Sikkiligar Bible
ಯೆಹುಶು 6
ಯೆರಿಕೊ ಪಡಾನು
ಯೆರಿಕೊನಾ ಇಸ್ರಾಯಲೊನೆ ಬುಚ್ಕಿನ ತ್ಯುನಾ ಗಾಮನಾ ಬಾಕಲೊನೆ ಘಟ್ಟ ಘಾಲಿಪಡ್ಯಾ.ಕುನ್ನಜ ಮ್ಹೈ ಗಯಾ ನೈ ಭಾರಾ ಆಯಾನೈ ತೆಳಾಮಾ ಯಹೊವಾ ಯೆಹುಶುವಾನೆ ದೆಕ ಮಿ ಯೆರಿಕೊನೆ ತೆನಾ ರಾಜಾವೊನೆ ಯುದ್ದ ವಿರೊನೆ ತಾರಾ ಹತೆ ಒಪ್ಪಶೊಸ. ತುಮಾರಾ ಭಟ್ಟೊಕ್ಹಾರಾ ಛೆ ದಿನಲಕ್ಕಾ ಯಕ್ಕಸಲಾ ಗಾಮನೆ ಫರು. ಕ್ಹಾತ ಜನಾ ಯಾಜಕೊ ಶಿಂಗ್ಡಾವೊನೆ ಧರಲಿನ ಮಂಜುಷನಾ ಕ್ಹಾಮಾ ಚಾಲಾಂದೆ. ಕ್ಹಾತವಾ ದಿನ್ನೆ ತುಮೆ ಗಾಮನೆ ಕ್ಹಾತಸಲಾ ಸುತ್ತೊ; ಯಾಜಕೊ ಶಿಂಗ್ಡಾವೊನೆ ಫುಕ್ಯು. ತ್ಯುನೆ ಧಿರ್ಘ ಥೈನ ಫುಕ್ಕಾನೆ ಶಿಂಗ್ಡಾನೆ ಅವಾಜ ಐಕ್ತಾಮಾ ತುಮೆ ಕ್ಹಾರಾ ಮಹತ್ತ ಥೈನ ಆರ್ಭಟೊ ತೆಳಾಮಾ ಗಾಮನಿ ಗೊಡಿ ತೆಜ ಪಡಿಜಾ಼ವಸ ಹರಯಕ್ಲೊ ಸಿದಾ ಮ್ಹೈ ಜಾಸಕಸ ಕೈನ ಕದ್ಯೊ. ತೆಳಾಮಾ ನೂನನೊ ದಿಕ್ರೊ ಥಯಲ ಯೆಹುಶುವಾ ಯಾಜಕೊನೆ ಬಲೈನ ತ್ಯುನೊನೆ ಒಡಂಬಡಿಕೆನಾ ಮಂಜುಷನೆ ಉಚೈಲಿನ ಜಾವೊ ಕ್ಹಾತ ಜನಾ ಯಾಜಕೊ ಶಿಂಗ್ಡಾವೊನೆ ಧರಲಿನ ಯಹೊವಾನಾ ಮಂಜುಷನಾ ಕ್ಹಾಮಾ ಜಾವಾದೆ ಕದ್ಯೊ. ವರಿ ತೆ ಮನಕ್ಹೊನೆ ಗೈನ ಗಾಮನೆ ಫರ್ಯೊ. ಯುದ್ಧ ಸನ್ನದ ಕ್ಹಾರಾ ಯಹೊವಾನಾ ಮಂಜುಷನಾ ಕ್ಹಾಮಾ ಜಾವಾದೆ ಕೈನ ಕದ್ಯೊ. ಯೆಹುಶುವಶಾ ಆಜ್ಞಾಕರಲ ನಿಂಗತ ಕ್ಹಾತ ಜನಾ ಯಾಜಕೊ ಶಿಂಗ್ಡಾವೊನೆ ಧರಲಿನ ಫುಕತ್ತಾ ಯಹೊವಾನಾ ಕ್ಹಾಮಾ ಚಾಲ್ಯಾ. ಯಹೊವಾನಾ ಮಂಜುಷ ತ್ಯುನಾ ಪಾಚು ಗಯು. ಯುದ್ಧ ಸನ್ನದ ಥಯಲವಾಲಾ ಶಿಂಗ್ಡಾವೊನೆ ಫುಕತ್ತಾ ಯಾಜಕೊನಾ ಕ್ಹಾಮಾ ವ್ಹತ್ತಾ. ಪಾಚ಼ಲ್ಯೊ ದಳ ಮಂಜುಷನಾ ಪಾಚು ವ್ಹತ್ತು.ಶಿಂಗ್ಡಾವೊನೆ ಫುಕತಾ ಚಾ಼ಲ್ಯಾತಾ. ಯೆಹುಶುವಾ ಮನಕ್ಹೊನೆ ತುಮೆ ಹಮ್ನಾ ಆರ್ಬಟ ನೈ ಕರು; ತುಮಾರಿ ಅವಾಜ ಐಕುಕೈನ ತುಮಾರಾ ಮ್ಹೊಡಾಕ್ಹು ಯಕ್ಕ ವಾತ ತಬಿ ಔಕೈನ ಆರ್ಭಟೊ ಕೈನ ಮಿ ಕವಾನಾ ದಿನಮಾ ಮಾತ್ರ ಆರ್ಭಟೊ ಕೈನ ಆಜ್ಞೆ ಕರ್ಯೊ. ತೆ ಯಹೊವಾನಾ ಮಂಜುಷನೆ ಯಕ್ಕ ಸಲಾ ಗಾಮನೆ ಸುತ್ತಲ್ಪರ ತ್ಯುನೆ ಫರಿನ ಪಾಳೆಯೆ ಐನ ರಾತ ಕಾಟ್ಯಾ. ಯೆಹುಶುವಾ ಪಾಟೆ ಉಟ್ಯೊ.ಯಾಜಕೊ ಯಹೊವಾನಾ ಮಂಜುಷನೆ ಉಚೈಲಿನ ಚಾಲ್ಯಾ. ಕ್ಹಾತಜನಾ ಯಾಜಕೊ ಶಿಂಗ್ಡಾವಿನೆ ಫುಕತಾ ಯಹೊವಾನಾ ಮಂಜುಷನಾ ಕ್ಹಾಮಾ ಚಾಲ್ಯಾ. ಯುದ್ಧ ಸನ್ನದೊ ತ್ಯುನಾ ಕ್ಹಾಮಾ ವ್ಹತ್ತಾ; ಪಾಚಲ್ಯು ದಳ ಯಹೊವಾನಾ ಮಂಜುಷನಾ ಪಾಚು ವ್ಹತ್ತು. ಶಿಂಗ್ಡಾವೊನೆ ಫುಕ್ತಾಜಾ ಚಾ಼ಲ್ಯಾತಾ. ಅಮ್ಮಜ ಬೆವಾ ದಿನಮಾ ಗಾಮನೆ ಸುತ್ತಿನ ಪಾಳೆನೆ ಪಾಚಾ ಫರ್xಯಾ. ಛೆ ದಿನಲಕ್ಕಾಬಿ ಅಮ್ಮಜ ಕರ್ಯಾ. ಕ್ಹಾತವಾ ದಿನಮಾ ತುನೆ ಸರ್ಯೊಹುಟ್ಟಾತಿ ಪೈಲಾಜ ಉಟಿನ ತೆಜ ಕ್ರಮಮಾ ಗಾಮನೆ ಕ್ಹಾತಸಲಾ ಸುತ್ಯಾ.ತೆ ದಿನಮಾ ಯಕ್ಕಜ ತೆ ಕ್ಹಾತ ಸಲಾ ಸುತ್ಯಾ. ಕ್ಹಾತವಾ ಸಲಾ ಸುತ್ತತಾಮಾ ಯಾಜಕೊ ಶಿಂಗ್ಡಾವೊನೆ ಫುಕ್ಕಾನೆ ಯೆಹುಶುವಾ ಮನಕ್ಹೊನೆ ಆರ್ಭಟೊ ಯಹೊವಾ ತುಮೊನೆ ಆ ಗಾಮನೆ ದಿದ್ಯೊಸ. ಆ ಅಮಾರ್ಹವಾನು ಕ್ಹಾರು ಕೆವಲ ಯಹೊವಾನಾ ಸೊತ್ತ ಕೈನ ತಿಳದೊ. ರಾಂಡಿ ಥಯಲ ರಾಹಬಳ ತಿನಾ ಕ್ಹಾತೆ ಘರಮಾ ರ್ಹಯೆಲವಾಲಾ ಕ್ಹಾರಾ ಉಗ್ರಾಂದೆ ಮಿ ವಳಾಯಲ ದುತನೊ ತೆ ದಡೈನ ಮ್ಹೆಲಿಸತೊ. ತುಮೆ ಥಯಾತಬಿ ಯಹೊವಾನೆ ಮಿಸ ಥಯಲ ಸಾಮನೊನಾ ವಿಷಯಮಾ ಹುಶಾರಕ್ಹು ರ್ಹೌ.ತುಮೆ ತಿಮಾ ಕಿನೆಬಿ ಇನಿಲಿದ್ಯಾಮ ಇಸ್ರಾಯೆಲನಾ ಪಾಳೆನಾ ಶಾಪನೆ ಗುರಿಥೈನ ಕೆಟ್ಟಸ. ಬೈಲ ವರಿ ಬಕ್ರಾ ವರಿ ಗದ್ಡಾವೊನೆ ನಿಶ್ಶೆಯ ಥೈನ ಕ್ವತಾಕ್ಹು ಕತ್ರಿಪಡ್ಯಾ ತೆಳಾಮಾ ಮನಕ್ಹೊ ಆರ್ಬಟ ಶಿಂಗ್ಡಾವೊನೆ ಅವಾಜ ಐ. ಮನಕ್ಹೊ ಶಿಂಗ್ಡಾವೊನಿ ಅವಾಜ ಐಕಿನ ಮಹತ್ತ ಥೈನ ಆರ್ಭಟ ಕರ್ತಾಮಾ ಗಾಮನಿ ಗೊಡಿ ತಿನಿ ತೆಜ ಪಡಿಗಯಿ. ಹರಯಕ್ಲೊ ಸಿದಾಜ ಗಾಮಾ ಗೈ ಪಡ್ಯಾ.ತೆ ತ್ಯುನೊನೆ ಸ್ವಾಧಿನ ಥಯು. ತುನೆ ಗಾಮ್ಮಾ ರ್ಹಯಲ ದಾಣ್ಗಾವೊನೆ ಬಾಕ್ಡಿಯೊನೆ ಪಟ್ಟಾವೊನೆ ಗಡಿಯಾವೊನೆ ಬೈಲ ವರಿ ಬಕ್ರಾ ವರಿ ಗದ್ಡಾವೊನೆ ನಿಶ್ಶೆಯ ಥೈನ ಕ್ವತಾಕ್ಹು ಕತ್ರಿಪಡ್ಯಾ. ಯೆಹುಶುವಾ ದೆಶನೆ ಗಯಲ ದೆಕಲ ಬೆ ಮನಕ್ಹೊನೆ ತುಮೆ ತೆ ರಾಂಡಿನಾ ಘರೆ ಜಾವೊ ತಿನೆ ಪ್ರಮಾಣ ಕರಲನಂಗತ ತಿನೆ ತಿಕನ ರ್ಹವಾನು ಕ್ಹಾರು ಭಾರಾ ಲಿನ ಆವೊ ಕೈನ ಕವಾನು ತೆ ಜಾಂಜಿಮಾನ ಗೈನ ರಾಹಾಬಳನೆ ತಿನಾ ಮಾಬಾಪನೆ ಭಾಯೊನೆ ತಿನೆ ರ್ಹವಾನು ಕ್ಹಾರು ತಿನಾ ಕುಟುಂಬನಾ ಕ್ಹಾರಾ ಮನಕ್ಹೊನೆ ಲೈನ ಇಸ್ಆಯಲನಾ ಪಾಳೆನಾ ನಜಿಕ ಮ್ಹೆಲ್ಯಾ. ಇಸ್ರಾಯಲೊ ಗಾಮನೆ ತಿಮಾ ರ್ಹವಾನುಕ್ಹಾರು ಆಗಕ್ಹು ಬಾಳ್ಯಾ.ತೆ ನೈಸೊ ಕ್ಹೊನಾನೆ ವರಿ ರುಪ್ಪಾನೆ ತಾಂಬಾನಾ ವರಿ ಲ್ಹೊಡಾನಾ ಸಾಮನೊನೆ ಯಹೊವಾನಾ ಆಲಯನಾ ಭಂಡಾನೆ ದಿದ್ಯಾ. ರಾಂಡಿ ಥಯಲ ರಾಹಾಬಳ ಯೆರಿಕೊ ಗಾಮನೆ ಫರಿನ ದೆಕಾನಾಹುತಿ ಆಯಲ ಯೆಹುಶುವಾನಾ ದುತೊನೆ ದಡಾಯಲಕ್ಹು ತೆ ತಿನೆ ತಿನಾಬಾನಾ ಘರವಾಲಾವೊನೆ ತಿನೆ ರ್ಹವಾನು ಕ್ಹಾರು ವಚಾ಼ಡ್ಯೊ.ತೆ ಹಮ್ನಾಲಕ್ಕಾ ಇಸ್ರಾಯಲೊಮಾ ಛೆ. ತೆಜ ಟೈಮಾ ಯೆಹುಶುವಾ ಇಸ್ರಾಯಲೊಕ್ಹು ಪ್ರಮಾಣ ಕರಲ ತ್ಯುನೊನೆ ಆ ಯೆರಿಕೊ ಗಾಮನೆ ಭಾಂದಾನಾಹುತಿ ಹತ ಲಗಾಡಾನೊ ಮನಕ್ಹ ಯಹೊವಾನಾ ನಜರಮಾ ಶಾಪಗ್ರಸ್ತಥೌ. ಥ್ಯವೊ ತಿನೆ ಅಸ್ತಿವಾರ ಗ್ಹಾಲ್ತಾಮಾ ತಿನಾ ಮ್ಹೊಟಾ ದಿಕ್ರಾನೆ ಬಾಕಲೊಮ್ಹೆಲ್ತಾಮಾ ನ್ಹಾನಾ ದಿಕ್ರಾನೆ ಜವೈಲಿವಾದೆ ಕೈನ ಕದ್ಯೊ. ಯಹೊವಾ ಯೆಹುಶುವಾನಾ ಕ್ಹಾತೆ ರ್ಹಯಲಕ್ಹು ತೆ ದೆಶಮಾ ಕ್ಹಾರಾ ಪಡ್ದಿಲಿದ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.