Sikkiligar Bible
ಯೆಹುಶು 7
ನುನನೊ ದಿಕ್ರೊ ಥಯಲ ಯೆಹುಶುವಾ ವರಿ ಕ್ಹಾರಾ ಮನಕ್ಹೊ ಆಕಾಶಿಯಾಮಾ ಘರೊ ಕರಿಲಿದ್ಯಾತಾ. ಯೆಹುಶುವಾ ಬೆ ಉಡಾಚಾರ ಕರಾಲಾವೊನೆ ಯೆರಿಕೊ ಗಾಮನಾ ಹುತಿ ತಿಳ್ದಿಲಿವಾನೆ ವಳಾಯೊ. ಎ ಮನಕ್ಹೊನೆ ಯೆಹುಶುವಾ ವಳಾಯಲ ಸಂಗತಿ ಬಿಜು ಕಿನೆಜ ಗ್ವತ್ತ ನ್ಹೊತು ''ಗೈನ ತೆ ಯೆರಿಕೊ ಗಾಮನೆ ಘನ್ನ ಸುಕ್ಷ್ಮಕ್ಹು ದೆಕೊ” ಕೈನ ಯೆಹುಶುವಾ ತೆ ಗುಡಾಚಾರಿಯೊನೆ ಕದ್ಯೊ. ತೆ ಭಂಬಿ ಜನಾ ಯೆರಿಕೊ ಗಾಮೆ ಗೈನ ಯಕ್ಕ ವ್ಯಶ್ಯಾನಾ ಘರಮಾ ರ್ಹಯಾ. ತೆ ಬಾಕಡಿನು ನಾಮ ‘ರಾಹಾಬ.’ ಯೆಹುಶುವಾ ಮನಕ್ಹೊನೆ ಬಲೈನ ತುಮೆ ಗಟ್ಟಾ ಚಡಿನ ಬೆತಲಿನಾ ಪೂರ್ವನೆ ಬೆತಾವೆನಾ ನಜಿಕಮಾಜ ಆಯಿ ಕವಾನಾ ಗಾಮಾನೆ ಸಂಚರಿಸಿನ ದೆಕ್ಯೊ ಕೈನ ತ್ಯುನೊನೆ ಯೆರಿಕೊತಾ ವಳಾಯಾ. ತ್ಯುನೆ ಗೈನ ಆಯಿ ಕವಾನಾ ಗಾಮಾನೆ ಸಂಚರಿನ ದೆಕಿನ ಪಾಚಾ ಫರಿನ ಐನ ಯೆಹುಶುವಾನೆ ಕ್ಹಾರಾ ಮನಕ್ಹೊ ಜಾವಾನು ಜ಼ರುರತ ನತ್ತಿ.ಬೆ ನೈತೊ ತನ್ನ ಹಜಾರ ಮನಕ್ಹೊ ಗಯಾಮ ಬಸ. ಗಾಮನೆ ಜಿತ್ತಸಕಸ ಕ್ಹಾರಾವೊನೆ ವಳೈನ ಕಾ ದಣದಾನು? ತ್ಯುನೆ ದಕ್ಹಾಜನಾ ಮಾತ್ರ ರ್ಹವಸ ಕೈನ ಕದ್ಯಾ. ತಿನಾ ನಿಂಗತ ತನ್ನ ಹಜಾರ ಮನಕ್ಹೊ ಗಯಾ. ತ್ಯುನೆ ಆಯಿ ಕವಾನಾ ಗಾಮಾನಾ ಮನಕ್ಹೊನ ಕ್ಹಾಮಾತಾ ನ್ಹಾಟಿನ ಔ ಲಾಗ್ಯು. ಆಯಿ ಕವಾನಾ ಗಾಮವಾಲಾ ತ್ಯುನೊನೆ ಗಾಮನಾ ಬಾಕಲತಾ ಕಲ್ಲುಗಣಿಲಕ್ಕಾ ಪಾಚಾ ಮ್ಹೆಲಲ ಇಳಿ ಜಿಮಿನಮಾ ತ್ಯುನೊನೆ ಹರಾಡಿನ ಸುಮಾರ ಮುವತ್ತಪರ ಛೆ ಮನಕ್ಹೊನೆ ಹತ ಕರ್ಯಾ. ಇನಾಕ್ಹು ಇಸ್ರಾಯಲನಿ ಧರ್ಯ ಕರಗಿನ ಪಾನಿಥಯು. ತೆಳಾಮಾ ಯೆಹುಸುವಾ ಇಸ್ರಾಯಲನಾ ಮ್ಹೊಟಾ ತ್ಯುನಾ ವಣ್ಣಾ ಫಾಡಿಲಿನ ಮಾತಾಪರ ರಾಕ ಘಾಲ್ಲಿನ ಕ್ಹಾಂಜಲಕ್ಕಾ ಯಹೊವಾನಾ ಮಂಜುಷನಾ ಕ್ಹಾಮಾ ಐನ ಪಡಿಗಯಾ. ವರಿ ಯೆಹುಶುವಾ ಅಯ್ಯೊ ಕರ್ತಾ, ಯಹೊವಾ, ತು ಆ ಮನಕ್ಹೊನೆ ಯೊರ್ದನನು ನದಿ ಕಾ ದಟಾಡ್ಯೊ? ಹಮೊನೆ ಅಮೊರಿನಾ ಹತೊಮಾ ದಿನ ನಾಶಕರು ಕೈನ ಛೆ? ಹಮೆ ಅಕ್ಲುಜ ಬಸ ಕೈನ ಯೊರ್ದನ ತಳಾನಾ ಹಿಂಗೆಜ ರ್ಹಯಾಮಾ ಕೆಕ್ಲು ಚೊಕೊ ವ್ಹತ್ತು. ಕರ್ತಾ ಇಸ್ರಾಯಲೊ ಶತ್ರುವೊನೆ ಪಿಟ್ಟ ದೆಕಲಾಡ್ಯಾಸತೊ. ಹಜಿ ಸು ಕೌ? ಕಾನಾನ್ಯೊ ದೆಶನಾ ಬಿಜಾ ಕ್ಹಾರಾ ನಿವಾಸಿಯೊ ಆ ಐಕಿನ ಹಮೊನೆ ಸುತ್ತಿಲಿನ ಭುಲೊಕಮಾ ಅಪ್ನಾ ನಾಮೊ ಉಗ್ರಾಲಿಂಗತ ಕರಸ.ತಾರಾ ಮಹಾನಾಮನಾ ಹುತಿ ಸು ಕರಸಿ ಕದ್ಯೊ. ತೆಳಾಮಾ ಯಹೊವಾ ಯೆಹುಶುವಾನೆ ಕದಲ ಸುವೈಕದಾಮ ಉಟ ತು ಆ ಪ್ರಕಾರ ಬೊರಲಪಡಲ ಕಾವೈ? ಇಸ್ರಾಯೆಲ ಮಾರಾ ವಾತಮಿರಿನ ಪಾಪಿಯೊ ಥಯಾಸ. ಉಪಯೊಗ ಕರಾನಾ ಸಮನೊ ಲಿನ ಚೊಟ್ಟಾಥೈನ ತ್ಯುನಾ ಸಾಮನೊಮಾ ದಡಲಿನ ವಂಚಕ ಥಯಾಸ. ತಿನಾಹುತಿ ಇಸ್ರಾಯಲೊ ಶತ್ರುವೊನಾ ಕ್ಹಾಮಾ ಹುಬ್ರಯ ನೈಸೊ ತ್ಯುನೊನೆ ಪಟ್ಟ ದೆಕಲಾಡಸ.ತ್ಯುನೆ ಪಾಪಕರಲವಾಲಾ ಶಾಪ ಕಾರಣ ಥಯಲ ತುಮಾರಾ ವಚ್ಮಾತೊ ಕಾಡೆಲಕ್ಕಾ ಮಿ ತುಮಾರಾ ಕ್ಹಾತೆ ನೈಆತೊ. ಉಟಿನ ಮನಕ್ಹೊನೆ ಶುದ್ದಕರ. ತು ತ್ಯುನೊನೆ ಇಸ್ರಾಯಲೊ ವಂತಾನಾಹುತಿ ಶುದ್ದ ಕರಲಿವೊ; ತುಮಾರಾ ವಚ್ಮಾ ಶಾಪನೆ ಕಾರಣ ಥಯಲಕ್ಹು. ತುಮೆ ತೆ ಕಾಡೆಲಕ್ಕಾ ಶತ್ರುವೊನಾ ಕ್ಹಾಮಾ ಹುಬ್ರೆತಾ ನೈ ಕೈನ ತುಮಾರೊ ಕ್ಹುದಾ ಥಯಲ ಯಹೊವಾ ಕವಸ. ವಂತಾ ಪಾಟೆ ತುಮೆ ಗುಂಪ ಗುಂಪಥೈನ ಮಕನ ಆವೊ. ಯಹೊವಾ ಕಯಾ ಗುಂಪನೆ ಧರಸ ತೆ ಗುಂಪ ಗೊತ್ರ ಗೊತ್ರ ಥೈನ ಕಯಾ ಗೊತ್ರಾನೆ ಧರಸ ತೆ ಗೊತ್ರಾ ಕುಟುಂಬ ಕುಟುಂಬ ಥೈನ ಕಯಾ ಕುಟುಂಬನೆ ಧರಸ ತೆ ಕುಟುಂಬವಾಲಾ ಯಕ ಯಕ್ಲಾ ಥೈನ ಔ. ಕುನ್ನ ಉಪಯೊಗ ಕರಾನಾ ಸಾಮನೊನಾ ಕ್ಹಾತೆ ಧರೆಲವಾಲಾವೊನೆ ತೆ ಕ್ಹುದಾನಿ ವಾತ ದಾಟಿನ ಇಸ್ರಾಯಲ ಮನಕ್ಹೊಮಾ ಗ್ಯಾನ ನೈಸೊ ಕಾಮ ಕರಲಕ್ಹು ತಿನು ಕ್ಹಾರು ಆಸ್ತಿನಾ ಕ್ಹಾತೆ ತಿನೆ ಬಾಳು ಕೈನ ಕದಲ ಛೆ. ಯೆಹುಶುವಾ ಪಾಟೆ ಉಟಿನ ಇಸ್ರಾಯೆಲ ಗುಂಪ ಗುಂಪನೆ ಯಕ್ಕ ಯಕ್ಕ ಥೈನ ಛೊಡಾನೆ ಯೆಹುದ್ಯ ಗುಂಪನೆ ಧರ್ಯಾತಾ. ತಿನಾ ಗೊತ್ರನಾ ಬಲಾತಾಮಾ ಜೆರಹನಾ ಗೊತ್ರನೆ ಧರ್ಯಾತಾ. ತೆ ಗೊತ್ರಾ ಕುಟುಂಬುವೊನೆ ಬಲಾತಾಮಾ ಜಬ್ದಿನಾ ಕುಟುಂಬನೆ ಧರ್ಯಾತಾ. ತೆ ಕುಟಂಬನಾ ದಾಣ್ಗಾವೊನೆ ಬಲಾತಾಮಾ ಯೆಹುದ ಗುಂಪನೊ ಜೆರಹನಾ ಗೊತ್ರವಾಲೊ ಜಬ್ದಿನಾ ಕುಟಂಬನೊ ಕರ್ಮಿನೊ ದಿಕ್ರೊ ಥಯಲ ಆಕಾನನೆ ಧರ್ಯಾತಾ. ತೆಳಾಮ ಯೆಹುಶುವಾ ಆಕಾನನೆ ಮಾರ ದಿಕ್ರಾ ತು ಇಸ್ರಾಯಲನಾ ಕ್ಹುದಾ ಥಯಲ ಯಹೊವಾನೆ ಘನಪಡಸೊ ತಿನೆ ಸ್ತೊತ್ರ ಕರ್ಯೊ. ತು ಕರಲ ಮನೆ ಕೆ, ಸುಜ ಝಾಕು ನಕೊ ಕದ್ಯೊ. ಆಕಾನನ ಯೆಹುಶುವಾನೆ ಮಿ ಕೊಳ್ಳೆಮಾ ಶಿನಾರ ದೆಶನಾ ಯಕ್ಕ ಚೊಕೊ ಥಯಲ ನಿಲ ವಂಗಿನೆ ಬೆಕ್ಹೊರಪ್ಯಾನು ತೊಲನು ರುಪ್ಪಾನೆ ಐವತ್ತರುಪ್ಯಾನು ಕ್ಹೊನಾನೊ ಘಟ್ಟೊ ದಿಕಿನ ತಿನೆ ಆಶಕ್ಹು ಕಾಳ್ಳದ್ಯಾ. ತಿನೆ ಮಾರಾ ಗುಡಾರನಾ ವಚ್ಮಾ ಕ್ಹಾಡಿಮಾ ಮ್ಹೆಲ್ಯೊಸ; ರುಪ್ಪು ಅಂಗ್ಡಾನಾ ಹೆಟು ರ್ಹವಸ. ಮಿ ಕ್ಹರಿಜ಼ ಹೌ ಕರಿನ ಇಸ್ರಾಯೆಲನೊ ಕ್ಹುದಾ ಥಯಲ ಯಹೊವಾನೆ ವಿರುದ್ದ ಥೈನ ಪಾಪ ಕರ್ಯೊಸ ಕೈನ ಉತ್ತರ ದಿದ್ಯೊ. ತೆಳಾಮಾ ಯೆಹುಶುವಾ ಆಳೊನೆ ಮೊಕಲೈನ ತ್ಯುನೆ ನ್ಹಾಟಿನ ಗೈನ ದೆಕಿನ ತೆ ನಿಲ ವಂಗಿನಾ ಗುಡಾರಮಾ ಕ್ಹಾಡಿಮಾ ವ್ಹತ್ತು. ರುಪ್ಪು ತಿನಾ ಹೆಟು ವ್ಹತ್ತು. ತ್ಯುನೆ ತೆ ಸಮ್ನೊನೆ ಗುಡಾರಮಾತಾ ಲಿನ ಯೆಹುಶುವಾ ಕ್ಹಾರಾ ಇಸ್ರಾಯಲೊ ರ್ಹಯಲ ಜ಼ಗಾ ಐನ ಯಹೊವಾನಾ ಕ್ಹಾಮಾ ಮ್ಹೆಲ್ಯಾ. ವರಿ ಯೆಹುಶುವಾ ಕ್ಹಾರಾ ಇಸ್ರಾಯಲೊ ಜೆರಹನೊ ದಿಕ್ರೊ ಥಯಲ ಆಕಾನನೆ ತೆ ರುಪ್ಪು, ನಿಲವಂಗಿ ಕ್ಹೊನಾನೊ ಘಟ್ಟೊ ತಿನಾ ಗಂಡ ಹೆಣ್ಣ ಬಚ್ಚಾ ಬೈಲೊನಾ ಬಚ್ಚಾ, ಗದ್ಡಾವೊ ಬಕ್ರಾ ವರಿ ಬಕ್ರಿಯೊ,ಗುಡಾರನೆ ಆ ಕ್ಹಾರಾವೊನೆ ಸಹಿತ ಥೈನ ಧರಿನ ಆಕೊರಿನಾ ಕ್ಹಾಡಿನೆ ಲಿನ ಗಯಾ. ತ್ಯಾ ಯೆಹುಶುವಾ ತಿನೆ ತು ಹಮೊನೆ ಆಪತ್ತನೆ ಗುರಿ ಥಯಲ ಕಾವ್ಹೈ.ಆ ಟೈಮಾ ಯಹೊವಾ ತುಮಾರಾ ಉಪ್ಪರ ಆಪತ್ತ ಆವಾ ವರಕ್ಹು ಕರುಸ ಕೈನ ಕದಲ್ಪರ ಇಸ್ರಾಯೆಲೊ ಕ್ಹಾರಾ ತಿನೆ ದಗ್ಡೊ ಭಿರಕೈನ ಮಾರ್xಯಾ.ತಿನೆ ರ್ಹಯೆಲ ಕ್ಹಾರು ದಗ್ಡೊ ಭಿರಕೈನ ಆಗಕ್ಹು ಬಾಳಿ ಪಡ್ಯಾ. ತಿನಾಪರ ದಗ್ಡಾನೆ ಯಕ್ಕ ಮ್ಹೊಟು ಕುಪ್ಪೆನೆ ಘಾಲಿಪಡ್ಯಾ. ತೆ ಹಮ್ನಾಲಕ್ಕಾ ಛೆ. ತೆಳಾಮಾ ಯಹೊವಾನಾ ರೊಷ ಅಗ್ನಿ ದಡಿರ್ಹಯು.ಆ ಸಂಗತಿಯೊನೆ ದೆಸೆಕ್ಹು ತೆ ಜ಼ಗಾನೆ ಹಮ್ನಾಲಕ್ಕಾ ಆಕೊರಿನಾ ಗ್ಹಾಡಿ ಕೈನ ನಾಮ ರ್ಹವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.