1 ಕೊರಿಂಥ 11

1ಮಿ ಕ್ರಿಸ್ತ ಯೆಸುನೆ ಅನುಸರಿಸಲ ಲಿಂಗತ, ತುಮೆ ಮನೆ ಅನುಸರಿಸೊ. 2ತುಮೆ ಹಮೆಶಾಬಿ ಮನೆ ಶೆ ಕರಿನ ಮಿ ತುಮೊನೆ ಕೈನ ದಿದಲ ಪದ್ದತನಾ ತರಿಕಾ ಕರೆಟ್ಟ ಚಾ಼ಲಿನ ಆವಾಡ್ಯಾಸ; ಇನಾ ಹುತಿ ತುಮೊನೆ ಮೆಚ್ಚುಸ. 3ಯಕ್ಕ ವಿಷಯ ತುಮೊನೆ ಗ್ವತ್ತ ರ‍್ಹವಾದೆ. ಹರಯಕ್ಕ ಮನಕ್ಹನೆ ಕ್ರಿಸ್ತ ಯೆಸುಜ಼ ಮ್ಹೊಟೊ ವ್ಹೈ. ಹರಯಕ್ಕ ಬಾಕ್ಡಿನೆ ಮಾಟಿಜ಼ ಮ್ಹೊಟೊ ವ್ಹೈ. ಕ್ರಿಸ್ತ ಯೆಸುನೆ ಕ್ಹುದಾಜ಼ ಮ್ಹೊಟೊ ವ್ಹೈ. 4ದಾಣಗೊ ಮಾತು ಝಾಕಿಲಿನ ಪ್ರಾಥನಾ ಕರ‍್ತೊ ರ‍್ಹಯಮ ನೈತೊ ಕ್ಹುದಾನಿ ವಾಕ್ಯಾ ಪ್ರವಚನಾ ಕರ‍್ತೊ ರ‍್ಹಯಮ ತಿನೊ ಮ್ಹೊಟೊ ಥಯಲ ಕ್ರಿಸ್ತ ಯೆಸುನೆ ಅಪಮಾನ ಲಾವಸ. 5ಬಾಕ್ಡಿ ತಿನಾ ಮಾತಾನಾ ಉಪ್ಪರ ಛೆಡೊ ನೈ ಲಿದ್ಯಾವಾಚಿ ಪ್ರಾಥನಾ ಕರ‍್ತಿ ರ‍್ಹಯಮ ನೈತೊ ಕ್ಹುದಾನಿ ವಾಕ್ಯಾ ಪ್ರವಚನ ಕರ‍್ತಿ ರ‍್ಹಯಮ ತಿನೊ ಮ್ಹೊಟೊ ಥಯಲ ಮಾಟಿನೆ ಅಪಮಾನ ಲಾವಸ. ಛೆಡೊ ನೈ ಲಿದಲ ಬಾಕ್ಡಿ ತಿನು ಮಾತುಜ಼಼ ಬೊಳ್ಸಿ ಲಿದಲ ಲಿಂಗತ ವ್ಹೈ. 6ತಿಮ್ಮ ಛೆಡೊ ನೈ ಲಿವಾಲಿ ಬಾಕ್ಡಿ ತಿನಾ ಮಾತಾನಾ ಬಾಲೊ ಕಾಡಿ ಪಡಾದೆ. ಬಾಕ್ಡಿನೆ ಮಾತಾನಾ ಬಾಲೊ ಕತ್ರಿ ಲಿವಾನು ರ‍್ಹವಾದೆ, ಬೊಳ್ಸಿ ಲಿವಾನು ರ‍್ಹವಾದೆ ಸರಮ ಕೈನ ಲಾಗ್ಯುಮ, ತೆ ಮಾತಾನೆ ಛೆಡೊ ಲಿವಾದೆ. 7ದಾಣಗೊ ಮಾತಾನಾ ಉಪ್ಪರ ಛೆಡೊ ಲಿವ ನೈ. ಕಾಕದ್ಯಾಮ, ತೆ ಕ್ಹುದಾನು ರುಪ ವರಿ ತಿನಿ ಮಹಿಮಾನಿ ಪ್ರತಿಬಿಂಬ ವ್ಹೈ. ಬಾಕ್ಡಿ, ದಾಣಗಾನಿ ಮಹಿಮಾನಿ ಪ್ರತಿಬಿಂಬ ವ್ಹೈ. 8ಬಾಕ್ಕಡಿಕ್ಹು ದಾಣಗೊ ನ್ಹವೈ; ದಾಣಗಾಕ್ಹು ಬಾಕ್ಡಿ ತಯ್ಯಾರ ಥೈ. 9ತಿನಾ ಲಿಂಗತಜ಼ ಬಾಕ್ಡಿನಾ ಹುತಿ ದಾಣಗೊ ನ್ಹವೈ; ದಾಣಗಾನಾ ಹುತಿ ಬಾಕ್ಡಿ ತಯ್ಯಾರ ಥಯಲ ವ್ಹೈ. 10ಇಮ್ಮ ದೆವ ದುತೊನಾ ಹುತಿ ತುಬಿ ಬಾಕ್ಡಿ ಮರ್ಯಾದಿ ದಿವಾನೆ ಛೆಡೊ ಘಾಲ್ಯು. 11ರ‍್ಹೈತಬಿ ಪ್ರಭುನಾ ಇಸಾಬೆ ದಾಣಗೊ ನೈಸೊ ಬಾಕ್ಡಿ ನತ್ತಿ; ಬಾಕ್ಡಿ ನೈಸೊ ದಾಣಗೊ ನತ್ತಿ. 12ಕಾಕದ್ಯಾಮ ಬಾಕ್ಡಿ ದಾಣಗಾಕ್ಹು ತಯ್ಯಾರ ಥಯಲ ಲಿಂಗತ ದಾಣಗೊ ಬಾಕ್ಕಡಿತೊ ಹುಟ್ಟಸ. 13ಬಾಕ್ಡಿ ಛೆಡೊ ನೈಸೊ ಕ್ಹುದಾನೆ ಪ್ರಾಥನಾ ಕರಾನು ಲಕ್ಕಷಣ ವ್ಹೈ ಸು? ತುಮೆಜ಼ ವಿಚಾರ ಕರೊ. 14ಲಾಂಬಾ ಬಾಲೊ ದಾಣಗಾನೆ ಸರಮ ವ್ಹೈ ಲಾಂಬಾ ಬಾಲೊ ಬಾಕ್ಡಿನೆ ಸುಂದರತಾ ನ್ಹವೈ ಸು? 15ಲಾಂಬಾ ಬಾಲೊ ಬಾಕ್ಡಿನೆ ಮರ್ಯಾದಿನಾ ಹುತಿ ನ್ಹವ್ಯೆ ಸು? 16ಇನಾಹುತಿ ಕುನತಬಿ ವಿವಾದ ಕರ‍್ಯೊಮ ತ್ಯವಾನೆ ಎ ಗ್ವತ್ತ ರ‍್ಹವಾದೆ; ಹೆವಿ ಪದ್ದತ ಅಪ್ನೊಮಾ ನತ್ತಿ; ವರಿ ಕಯಾಜ಼ ಸಭೆಮಾ ನತ್ತಿ. 17ಹಮ್ನಾ ಮಿ ಕವಾನಿ ವಿಷಯಮಾ ತುಮೊನೆ ಮೆಚ್ಚತೊ ನೈ. ತುಮೆ ಸಭೆಮಾ ಮಳಾನು ಚೊ಼ಕಾನಾ ಹುತಿತುಬಿ ಹೆಚ್ಕಿ ಕೆಟ್ಟಜ಼ ಥಾವಸ. 18ಪೈಲಾ, ತುಮೆ ಮಳಾನಿ ಸಭೆಮಾ ಗುಂಪೊ ಛೆ ಕೈಸ. ದಕ್ಹಾ ಇಸಾಬೆ ಎ ಸುದ್ದಿ ಕ್ಹರಿಜ಼ ವ್ಹೈ ಕೈನ ಮನೆ ಲಾಗಸ. 19ತುಮೊಮಾ ಭೆದ ಭಾವ ರ‍್ಹವಾನು ಸಹಜ ಛೆ. ತಿಮ್ಮ ರ‍್ಹವಾ ಹುತಿಜ಼ ಪ್ರಾಮಾಣಿಕ ಕುನ್ ವ್ಹೈ ಕೈನ ಗ್ವತ್ತ ಕರಾನೆ ಸಾಧ್ಯ ಛೆ. 20ರ‍್ಹೈತಬಿ ತುಮೆ ಕ್ಹಾರಾ ಯಕ್ಕ ಥೈನ ಮಳ್ತಾಮಾ ತುಮೆ ಕರಾನು ಭೊಜನ ಪ್ರಭುನು ಭೊಜನ ನ್ಹವ್ಹೈ. 21ಕಾಕದ್ಯಾಮ, ಭೊಜನನಾ ಟೈಮಮಾ ಯಕೆಕ್ಲೊ ತೆ ಲಾಯಲ ಖಾವಾನೆ ಬಿಜಾ಼ವೊತಿ ಪೈಲಾ ಬೆಟಸ. ಯಕ್ಲೊ ಭುಕ್ಕೊ ಥಯಲ ರ‍್ಹವಸ; ವರಿಯಕ್ಲೊ ಪಿನ ಚಿತ್ತ ಥಯಲ ರ‍್ಹವಸ. 22ಖಾವಾನೆ ಪಿವಾನೆ ತುಮೊನೆ ಸ್ವಂತ ಘರೊ ನತ್ತಿ ಸು? ಗತಿ ನೈ ರ‍್ಹಯಲವಾಲಾವೊನೆ ಸರಮುಂದಾ ಕರಿನ, ಕ್ಹುದಾನಿ ಸಭೆನೆ ಖಾಸ ನ್ಹವೈ ಕೈನ ದೆಕಾಡು ಕರ‍್ಯಾಸ ಸು? ಇನಾಹುತಿ ಮಿ ತುಮೊನೆ ಸು ಕೌ? ತುಮೊನೆ ಹೊಗಳು ಸು ಇನ್ಕಾರು? ಕ್ಹರಿಬಿ ತುಮೊನೆ ಹೊಗಳತೊ ನೈ. 23ತುಮೊನೆ ಕರಲ ಉಪದೆಶ ಮಿ ಪ್ರಭುಕ್ಹು ಲಿದ್ಯೊಸ. ತೆ ಸು ವ್ಹೈ ಕದ್ಯಾಮ; ಪ್ರಭು ಯೆಸು, ತಿನೆ ತೆ ಧರಿನ ದಿದಲ ತೆ ರಾತ, ರೊಕ್ಲೊ ಲಿನ ಕ್ಹುದಾನೆ ಸ್ತೊತ್ರಾ ಕರಿನ ತೆ ತೊಡಿನ 24"ಎ ತುಮೊನೆ ದಿದಲ ಮಾರು ಅಂಗ ವ್ಹೈ, ಇನೆ ಮಾರಿ ಶೆನಾ ಹುತಿ ಕರೊ "ಕದ್ಯೊ. 25ತೆಳಾಮಾಜ಼ ಭೊಜನನಾ ಲಾಸ್ಟೆ ಪಾನ ಪಾತ್ರೆ ಲಿನ"ಎ ಪಾತ್ರೆ ಮಾರಾ ರಗತಕ್ಹು ತಯ್ಯಾರ ಥಯಲ ನವು ವಡಂಬಡಿಕೆ ವ್ಹೈ; ಇನೆ ತುಮೆ ಪಾನ ಕರ‍್ತಾಮಾ ಮಾರಿ ಶೆನಾ ಹುತಿ ಕರೊ "ಕದ್ಯೊ. 26ಕೈನಜ಼, ತುಮೆ ಎ ರೊಕ್ಲೊ ಖೈನ ಎ ಪಾತ್ರೆತು ಪಾನ ಪಿತಾ ಟೈಮಮಾ ಪ್ರಭು ಆಯೆ ಲಕ್ಕಾ ತಿನು ಮರಣ ಕತಾ ರ‍್ಹವೊ.

27ಕುನ ತಬಿ ಅಯೊಗ್ಯಕ್ಹು ಎ ರೊಕ್ಲೊ ಖಾದ್ಯೊರೆ, ನೈತೊ ಪ್ರಭುನಾ ಪಾತ್ರೆತೊ ಪಾನ ಕರ‍್ಯಮ ತೆ ಪ್ರಭುನಾ ಅಂಗನೆಬಿ ರಗತನೆಬಿ ವಿರುದ್ದ ಕರಾಲೊ ಥಾವಸ. 28ಹರಯಕ್ಲೊ ಪೈಲಾ ತಿನೆ ತೆಜ಼ ಪರಿಕ್ಷಾ ಕರಲಿನ ಪಾಚಲ್ತೊ ತೆ ರೊಕ್ಕಲಾನೆ ಖಾವಾದೆ; ವರಿ ತೆ ಪಾತ್ರೆತೊ ಪಾನ ಕರಾದೆ. 29ಕಾಕದ್ಯಾಮ, ತೆ ಪ್ರಭುನು ಅಂಗ ವ್ಹೈ ಕೈನ ಗ್ವತ್ತ ರ‍್ಹಯಾವಾಚಿ, ಖೈನ ಪಾನ ಕರಾಲೊ ನ್ಯಾಯನಾ ಪೈಸ್ಲಾನೆ ತಿನಾ ಉಪ್ಪರ ಲಾವಾನಾ ಹುತಿ ಖಾವಸ, ಪಿವಸ. 30ತುಮೊಮಾ ಘನ್ನಾ ಜ಼ನಾ ಎಜ಼ ಕಾರಣಕ್ಹು ತಾಕತ ನೈಸೊ ಥಯಾಸ, ಅರಾಮ ನೈಸೊವಾಲಾ ಥಯಾಸ; ವರಿ ಕೆಕ್ಲಾಕಿ ಜ಼ನಾ ಮರ‍್ಯಾಸ. 31ಅಪೊನೆ ಅಪೆಜ಼ ಪರಿಕ್ಷಾ ಕರಿಲಿದ್ಯಾಮ ಪ್ರಭುನಾ ನ್ಯಾಯನಾ ಪೈಸ್ಲಾನೆ ಗುರಿ ನೈ ಥಾತಾ. 32ತಿಮ್ಮ ಸುಬಿ ಪ್ರಭುನಾ ಪೈಸ್ಲಾನೆ ಅಪೆ ಮ್ಹೈ ಥಯಮ ತ್ಯುನೆ ಅಪೊನೆ ದಂಡ ದಿನ್ನ, ತಿದ್ದಸ. ದುನಿಯಾಮಾ ಅಪೆ ತಪ್ಪ ನೈ ಕರಾಲಾ ಲಿಂಗತ ಕರಸ. 33ತಿನಾಹುತಿ ಮಯಾನಾ ಭಾಯೊ ಭೆನೊ, ಪ್ರಭುನಾ ಭೊಜನನಾ ಹುತಿ ತುಮೆ ಯಕ್ಕ ಥೈನ ಮಳ್ತಮಾ ಯಕ್ಕನೆ ಯಕ್ಕ ಕೈದಿನ ರ‍್ಹವೊ. 34ತುಮೆ ಭುಕ್ಕ ಮರಾನಾ ಹುತಿ ಸಭೆನೆ ಆವಾನು ರ‍್ಹಯಮ ಘರೊಮಾಜ಼ ಖಾವೊ. ತೆಳಾಮಾ ಸಭೆನೆ ಗೈನ ತುಮೆ ನ್ಯಾಯನಾ ಪೈಸ್ಲಾನೆ ಗುರಿ ನೈ ಥಾತಾ. ಹಜು಼ನ ಬಿಜಿಯೊ ವಾತೊ ಮಿ ಐನ ತಿಳಸೈನ ದಿವ್ಸ.