ಲುಕ 12

ಫರಿಸಾಯರೊ ಲಿಂಗತ ಥಾವೊ ನಕೊ

1ತೆಕ್ಲಾಮಾಜ಼಼ ಹಜಾ಼ರೊಸಿ ಮನಕ್ಹೊ ಯಕ್ಲಾನಾ ಯಕ್ಲೊ ಖುಂದಾ ಯಕ್ಲಾ ಕುಡಿನ ಆಯಲ ಹುತಿ ತೆ ಪೈಲಾ ತಿನಾ ಶಿಷ್ಯಾವೊನೆ ಸು ಕದ್ಯೊ ಕದ್ಯಾಮ, ಫರಿಸಾಯರೊನಾ ಖಾಟಾ ಲೊಟ್ನಿ ವಿಷಯಮಾ ಕದ್ಯಾಮ ತಿವ್ನಿ ಕಪಟತನಾ ಹುತಿ ಹುಶಾರಕ್ಹು ರ‍್ಹವೊ. 2ಝಕಾಯಲ ಕಯುಜ಼ ಗ್ವತ್ತ ಥಾವಸ, ದಡೈನ ಮ್ಹೆಲಲ ಕ್ಹಾರಾವೊನಾ ಕ್ಹಾಮು ಆವಸ. 3ಇಮ್ಮ ರ‍್ಹಯಲ ಹುತಿ ತುಮೆ ಅಂದಾರಾಮಾ ಕದಲ ಉಜಾಲಾಮಾ ಐಕು ಆವಸ. ವರಿ ತುಮೆ ಖೊಲಿಮಾ ರ‍್ಹೈನ ಕಾನ್ಮಾ ಕದಲ ವಾತೊ ಮ್ಹಾಡಿನಾ ಘರಮಾ ಕವಸ.

ಕ್ಹುದಾಕ್ಹು ಯಕ್ಕಜ಼ ಭುಚ಼ಕೊ

(ಮತ್ತಾಯ 10:28-31)

4"ಮಾರಾ ದೊಸ್ತೊ ಮಿ ತುಮೊನೆ ಸು ಕೌಸ ಕದ್ಯಾಮ, ತುಮಾರಾ ಅಂಗನೆ ಖಲಾಸ ಕರಾಲಾನೆ ಭುಚ಼ಕೊ ನಕೊ ತ್ಯುನೆ ವರಿ ಬಿಜು಼ ಸುಜ಼ ಕರತಾ ನೈ. 5ತುಮೆ ಕಿನೆ ಭುಜ್ಕು಼ ಕದ್ಯಾಮ, ತುಮೊನೆ ಖಲಾಸ ಕರಿನ ನರಕಮಾ ಘಾಲಾನೆ ಅದಿಕಾರ ರ‍್ಹಯಲ ವಾಲೊ ಕ್ಹುದಾನೆ ಯಕ್ಕಜ಼ ಭುಚ಼ಕು.

6"ಪಾಂಚ಼ ಚಿಮ್ಣಿಯೊನಿ ಕಿಮ್ಮತ ಬೆ ಬಿಲ್ಲಾ? ರ‍್ಹಯುತಬಿ ಕ್ಹುದಾ ತ್ಯುನೊಮಾ ಯಕ್ಕನೆಬಿ ಇಕ್ಹರತೊ ನೈ. 7ತಿನಾಲಿಂಗತಜ಼ ತಮಾರಾ ಮಾತಾಮಾ ಕೆಕ್ಕಲಾ ಬಾಲೊ ಛೆ ಕ್ಹುದಾನೆ ಗ್ವತ್ತ ಛೆ. ತಿನಾಹುತಿ ತುಮೆ ಭುಚಕೊ಼ ನಕೊ. ತುಮೆ ಘನಿಯೊ ಚಿಮ್ಣಿಯೊತಿಬಿ ಘನ್ನಾ ಕಿಮ್ಮತ್ನಾ ವ್ಹೈ.

ಯೆಸುನಾ ಹುತಿ ಸರ್ಮವೊ ನಕೊ

(ಮತ್ತಾಯ 10:32-33; 12:32; 10:19-20)

8"ಮಿ ತುಮೊನೆ ಸು ಕೌಸ ಕದ್ಯಾಮ, ಕಯೊಬಿ ಬಿಜಾ಼ ಮನಕ್ಹೊನಾ ಕ್ಹಾಮೊ ತೆ ಮನಕ್ಹ ಮಾರೊ ವ್ಹೈ ಕದ್ಯಾಮ ಮನಕ್ಹನೊ ದಿಕ್ರೊ ಬಿ ತೆ ಮನಕ್ಹನೆ ದೆವದುತೊನಾ ಕ್ಹಾಮೊ ತಿನೆ ಮಾರೊ ವ್ಹೈ ಕೌಸ. 9ವರಿ ಕಯೊಬಿ ಬಿಜಾ಼ ಮನಕ್ಹೊನಾ ಕ್ಹಾಮೊ ತೆ ಮನಕ್ಹ ಮಾರೊ ನ್ಹವೈ ಕದ್ಯಾಮ, ಮನಕ್ಹನೊ ದಿಕ್ರೊ ತಿನೆ ದೆವದುತೊನಾ ಕ್ಹಾಮೊ, ತೆ ಮನಕ್ಹನೆ ಮಾರೊ ನ್ಹವೈ ಕೌಸ. 10"ಕುನ್ನಬಿ ಮನಕ್ಹನಾ ದಿಕ್ರಾನಾ ವಿರುದ್ದ ಬೊಲಲ ರ‍್ಹಯೊಮ ತಿನೆ ಮಾಫ ಮಳ್ಸ. ವರಿ ಪವಿತ್ರ ಆತ್ಮಾನೆ ದೊಶ ದಿವಾಲಾನೆ ಮಾಫ ಮಳ್ತಿಜ಼ ನೈ. 11ಮನಕ್ಹೊ ತುಮೊನೆ ಸಬಾಮಂದಿರಮಾ ಅದಿಕಾರಿಯೊನಾ ಕ್ಹಾಮಾ ನ್ಯಾಯಾದಿಪತಿಯೊನಾ ಕ್ಹಾಮಾ ಮಂತ್ರಿಯೊನಾ ಕ್ಹಾಮಾ ತುಮೊನೆ ಯಳ್ದಿನ ನಿಂಜಾ಼ತಾಮಾ ತ್ಯುನಾ ಕ್ಹಾಮೊ ಸು ಬೊಲುಕೈನ ತುಮೆ ಚಿಂತಾನಕೊ ಕರೊ. 12ತೆ ಟೈಮಾ ತುಮೆ ಬೊಲಾನು ಪವಿತ್ರ ಆತ್ಮಾ ತುಮೆ ಸು ಕೌ ಕೈನ ತಿಳ್ಸಾವಸ"

ಸ್ವಾರತನಾ ಹುತಿ ಯೆಸು ಕದಲ

13ನಜಿಕ್ಮಾ ರ‍್ಹಯಲವಾಲೊ ಯಕ್ಲೊ ಯೆಸುನೆ, ಭೊದಕ ಹಮಾರೊ ಬಾ ಛೊಡಿನ ಗಯಲ ಮಾರಿ ಬಾನಿ ಆಸ್ತಿಮಾ ಮನೆ ವಾಟೊ ದೆ ಕೈನ ಮಾರಾ ಮ್ಹೊಟಾ ಭೈನೆ ಕೆ ಕದ್ಯೊ.

14ತೆನೈಸೊ ಯೆಸು "ಮಿ ತುಮಾರಿ ನ್ಯಾಯ ಕರಾನೆ ವರಿ ತುಮಾರಾ ಬಾನಿ ಆಸ್ತಿಮಾ ತುಮೊನೆ ಭಂಬಿಜ಼ನಾವೊನೆ ವಾಟಿನೆ ದಿವಾನೆ ಮನೆ ಕುನ್ನ ಕದ್ಯುಸ? 15ತೆ ಥಯಲಪರ ಯೆಸು ತ್ಯಾ ರ‍್ಹಯಲ ಮನಕ್ಹೊನೆ "ಹುಶಾರ, ಕೈಬಿ ಆಸನೆ ಸ್ವಾರಥಮಾ ಪಡೆನೈಸೊ ಜಾ಼ಗಾ ರ‍್ಹವೊ. ಕಾಕದ್ಯಾಮ ಯಕ್ಲಾನೆ ಕೆಕ್ಕಲಿಬಿ ಆಸ್ತಿ ರ‍್ಹೈತಬಿ ತೆ ಆಸ್ತಿಕ್ಹು ತೆ ಮನಕ್ಹನೊ ಜ಼ಲಮ ನೈ ವಚಾ಼ಡಿಲೆತೊ "ಕದ್ಯೊ.

16ಪಾಚಲ್ತೊ ಯೆಸು ಮನಕ್ಹೊನೆ ಯಕ್ಕ ಸಾಮ್ಯ (ಸಾಮ್ಯ ಕದ್ಯಾಮ ತಿನೆ ಮಳೈನ ಕವಾನು) ಕದ್ಯೊ" ಯಕ್ಲೊ ಘನ್ನೊ ಸೌಕಾರ ವ್ಹತ್ತೊ ವರಿ ತಿನೆ ಘನ್ನಿ ಜ಼ಗಾ ವ್ಹತ್ತಿ ವರಿ ಯಕ್ಕಸಲಾ ತಿನಿ ಜಿಮಿನ್ಪರ ಘನ್ನು ಅನಾಜ಼ ಉಟ್ಯುತು. 17ತೆಳಾಮಾ ತೆ ಸೌಕಾರ ರ‍್ಹಯಲವಾಲೊ ಮಿ ಹಮ್ನಾ ಸು ಕರು? ಮಾರು ಅನಾಜ಼ ಭರಿನ ಮುಕ್ಕಕಾನೆ ಜ಼ಗಾ ನತ್ತಿ! ತಿನಾಕ್ಹು ತೆ ಕೈಲಿದ್ಯೊ. 18ಪಾಚಲ್ತೊ ತೆ ಸೌಕಾರ, ಮಿ ಸು ಕರು ಕವಾನು ಮನೆ ಗ್ವತ್ತ ಛೆ. ಮಾರು ಅನಾಜ಼ ಮ್ಹೆಲಾನು ಘರ ಪಾಡಿನ, ಅನಾಜ಼ ಮ್ಹೆಲಾನಾ ಹುತಿ ಮಿ ಮ್ಹೊಟು ಘರ ಭಾಂದುಸ. ವರಿ ಅನಾಜ಼ ಕ್ಹಾರು ಜ಼ಮಾ ಕರಿನ ಭರಿನ ಮ್ಹೆಲಾವುಸ್, 19ಪಾಚಲ್ತೊ ಮಿ ಮಾರಾ ಹುತಿ ಘನ್ನಾ ವರಕ್ಹ ಚಾ಼ಯೆಥಯಲ ಅನಾಜ಼ ಕುಡ್ಸಿನ ಮ್ಹೆಲ್ಯೊಸ, ಖಾ. ಪಿ. ಖುಶಿ ಕರ! ಕೈಲ್ಯುಸ, ವಿಚಾರ ಕರಲಿದ್ಯೊ. 20ತೆನೈಸೊ ಕ್ಹುದಾ ತಿನೆ, ತು ಗ್ಯಾನ ನೈಸೊವಾಲಾ! ಆಜ಼ ರಾತೆಜ಼ ತು ಮರಸಿ! ಹಮ್ನಾ ಕೆ ತು ಕುಡ್ಸಿನ ಮ್ಹೆಲಲ ಅನಾಜ಼ ತೆ ಸು ಥಾಸ? ತೆ ಕ್ಹಾರು ಅನಾಜ಼ ಕಿನಾ ಪಾಲ ಥಾಸ? ಕೈನ ಪುಚ್ಯೊ.

21"ತಿನಾಹುತಿ ಕುಡ್ಸಿನ ಮ್ಹೆಲಲ ಆಸ್ತಿ ಲಾಸ್ಟೆ ತಿನಿ ಗತಿ ಅಮ್ಮಜ಼ ಥಾವಸ. ಎ ಮನಕ್ಹ ಕ್ಹುದಾನಿ ನಜ಼ರಮಾ ಸೌಕರ ನ್ಹವೈ.

ಕ್ಹುದಾನಿ ರಾಜ್ಯನೆ ಪೈಲಾ ಸ್ಥಾನ

(ಮತ್ತಾಯ 6:25-34)

22ಯೆಸು ತಿನಾ ಶಿಷ್ಯಾವೊನೆ ಅಮ್ಮ ಕದ್ಯೊ" ಎ ಕಾರಣ ಕ್ಹು ಮಿ ತುಮೊನೆ ಸು ಕೌಸ ಕದ್ಯಾಮ, ತಿನಾ ಜ಼ಲಮನಾ ಹುತಿ ಖಾವಾನು ಅನ್ನ ವರಿ ಘಾಲ್ಲಿವಾನಾ ಹುತಿ ವಣ್ಣಾವೊನಾ ಹುತಿ ಚಿಂತಾ ಕರೊ ನಕೊ. 23ಖಾವಾನಾ ಅನ್ನತಿಬಿ ಜ಼ಲಮ ಹೆಚ್ಚಿನ ವ್ಹೈ ವಣ್ಣಾವೊತಿಬಿ ಅಂಗ ಜ಼ರುರತ ವ್ಹೈ.

24ಪಕ್ಕಷಿಯೊನೆ ದೆಕೊ. ತೆ ಬಿತ್ತತಿಯೊ ನೈ, ಕಾಟ್ತಿಯೊ ನೈ ತೆ ಪಕ್ಕಷಿಯೊ ಅನಾಜ಼ ತ್ಯುನಾ ಗುಡ್ಮಾ ಕುಡ್ಸಿನ ಮ್ಹೆಲ್ತಿಯೊ ನೈ. ಕ್ಹುದಾ ತ್ಯುನೊನೆ ಜ಼ತ್ತನ ಕರಸ್ತೊ. ತುಮೆ ಪಕ್ಕಷಿಯೊತಿಬಿ ಕ್ಹುದಾನಿ ನಜ಼ರಮಾ ಘನ್ನಾ ಚೊ಼ಕಾ ವ್ಹೈ. 25ತುಮೆ ಅನ್ನನಾ ಹುತಿ ವಣ್ಣಾವೊನಾ ಹುತಿ ಕೆಕ್ಕಲಾ ಚಿಂತಾ ಕರ‍್ಯಾತಬಿ ತುಮೆ ನಕ್ಕರಬಿ ಬೆಳತ್ತಿ ನೈ? 26ನ್ಹಾನಾ ಕಾಮೊ ತುಮೊನೆ ನೈ ಕರಾನೆ ಥಯುತಬಿ ಮ್ಹೊಟಾ ಕಾಮೊ ಕರಾನು ಕಾ ಚಿಂತಾ ಕರೊಶಿ?

27ರಾನ್ಮಾ ರ‍್ಹಯಲ ಬೆಳ್ದಾನಾ ಫುಲ್ಲೊನೆ ದೆಕೊ. ತೆ ಫುಲ್ಲೊ ರಾಬ್ತಾ ನೈ. ತ್ಯುನಾ ವಣ್ಣಾ ಶಿಲೆತಾ ನೈ. ತಿಮ್ಮ ರ‍್ಹಯೊತಬಿ ಸೊಲೊಮೊನ ರಾಜಾ಼ನಿ ಅದಿಕಾರ ರ‍್ಹತಾಮಾ ತ್ಯುನಾಮಾ ಯಕ್ಕ ಫುಲ ಲಿಂಗತಬಿ ಚೊ಼ಕಾ ವಣ್ಣಾ ಘಾಲ್ಲಿದ್ಯೊನೈ. 28ಎ ಬರೊಕ್ಹೊ ನೈಸೊವಾಲಾವೊ ಹಮ್ನಾ ರ‍್ಹೈನ ವ್ಹಂತ್ತಾ ಬಳಿ ಜಾ಼ವಾಲಾ ರಾನ್ಮಾನಾ ಚಾ಼ರೊನೆ ದೆಕೊ. ಕ್ಹುದಾ ತ್ಯುನೊನೆ ಕೆಕ್ಲೊ ಚೊ಼ಕೊ ಕರ‍್ಯೊಸ. ತೆ ಚಾ಼ರಾತಿಬಿ ಕ್ಹುದಾ ತುಮೊಪರ ಮಯಾ ಛೆ. ತುಮೊನೆ ಕೆಕ್ಲೊ ದೆಸ.

29"ತುಮೆ ಸು ಖೌ? ಸು ಪ್ಯು? ಕೈನ ಕೆಳಾಮಾಬಿ ತುಮೆ ವಿಚಾರ ಕರೊ ನಕೊ. ವರಿ ಚಿಂತಾ ಕರೊ ನಕೊ. 30ಎ ಕ್ಹಾರು ಮಳಾದೆ ಕೈನ ಎ ಭುಲೊಕ್ನಾ ಮನಕ್ಹೊ ಪ್ರಯತ್ನ ಕರಸ. ಎಕ್ಹಾರು ತುಮೊನೆ ಚಾ಼ಯೆ ಕವಾನು ಸ್ವರ್ಗಮಾ ರ‍್ಹಯಲ ತುಮಾರಾ ಬಾನೆ (ಕ್ಹುದಾನೆ) ಗ್ವತ್ತ ಛೆ. 31ತೆನೈಸೊ ತುಮೆ ಪೈಲಾ ಕ್ಹುದಾನಾ ರಾಜ್ಯನಾ ಹುತಿ ಟೈಮ ದಿವೊ. ಪಾಚಾ಼ತು ತುಮೊನೆ ಚಾ಼ಯೆಥಯಲ ಕ್ಹಾರುಜ಼ ದಿವಸ.

ದೊಕಡಾವೊಪರ ಬರೊಕ್ಹೊ ನಕೊ ಕರೊ

32"ನ್ಹಾನು ಮನಕ್ಹೊನು ಗುಂಪ ಭುಚ಼ಕೊ ನಕೊ, ತುಮೊನೆ ತೆ ರಾಜ್ಯ ದಿವಾನೆ ತುಮಾರಾ ಬಾನೆ ಆಸ ಛೆ. 33ತುಮೊಕನ ರ‍್ಹಯಲ ಆಸ್ತಿ ಇಕ್ಕಿನ,ಇಕ್ಕಿನ ಆಯಲ ದೊಕ್ಡಾ ತ್ರಾಸ್ಮಾ ರ‍್ಹಯಲ ಮನಕ್ಹೊನೆ ದಿವೊ. ಎ ಲೊಕಮಾ ಸೌಕಾರತನಾ ಹಮೆಶಾ ರ‍್ಹತಿ ನೈ. ತಿನಾಹುತಿ ಹಮೆಶಾ ರ‍್ಹವಾನುಜ಼ ಗಳ್ಸಿನ ಮ್ಹೆಲೊ. ಹಾಳ ನೈ ಥಾವಾನು ಆಸ್ತಿ ಸ್ವರ್ಗಮಾ ಗಳ್ಸೊ. ತೆ ಆಸ್ತಿನೆ ಚ್ವಟ್ಟಾ ಚೊ಼ರಿ ಕರತಾ ನೈ ವರಿ ತಿನೆ ನುಶಿಯೊ ಲಾಗ್ತಿಯೊ ನೈ. 34ತಮಾರಿ ಆಸ್ತಿ ಕಿಜಾ಼ ರ‍್ಹವಸ ತ್ಯಾಜ಼ ತುಮಾರು ಮನಸ ರ‍್ಹವಸ.

ಕೆಳಾಮಾಬಿ ತಯಾರ ಥೈನ ರ‍್ಹವೊ

(ಮತ್ತಾಯ 24:42-44)

35ತುಮೆ ವಣ್ಣಾ ಘಾಲ್ಲಿನ ತಯ್ಯಾರ ರ‍್ಹವೊ, ತುಮಾರೊ ದಿವ್ವೊ ಲಾಗಲ ರ‍್ಹವಾದೆ. 36ತುಮೆ ತೊ ತಮಾರೊ ಮಾಲಕ ಐನ ಬಾಕಲ ವಜಾ಼ಡಲ ಬರೊಬ್ಬರ ಬಾಕಲ ಕಾಡಾಲಾ ಥಾವೊ ಹಿವಾನು ಅನ್ನ ಖೈನ ಕೆಳಾಮಾ ಆವಸ ಕವಾನು ಗೊತ್ತ ನತ್ತಿ. ತುಮೆ ಕೆಳಾಮಾಬಿ ತಯ್ಯಾರ ರ‍್ಹವೊ. 37ಮಾಲಕ ಐನ ಕಯೊ-ಕಯೊ ಆಳ ಹುಶಾರ ಛೆ ಕೈನ ದೆಕಸ. ತೆಜ಼ ಆಳೊ ಧನೈ ವ್ಹೈ. ತೆಜ಼ ವಣ್ಣಾ ಘಾಲ್ಲಿನ ತೆಜ಼ ಆಳೊನೆ ಮಾಲಕ ತೆ ಆಳೊನೆ ಬಲೈನ ಬೈಟಾಡಿ ಅನ್ನ ಘಾಲಿನ ದಿವಸ ಕೈನ ಮಿ ತುಮೊನೆ ಕ್ಹರಿಜ಼ ಕೌಸ. 38ವರಿ ತೆ ಆಳೊ ತ್ಯುನಾ ಮಾಲಕನಾ ಹುತಿ ರಾತ್ನಾ ಬೆ ವಾಸ್ತಾ ನೈತೊ ತನ ವಾಸ್ತಾ. ಕೈದಾನು ಮಾಲಕ ದೆಕಿನ ಹಜು಼ನ ಜಾ಼ಗಾ ಛೆ ಕೈನ ತಿಳ್ದಿನ ತೆ ಘನ್ನೊ ಖುಶಿ ಥಾವಸ. 39ಎ ತುಮೊನೆ ಶೆ ರ‍್ಹವಾದೆ. ಚ್ವಟ್ಟೊ ಆವಾನು ಟೈಮ ಮಾಲಕನೆ ಗ್ವತ್ತ ರ‍್ಹಯುಮ, ತೆ ತಿನಾ ಘರಮಾ ಚೊ಼ರಿಕರಾನೆ ದಿವಸ್ಸು? ನೈ. 40ತಿನಾಲಿಂಗತಜ಼ ತುಮೆ ತಯ್ಯಾರ ರ‍್ಹವೊ! ತುಮೊನೆ ಗ್ವತ್ತ ನೈರ‍್ಹಯಲ ಟೈಮಾಜ಼ ಮನಕ್ಹನೊ ದಿಕ್ರೊ ಆವಸ"

ಬರೊಕ್ಹೊ ರ‍್ಹಯಲವಾಲೊ ಆಳ ಕುನ್ನ ವ್ಹೈ?

41ತೆಳಾಮಾ ಪೆತ್ರಾ ಯೆಸುನೆ ಗುರು ಎ ಸಾಮ್ಯ ತು ಕದಲ ಹಮಾರಾ ಹುತಿ ವ್ಹೈಸು, ಸು ಮನಕ್ಹೊನಾ ಹುತಿ ವ್ಹೈ? ಕೈನ ಪುಚ್ಯೊ.

42ಯೆಸು ಅಮ್ಮ ಕದ್ಯೊ" ಗ್ಯಾನಿ ರ‍್ಹಯಲ ವರಿ ಬರೊಕ್ಹಾನೊ ಥಯಲ ಆಳ ಕುನ್ನ ವ್ಹೈ? ಟೈಮ ಟೈಮೆ ಕರೆಟ್ಟ ಕುಲಿ ಆಳೊನೆ ಅನಾಜ಼ ತುಕಾ ಕರಿನ ದಿವಾನಾ ಘರಪರ ನೆಮಿಸಲ ಆಳಜ಼ ಬರೊಕ್ಹೊ ವಾಲೊ ವ್ಹೈ. 43ತೆ ಆಳ ತಿನು ಕಾಮ ಕ್ಹರಿ ಕ್ಹು ಕರತೊ ರ‍್ಹಯೊಮ, ಮಾಲಕ ಆತಾಮಾ ತೆ ಆಳನೆ ಘನ್ನಿ ಖುಶಿ ಥಾವಸ. 44ಮಿ ತುಮೊನೆ ಕ್ಹರಿ ಕೌಸ. ಮಾಲಕ ಆತಾಮಾ ತಿನಿ ಆಸ್ತಿಪರ ತೆ ಆಳನೆಜ಼ ನೆಮ್ಸಸ.

45ತೆನೈಸೊ ತೆ ಆಳ ಕೆಟ್ಟ ರ‍್ಹಯೊಮ ತಿನೊ ಮಾಲಕ ಭೆಗಿನ ಆತೊ ನೈ ಕೈನ, ಕೈಲಿದ್ಯೊಮ ಸು ಥಾಸ? ತೆ ಆಳ ಮಾಲಕನಾ ಬಿಜಾ಼ ಆಳೊನೆ ಮಾರಾಸ ವರಿ ಖೈನ ಪಿನ ನಶಾಮಾ ರ‍್ಹವಸ. 46ಪಾಚಲ್ತೊ ತೆ ಮಾಲಕ ತೆ ಆಳನೆ ಗ್ವತ್ತ ನೈಸೊ ಟೈಮಾ ಐನ ತೆ ಆಳನೆ ಶಿಕ್ಷಾ ದಿನ್ನ ತೆ ಮಾಲಕ ಬರೊಕ್ಹೊ ನೈ ರ‍್ಹಯಲ ಮನಕ್ಹೊಮಾ ತಿನೆ ಢಕ್ಕಲಿ ಪಾಡಸ. 47ತಿನೊ ಮಾಲಕ ತಿನಾಕ್ಹು ಸು ಆಸ ಮ್ಹೆಲ್ಯೊಸ ಕೈನ ತೆ ಆಳನೆ ಗೊತ್ತ ವ್ಹತ್ತು. ತೆನೈಸೊ ತೆ ಆಳ ತಯ್ಯಾರ ನ್ಹೊತೊ. ವರಿ ತಿನೊ ಮಾಲಕ ದಿದಲ ಕಾಮ ತೆ ಆಳ ಕರ‍್ಯೊ ನ್ಹೊತೊ. ತಿನಾಹುತಿ ತೆ ಆಳನೆ ಮಾಲಕ ಶಿಕ್ಷಾ ದಿವಸ! 48ತೆನೈಸೊ ತಿನಾ ಮಾಲಕನಿ ಆಸ ನೈ ತಿಳದಿಲಿದಲ ಆಳ ತಪ್ಪ ಕರ‍್ಯೊಮ ತಿನೆ ಕಮ ಶಿಕ್ಷಾ ಮಳಸ. ವರಿ ತಿನಾ ಮಾಲಕ ಕದಲ ಕಾಮ ಛೊಡಿನ ತಪ್ಪ ಕಾಮ ಕರ‍್ಯೊಮ ತೆ ಆಳನೆ ಘನ್ನಿ ಶಿಕ್ಷಾ ಮಳಸ.

(ಮತ್ತಾಯ 10:34-36)

49ವರಿ ಮಿ ಜಗತ್ಮಾ ಆಗ ಘಾಲಾನೆ ಆಯೊಸ! ಯಕ್ಕಲಾಮಾಜ಼ ಬಳ್ತು ರ‍್ಹೌ. 50ವರಿ ಮಿ ಬಿಜಿ಼ ತರಾನಿ ಬಾಪ್ತಿಸ್ಮ ವ್ಹಂದು. ತೆ ವ್ಹಂದೆಲಕ್ಕಕಾ ಮಿ ಘನ್ನೊ ಕಷ್ಟಮಾ ಛೆ. 51ಮಿ ಜಗತ್ನೆ ಸಮಾದಾನ ದಿವಾನೆ ಆಯೊಸ ಕೈನ ತುಮೆ ತಿಳದ್ಯಾಸು? ನೈ! ಮಿ ಜಗತ್ಮಾ ಮನಕ್ಹೊಮಾ ಭೆದ ಹುಟ್ಸಾನೆ ಆಯೊಸ! 52ಆಜ಼ತೊ, ಪಾಂಚ಼ ಜ಼ನಾ ರ‍್ಹಯಲ ಕುಟುಂಬಮಾ ಭೆದ ಹುಟ್ಟಸ. ತ್ಯುನೊಮಾನಾ ತನ ಜ಼ನಾ ಬೆ ಜ಼ನಾವೊನೆ ವಿರುದ್ದ ಥಾವಸ. ಬೆ ಜ಼ನಾ ತನ ಜ಼ನಾವೊಪರ ವಿರುದ್ದ ಥಾವಸ. 53ಬಾಪ ದಿಕ್ರಾಮಾ ಭೆದ ಹುಟ್ಟಸ. ದಿಕ್ರೊ ಬಾಪನೆ ವಿರೊದ ಥಾವಸ. ಬಾಪ ದಿಕ್ರಾನೆ ವಿರೊದ ಥಾವಸ. ಮಾ ವರಿ ದಿಕ್ರಿಮಾ ವಿರೊದ ಥಾವಸ. ದಿಕ್ರಿ ಮಾನೆ ವಿರುದ್ದ ಥಾವಸ. ಮಾ ತಿನಿ ದಿಕ್ರಿನೆ ವಿರುದ್ದ ಥಾವಸ. ಫೈ ವ್ಹವುಮಾ ಭೆದ ಹುಟ್ಟಸ. ವ್ಹವು ಫೈನಾ ವಿರುದ್ದ ಥಾವಸ. ಫೈ ವ್ಹವುನಾ ವಿರುದ್ದ ಥಾವಸ"

ಟೈಮ ವರಿ ದಿನೊ ತಿಳದಿಲಿವೊ

(ಮತ್ತಾಯ 16:2-3)

54ಪಾಚಲ್ತೊ ಯೆಸು ಅಮ್ಮ ಕದ್ಯೊ "ಮ್ಹಾಡ ಪಶ್ಚಿಮ ದಿಕ್ಕಕತೊ ಮ್ಹೊಟು ಥಾವಾನು ದೆಕತಾ ರ‍್ಹತಾಮಾ ತೆ ದಿನಮಾ ಪಾನಿ ಆವಸ, ಕೈನ ಕವೊಸಿ. ತಿನಾ ಲಿಂಗತಜ಼ ಪಾನಿ ಆವಸ. 55ದಕ್ಷಿಣ ದಿಕ್ತೊ ವಾರೊ ಚು಼ಟಸ, ಎ ದಿನೊಮಾ ಘನ್ನಿ ಝಳಾ ಥಾವಸ, ಕವೊಸಿ ತೆ ತಿಮ್ಮಜ಼ ಥಾವಸ, 56ತುಮೆ ಕಪಟ್ಯಾ ವ್ಹೈ! ತುಮೆ ಎಕ್ಹಾರು ತಿಳದಿಲಿವೊಸಿ, ಹಮ್ನಾ ಥಾವಾನು ತುಮೆ ತಿಳದಿಲಿವಾನೆ ಥಾತು ನೈಸು?

ತುಮಾರೊ ತ್ರಾಸ ಮುಗಸೈ ಲಿವೊ

(ಮತ್ತಾಯ 5:25-26)

57ತುಮೆಜ಼ ಕಾ ತಿರಪ ಕರು ನೈ? 58ಯಕ್ಲೊ ತುಮೊಪರ ಅಪವಾದ ಘಾಲಾನೆ ಕೊರಟೆ ಜಾ಼ತಾಮಾ ತಮಾರಿ ಸಮಶ್ಯಾ ವಾಟ್ಮಾಜ಼ ಬಗೆ ಹರಸಿಲಿವೊ ತುಮೊಕನ ಥಾವಾ ಯಕ್ಲು ಬಗೆ ಹರಸಿಲಿವೊ ನೈತೊ ತುಮೊನೆ ಬಿಜಕ್ಲೊ ಜಜ್ನಾ ಕ್ಹಾಮೊ ಯಳ್ದಿನ ನಿಂಜಾ಼ವಸ. ತೆ ಜಜ್ಜ ತುಮೊನೆ ಜೆಲ್ಮಾ ಘಾಲಾ ಲಗಾಡಸ್. 59ತಿಮ್ಮ ಥೈಯುಮ ತಮೊಕನ ರ‍್ಹಯಲ ತೆಕ್ಲಾ ದೊಕಡಾ ವರಿ ಆಸ್ತಿ ಜ಼ವೈಲಿವೊಸಿ ವರಿ ತೆಕ್ಲು ಥಯು ತಬಿ ತುಮೆ ಜೆಲ್ಮಾತಾ ಭಾರಾ ಆವಾನೆ ಥಾತುಜ಼಼ ನೈ"