟೈಮನಾ ಹಹುತಿ, ಮಾರಾ ಬಾನೆ ಯಕ್ಕಜ಼ ಗ್ವತ್ತ ಛೆ ಬಿಜಾ಼ ಕಿನೆಜ಼ ಗ್ವತ್ತ ನತ್ತಿ. ಪರಲೊಕಮಾ ರ‍್ಹಯಲ ದುತೊನೆಬಿ ಗ್ವತ್ತ ನತ್ತಿ, ದಿಕ್ರಾನೆಬಿ ಗ್ವತ್ತ ನತ್ತಿ.. 37ನೊಹಾನಾ ದಿನೊ ಕಿಮ್ಮ ವ್ಹತಾ ತಿನಾನಿಂಗತಜ಼ ಮನಕ್ಹನೊ ದಿಕ್ರೊ ಆವಾನಾ ಟೈಮ್ಮಾ ರ‍್ಹವಸ. 38ಕಿಮ್ಮ ಕದ್ಯಾಮ ಜಲಪ್ರಳಯ ತಿ ಪೈಲಾನಾ ದಿನೊಮಾ ನೊಹಾ ಹಡಗಾಮ ಗಯಲ ದಿನ್ನ ಲಕ್ಕಾ ಮನಕ್ಹೊ ಪಿತಾ ಖಾತಾ, ಹಿವಾ ಕರಿಲೆತಾ, ಹಿವಾ ಕರ್ತಾ ವ್ಹತಾ. 39ಪ್ರಳಯನು ಪಾನಿ ಐನ ಕ್ಹಾರಾವೊನೆ ಕಿತ್ತೈ ಲಿನ ಜಾ಼ಯೆ ಲಕ್ಕಾ ತ್ಯುನೊನೆ ಸುಜ಼ ಗ್ವತ್ತ ನೈಸೊ ವ್ಹತಾತೊ. ತಿನಾನಿಂಗತಜ಼ ಮನಕ್ಹನೊ ದಿಕ್ರೊ ಆವಾನ ದಿನೊಮಾ ರ‍್ಹವಸ. 40ತೆಳಾಮಾ ಬೆ ಜ಼ನಾ ಖೆತರ್ಮಾ ರ‍್ಹವಸ; ತ್ಯುನೊಮಾಮಾನಾ ಯಕ್ಲಾನೆ ಲಿವಸ, ಯಕ್ಲಾನೆ ಛೊಡಸ. 41ಬೆ ಬಾಕ್ಡಿಯೊ ದಳಾನಾ ಡಗ್ಡಾಕನ ಬೈಟಿನ ದಳತಿಯೊ ರ‍್ಹವಸ; ಯಕ್ಲಿನೆ ಲಿವಸ, ಯಕ್ಲಿನೆ ಛೊಡಿಪಾಡಸ. 42ಇಮ್ಮ ರ‍್ಹತಾಮಾ ಕರ್ತಾ ಆವಾನೊ ದಿನ್ನ ನೈ ಗ್ವತ್ತ ರ‍್ಹಯಲ ಹುತಿ ಹುಶಾರಮಾ ರ‍್ಹವೊ. 43ಚ಼್ವಟ್ಟೊ ಕೆಳಾಮಾ ಆವಸ ಕವಾನು ಗ್ವತ್ತ ರ‍್ಹವತ್ತೊ ತೆ ತಿನಾ ಗರ್ಮಾ ಚೊ಼ರಿ ಕರಾನೆ ಆವಾಲಾನೆ ಕೈತ್ತೊ ರ‍್ಹತೊತೊ ಕೈ ತಿಳ್ದಿಲಿವೊ. 44ತಿನಾ ಹುತಿ ತುಮೆಬಿ ತಯ್ಯಾರ ರ‍್ಹವೊ; ತುಮೆ ವಿಚಾರಬಿ ಕರಲ ರ‍್ಹತಾ ನೈ ತೆವಾ ಟೈಮ್ಮಾ ಮನಕ್ಹೊನೊ ದಿಕ್ರೊ ಆವಸ. 45ಕದ್ಯಾಮ ಮಾಲಕ ತಿನಾ ಘರವಾಲಾವೊನೆ ಟೈಮೆ ಟೈಮೆ ಅನ್ನ ದಿವಾನಾ ಹುತಿ ತೆ ಬರೊಕ್ಹಾವಾಲಾ ನಿಂಗತ, ಗ್ಯಾನಿ ಥಯಲ ಆಳ ಕುನ್ನ ವ್ಹೈ? 46ಮಾಲಕ ಆವಾನಾ ವಕ್ಹತಮಾ ಕಯೊ ಆಳ ಇಮ್ಮ ಕರಾನು ದೆಕ್ಯೊಮ ತೆ ಆಳ ಧನ್ಯ ವ್ಹೈ. 47ತೆವಾನೆ ತೆ ತಿನಿ ಕ್ಹಾರಿ ಆಸ್ತಿನೆ ಮ್ಯಾನೆಜರ ಕರಿನ ಮ್ಹೆಲಸ ಕೈನ ತುಮೊನೆ ಕ್ಹರಿಮಾಜ಼ ಕೌಸ. 48ತೆನೈಸೊ ತೆ ಕೆಟ್ಟ ಆಳ, ಮಾರೊ ಮಾಲಕ ಆವಾನೆ ತಡಾ ಕರಸ, ಕೈನ ತಿನಾ ಮನಸ್ಮಾ ಕೈಲಿನ 49ತಿನಾ ಆಳೊನೆ ಮಾರ್ತೊ, ವರಿ ಪಿದೊಡಾವೊನಾ ಕ್ಹಾತೆ ಮಳಿನ ಪಿವಾನು ಸುರು ಕರ‍್ಯೊಮ, 50ತೆ ವಿಚಾರ ನೈ ಕರಲ ದಿನೊಮಾ, ವಕ್ಹತ ನೈ ರ‍್ಹಯಲ ಗ್ವತ್ತ ಟೈಮ್ಮಾ ತೆ ಅಳನೊ ಮಾಲಕ ಐನ ತಿನೆ ಘನ್ನಿ ಮ್ಹೊಟಿ ಶಿಷಾ ದಿನ 51ಕಪಟ್ಯಾವೊ ನೈಸೊ ಥಾವಾನಿ ಗತಿ ತಿನೆ ತೆ ಕರಸ.ತ್ಯಾ ರವಾನು ಕಟ್ಟ ಕಟ್ಟ ದಾತೊ ಖಾವಾನು ರ‍್ಹವಸ.