Skip to content
BibleKenya

Sikkiligar Bible

ಮಿಕ 2

ಇಸ್ರಾಯಲನು ಪಾಪ

ಪಾಪ ಕರಾನೆ ವಿಚಾರ ಕರಾಲಾನೆ ಸಂಕಟ ಆವಸ. ಇವ್ನೆ ವಚ್ಚಾನಾಪರ ಪಡಿನ ಪಾಪ ಕರಾನೆ ವಿಚಾರ ಕರಸ. ಪಾಟೆ ಸುರ್ಯೊ ಹುಟ್ತಾಮಾ ತ್ಯುನೆ ವಿಚಾರ ಕರಲ ಪಾಪೊನೆ ಕಾಮ ನಿಂಗತ ಕರಸ ಕಾ? ಕಾಕದ್ಯಾಮ ತ್ಯುನೊನೆ ತ್ಯುನಾ ಇಷ್ಟಾನಿಂಗತ ಚಾ಼ಲಾನೆ ತಾಕತ ಛೆ. ತ್ಯುನೊನೆ ಕ್ಹೆತರೊನಾ ಗಾದಿಯೊ ಚಾ಼ಯೆ, ತಿನೆ ತ್ಯುನೆ ಲಿವಸ. ತ್ಯುನೊನೆ ಘರೊ ಚ಼ಾಯೆ, ತಿನೆ ತ್ಯುನೆ ಲಿವಸ. ಯಕ್ಲಾನೆ ಮೊಸ ಕರಿನ ತಿನೆ ಘರನೆ ಕಾಳ್ಳಿವಸ. ಹಜಿಯಕ್ಲಾನೆ ಮೊಸ ಕರಿನ ತಿನಾ ಕ್ಹೆತರನಾ ಗಾದಿಯೊ ಕಾಳ್ಳಿವಸ.

ತಿನಾಹುತಿ ಯಹೊವಾ ಅಮ್ಮ ಕವಸ: ದೆಕೊ, ಮಿ ಆಂ ಕುಟುಂಬನಾ ವಿರುದ್ದ ಕಷ್ಟ ಲಾವಾನೆ ವಿಚಾರ ಕರಾಡೊಸ. ತುನೆ ತು ವಚಾ಼ಡಿ ಲಿವಾನೆ ಸಾದ್ಯ ರ‍್ಹತು ನೈ. ಕೆಟ್ಟ ದಿನೊ ಆವಾನಾಹುತಿ ತುಮೆ ಫುಗ್ಗಾನು ಹುಬ್ರಾಡೊಸಿ. ತೆಳಾಮಾ ಮನಕ್ಹೊ ತುಮಾರಾಹುತಿ ಗಿದ್ದ ಕವಸ. ಮನಕ್ಹೊ ಶೊಕ ಗಿದ್ದ ಕವಸ. ಹಮೆ ನಾಶ ಥಯಾ! ಯಹೊವಾ ಹಮಾರಾ ದೆಶ ಲಿನ ಬಿಜಾ಼ ಮನಕ್ಹೊನೆ ದಿದ್ಯೊ. ಹೊ, ತೆ ಅಪ್ನಿ ಜಿಮಿನ ಅಪೊಕಂತಿ ಕಾಳ್ಳಿಲಿದ್ಯೊ, ಹಮಾರಾ ಗಾದಿಯೊನೆ ಅಪ್ನಾ ದುಶ್ಮನೊನಾ ಹತ್ಮಾ ದಿದ್ಯೊ.

ಹಮ್ನಾ ಅಪೆ ಅಪ್ನಿ ಜಿಮಿನ ಅಳತಿ ಕರಿನ ಕ್ಹುದಾನಾ ಮನಕ್ಹೊನೆ ವಾಟಾನೆ ಥಾತು ನೈ.

ಮನಕ್ಹೊ, ತು ಮನೆ ಕೌ ನಕೊ, ತೆ ಕೆಟ್ಟ ವಿಷಯೊನೆ ಹಮೊನೆ ಕೌ ನಕೊ, ಹಮೊನೆ ಕಯಾಜ ಕೆಟ್ಟ ವಿಷಯೊ ಸೆರತಾ ನೈ ಕೈನ ಕವಸ. ತೆನೈಸೊ ಇಸ್ರಾಯೆಲನಾ ಮನಕ್ಹೊ, ಮಿ ತುಮೊನೆ ಕೌಜ಼. ತುಮಾರಾ ದುಷ್ಟನಾಹುತಿ ಯಹೊವಾ ತಿನು ತಾಳ್ಮೆ ಜ಼ವೈಲಿದ್ಯೊಸ? ತುಮೆ ಫೈಸಲಾ ತರಿಕಾಮಾ ಜಿವ್ನಾ ಕರ್ತಾ ರ‍್ಹಯಾರೆ ಮಿ ತುಮೊನೆ ಚೊ಼ಕಾ ಸಂಗತಿಯೊ ಕತೊತೊ?

ತೆನೈಸೊ ಮನೆ ದುಶ್ಮನ ನಿಂಗತ ಉಟಿನ ಹುಬ್ರಯಲ ಮಾರಾ ಮನಕ್ಹೊ, ತುಮೆ ದಾಟಿನ ಜಾ಼ವಾಲಾವೊನಾ ವಣ್ಣಾವೊನೆ ತ್ಯುನಾ ಪಿಟ್ಟಪರ್ತಾ ಕಿತ್ತಿಲಿವೊ. ನಿಭರ್ಯ ಥೈನ ನ್ಹಾಟಾಲಾ ಮನಕ್ಹೊ ಕಂತು ಕೈದಿಯೊ ವ್ಹೈಕೈನ ಛಿಲ್ಲಿ ಲಿವೊಸಿ. ಮಾರಾ ಮನಕ್ಹೊ ಬಾಕ್ಡಿಯೊ ಹತ್ಮಾತಾ ಚೊ಼ಕಾ ರ‍್ಹಯಲ ಘರೊನೆ ಕಾಳ್ಳಿಲಿದ್ಯಾಸ; ತ್ಯುನಾ ನ್ಹಾನಾ ಬಚ್ಚಾವೊಕಂತು ಮಾರಿ ಆಸ್ತಿನೆ ಹಮೆಶ್ಯಾನಾಹುತಿ ಕಾಳ್ಳಿಲಿದ್ಯಾಸ. ಉಟಿನ ಆಂ ಜ಼ಗಾ ಛೊಡಿನ ಜಾ಼. ಆಂ ತಾರಿ ಅರಾಮ ಕರಾನಿ ಜ಼ಗಾ ನ್ಹವೈ, ಕಾ ಕದ್ಯಾಮ ತು ಇನೆ ಹಾಳ ಕರ್ಯೊಸ. ತು ಇನೆ ಹೊಲಸ ಕರ್ಯೊಸ, ತಿನಾಹುತಿ ಎ ನಾಶ ಥಾವಸ; ಘನಾ ಕೆಟ್ಟ ತರಿಕಾಮಾ ಹಾಳ ಕರಸ. ಆಂ ಮನಕ್ಹೊ ಮಾರಾ ವಾತೊ ಐಕಾನೆ ಪಸಂದ ಕರ್ತಾ ನೈ. ತೆನೈಸೊ ಬಿಜ಼ಯಕ್ಲಾನಾ ಸುಳ್ಳ ವಾತೊ ಐಕಾನೆ ಪಸಂದ ಕರಸ. ಸುಳ್ಳ ಪ್ರವಾದಿಯೊ ಐನ , ತುಮೊನೆ ಚೊ಼ಕು ಭವಿಶ್ಯ ಛೆ ಚಾ಼ಯೆಅಕ್ಲು ದ್ರಾಕ್ಷಿಯೊನು ರಕ್ಹ, ದಾರುಬಿ ತುಮೊನೆ ಮಳಸ. ಕೈನ ಕದ್ಯಾರೆ ತ್ಯುನೆ ತಿನೆ ನಂಬಿ ಸಿಕ್ವಾರ ಕರಸ.

ಇಸ್ರಾಯೆಲನಿ ವಚಾ಼ಡಾನಾ ಹುತಿ ವಾಗ್ದಾನ

ಯಾಕೊಬನ ಮನಕ್ಹೊ, ಮಿ ತುಮೊನೆ ಯಕ್ಕಜ ಜ಼ಗಾಜ಼ ಮಳೌಸ. ಇಸ್ರಾಯಲಮಾ ಉಗ್ರಲವಾಲಾವೊನೆ ಯಕ್ಕಜ ಜ಼ಗಾ ಮಳೌಸ. ಹಟ್ಟಿಮಾ ಬಕ್ರಾವೊನೆ ಸೆರಸಾವಾ ನಿಂಗತ, ಚಾ಼ರೊಮಾ ಯಕ್ಕ ಜ಼ಗಾ ಮಳಾವಸ. ತೆಳಾಮಾ ತೆ ಜ಼ಗಾ ಮನಕ್ಹೊನಾ ಗದ್ದಲಕ್ಹು ಭರಿಜಾ಼ವಸ. ತೆಳಾಮಾ ಮಾರಾಲೊ ಮನಕ್ಹೊನಾ ಕ್ಹಾಮೊ ಕ್ಹಾಮೊ ಗೈನ ಬಾಕಲೊನೆ ಫೊಡಲ್ಪರ ಮನಕ್ಹೊನಾ ಗಾಮನೆ ಛೊಡಿನ ಜಾ಼ವಸ. ತ್ಯುನೆ ತ್ಯುನಾ ರಾಜಾ಼ನೆ ಕರ್ತಾನೆ ಕಾಯ್ದಿಲಿನ ತ್ಯಾಂತಾ ಜಾ಼ವಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.