Sikkiligar Bible
ಹಬಕ್ಕುಕ 1
ಪ್ರವಾದಿ ಥಯಲ ಹಬಕುಕನೆ ಆಯಲ ಕ್ಹುದಾನಿ ವಾತ.
ಅನ್ಯಾಯನಾ ಹುತಿ ಹಬಕುಕನು ದುರ
ಯಹೊವಾ ಕ್ಹುದಾ ತಾರಿ ಮದತನಾ ಹುತಿ ಕೆಕ್ಲೊ ಮಾಂಗು ಮಿ ಮಾಂಗಾನು ಕೆಕ್ಲಾ ದಿನ್ನ ನೈ ಐಕ್ತೊ? ತ್ರಾಸ ಥಾವಾಡ್ಯೊಸ ಕೈನ ವದ್ರಾಡ್ಯೊಸ ವರಿಬಿ ತು ವಚಾ಼ಡಾಡ್ಯೊ ನತ್ತಿ. ಅನ್ಯಾಯ ಥಾವಾನು ಮಿ ದೆಕಾ ವರಕ್ಹು ಕಾ ಕರಾಡ್ಯೊಸ? ತ್ರಾಸ ಮನೆ ಕಾ ದೆಕಾಡಾಡ್ಯೊಸ? ಹವು ಖತರನಾಕ ಮರಾ ಕ್ಹಾಮುಜ಼ ಛೆ; ಲಡೈಯೊ ಥಾವಾಡಿಯೊಸ. ಇಮ್ಮ ರ‍್ಹಯಲ ಹುತಿ ಧರ್ಮೊಪದೆಶ ತಾಕತ ನೈಸೊ ಆವಾನು ಥಯುಸ. ತಿನಾಹುತಿ ಮನಕ್ಹೊನಾ ಕ್ಹಾತೆ ನ್ಯಾಯ ಕರಾನೆ ಥಾವಾಡ್ಯು ನತ್ತಿ. ಕೆಟ್ಟ ಮನಕ್ಹೊ ಚೊ಼ಕಾ ಮನಕ್ಹೊನಾ ಕ್ಹಾತೆ ಝಿತ್ತಾಡ್ಯಾಸ.
ಯಹೊವಾನು ಉತ್ತರ
ಕ್ಹುದಾ ತಿನಾ ಮನಕ್ಹೊನೆ ಅಮ್ಮ ಕದ್ಯೊ. ಮನಕ್ಹೊನಾ ವಚ್ಮಾ಼ ಥಾವಾನು ದೆಕೊ, ಡೊಳೊ ಮ್ಹೆಲೊ ಘಾಬ್ರಾಥಾವೊ; ತುಮಾರಾ ಕಾಲಮಾ ಮಿ ಯಕ್ಕ ಕಾಮ ಕರುಸ, ತುಮೊನೆ ತೆ ತಿಳದ್ಯುತಬಿ ತುಮೆ ಬರೊಕ್ಹೊ ಕರ್ತಾ ನೈ. ಮಿ ಬಾಬೆಲೊನವಾಲಾವೊನೆ ಉಟಾಡುಸ. ತ್ಯುನೆ ಘನ್ನಾ ಅಡ್ಮುಟ್ಟ ಮನಕ್ಹೊ ವ್ಹೈ. ತ್ಯುನೆ ಬಿಜಾವೊನಿ ಆಸ್ತಿ ತ್ಯುನಾ ವಶಮಾ ಕರಿಲಿವಾನಾ ಹುತಿ ಕ್ಹಾರಿ ದುನಿಯಾ ಫರಸ. ತ್ಯುನೆ ಘನ್ನಾ ಖತರನಾಕ ವರಿ ಘನ್ನಾ ಕೆಟ್ಟ ಮನಕ್ಹೊ ವ್ಹೈ. ತ್ಯುನಾಕ್ಹು ತ್ಯುನೆಜ಼ ಕಾನುನ ರ‍್ಹವಸ. ತ್ಯುನಾಕ್ಹು ತ್ಯುನೆ ಮ್ಹೊಟಾ ಕವೈಲಿವಸ.
ತ್ಯುನಾ ಘೊಡಾ ಚಿರತೆತಿ ಘನ್ನಾ ಘಟ್ಟ ವ್ಹೈ. ತ್ಯುನೆ ನರಿಯೊತಿಬಿ ಹುಷಾರ ರ‍್ಹವಸ. ಘೊಡಾಪರ ಬೈಟಲವಾಲಾ ಘೊಡಾವೊನೆ ನ್ಹಚಾ಼ಡಸ ತ್ಯುನೆ ದುರತಾ ಪಿಟೆಲಾಗಿನ ಆವಸ. ತ್ಯುನೆ ಹದ್ದನಾ ನಿಂಗತ ಉಡಿನ ಆವಸ.
ತ್ಯುನೆ ತ್ರಾಸ ಕೈನಜ಼ ಕರಾನೆ ಆವಸ; ತ್ಯುನೆ ಗುಂಪ ಉಸುಕನಿ ಜಿಮಿನಮಾ ಆವಸ. ಲೆಕ್ಕೊವಾಚಿ ಬಂದಿ ಕರಿಲಿವಸ. ತ್ಯುನೆ ಬಿಜಾ಼ ರಾಜಾವೊನೆ ಕದ್ರಾವಸ. ಮ್ಹೊಟಾ ಮನಕ್ಹೊನೆ ಕದ್ರಾವಸ. ಕೊಟೆನ ಪಾಡಿನ ಮಾತಿನಿ ಘುಂಪಾ ಕರಸ. ತೆಳಾಮಾಜ಼ ತುಫಾನನಾ ನಿಂಗತ ಬಿಸ್ತಾ ಗೈಪಡಸ. ತೆ ಮನಕ್ಹೊ ತ್ಯುನಿ ತಾಕತನೆಜ಼ ಆರಾಧನಾ ಕರಸ.
ಹಬಕುಕ ಕ್ಹುದಾಕನ ವರಿ ಯಕ್ಕೆಬ ದುರ ದಿವಸ
ತೆಳಾಮಾ ಹಬಕುಕ ಕದ್ಯೊ, ಯಹೊವಾ ಕ್ಹುದಾ ತು ಅನಾದಿಕಾಲತೊ ಆಯಲವಾಲೊ ನ್ಹವೈಸು? ತು ಮಾರೊ ಪವಿತ್ರ ಕ್ಹುದಾ ತು ಹಮೆಶಾಬಿ ರ‍್ಹವಾಲೊ ಕ್ಹುದಾ ವ್ಹೈ. ಎ ಯಹೊವಾ ಫೈಸಲೊ ಕರಾನಾಹುತಿ ತು ತ್ಯುನೊನೆ ನೆಮಶ್ಯೊಸ ಮಾರಾ ಕ್ಹುದಾ ತು ಶಿಕ್ಷಾ ದಿವಾನಾಹುತಿವ ತ್ಯುನೊನೆ ಅಧಿಕಾರ ದಿದ್ಯೊಸ. ತುಜ಼ ಹಮೊನೆ ಆಸ್ರೊ ವ್ಹೈ. ಕೆಟ್ಟಜ಼ ನೈಸೊ ದೆಕಾಲಾ ಪವಿತ್ರ ಕ್ಹುದಾ ಕೆಟ್ಟ ಮನಕ್ಹನೆ ನೈ ಛೊಡಾಲಾ ಕೆಟ್ಟ ಮನಕ್ಹ ಚೊ಼ಕಾ ಮನಕ್ಹನೆ ತ್ರಾಸ ಕರ್ತಾಮಾ ತು ಕಾ ಗಪ್ಪ ಛೆ?
ಆಳಾವಾಲನಿಂಗತ ಮನಕ್ಹೊನಿ ಪರಿಸ್ಥಿತಿ ಕಿಡಾ ಕಾಟುನು ಸ್ತಿತಿನೆ ಕಾ ಲಾಯೊಸ, ಮನಕ್ಹೊನೆ ಸಮುದ್ರನಿಯೊ ಮಚ್ಲಿಯೊನಾ ಸಮಾನ ಕರ‍್ಯೊಸ. ತೆ ಬಾಬೆಲೊನವಾಲಾ ಮನಕ್ಹೊನೆ ಗಲ್ಲಕ್ಹು ಉಚೈನ, ತಿನಾ ಬಲಿಯೊಕ್ಹು ಧರಿನ ತ್ಯುನೊನೆ ಮಳಾವಸ. ತೆಳಾಮಾ ತ್ಯುನೆ ಘನ್ನಾ ಖುಶಿ ಥಾವಸ. ತಿನಾಹುತಿ ತ್ಯುನಾ ಬಲಿನೆ ಬಲಿ ದಿನ, ತ್ಯುನಾ ಬಲಿನೆ ಉದನೊ ಧವಾಂಡೊ ದಿವಸ ಕಾ ಕದ್ಯಾಮ ತ್ಯುನೆ ಖಾವಾನು ಅನ್ನ ಸ್ವಾದ ಥಾವಸ. ವರಿ ತೆ ಐಶೊ ಅರಾಮನಿ ಜಿವ್ನಾ ಕರಸ.
ಇಮ್ಮ ರ‍್ಹಯಲಹುತಿ ತ್ಯುನೆ ಹಮೆಶಾಬಿ ಬಲಿಯೊ ವಚೈ಼ನ ಮರ್ಗಾ ನೈಸೊ ದೆಶೊನೆ ನಾಶ ಕರ್ತಾ ತೆ ರ‍್ಹೌಸು.?
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.