1 ಕೊರಿಂಥ 12

1ಭಾಯೊ ಭೆನೊ, ಪವಿತ್ರ ಆತ್ಮಾನಾ ವರಾನಾ ಕ್ಹರಿನಾ ಹುತಿ ತುಮೆ ಚೊ಼ಕಿ ತರಾ ತಿಳ್ದಿಲಿವಾಲಾ ಥೌ. 2ತುಮೆ ಬರೊಕ್ಹಾಮಾ ನೈ ರ‍್ಹತಾಮಾ, ತುಮೊನೆ ಮನಸ್ಸೆ ಆಯಲ ತಿಮ್ಮ ಮುಕಿಯೊ ಮುರತಿಯೊ ಕನ ಗೈನ ಆತಾತಾ; ಎ ತುಮೊನೆಜ಼ ಗ್ವತ್ತ ಛೆ. 3ಅಕ್ಲು ತುಮೊನೆ ಕರೆಟ್ಟ ಗ್ವತ್ತ ರ‍್ಹವಾದೆ; ಪವಿತ್ರ ಆತ್ಮಾನಿ ಪ್ರೆರಣೆಕ್ಹು ಬೊಲಾಲೊ ಕುನ್ನಬಿ "ಯೆಸುನೆ ದಿಕ್ಕಾರ" ಕೆ ನೈ ಸಕ್ತೊ. ತಿನಾ ಲಿಂಗತಜ಼, ಪವಿತ್ರ ಆತ್ಮಾನಿ ಪ್ರೆರಣೆ ನೈಸೊ ಕುನ್ನಬಿ"ಯೆಸುಜ಼ ಪ್ರಭು ವ್ಹೈ" ಕೈನ ವಪ್ಪಿ ನೈ ಲೆಸಕ್ತೊ. 4ಆತ್ಮಿಕ ವರಾ ಬಿಜಾ಼ ಬಿಜಾ಼ ಛೆ; ತೆ ಕ್ಹಾರು ದಿವಾನು ಪವಿತ್ರ ಆತ್ಮಾ ಯಕ್ಲೊಜ಼ ವ್ಹೈ. 5ಸೆವಾ ಬಿಜಾ಼ ಬಿಜಾ಼ ಛೆ; ತೆನೈಸೊ ತೆ ಸೆವಾನೆ ಯೊಗ್ಯ ಪ್ರಭು ಯಕ್ಲೊಜ಼ ವ್ಹೈ. 6ಕಾಮ್ನಾ ತರಿಕಾ ಬಿಜಾ಼ ಬಿಜಾ಼ ಛೆ; ತೆ ಕ್ಹಾರು ಕ್ಹಾರಿ ತರಾಮಾ ಕರಾಲೊ ಕ್ಹುದಾ ಯಕ್ಲೊಜ಼ ವ್ಹೈ. 7ಹರ ಯಕ್ಲಾಮಾ ದಿಕ್ಹಿನ ಆವಾನಾ ಪವಿತ್ರ ಆತ್ಮಾನಾ ವರಾ ಕ್ಹಾರಾ ಜ಼ನಾವೊನಾ ಚೊ಼ಕಾನಾ ಹುತಿಜ಼ ದಿದಲ ವ್ಹೈ. 8ಪವಿತ್ರ ಆತ್ಮಾನಾ ಮುಲಕ ಯಕ್ಲಾನೆ ಗ್ಯಾನನಾ ವಾತೊ, ಬಿಜೆ಼ಕ್ಲಾನೆ ತಿನಾ ಮುಲಕ ಶಾಣಾನಿಯೊ ವಾತೊ ಬೊಲಾನು ಮಳಸ; 9ತೆಜ಼ ಪವಿತ್ರ ಆತ್ಮಾಕ್ಹು ಯಕ್ಲಾನೆ ಘನ್ನೊ ವಿಶ್ವಾಸ ಬಿಜೆ಼ಕ್ಲಾನೆ ಅರಾಮ ಕರಾನಿ ತಾಕತ ಮಳಸ. 10ಯಕ್ಲಾನೆ ಪವಾಡ ಕರಾನಿ ತಾಕತ, ಬಿಜೆಕ್ಲಾನೆ ಪ್ರವಾದನೆ ಕರಾನಿ ತಾಕತ, ವರಿ ಯಕ್ಲಾನೆ ಕ್ಹರಿನೆ ತಿಳ್ದಿಲಿವಾನು ಗ್ಯಾನ, ಬಿಜೆಕ್ಲಾನೆ ಬಿಜಾ಼ ಬಿಜಾ಼ ಭಾಶಾ ಬೊಲಾನಿ ತಾಕತ, ವರಿ ಯಕ್ಲಾನೆ ತೆ ಕ್ಹಾರು ತಿಳ್ದಿಲಿವಾನು ಅರು ತೆ ಪವಿತ್ರ ಆತ್ಮಾಕ್ಹು ದಿವಸ. 11ಎ ವರಾ ಕ್ಹಾರಾ ತೆ ಪವಿತ್ರ ಆತ್ಮಾ ಯಕ್ಕಜ಼ ತಿನಿ ಪಸಂದ ಲಿಂಗತ ಹರ ಯಕ್ಲಾನೆ ವಾಟಸ. 12ಅಂಗ ಯಕ್ಕಜ಼ ವ್ಹೈ; ಅಂಗನಾ ಭಾಗೊ ಘನ್ನಾ ವ್ಹೈ. ತೆ ಅಂಗನಾ ಭಾಗೊ ಘನ್ನಾ ರ‍್ಹಯಾತಬಿ ತೆ ಯಕ್ಕಜ಼ ಅಂಗ ವ್ಹೈ. ತಿನಾ ಲಿಂಗತಜ಼ ಕ್ರಿಸ್ತ ಯೆಸು ವ್ಹೈ. 13ಯಹುದ್ಯೊ ರ‍್ಹವಾದೆ, ಗ್ರಿಕವಾಲಾ ರ‍್ಹವಾದೆ, ಗುಲಾಮೊ ರ‍್ಹವಾದೆ, ಆಜಾ಼ದ ರ‍್ಹಯಲವಾಲಾ ರ‍್ಹವಾದೆ- ಅಪೆ ಕ್ಹಾರಾ ಯಕ್ಕಜ಼ ಅಂಗ ಥೌ ಕೈನ ಯಕ್ಕಜ಼ ಆತ್ಮಾಕ್ಹು ಬಾಪ್ತಿಸ್ಮ ಹೊಂದಿಲಿದ್ಯಾಸ. ಯಕ್ಕಜ಼ ಆತ್ಮಾನೆ ಅಪೊನೆ ಕ್ಹಾರಾವೊನೆ ಪಾನ ಥೈನ ದಿದಲ ಛೆ. 14ಪುರಾ ಅಂಗ ಯಕ್ಕಜ಼ ಅಂಗನು ಭಾಗಕ್ಹು ನ್ಹವೈ, ಘನ್ನಾ ಅಂಗನಾ ಭಾಗೊಕ್ಹು ಮಳಲ ಛೆ. 15ಕೆಳಾಮಾ ತುಬಿ ಪಗ್ಗ"ಮಿ ಹತ್ತ ನ್ಹವೈ, ಎ ಕಾರಣಕ್ಹು ಮಿ ಅಂಗನೆ ಮಳಿನ ನತ್ತಿ" ಕೈನ ಕದಲ ರ‍್ಹಯಮ ತೆ ಅಂಗನು ಭಾಗ ಥೈನ ರ‍್ಹವಾನು ಚು಼ಕಸ ಸು? 16ನೈತೊ ಕಾನ"ಮಿ ಡೊಳೊ ನ್ಹವೈ" ಎ ಕಾರಣಕ್ಹು ಕೈನ ಕದಲ ರ‍್ಹಯಮ ತೆ ಅಂಗನು ಭಾಗ ಥೈನ ರ‍್ಹವಾನು ಚು಼ಕಸ ಸು? 17ಅಂಗ ಪುರಾ ಡೊಳೊ ಥಯುಮ ತೆ ಐಕಾನು ಕಿಮ್ಮ? ನೈತೊ ತೆ ಪುರಾ ಕಾನಜ಼ ಥಯುಮ, ಬಾಸ ದೆಕಾನೆ ತಾಕತ ಕಿಜಾ಼ ಛೆ? 18ಚೊ಼ಕು ಛೆ, ಕ್ಹುದಾ ತಿನಿ ಚಿತ್ತ ಲಿಂಗತ, ಹರಯಕ್ಕ ಅಂಗನಾ ಭಾಗನೆ ಕರೆಟ್ಟ ಜೊಡಸಾಯೊಸ. 19ತೆ ಕ್ಹಾರಾ ಯಕ್ಕಜ಼ ಅಂಗನಾ ಭಾಗ ಥಯಾಮ ತ್ಯಾ ಅಂಗ ಕಿಜಾ಼ ಛೆ? 20ಇಮ್ಮ ಅಂಗನಾ ಭಾಗೊ ಘನ್ನಾ ರ‍್ಹಯಾತಬಿ ಅಂಗ ಪುರಾ ಯಕ್ಕಜ಼ ವ್ಹೈ. 21ಇಮ್ಮ ರ‍್ಹತಾಮಾ "ತಾರಿ ಜ಼ರುರತ ಮನೆ ನತ್ತಿ" ಕೈನ ಹತೆ ಡೊಳೊ ಕವಾನೆ ನೈ ಥಾತು. ತಿನಾ ಲಿಂಗತಜ಼"ತಾರಿ ಜ಼ರುರತ ಮನೆ ನತ್ತಿ" ಕೈನ ಪಗೊನೆ, ಮಾತು ಕವಾನೆ ನೈ ಥಾತು. 22ತೆಕ್ಲುಜ಼ ನೈ, ತಾಕತ ನೈಸೊ ದಿಕ್ಹಾನಾ ಅಂಗನಾ ಭಾಗೊ ಅಪೊನೆ ಚಾ಼ಯೆಜ಼. 23ನ್ಹಾನಾ ವ್ಹೈ ಕೈನ ಕವೈಲಿವಾನಾ ಅಂಗನಾ ಭಾಗೊ ಘನ್ನಾ‍ ಮ್ಹೊಟಾ ಕಾಮೊ ಕರಸ. ಜಾ಼ಕಿನ ಮ್ಹೆಲಾನಾ ಅಂಗನಾ ಭಾಗೊನೆ ಮರ್ಯಾದಿ ವಚಾ಼ಡಸ. 24ಚೊ಼ಕು ಅಂಗನಾ ಭಾಗೊನೆ ರಕ್ಷಣೆನಿ ಜ಼ರುರತ ನೈ ರ‍್ಹತಿ. ಅಂಗನೆ ತಯ್ಯಾರ ಕರಲ ಕ್ಹುದಾ ಕಮಿ ರ‍್ಹಯಲ ಅಂಗನಾ ಭಾಗೊನೆ ಘನ್ನಿ ಮರ್ಯಾದಿ ದಿದ್ಯೊಸ. 25ಅಂಗಮಾ ಭೆದ-ಭಾವ ನೈಸೊ ಅಂಗನಾ ಭಾಗೊನೆ ಯಕ್ನಾ ಯಕ್ಕನೆ ಚೊ಼ಕಾನಾ ಹುತಿ ಕರ‍್ಯೊಸ. 26ಯಕ್ಕ ಅಂಗನಾ ಭಾಗನೆ ದುಕ್ಕ ಥಯುಮ, ಕ್ಹಾರಾ ಅಂಗನಾ ಭಾಗೊ ತಿನಾ ಕ್ಹಾತೆ ದುಕ್ಕ ಖಾವಸ. ಯಕ್ಕ ಅಂಗನಾ ಭಾಗನೆ ಖುಶಿ ಥಯುಮ, ಉಗ್ರಲ ಕ್ಹಾರಾ ಅಂಗನಾ ಭಾಗೊ ತಿನಾ ಕ್ಹಾತೆ ಮಳಿನ ಖುಶಿ ಕರಸ. 27ತುಮೆ ಕ್ಹಾರಾ ಕ್ರಿಸ್ತ ಯೆಸುನು ಅಂಗ ಥಯಾಸ; ಹರಯಕ್ಲೊ ಎ ಅಂಗನು ಭಾಗ ಥಯೊಸ. 28ಕ್ಹುದಾ ತುಮಾರಾ ಸಭೆಮಾ, ಪೈಲಾ ಅಪೊಸ್ತಲೊನೆ, ಬೆವಾ ಪ್ರವಾದಿಯೊನೆ, ತನ್ವಾ ಮಾಸ್ತರೊನೆ ನೆಮಿಶೊಸ. ಪಾಚಲ್ತೊ ಪವಾಡ ಕರಾಲಾವೊನೆ, ರೊಗ ಅರಾಮ ಕರಾಲಾವೊನೆ, ಉಪಕಾರ ಕರಾಲಾವೊನೆ, ಸಭೆ ಚ಼ಲೈ ಲಿನ ಜಾ಼ವಾಲಾವೊನೆ, ಘನ್ನಾ ಭಾಷಾ ಬೊಲಾಲಾವೊನೆ ನೆಮಿಶೊಸ. 29ಕ್ಹಾರಾ ಜ಼ನಾ ಅಪೊಸ್ತಲೊ ನ್ಹವೈ, ಕ್ಹಾರಾ ಜ಼ನಾ ಪ್ರವಾದಿಯೊ ನ್ಹವೈ, ಕ್ಹಾರಾ ಜ಼ನಾ ಮಾಸ್ತರೊ ನ್ಹವೈ, ಕ್ಹಾರಾ ಜ಼ನಾ ಪವಾಡ ಕರಾಲಾ ನ್ಹವೈ, 30ಕ್ಹಾರಾ ಜ಼ನಾ ರೊಗೊ ಅರಾಮ ಕರಾಲಾ ನ್ಹವೈ, ಕ್ಹಾರಾ ಜ಼ನಾ ಘನ್ನಾ ಭಾಷಾ ಬೊಲಾಲಾ ನ್ಹವೈ, ನೈತೊ ಕ್ಹಾರಾ ಜ಼ನಾ ಭಾಷಾ ತಿಳಸೈನ ದಿವಾಲಾ ನ್ಹವೈ. 31ಖಾಸ ರ‍್ಹಯಲ ವರಾ ತುಮೆ ಪುರಾ ಶ್ರದ್ಧಾಕ್ಹು ಆಸ ಕರೊ. ಮಿ ತುಮೊನೆ ಹಜು಼ನ ಚೊ಼ಕಿ ರ‍್ಹಯಲ ವಾಟ ದೆಕಾಡುಸ;