Sikkiligar Bible
ಹಬಕ್ಕುಕ 2
ಹಬಕುಕನೆ ಕ್ಹುದಾನು ಜವಾಬ
ಮಿ ಕೈದಾಲೊ ಥೈನ ಹುಬ್ರೌಸ. ಮಿ ತ್ಯಾ ಮಾರಿ ಜ಼ಗಾ ಲ್ಯುಸ ವರಿ ಕೈದುಸ ತ್ಯಾ ಮಿ ದೆಕುಸ ಯಹೊವಾ ಕ್ಹುದಾ ಸು ಕವಸ.
ತೆಳಾಮಾ ಮನೆ ಯಹೊವಾ ಕ್ಹುದಾ ಜವಾಬ ದಿದ್ಯೊ ಪ್ರಕಟಣೆ ಬರದ ಕೈನ ಕದ್ಯೊ. ತೆ ಒದಾಲೊ ಭೆಗಿನೆಜ ಒದು ತೆ ಫಳಿಪರ ಬರದ. ಎ ಸಂದೆಶ ಅಗೊ ಆವಾನು ರ‍್ಹಯಲ ಖಾಸ ದಿನೊನಾ ಹುತಿ ವ್ಹೈ. ಎ ಸಂದೆಶ ಅಂತ್ಯನಾ ದಿನೊನಾ ಹುತಿ ವ್ಹೈ ವರಿ ಎ ಕ್ಹರಿ ಥಾವಸ. ಅಮ್ಮ ಲಾಗಸ ಎ ದಿನ್ನ ಆತೊಜ಼ ನೈ. ವರಿಬಿ ತೆ ದಿನೊನಾ ಹುತಿ ಸಮಾಧಾನಕ್ಹು ಕೈದೊ ವರಿ ತೆ ದಿನೊ ಆವಸ ವರಿ ತಡಾ ಥಾತು ನೈ. ದೆಕೊ, ಕೆಟ್ಟ ಮನಕ್ಹನು ಆತ್ಮಾ ಪುಗ್ಯುಸ, ಯಕ್ಕಜ಼ ಮನಸನೊ ನ್ಹವೈ; ಕ್ಹರಿನೊ ಮನಕ್ಹ ತಿನಿ ಕ್ಹರಿಕ್ಹುಜ಼ ವಾಚ಼ಸ.
ಕೆಟ್ಟ ಮನಕ್ಹೊನೆ ಥಾವಾನು ತ್ರಾಸ
ದ್ರಾಕ್ಷಿಯೊನ ರ‍ಕ್ಹ ತಿನೆ ಮೊಸ ಕರಸ. ತಿನೆ ನಿಶಾ ಥೈನ ತಿನೆ ಸಮಾಧಾನ ಮಳ್ತುಜ಼ ನೈ. ಪಾತಾಳಮಾ ತಿನಿ ಆಸ ಮ್ಹೊಟಿಕರಿಲಿವಸ. ಮೌತನಿಂಗತ ಛೆ, ತೃಪ್ತ ರ‍್ಹತೊ ನೈ ಕ್ಹಾರಾ ದೆಶೊನೆ ತಿನಾಹುತಿ ಮಳಾವಸ. ಕ್ಹಾರಾ ಮನಕ್ಹೊನೆ ತಿನಾ ಆಳೊ ಕರಿಲಿವಸ. ಕ್ಹರಿಮಾಜ಼ ತೆ ಮನಕ್ಹೊ ತಿನೆ ಹಿನಾವಸ. ವರಿ ತೆ ಚೊ಼ರಿಕರಿಲಿದಲನ ಕ್ಹಾರುಜ಼ ಜ಼ಬರದಸ್ತಿನಿ ವಾಟಕ್ಹು ಸೌಕಾರ ಥಯಲವಾಲಾನೆ ತಾರಿ ಗತಿ ಮಿ ಸು ಕೌ?. ಎ ಕೆಕ್ಲಾ ದಿನ್ನಲಕ್ಕಾ ಅಗು ಬಡಸ.
ತಾರಾ ಸಾಲಾವಾಲಾ ಕ್ಷಣಮಾಜ಼ ತಾರಾ ಕ್ಹಾಮಾ ಹುಬ್ರವಸ ತ್ಯುನೆ ಹುಶಾರ ಥೈನ ತುನೆ ಭುಚ್ಕಾ಼ಡಸ. ತೆಳಾಮಾ ತು ತ್ಯುನಾ ಹತೆ ಸುಲಗೆ ಥಾಶಿ. ಕಾ ಕದ್ಯಾಮ ತು ಘನ್ನಾ ದೆಶೊನೆ ಲುಟಿ ಕರ‍್ಯೊಸ. ತ್ಯುನು ರಗತ ಚು಼ವಾಯೊಸ, ತ್ಯುನಾ ದೆಶೊನೆ ವರಿ ಮನಕ್ಹೊನೆ ತ್ರಾಸ ದಿದ್ಯೊಸ, ತಿನಾಹುತಿ ತ್ಯುನೆ ತೆ ಮನಕ್ಹೊ ತಾರಾ ಕ್ಹಾತೆ ಕರಸ. ಕರಲಹುತಿ ತೆ ಮನಕ್ಹೊ ತುನೆ ಲುಟಿ ಕರಸ. ಕಾ ಕದ್ಯಾಮ ತು ಮನಕ್ಹೊನು ರಗತ ಚು಼ವಾಯೊಸ. ದೆಶೊಮಾ ರ‍್ಹಯಲ ಕ್ಹಾರುಜ಼ ನಾಶ ಕರ‍್ಯೊಸ.
ಅನ್ಯಾಯಕ್ಹು ತಿನಾ ಘರೊ ಭಾಂದಿಲಿವಾಲಾನೆ, ತಿನು ಗುಡ ಉಪ್ಪರ ಮ್ಹೆಲಿಲಿವಾಲಾನೆ ನಾಶನಾ ಹತಮಾತು ಚು಼ಕೈಲಿವಾಲಾನೆ ತ್ರಾಸ! ತು ಘನ್ನಾ ಮನಕ್ಹೊನೆ ನಾಶ ಕರಲಹುತಿ ತಾರಾ ಖಾಂದಾನನೆ ಕೆಟ್ಟ ನಾಮ ಲಾಯಲನಿಂಗತ ಥಯು. ತಾರಾಕ್ಹು ತುನೆಜ಼ ಕೆಟ್ಟ ಕರಿಲಿದ್ಯೊ. ತಾರಾ ಘರನಾ ದಗಡಾ ತಾರಾ ವಿರುದ್ದ ವದ್ರಸ. ತಿನಿ ಛತ್ತ ತಿನೆ ಪ್ರತಿ ಧ್ವನಿ ಕರಸ.
ಗಾಮ ಮನಕ್ಹೊನು ರಗತ ಚು಼ವೈನ ಬಾಂದಿನ, ಗಾಮ ಅನ್ಯಾಯಕ್ಹು ತಯ್ಯಾರ ಕಾರಾಲಾನೆ ತ್ರಾಸ! ಮನಕ್ಹೊನಿ ಮ್ಹೈನತ ಆಗನೆ ಬೊಂದೊ ಥಾವಸ. ಖಾಂದಾನನಿ ಮ್ಹೈನತ ಬೆಕ್ಕಾರ ಗೈ. ಎ ಯಹೊವಾ ಕ್ಹುದಾನಿ ಚಿತ್ತ ವ್ಹೈ. ಸಮುದ್ರಮಾ ಪಾನಿ ಭರಲನಿಂಗತ ದುನಿಯಾಮಾ ಕ್ಹುದಾನಿ ಮಹಿಮಾ ವರಿ ತಿಳವಳಿಕೆ ಬಗಲ ಫೈಲಸ.
ತಾರಿ ಶಿಟ್ಟ ದ್ರಾಕ್ಷಿಯೊನಾ ರಕ್ಹಮಾ ಕಲೈನ ಬಾಜು಼ವಾಲಾನೆ ಪಿಲೈನ, ತ್ಯುನೊನೆ ಭೊಗಳೊ ದೆಕೊ ಕೈನ ತ್ಯುನೊನೆ ನಿಶಾಕರಲವಾಲಾ ಅಯ್ಯೊ ತಾರಿ ಗತಿ ಮಿ ಸು ಕೌ! ಮಹಿಮಾನಿ ಬದಲ ತಾರಾಮಾ ಸರಮುಂದೊ ಥಯೊಸ. ಹಮ್ನಾ ತಾರಿ ಪಾಳಿ, ಪಿನ ಭೊಗಳೊ ಥಾ, ಯಹೊವಾ ಕ್ಹುದಾನಾ ಶಿದಾ ಹತ್ಮಾನೊ ತಾಂಬಿಯೊ ತಾರಾ ಬಗಲ ಕರಿಲೆ ತಾರಿ ಘನತೆ ಮರಿಯಾದಿ ಝಾಕಸ. ತು ಮನಕ್ಹೊನು ರಗತ ಚು಼ವೈನ ದೆಶನಾ ಕ್ಹಾರ ಮನಕ್ಹೊನೆ ತ್ರಾಸ ಕರಲ ಹುತಿ ಲೆಬೊನನೆ ತ್ರಾಸ ಥಯಲ ತುಬಿ ಪಡಸಿ, ಜಾನವರೊ ನಾಶ ಥಾವಾನು ತುನೆ ಭುಚ್ಕಾ಼ಡಸ.
ಮನಕ್ಹ ತಯ್ಯಾರ ಕರಲ ಮೊರ್ತಿಕ್ಹು ಸು ಉಪಯೊಗ ವ್ಹೈ? ಸುಳ ಬೊಲಾಲಿ ಮೊರ್ತಿಯೊನಿ ಕಿಮ್ಮತ ಸು ಛೆ? ಧಿಕ್ಕಾರ ಛೆ ತೆ ಮನಕ್ಹನೆ ಮೊರ್ತಿನೆ ಕವಸ, ಯ ಕ್ಹುದಾ ಜಾ಼ಗ ಉಟ್ಟ!
ತೆ ನೈಸೊ ಯಹೊವಾ ತಿನಾ ಪವಿತ್ರ ಮಂದಿರಮಾ ಛೆ. ತಿನಾಕ್ಹಾಮಿ ದುನಿಯಾ ಕ್ಹಾರಿಜ಼ ಗಪ್ಪ ರ‍್ಹವಾದೆ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.