Sikkiligar Bible
ಮಿಕ 7
ಇಸ್ರಾಯೆಲನಿ ನೈತಿಕ ಭ್ರಷ್ಟಾಚಾರ
ಮಿ ಬೆಜಾ಼ರ ಥಯೊಸ. ಕಾ ಕದ್ಯಾಮ ಮಿ ಜ಼ಮಾಕರಲ ಹಣ್ಣೊ ನಿಂಗತ ಛೆ; ಕಾಟಲ ಶೆಖರ ಥಯಲ ದ್ರಾಕ್ಷಿ ನಿಂಗತ ಛೆ. ಕ್ಹಾವಾನೆ ದ್ರಾಕ್ಷಿಯೊ ಸುಜ಼ ಉಗ್ರ್ಯಾ ನೈ. ಮನೆ ಪಸಂದ ರ್ಹಯಲ ಫಲನಾ ಕಾಲಮಾ ಶುರುವಾತಮಾ ಆವಾನು ಅಂಜುರನು ಫಲ ಮಳ್ಯುಜ಼ ನೈ. ಮಿ ಕವಾನು ಸುವೈ ಕದ್ಯಾಮ ನಂಬಿಗಸ್ತ ಮನಕ್ಹೊ ಕ್ಹಾರಾ ಗೈಪಡ್ಯಾ. ತೆ ದೆಶಮಾ ಚೊ಼ಕಾ ಮನಕ್ಹೊ ಕಯಾಜ಼ ಉಗ್ರ್ಯಾ ನೈ. ಹರಯಕ್ಲೊ ಹಜಿಯಕ್ಲಾನೆ ಕಲಾಸ ಕರಾನೆ ಕಾಯ್ದಾಡೊಸ. ಹರಯಕ್ಲೊ ತಿನಾ ಭೈನೆ ಕ್ಹಾಪ್ಡಾವಾನೆ ಕಾಯ್ದಾಡೊಸ. ಕೆಟ್ಟ ಕರಾನೆ ಭಂಬಿ ಹತೊಕ್ಹು ಮನಕ್ಹೊ ನಿಪುಣ ಥಯಾಸ. ಅದಿಕಾರಿಯೊ ಲಂಚಾ ಪುಚ್ಚಸ. ಫೈಸಲೊ ಕರಾಲಾ ಅಪ್ನು ತಿರ್ಪ ಕರಾನೆ ದೊಕ್ಡಾ ಪುಚ್ಚಸ. ಮ್ಹೊಟಾ ನಾಯಕೊ ನ್ಯಾಯ ಥಯಲ ವರಿ ಹಿತ ಥಯಲ ಫೈಸಲೊ ನೈ ಕರ್ತಾ. ತ್ಯುನಾ ಇಷ್ಟಾ ನಿಂಗತ ತ್ಯುನೆ ಕರಸ. ತ್ಯುನಾಮಾ ಚೊ಼ಕಾಬಿ ಕಾಟಾನಾ ಕಂಟಿಯೊ ನಿಂಗತ ಛೆ. ತ್ಯುನಾಮಾ ರ್ಹವಾನಾ ಚೊ಼ಕಾಬಿ ವಾಕಾತಿಕಾ ರ್ಹಯಲ ಕಾಟಾವೊನಾ ಕಂಟಿಯೊತಿಬಿ ವಾಕಾ ಥಯಾಸ. ತಾರಾ ಪ್ರವಾದಿಯೊ ಆಂ ದಿನ ಆವಸ ಕೈನ ಕವಾಡಾಸ. ತಾರಾ ಪ್ರವಾದಿಯೊನೊ ದಿನ್ನ ಆಯೊಸ. ಹಮ್ನಾ ತುನೆ ಶಿಕ್ಷಾ ದಿವಸ. ತು ಹಮ್ನಾ ಗಲಿಬಿಲಿನೆ ಮ್ಹೈ ಥಾಸಿ! ತಾರಾ ಬಾಜು಼ವಾಲಾನಾ ಉಪ್ಪರ ಭರೊಕ್ಹೊ ಮ್ಹೆಲು ನಕೊ! ತಾರಾ ದೊಸ್ತನಾ ಉಪ್ಪರ ಭರೊಕ್ಹೊ ಮ್ಹೆಲುನಕೊ! ತಾರಿ ಬೈಕೊನಾ ಕ್ಹಾತೆ ತಾರಾ ಮನಸಮಾ ರ್ಹವಾನುವಿಚಾರ ಕವು ನಕೊ. ಯಕ್ಲಾನೊ ದುಶ್ಮನ ತ್ಯುನಾ ಘರವಾಲಾಜ಼ ಥಾವಸ. ದಿಕ್ರೊ ಬಾಪನೆ ಮರ್ಯಾದಿ ದೆತೊ ನೈ. ದಿಕ್ರಿ ತಿನಿಯಾನಾ ವಿರುದ್ದ ಚಾ಼ಲಸ. ವ್ಹೌವು ಫೈನೆ ವಿರುದ್ದ ಥೈನ ಚಾ಼ಲಸ.
ಕ್ಹುದಾನಿ ಮರ್ಗಾ
ಮಿ ಮದದನಾಹುತಿ ಯಹೊವಾಕನ ದೆಕುಸ. ಕ್ಹುದಾ ರಕ್ಷಣೆನಾಹುತಿ ನಿರಿಕ್ಷಾ ಕರಸ. ಮಾರೊ ಕ್ಹುದಾ ಮನೆ ಕಾನ ದಿವಸ.
ಮಿ ಪಡ್ಯೊಸ, ತೆನೈಸೊ ದುಶ್ಮನ ಮನೆ ದೆಕಿನ ಅಕ್ಹು ನಕೊ! ಮಿ ವರಿ ಉಟುಸ; ಮಿ ಹಮ್ನಾ ಅಂದಕಾರಮಾ ಬೈಟುಸ. ತೆನೈಸೊ ಯಹೊವಾ ಮನೆ ಉಜಾಲು ಥಾವಸ. ಮಿ ಯಹೊವಾನೆ ಪಾಪ ಕರಲಕ್ಹು ತೆ ತಿನಿ ಶಿಟ್ಟ ತಡ್ದಿಲಿವಸ; ಕಾಲನಾ ಕಾಲನೆ ತೆ ತಿನು ವಾಜ್ಯನೆ ಕರಿನ ಮನೆ ನ್ಯಾಯಾ ಕರಸ; ಮನೆ ಉಜಾಲಾನೆ ಲಾವಸ, ತಿನಾ ರಕ್ಷನಾ ಧರಮನೆ ದೆಕುಸ. ತಾರೊ ಕ್ಹುದಾ ಥಯಲ ಯಹೊವಾ ಕಿಜಾ ಛೆ ಕೈನ ಪಚ್ತಾಮಾ ಜರನಾ ದುಶ್ಮನೊ ಇನೆ ದೆಕ್ತಾಮಾ ಸರಮ ತ್ಯುನೊನೆ ಮ್ಹೈ ಕರಲಿವಸ; ಮಿ ತ್ಯುನೊನೆ ಡೊಳಾಕ್ಹು ದೆಕುಸ.ಹಮ್ನಾಜ಼ ರಸ್ತಾ ಕಸಾ ನಿಂಗತ ಥಾವಸ.
ಆಹಾ ತಾರಾ ಗೊಡಿಯೊ ಭಾಂದಾನಾ ದಿನೊ ಆವಸ; ತೆ ಆಗನ್ಯಾ ತಾರಾತಿದುರ ಥಾವಸ. ತೆಜ಼ ದಿನೊಮಾ ತಾರಾ ಮನಕ್ಹೊ ಅಶ್ಯುರತಾ ಐಗುಪ್ತತಾ ಮಳಿನ ತುಕನ ಆವಸ ಸಮುದ್ರತಾ ಸಮುದ್ರಲಕ್ಕಾ ಡೊಂಗರ್ತಾ ಡೊಂಗರಲಕ್ಕಾ ಐಗುಪ್ತತಾ ಯೊಫ್ರಿಟೆಸ ನದಿಲಕ್ಕಾ ಜುದಾ ಥೈಗಯಲ ತಾರಾ ಮನಕ್ಹೊ ತುಕನ ಮಳಸ. ತೆ ನೈಸೊ ತೆಕ್ಲಾಮಾಜ಼ ಎ ದೆಶನಾ ಮನಕ್ಹೊನಾ ಹುತಿ ತ್ಯುನಾ ಕೆಟ್ಟ ಕಾಮೊ ಫಲ ಥೈನ ಹಾಳ ತಯುಸ.
ಚೊಕಿ ಜಿಮಿನನಾ ವಚ್ಮಾ಼ ರ್ಹಯಲ ರಾನಮಾ ಹರಿಕ್ಕನೆ ಲಾಗಾನು ತಾರಾ ಮನಕ್ಹನೆ ತಾರಾ ಸ್ವಾಸ್ಥಮಾ ಹಿಂಡನೆ ತಾರಾ ಹತೊಕ್ಹು ಚ಼ರಾ. ಪುರ್ವಕಾಲನಿಂಗತ ಬಾಶಾನಮಾ ಗಿಲ್ಯಾದಮಾ ಚ಼ರಾದೆ.
ತು ಐಗುಪ್ತ ದೆಶಮಾತೊ ಪಾರ ಥೈನ ಆಯಲ ಕಾಲಮಾ ಮಿ ದೆಕಾಡಲತಿಮ್ಮ ಅದ್ಭುತೊ ದೆಕಾಡುಸ. ಜನಾಂಗೊ ದೆಕಿನ ತುಮಾರಿ ಮ್ಹೊಟಿ ತಾಕತನೆ ದೆಕಿನ ಸರ್ಮಾವಸ ಮ್ಹೊಡಾಪರ ಹತ್ತ ಮ್ಹೆಲ್ಲಿವಸ. ತಿವ್ನಾ ಕಾನು ಐಕುಆತಾ ನೈ. ಕ್ಹಾಪನಿಂಗತ ಮಾತಿ ಚಾ಼ಟಸ. ಜಿಮನಪರ ಚಾ಼ಲಾನಾ ಕಿಡಾ ಕಾಟು ನಿಂಗತ ತಿವ್ನಾ ದಡಾನಾ ಜ಼ಗಾಪರ ಕಾಪ್ತಾ ತಿ ನ್ಹಾಟಿ ಜಾ಼ವಸ. ಯಹೊವಾ ಕವಾಲೊ ಹಮಾರೊ ಕ್ಹುದಾ ಥಯಲ ತುನೆ ಭುಚ಼ಕತಾ ತುನೆ ವಪ್ಪಿಲಿವಸ.
ತುನೆ ಕಯೊ ಕ್ಹುದಾ ತುನೆ ಸಮಾನ ವ್ಹೈ? ತು ತಾರಿ ಸ್ವಾಸ್ಥೈಮಾ ಉಗ್ರಲ ಅಪರಾಧ ಮಾಫ ಕರಸ. ತ್ಯುನ ದ್ರೊಹನೆ ದ್ಯಾನ ದಿವಾಲೊ ನ್ಹವೈ. ಹೊ ಅಪ್ನೊ ಕ್ಹುದಾ ಹಮೆಶಾಬಿ ಶಿಟ್ಟ ಥೈನ ರ್ಹವಾಲೊ ನ್ಹವೈ . ಮರ್ಗಾನುಜ಼ ತಿನು ಮನಸ ವ್ಹೈ. ತೆ ವರಿ ಯಕ್ಕಮ ಮರಗಸ. ಅಪನು ಅಪರಾಧ ಝಾಕಸ. ಕ್ಹುದಾ ತಾರಾ ಮನಕ್ಹೊ ಕರಲ ಪಾಪ ಸುದ್ರಮಾ ನಾಕಿ ಪಾಡಶಿ. ತು ಪೈಲಾನಾ ಕಾಲ್ತೊಬಿ ಹಮಾರಾ ಪಿತೃವೊನೆ ಕ್ಹಮ ಘಾಲಲ ತಿಮ್ಮ ಯಾಕೊಬನಾ ಖಾಂದನವಾಲವೊನೆ ಕ್ಹರಿಬಗಲ ರ್ಹೈನ ಅಬ್ರಹಾಮನಾ ಖಾಂದಾನವಾಲಾವೊನೆ ಮಯಾ ಬಗಲ ರ್ಹೈನ ಚಾ಼ಲಶಿ
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.