Sikkiligar Bible
ಮಿಕ 3
ಇಸ್ರಾಯೆಲನಾ ಶಾನಾವೊನು ಖಂಡನಾ
ಐಕೊ, ಯಾಕೊಬನಾ ಮಾಲಕೊ, ಇಸ್ರಾಯಲನಾ ಅಧಿಪತಿಯೊ ಮಾರಿ ವಾತ ಐಕೊ. ನ್ಯಾಯ ಸುವೈ ಕೈನ ತುಮೊನೆ ಗೊತ್ತ ರ್ಹೌ. ತುಮೆ ಶಿಷ್ಟತನಾನೆ ದ್ವೆಶ ಕರಿನ ದುಷ್ಟತನಾನೆ ಮಯಾ ಕರೊಸಿ! ತುಮೆ ಮನಕ್ಹೊನಾ ಚಾ಼ಮ್ಡಾನೆ ಛಿಲ್ತಾ ತ್ಯುನಾ ಹಡ್ಕಾಮಾತಾ ಮಾಕ್ಹನೆ ಕಿತ್ತಿ ಲಿವೊಸಿ. ತುಮೆ ಮಾರಾ ಮನಕ್ಹೊನಾ ಅಂಗಮಾತಾ ಚಾ಼ಮ್ಡು ಕಾಡಿನ ಹಡ್ಕಾವೊನೆ ತುಕ್ಡಾ ಕರಿನ ತ್ಯುನೊನೆ ನಾಶ ಕರೊಸಿ. ತಪಾಲಾವೊಮಾ ಚ಼ಡಾವಾನೆ ಮಾಕ್ಹ ಕಾಟಿನ ಘಾಲಾನಾನಿಂಗತ ತುಮೆ ತ್ಯುನಾ ಹಡ್ಕಾವೊನೆ ತುಕ್ಡಾ ಕರೊಸಿ. ತುಮೆ ಯಹೊವಾನೆ ಪ್ರಾರ್ಥಾನಾ ಕರಸಕೊಸಿ. ತೆನೈಸೊ ತೆ ತುಮೊನೆ ಉತ್ತರ ನೈದೆತೊ. ತುಮಾರಾ ಕೆಟ್ಟ ಪಾಪೊನಾಹುತಿ ತ್ಯುನಾ ಮ್ಹೊಡಾ ಝಾಕಿ ಲಿವಸ.
ದಕ್ಹಾಜ಼ನಾ ಸುಳ್ಳ ಪ್ರವಾದಿಯೊ ಯಹೊವಾನಾ ಮನಕ್ಹೊನೆ ಸುಳ್ಳನೆ ಕವಸ. ಥ್ಯವಾವೊನಾಹುತಿ ಯಹೊವಾ ಕವಾನು ಸುವೈ ಕದ್ಯಾಮ, ಆಂ ಪ್ರವಾದಿಯೊನಾ ವಾತೊ ತ್ಯುನಾ ಪೆಟೊ ಭರಲಿವಾನೆ ವೈ. ಮನಕ್ಹೊ ತ್ಯುನೊನೆ ಅನ್ನ ದಿದ್ಯಾರೆ ಕ್ಹುಶಿಕ್ಹು ವಾಗ್ದಾನಾ ಕರಸ. ಮನಕ್ಹೊ ತ್ಯುನೊನೆ ಅನ್ನ ನೈ ದಿದ್ಯಾರೆ ಯುದ್ದನು ವಾಗ್ದಾನ ಕರಸ. ಇಮ್ಮ ರ್ಹತಾಮಾ ತುಮೊನೆ ರಾತ ಥಾವಸ. ತುಮೊನೆ ದರ್ಶನೊ ನೈ ಥಾತಾ. ಅಗು ಸು ಚಾ಼ಲಸ ಕವಾನು ತುಮೆ ನೈ ದೆಕ್ತಾ. ತಿನಾಹುತಿ ತುಮೊನೆ ಅಂದಾರಾ ನಿಂಗತ ಛೆ. ಪ್ರವಾದಿಯೊನೆ ಸುರ್ಯೊ ಡುಬಲ ರ್ಹವಸ. ತ್ಯುನೊನೆ ಅಗು ಥಾವಾನು ದಿಕ್ಹತು ನೈ. ತಿನಾಹುತಿ ತ್ಯುನೊನೆ ಕ್ಹಾರುಜ಼ ಘನ್ನು ಅಂದಾರು ಥಯುಸ. ಕ್ಹುದಾನೆ ದೆಕಲವಾಲಾ ಸರಮಾಯಾಸ. ಭವಿಶ್ಯ ಕವಾಲಾ ನೈ ಸರಮಾಲಾ ಥಯಾಸ. ಕಾ ಕದ್ಯಾಮ ಕ್ಹುದಾಬಿ ತ್ಯುನಾಕ್ಹಾತೆ ಬೊಲಾನು ಹುಬ್ರಾಡಲಕ್ಹು ತ್ಯುನೆ ಸುಜ಼ ಕತಾ ನೈ.
ಯಹೊವಾನಿ ಆತ್ಮಾ ಮಾರಾಮಾ ಅದಿಕಾರಬಿ ಚೊ಼ಕುತನಾಬಿ ತಾಕತಬಿ ಭರ್ಯೊಸ. ಕಾ ಕದ್ಯಾಮ ಯಾಕೊಬನಾ ದ್ರೊಹ ತಿಳಸಾವಾನೆ ತೆಕ್ಲುಜ಼ ವೈ, ಇಸ್ರಾಯಲನಾ ಪಾಪೊ ತಿನೆ ಕವಾನಾಹುತಿ ತಯಾರ ಥಯಾಸ ” ಯಾಕೊಬನಾ ಘರನಾ ಮಾಲಕೊ, ಇಸ್ರಾಲನಾ ಮ್ಹೊಟಾ ಮನಕ್ಹೊ ನ್ಯಾಯನಿ ಜಿವ್ನಾನೆ ತುಮೆ ದ್ವೆಶ ಕರೊಸಿ. ಕರೆಟ್ಟ ವರಿ ತಪ್ಪ ಕರಾಲಾ ಮಾರಾ ವಾತೊ ಐಕೊ.. ಮನಕ್ಹೊನೆ ಕಲಾಸ ಕರಿನ ಚಿಯೊನನೆ ಭಾಂದೊಸಿ. ಮನಕ್ಹೊನೆ ಮೊಸ ಕರಿನ ಯರುಸಲೆಮನೆ ಭಾಂದೊಸಿ. ಯರುಸಲೆಮನಾ ನ್ಯಾಯಾ ಕರಾಲಾ ಲಂಚಾ ಲಿನ ಅನ್ಯಾಯನಾಹುತಿ ಫೈಸಲೊ ದಿವೊಸಿ. ಮನಕ್ಹೊನೆ ಕವಾತಿ ಪೈಲಾಜ಼ ಯರುಸಲೆಮನಾ ಮ್ಹೊಟಾ ಮನಕ್ಹೊ ದೊಕ್ಡಾನೆ ವಸೂಲಿ ಕರಸ. ಮನಕ್ಹೊ ತ್ಯುನಾ ಭವಿಷ್ಯನಾಹುತಿ ಪುಚ್ಚಾನೆ ಪ್ರವಾದಿಯೊನೆ ಪೈಲಾಜ಼ ದೊಕ್ಡಾ ದಿವಸ. ಪಾಚಲ್ತಾ ತೆ ನಾಯಕೊ, ಯಹೊವಾಪರ ವಜ್ಜು ಘಾಲಿನ ಯಹೊವಾ ಹಮಾರಾಮಾ ಕ್ಹಾತೆ ಛೆ. ತಿನಾಹುತಿ ಹಮೊನೆ ಕೆಟ್ಟ ಸುಜ಼ ಲಾಗತು ನೈ ಕೈನ ಕವಸ.
ನಾಯಕೊ, ತುಮಾರಾಕ್ಹು ಚಿಯೊನ ನಾಶ ಥಾವಸ. ನೆಗಿಲತು ಹುಟ್ಟಲ ಕ್ಹೆತರತಿ ತೆ ರ್ಹವಸ. ಯರುಸಲೆಮ ಹಾಳ ಪಡಿನ ರಾಶಿ ಥಾವಸ. ಆಲಯನು ಡೊಂಗರ ಮ್ಹೊಟು ಡೊಂಗರ ಥಾವಸ. ತಿನಾ ಉಪ್ಪರ ಪೊದೆವೊ ಹುಲುಥೈನ ಬೆಳದಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.