Sikkiligar Bible
ಮಿಕ 1
ಸಮಾರ್ಯಾ ವರಿ ಯರುಸಲೆಮನೆ ಅಗು ಥಾವಾನು ನಾಶ
ಸಮಾರ್ಯಾ ವರಿ ಯೆರುಸೆಲಮನೆ ಥಾವಾನೆ ನಾಶನಾಹುತಿ ಕವಾನು ಯಹೊವಾನಾ ವಾತೊ ಮಿಕಾನೆ ಐಕು ಆಯಾ. ರಾಜೊ಼ ಥಯಲ ಯೊಥಾಮ, ಅಹಾಮ ವರಿ ಹಿಜ್ಕಿಯವಾಲಾವೊನಿ ಆಳ್ವಿಕೆನಾ ಟೈಮಮಾ ಎ ಥಯು. ಇವ್ನೆ ಯಹುದ ರಾಜ್ಯನಾ ರಾಜಾ಼ವೊ ವ್ಹೈ. ಮಿಕ ಮೊರೆಷೆತವಾಲೊ ವ್ಹೈ. ತೆ ಸಮಾರ್ಯ ವರಿ ಯೆರುಸಲೆಮನಾ ವಿಷಯಮಾ ದರ್ಶನ ದೆಕ್ಯೊ.
ಕ್ಹಾರಾ ಮನಕ್ಹೊ, ಐಕೊ!
ಜಿಮಿನಬಿ ತಿಮಾ ರ್ಹಯಲ ಕ್ಹಾರಾ ಜ಼ನಾ ಐಕೊ! ಮಾರೊ ಮಾಲಕ ಥಯಲ ಯಹೊವಾ ತಿನಾ ಪವಿತ್ರ ಆಲಯಮಾತೊ ಆವಸ.
ತುಮಾರಾ ವಿರುದ್ದ ಸಾಕ್ಷಿ ಥೈನ ತೆ ಆವಸ. ಯಹೊವಾ ತಿನಾ ಪರಿಶುದ್ಧ ಜ಼ಗಾತೊ ಹೆಟೊ ಆವಾನು ದೆಕೊ. ತೆ ದುನಿಯಾನಾಮಾ ರ್ಹಯಲ ಉಚ್ಚಿ ಜ಼ಗಾಪರ ಚಾ಼ಲಾನೆ ಆವಾಡೊಸ.
ಆಗಮಾ ಮೆಣಬತ್ತಿ ಕರ್ಗೆಲಿಂಗತ ಡೊಂಗರೊ ತಿನಾ
ಪಗೊನಾ ಹೆಟಾ ಕರ್ಗಿ ಜಾ಼ವಸ.
ಖಾಡಿಯೊ ಜು಼ದಿಯೊ ಥೈನ ಪಾನಿ ಲಿಂಗತ
ನ್ಹಾನಿಯೊ ವಾಟೊತಾ ಜೊ಼ರ ಹರ್ದಿನ ಜಾ಼ವಸ.
ಎ ಕ್ಹಾರಾನೆ ಕಾರಣ ಯಾಕೊಬನಾ ಪಗೊಜ಼ ವ್ಹೈ, ಇಸ್ರಾಯೆಲವಾಲಾವೊನಾ ಮೊಸಜ಼ ವ್ಹೈ! ಯಾಕೊಬ ಪಾಪ ಕರಲಕ್ಹು ಕಾರಣ ಸು ವ್ಹೈ? ಸಮಾರ್ಯಜ಼ ಕಾರಣ ವ್ಹೈ. ಯಹುದನು ಉನ್ನತ ಜ಼ಗಾ ಕೈ ವ್ಹೈ? ತೆಜ಼ ಯೆರುಸಲೆಮ ವ್ಹೈ! ತಿನಾಹುತಿ ಮಿ ಸಮಾರ್ಯನೆ ದಗ್ಡಾವೊನಿ ರಾಶಿ ಕರುಸ. ತೆ ದ್ರಾಕ್ಷಿಯೊನಿ ಬಳ್ಳಿ ಘಾಲಾನೆ ತಯ್ಯಾರ ಥಾವಸ. ಸಮಾರ್ಯನಾ ಕ್ಹಾರಾ ದಗ್ಡಾವೊನೆ ಖಾಡಿಮಾ ನಾಕಿಪಡುಸ; ತೆಳಾಮಾ ತ್ಯಾ ಖಾಲಿ ಫಾಂಯಾಜ಼ ದಿಕ್ಹಸ. ತಿನಾ ಕ್ಹಾರಾ ಮುರ್ತಿಯೊ ಫೊಡಿನ ಪುಡಿ ಥಾವಸ. ತಿನಾ ವ್ಯಬಿಚಾರಿನಾ ದೊಕ್ಡಾ ಆಗಮಾ ಬಳಿ ಜಾ಼ವಸ. ತಿನಾ ಸುಳ್ಳ ಕ್ಹುದಾವೊನಾ ಕ್ಹಾರಾ ಮುರ್ತಿಯೊನೆ ನಾಶ ಕರುಸ. ಕಾಕದ್ಯಾಮ ಸಮಾರ್ಯ ಮನೆ ಬರೊಕ್ಹೊ ನೈ ರ್ಹಯಲವಾಲಾ ಥೈನ ಸೌಕಾರ ಥೈ. ಮನೆ ನೈ ಬರೊಕ್ಹೊ ಕರಾಲಾ ಕ್ಹಾರಾ ತಿಕಂತು ತೆ ಕಾಳ್ಳಿವಸ.
ಅಗಾ ಥಾವಾನಾ ಘಟನೆನಾಹುತಿ ಮಿ ಘನ್ನು ದುಖಿ ಥಯೊಸ. ಮಿ ವಣ್ಣಾ ರ್ಹವಾದೆ ಕಾರಮಲಿಯೊ ರ್ಹವಾದೆ ಘಾಲ್ಲಿದ್ಯಾವಾಚಿ ಜೌ಼ಸ. ನರಿ ಲಿಂಗತ ರೌಸ, ಉಲ್ಲು ಪಕ್ಷಿ ಲಿಂಗತ ಗೊಳಾಡುಸ. ಸಮಾರ್ಯನು ದುಕ್ಕ ಅರಾಮ ಥಾತು ನೈ. ತಿನು ರೊಗ ಯೆಹುದನೆ ಫೈಲ್ಯುಸ. ತೆ ಮಾರಾ ಮನಕ್ಹೊನಾ ಗಾಮತು ಯೆರುಸಲೆಮ ಲಕ್ಕಾ ಫೈಲ್ಯಲ ಛೆ.
ಇನೆ ಗತ್ತ ಮಾ ತಿಳ್ಸಾವೊ ನಕೊ, ವರಿ ರವೊ ನಕೊ. ಬೆತ ಒಫ್ರದ ಧುಳಮಾ ಉಳ್ಳಾಡೊ, ಶಾಫಿರ ಮಾ ರ್ಹವಾಲಾ, ಉಗಾಡಾ ಥೈನ ಸರಮಕ್ಹು ಚಾ಼ಲೊ. ಚಾನಾನ್ ಮಾ ರ್ಹವಾಲಾ ಭಾರಾ ಆತಾ ನೈ. ಬೆತೆಚೆಲಮಾನಾ ಮನಕ್ಹೊ ರವಸ, ತುಮೊನೆ ತ್ಯುನೆ ದೆತಾ ರ್ಹಯಲ ಪ್ರೊತ್ಸಾಹ ಪಾಚಾ಼ ಲಿವಸ. ಮಾರೊತ್ ಮಾ ರ್ಹವಾಲಾ ಮನಕ್ಹೊ ಕಮ್ಜೊರ ಥಯಾಸ. ತ್ಯುನೆ ಚೊ಼ಕಿ ಸುವಾರ್ತೆನಾಹುತಿ ಕೈದಾಡಾಸ. ಕಾಕದ್ಯಾಮ ಯೆರುಸಲೆಮ ಗಾಮನಾ ಬಾಕಲೊಕನ ಯಹೊವಾಕ್ಹು ಮುಶ್ಕಿಲ ಐಸ. ಲಾಕಿಷಮಾ ರ್ಹವಾಲಾ, ಜೊ಼ರ ನ್ಹಾಟಾನಾ ಘೊಡಾನೆ ತಾರಿ ರಥೊನೆ ಭಾಂದೊ. ಚಿಯೊನನು ಪಾಪ ಲಾಕಿಷಮಾ ಶುರು ಥಯು. ಕಾಕದ್ಯಾಮ ತು ಇಸ್ರೆಲನು ಪಾಪ ವರಿ ದ್ರೊಹ ಕರ್ಯೊಸ. ತಿನಾಹುತಿ ಮೊರೆಷತ್ತಮಾ ರ್ಹವಾನಾ ಗತ್ತನೆ ನೆ ದಿವಾನಾ ಕಾಣಿಕೆನೆ ದೆ.ಅಕ್ವಿಬಿನಾ ಕುಟುಂಬೊ ಇಸ್ರೆಲ ರಾಜಾ಼ವೊನೆ ಮೊಸ ಥಾವಸ.
ಮಾರೆಷಮಾ ರ್ಹವಾಲಾ ಮನಕ್ಹೊ, ತುಮೊನೆ ವಿರುದ್ದ ಥೈನ ಮಿ ನಾಯಕೊನೆ ಬಲೌಸ. ತೆ ತುಮೊಕನ ರ್ಹವಾನಾ ಸಾಮನೊ ಕಿತ್ತಿ ಲಿವಸ. ಇಸ್ರೆಲನಿ ವೈಭವ ಅದುಲ್ಲಾಮಿನೆ ಆವಸ. ತಾರಾ ಬಾಲೊ ಬೊಳ್ಸಿಲೆ; ಕಾಕದ್ಯಾಮ ತು ಮಯಾ ಕರಾನಾ ಬಚ್ಚಾ಼ವೊನಾಹುತಿ ತು ರೊಶಿ. ರಣಹದ್ದ ಲಿಂಗತತಾರು ಮಾತು ಟಕ್ಲು ಥಾವಾದೆ. ತಾರಾ ದುಖನೆ ದೆಕಾಡ. ಕಾಕದ್ಯಾಮ ತಾರಾ ಬಚ್ಚಾ಼ತುಕ್ಹು ಉದಾಳಿಲಿವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.