Sikkiligar Bible
ಯೆಹುಶು 5
ಯೊರ್ದನನಾ ಪಶ್ಚಿಮಾ ರ್ಹಯಲ ಕ್ಹಾರಾ ಅಮೊರಿನಾ ರಾಜಾ ಸಮಂದರನಾ ಬಾಜು಼ಮಾ ರ್ಹಯಲ ಸರ್ವ ಕಾನಾನನಾ ರಾಜಾವೊ ಯಹೊವಾನಾ ಇಸ್ರಾಯೆಲನಾ ಕ್ಹಾಮಾ ಯೊರ್ದನೆ ಬತ್ತಿನ ತ್ಯುನೊನೆ ದಟಾಡ್ಯೊಸ ಕೈನ ಪುಚ್ತಾಮಾ ತ್ಯುನಿ ಛಾತಿ ಫುಟಿಗಯಿ. ಇಸ್ರಾಯೆಲನಾ ನಿಮಿತ್ತಕ್ಹು ತ್ಯುನೊನೆ ಧೈರ್ಯ ನೈಸೊ ಥಯು.
ಗಿಲ್ಗಾನಮಾ ಖತ್ನಾ
ತೆ ಟೈಮಾ ಯಹೊವಾ ಯೆಹುಶುವಾನೆ ತು ದಗ್ಡಾವೊನಾ ಚಾಕುವೊ ಕರಲಿನ ಇಸ್ರಾಯೆಲಮಾ ಫರಿನ ಕ್ಹತ್ನಾ ಕರು ಕೈನ ಕವಾನು ತೆ ದಗ್ಡಾವೊನಾ ಚಾಕುವೊ ಕರಲಿನ ಕ್ಹತ್ನಾ ಡೊಂಗರಪರ ಇಸ್ರಾಯಲೊನೆ ಖತ್ನಾ ಕರ್ಯೊ. ಯೆಹುಶುವಾ ಖತ್ನಾ ಕರಲ ಕಾರಣ ಸುವೈ ಕದ್ಯಾಮ ಐಗುಪ್ತತಾ ಆಯಲ ದಾಣ್ಗಾಮಾ ಯುದ್ಧವಿರೊ ಕ್ಹಾರಾ ತೆ ದೆಶ ಛೊಡಲ್ಪರ ಜಂಗಲಮಾ ಮರಿಗಯಾ.ತ್ಯಾತಾ ಆಯಲ ಮನಕ್ಹೊನೆ ಕ್ಹಾರಾ ಖತ್ನಾ ಕರಲ ವ್ಹತ್ತು. ಕ್ಹಾರಾ ಮನಕ್ಹೊ ಭಾರಾ ಆಯಲ ಮನಕ್ಹೊನೆ ಖತ್ನಾ ಥಯುತು. ಐಗುಪ್ತತಾ ಜಂಗಲನಾ ಹುಟ್ಟಲವಾವೊನೆ ಖತ್ನಾ ಥಯು ನ್ಹೊತು. ಐಗುಪ್ತತಾ ಆಯಲ ಇಸ್ರಾಯಲೊ ಯಹೊವಾನಿ ವಾತ ನೈ ಐಕಲಕ್ಹು ತ್ಯುನೆ ತ್ಯುನಾ ಭಟೊಕ್ಹಾರಾ ಸಂಹಾರ ಥಾಯೆಲಕ್ಕಾ ಚಾಳಕ್ಹ ವರಕ್ಹ ಜಂಗಲಮಾಜಾ ಮರಿಗಯಾ. ಯಹೊವಾ ತೆ ತ್ಯುನಾ ಪಿತೃವೊನೆ ವಾಗ್ದಾನ ಕರಲ ದುದ್ದ ವರಿ ಜೇನ ವ್ಹೈನ ಜಾವಾನು ದೆಶಮಾ ತ್ಯುನೊನೆ ಚು಼ವಾತೊ ನೈಕೈನ ಕ್ಹಮ ಘಾಲ್ಯೊ. ತ್ಯುನೊನೆ ಯಕ್ಕಥೈನ ಹುಟ್ಟಲ ತ್ಯುನಾ ಬಚ್ಚಾವೊನೆ ಯೆಹುಶುವಾ ಖತ್ನಾ ಕರ್ಯೊ.ವಾಟಮಾ ತ್ಯುನೊನೆ ಖತ್ನಾ ನೈಕರಲಕ್ಹು ತ್ಯುನೆ ಖತ್ನಾ ನೈಕರಲವಾಲಾ ವ್ಹತ್ತಾ. ಕ್ಹಾರಾ ಜನಾಂಗವಾಲಾ ಖತ್ನಾ ಥಯಲ್ಪರ ತ್ಯುನೆ ರ್ಹಯೆಲಕ್ಕಾ ತ್ಯುನಾ ತ್ಯುನಾ ಜ಼ಗಾವೊಮಾ ಪಾಳೆಯಮಾ ವ್ಹತ್ತಾ. ಯಹೊವಾ ಯೆಹುಶುವಾನೆ ಮಿ ಐಗುಪ್ತನಾ ನಿಂದೆನೆ ಆ ಟೈಮಾ ತುಮಾರಾಕ್ಹು ನಿವಾರಿನ ಕರಕ್ಹು ಕದಲಕ್ಹು ತೆ ಜ಼ಗಾನೆ ಹಮ್ನಾಲಕ್ಕಾ ಗಿಲ್ಗಾಲ ಕೈನ ನಾಮ ರ್ಹವಸ. ಇಸ್ರಾಯಲೊ ಗಿಲ್ಗಾಲಮಾ ಉತ್ರಲ್ಪರ ಪೈಲಾನಾ ಮ್ಹನಾನಾ ಚೌದವಾ ದಿನೆ ಕ್ಹಾಂಜೆ ಯೆರಿಕೊನಾ ಬೈಲಮಾ ಪಸ್ಕ ಸನ್ನನೆ ಕರಿನ ಅಗಲ್ಯಾ ದಿನತಾ ಧಾನ್ಯನೆ ಕ್ಹಾವಾನೆ ಉಪಯೊಗ ಕರ್ಯಾ. ಕಿಮ್ಮ ಕದ್ಯಾರೆ ತೆಜ ದಿನಮಾ ತ್ಯುನೆ ಕ್ಹಾಟು ನೈರ್ಹಯಲ ರೊಕ್ಲಾವೊನೆ ಬಾಳಲ ತುದಿಯೊನೆ ಕ್ಹಾದ್ಯಾ. ತೆ ದೆಶನಾ ಹುಟ್ಟಲ ವಳಿನೆ ಕ್ಹಾದಲ್ಪರ ಅಗಲ್ಯಾ ದಿನ್ನೆ ಮನ್ನ ಹುಬ್ರಗಯು.ತೆ ತ್ಯುನೊನೆ ಫರಿನ ಮಳ್ಯೂಜ ನೈ. ಇಸ್ರಾಯಲೊ ತೆ ವರಕ್ಹಮಾ ಕ್ಹಾರಾ ಕಾನಾನ ದೆಶನಾ ಉತ್ಪನನೊನೆ ಅನುಭವ ಕರಾಡಾತಾ.
ಯೆಹುಶವಾ ವರಿ ತಲ್ವಾರ ಧರಿಲಿದಲ ಯಕ್ಕ ಮನಕ್ಹ
ಯೆಹುಶುವಾ ಯೆರಿಕೊನಾ ಕ್ಹಾಮಾ ರ್ಹತಾಮಾ ಯಕ್ಕಾನ ಯಕ್ಕ ದಿನೆ ಡೊಳೊ ಉಚೈನ ದೆಕ್ತಾಮಾ ಯಕ್ಲೊ ಮನಕ್ಹ ಹಿರಲ ಗದ್ಡಾನೆ ಹತ್ಮಾ ಧರಿನ ತಿನಾ ಕ್ಹಾಮು ಹುಬ್ರಯಲ ದೆಕ್ಯೊ. ತೆ ತಿಕನ ಗೈನ ತು ಹಮಾರೊ ವ್ಹೈ ನೈತೊ ಶತ್ರುವೊನೊ ವ್ಹೈ ಕೈನ ಪುಚ್ತಾಮಾ ತೆ ಮನಕ್ಹ ಮಿ ಥ್ಯವೊ ನವೈ; ಯಹೊವಾನಾ ಸೆನಾಪತಿ ಹಮ್ನಾಜ ಆಯೊಸ ಕದ್ಯೊ.ತೆಳಾಮಾ ಯೆಹುಶುವಾ ತಿನೆ ಸಾಷ್ಟಾಂಗ ನಮಸ್ಕಾರ ಕರಿನ ಸ್ವಾಮಿಯೊ ತಿನಾ ಸೆವಕನೆ ಸು ಆಜ್ಞಾಕರು ಕದ್ಯೊಸ ಯಹೊವಾನಾ ಸೆನಾಪತಿ ತಾರಾ ಪಗೊತಾ ಚಪ್ಲೊ ಕಾಡಿಪಡ ತು ಹುಬ್ರಯಲ ಜ಼ಗಾ ಪರಿಶುದ್ಧ ವ್ಹೈ ಕೈನ ಯೆಹುಶುವಾನೆ ಕದ್ಯೊ.ತೆ ತಿಮ್ಮಜ ಕರ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.