1 ಕೊರಿಂಥ 10

ಯೆಹುದಿಯೊಲಿಂಗತ ರ‍್ಹವೊನಕೊ

1ಮಯಾನಾ ಭಾಯೊ ಭೆನೊ, ಅಪ್ನಾ ಪೈಲಾನಾ ಮನಕ್ಹೊನೆ ಥಯಲ ಕ್ಹಾರು ತುಮಾರು ಧ್ಯಾನಮಾ ಲಾವಾನೆ ಕೊಶಿಶ ಕರಾಡ್ಯೊಸ. ತ್ಯುನೆ ಕ್ಹಾರಾ ಮ್ಹಾಡನಾ ಛೌಲಿಮಾ ಚಾ಼ಲ್ಯಾ. ಕ್ಹಾರಾ ಜ಼ನಾ ಸಮುಂದರನೆ ಸು ಥಯಾವಾಚಿ ದಾಟ್ಯಾ. 2ಇಮ್ಮ ತ್ಯುನೆ ಮ್ಹಾಡಮಾಬಿ ಸಮುಂದರಮಾಬಿ ಬಾಪ್ತಿಸ್ಮ ಕರೈಲಿನ ಮೊಶೆನೆ ಶಿಷ್ಯಾ ಥಯಾ. 3ಕ್ಹಾರಾ ಜ಼ನಾ ಯಕ್ಕಜ಼ ಆತ್ಮಿಕನು ರೊಕ್ಲೊ ಖಾದ್ಯಾ; 4ತ್ಯುನಾ ಕ್ಹಾತೆ ರ‍್ಹಯಲ ಆತ್ಮಿಕ ದಗ್ಡಾನು ಪಾನಿ ಪಿದ್ಯಾ. ತೆಜ಼ ದಗ್ಡೊ ಕ್ರಿಸ್ತಜ಼ ವ್ಹತ್ತೊ. 5ತೆನೈಸೊ ತ್ಯುನೊಮಾ ಘನ್ನಾ ಜ಼ನಾ ಕ್ಹುದಾನೆ ಪಸಂದ ಥಯಾ ನೈ. ತಿನಾಹುತಿ ಹಾಳ ಜ಼ಗಾಮಾ ಖಲಾಸ ಕರಿನ ತ್ಯುನಾ ಅಂಗೊ ರಾನ್ಮಾ ಪಡಿ ಗಯಾತಾ. 6ಎ ಘಟನೆ ಕ್ಹಾರಾ ಅಪೊನೆ ಹುಶಾರಕ್ಹು ದಿವಾನಾ ವಾತೊ ಥಯಾಸ. ತ್ಯುನಾ ಲಿಂಗತ ಅಪೆ ಕೆಟ್ಟ ರ‍್ಹಯಲ ಆಸ ಕರು ನೈ. 7ತ್ಯುನೊಮಾ ದಕ್ಹಾ ಜ಼ನಾ ಮುರತಿಯೊನೆ ಪುಜಾ ಕರಾಲಾ ಥಯಲ ಲಿಂಗತ ಅಪೆ ಥೌ ನೈ. ಇವ್ನಾ ಹುತಿ ಪವಿತ್ರ ಗ್ರಂಥಮಾ ಅಮ್ಮ ಬರ್ದಲ ಛೆ"ಎ ಮನಕ್ಹೊ ಖಾವಾನೆ ಕೈನ ಪಿವಾನೆ ಕೈನ ಬೆಟ್ಯಾ ನ್ಹಾಚಾ಼ನೆ ಕೆಟ್ಟ ತರಾಕ್ಹು ಉಟ್ಯಾ" 8ತ್ಯುನಾಮಾ ದಕ್ಹಾ ಜ಼ನಾ ಲೈಂಗಿಕ ಪಾಪ ಕರಲಕ್ಹು ಯಕ್ಕಜ಼ ದಿನ್ನಮಾ ಇಕ್ಹಪರ ತನ್ನ ಹಜಾ಼ರ ಮನಕ್ಹೊ ಮರ‍್ಯಾ. ಅಪೆ ಲೈಂಗಿಕ ಕಾಮೊಕ್ಹು ದುರ ರ‍್ಹೌ. 9ತ್ಯುನಾ ಬಗಲನಾ ದಕ್ಹಾ ಜ಼ನಾ ಪ್ರಭುನೆ ಪರಿಕ್ಷಾ ಕರ‍್ಯಾ. ತಿನಾಹುತಿ ಕ್ಹಾಪೊಕ್ಹು ನಾಶ ಥಯಾ. ತ್ಯುನಾ ಲಿಂಗತ ಪ್ರಭುನೆ ಪರಿಕ್ಷಾ ಕರಾನು ಅಪೊನೆ ನಕೊ. 10ವರಿ ದಕ್ಹಾ ಜ಼ನಾ ಗುಣಗುಟ್ಯಾ; ಖಲಾಸ ಕರಾನಾ ದುತಕ್ಹು ಖಲಾಸ ಥಯಾ. ತುಮೆಬಿ ತ್ಯುನಾ ಲಿಂಗತ ಗುಣಗುಟ್ಟಾಲಾ ಥಾವೊ ನಕೊ. 11ಎ ಕ್ಹಾರು ತ್ಯುನೊನೆ ಥಯಲ ಬಿಜಾ಼ವೊನೆ ಗ್ವತ್ತ ಥಾವಾನಾ ಹುತಿ ವ್ಹೈ. ಎ ಕ್ಹಾರು ಬರ್ದಿನ ಮ್ಹೆಲಲ, ದುನಿಯಾನಾ ಅಂತ್ಯನೆ ಆಯಲ ಅಪೊನೆ ಪೈಲಾಜ಼ ಹುಶಾರ ಥಾವಾನಾ ಹುತಿ ವ್ಹೈ. 12ತಿನಾಹುತಿ ಚೊ಼ಕಿ ತರಾ ಛೆ ಕೈನ ಕೈಲಿವಾಲಾ, ಠೊಕರ ಲಾಗಿನ ಪಡೆ ನೈಸೊ ಹುಶಾರಕ್ಹು ರ‍್ಹೆ. 13ಮನಕ್ಹೊಕ್ಹು ನೈ ಜಿತ್ತಾನಾ ಶೊಧನೆ ತುಮೊನೆ ಆಯಾ ನತ್ತಿ. ಕ್ಹುದಾ ದಿದಲ ವಾತ ಚು಼ಕ್ತೊ ನೈ. ನೈ ಜಿತ್ತಾನಾ ಶೊಧನೆನೆ ತುಮೊನೆ ಕೆಳಾಮಾಜ಼ ಘಾಲ್ತೊ ನೈ. ಶೊಧನೆ ಆಯಲ ಪರ ತಿಕ್ಹು ತಡ್ದಿಲಿವಾನಿ ತಾಕತ ಚು಼ಕೈಲಿವಾನಿ ವಾಟ ತೆಜ಼ ದಿವಸ. 14ತಿನಾಹುತಿ ಮಯಾನಾ ಭಾಯೊ ಭೆನೊ, ಮುರತಿಯೊನಿ ಆರಾಧನಾ ಕರಾನು ಛೊಡಿ ಪಡೊ. 15ತುಮೆ ತಿಳ್ದಿಲಿದಲವಾಲಾ ವ್ಹೈ ಕೈನ ತಿಳ್ದಿನ ಎ ಕವಾಡ್ಯೊಸ. ಮಾರಾ ವಾತೊ ತುಮೆಜ಼ ಪರಿಕ್ಷಾ ಕರಿನ ದೆಕೊ. 16ಅಪೆ ಕ್ಹುದಾನೆ ಸ್ತುತಿ ಕರಿನ ಪಿವಾನಾ ವಾಟ್ಕಾಕ್ಹು ಪಿತಾಮಾ ಕ್ರಿಸ್ತನಾ ರಗತಮಾ ವಾಟೊ ಲಿವಾಲಾ ಥಯ್ಯೆಸ. ರೊಕ್ಲೊ ತೊಡಿನ ಖಾತಾಮಾ ಕ್ರಿಸ್ತನಾ ಶರಿರಮಾ ಪಾಲ ಲಿವಾಲಾ ಥಯ್ಯೆಸ. 17ರೊಕ್ಲೊ ಯಕ್ಕಜ಼ ವ್ಹೈ; ತಿನಾಹುತಿ ಅಪೆ ಘನ್ನಾ ಜ಼ನಾ ರ‍್ಹೈತಬಿ ಯಕ್ಕಜ಼ ಶರಿರ ಥಯ್ಯೆಸ. ಕಾಕದ್ಯಾಮ ಅಪೆ ಕ್ಹಾರಾ ತೆ ಯಕ್ಕಜ಼ ರೊಕ್ಲಾನಾ ಪಾಲ ಲಿವಾಲಾ ಥಯಾಸ. 18ಇಸ್ರಾಯೆಲನಾ ಮನಕ್ಹೊನಿ ಪದ್ದತ ದೆಕೊ; ಬಲಿ ಥೈನ ಚ಼ಡಾಯಲ ಖಾವಾಲಾ ಬಲಿಮಾನೊ ವಾಟೊ ಲಿದಲ ರ‍್ಹವಸ. 19ಇಮ್ಮ ಮಿ ಕತಾಮಾ ಮುರತಿಯೊನೆ ಚ಼ಡಾವಾನೆ ಕರಲ ಅನ್ನ ಖಾಸ ವ್ಹೈ ನೈತೊ ಮುರತಿಜ಼ ಖಾಸ ವ್ಹೈ ಕೈನ ಮಿ ಕವಾನು ಮತ್ಲಬ ವ್ಹೈಸು? ಕಯುಜ಼ ನ್ಹವೈ, 20ಮಿ ಕವಾನು ಸು ವ್ಹೈ ಕದ್ಯಾಮ; ಬಿಜಾ಼ ಮನಕ್ಹೊ ಬಲಿ ಭುತ್ಡಾವೊನೆ ಚ಼ಡಾವಸ ತೆನೈಸೊ ಕ್ಹುದಾನೆ ನ್ಹವೈ. ಇಮ್ಮ ತುಮೆ ಭುತ್ಡಾವೊನಾ ಕ್ಹಾತೆ ಪಾಲ ಲಿವಾನು ಮಿ ಕೆಳಾಮಾಜ಼ ಪಸಂದ ನೈ ಕರ‍್ತೊ. 21ತುಮೆ ಪ್ರಭುನಾ ಪಾತ್ರೆತು ವರಿ ಭುತ್ಡಾವೊನಾ ಪಾತ್ರೆತು ಪಿವಾನೆ ಥಾತು ನೈ. ಪ್ರಭುನಾ ಪಂಕ್ಕತಿಮಾ ತಿನಾ ಲಿಂಗತ ಭುತ್ಡಾವೊನಾ ಪಂಕ್ಕತಿಮಾ ಖಾವಾನೆ ಥಾತು ನೈ. 22ಅಪೆ ಪ್ರಭುನೆ ಕದ್ರಾವಾಡ್ಯಾಸು? ತಿನಾತಿ ಅಪೆ ತಾಕತವರ ವ್ಹೈ ಸು?

ತುಮಾರಾ ಸ್ವತಂತ್ರ ಕ್ಹುದಾನಿ ಮಹಿಮಾನಾ ಹುತಿ

23"ಸುಬಿ ಕರಾನೆ ಆಜಾ಼ದಿ ಛೆ" ಕೈನ ಕೆ ಸಕೆಸ ಸು. ತೆನೈಸೊ ಕ್ಹಾರು ಉಪಯೊಗ ನ್ಹವೈ. ಸುಬಿ ಕರಾನೆ ಆಜಾ಼ದಿ ಛೆ. ತೆನೈಸೊ ಕ್ಹಾರುಜ಼ ಅಭಿವೃದ್ಧಿ ಕರ‍್ತು ನೈ. 24ಹರಯಕ್ಲೊ ಕ್ಹಾಲಿ ತಿನು ಚೊ಼ಕು ಆಸ ಕರ‍್ಯಾವಾಚಿ ಬಿಜಾ಼ವೊನು ಚೊ಼ಕಾನಾ ಹುತಿ ಆಸ ಕರು. 25ಮನಸ್ಸಾಕ್ಷಿನೆ ಕೆಡ್ಸಾನಾ ಸವಾಲೊನೆ ಆವಾನೆ ದಿದ್ಯಾವಾಚಿ ಮಾಕ್ಹನಾ ಬಾಜ಼ರಮಾ ಇಕ್ಕಾನು ಕ್ಹಾರು ತುಮೆ ಲೈನ ವಿಚಾರ ಕರ‍್ಯಾ ಬಗರ ಖಾ ಸಕೊಶಿ. 26ಕಾಕದ್ಯಾಮ"ಸೃಷ್ಟಿಮಾ ರ‍್ಹವಾನು ಕ್ಹಾರು ಪ್ರಭುನುಜ಼ ವ್ಹೈ" 27ಕ್ರೈಸ್ತವಿಶ್ವಾಸಿ ನೈ ರ‍್ಹಯಲವಾಲೊ, ತುಮೊನೆ ಖಾವಾನೆ ಬಲಾಯೊಮ, ತುಮೊನೆ ಚೊ಼ಕು ಲಾಗ್ಯುರೆ ಜಾ಼ವೊ; ಮನಸ್ಸಾಕ್ಷಿನೆ ಕೆಡ್ಸಾನಾ ಸವಾಲೊನೆ ಆವಾನೆ ದಿದ್ಯಾವಾಚಿ ತೆ ಘಾಲಲ ತೆಕ್ಲು ಖಾವೊ. 28ತೆಳಾಮಾ ಕುನತಬಿ"ಎ ಮುರತಿಯೊನೆ ಬಲಿ ದಿದಲ ವ್ಹೈ" ಕೈನ ಕದ್ಯಾಮ,ತಿಮ್ಮ ಕದಲವಾಲಾನಾ ಹುತಿ ವರಿ ಮನಸ್ಸಾಕ್ಷಿನಾ ಹುತಿ ತೆ ಖಾವೊ ನಕೊ. 29ಕದ್ಯಾಮ, ತಾರಾ ಸ್ವಂತ ಮನಸ್ಸಾಕ್ಷಿನಾ ಹುತಿ ನೈ, ತುನೆ ಕದಲವಾಲಾನಾ ಮನಸ್ಸಾಕ್ಷಿನಾ ಹುತಿ ಖೌ ನಕೊ. ತುಮೊಮಾ ಯಕ್ಲೊ"ತಿನಿ ಆಜಾ಼ದಿನೆ ಬಿಜೆ಼ಕ್ಲಾನಿ ಮನಸ್ಸಾಕ್ಷಿ ಕಾ ಅಡ್ಡ ಥೌ? ಕೈನ ಪುಚ಼್ಚ ಸಕಸ. 30ವರಿ "ಮಿ ಕ್ಹುದಾನೆ ಸ್ತೊತ್ರ ಕರಲ ರ‍್ಹಯಮ ವರಿ ಸ್ತೊತ್ರ ಕರಿನ ಖಾದಲ ಅನ್ನನಾ ಹುತಿ ಮಾರಾ ಉಪ್ಪರ ದುಷಣೆ ಕಾ? ಕೈನ ಪುಚ಼್ಚ ಸಕಸ. 31ತಿನೆ ಮಾರು ಜವಾಬ ಎ ವ್ಹೈ; ತುಮೆ ಖಾದ್ಯಾತಬಿ ಪಿದ್ಯಾತಬಿ ಸು ಕರಿತಬಿ ಕ್ಹುದಾನಿ ಮಹಿಮಾನಾ ಹುತಿ ಕರೊ. 32ಯೆಹುದಿಯೊನಾ ಹುತಿ ರ‍್ಹವಾದೆ, ಗ್ರಿಕವಾಲಾವೊನೆ ರ‍್ಹವಾದೆ, ಕ್ಹುದಾನಿ ಧರಮ ಸಭೆನಾ ಹುತಿ ರ‍್ಹವಾದೆ ಕರಾಲಾ ಥಾವೊ ನಕೊ. 33ಮಿ ತಬಿ ಮಾರಾ ಸ್ವಂತ ಚೊ಼ಕಾನಾ ಹುತಿ ವಿಚಾರ ಕರ‍್ಯಾವಾಚಿ ಕ್ಹಾರಾ ಜ಼ನಾವೊನಾ ಉದ್ಧಾರನಾ ಹುತಿ ತ್ಯುನು ಚೊ಼ಕು ಆಸ ಕರಿನ, ಕ್ಹಾರಾವೊನೆ ಕ್ಹಾರಾಮಾ ಮೆಚ್ಚಿಸಾನೆ ಕೊಶಿಶ ಕರುಸ.