Skip to content
BibleKenya

Sikkiligar Bible

ಆದಿ 9

ನೊಹಾನಾ ಕ್ಹಾತೆ ಕ್ಹುದಾನಿ ಒಡಂಬಡಿಕೆ

ಕ್ಹುದಾ ನೊಹಾನೆ ತಿನಾ ಬಚ್ಚಾವೊನೆ ಆಶಿರವಾದ ಕರಿನ ತ್ಯುನೊನೆ, ಘನ್ನಾ ಬಚ್ಚಾವೊನೆ ಜನ್ನಿನ ಜಿಮಿನ್ಪರ ಜಾಸ್ತ ಥಾವೊ. ವರಿ ಕ್ಹಾರಿ ದುನಿಯಾಮಾ ಭರಿ ಜ಼ಾವೊ. ಜಿಮಿನ್ಪರ ರ‍್ಹಯಲ ಹರಯಕ್ಕ ಜಾನವರ, ಹಬಾಳಮಾ ಉಡಾನಾ ಹರಯಕ್ಕ ಪಕ್ಷಿಯೊ, ಜಿಮಿನ್ಪರ ಫರಾನಾ ಹರಯಕ್ಕ ಕಿಡು ವರಿ ಸಮಂದರಮಾ ರ‍್ಹವಾನಾ ಹರಯಕ್ಕ ಮಚಲ್ಯೊ ತುಮೊನೆ ಬುಚ್ಕಿನ ರ‍್ಹವಸ ತೆ ಕ್ಹಾರಾವೊನೆ ಮಾಲಕ ಕರ‍್ಯೊಸ. ಜಿಮಿನಪರ ಫರಾನಾ ಕ್ಹಾರಾ ಪೈಲಾ ತುಮೊನೆ ಕ್ಹಾವಾನಾಹುತಿ ಜಾಡೊ ದಿದ್ಯೊ. ಹಮನಾ ತುಮೊನೆ ಕ್ಹಾವಾನಾಹುತಿ ಜಾನವರ ದಿದ್ಯೊಸ. ಜಿಮಿನ್ಪರ ರ‍್ಹಯಲ ಕ್ಹಾರುಜ ತುಮಾರಾಹುತಿ ದಿದ್ಯೊಸ. ಮಿ ತುಮೊನೆ ಸು ಶೆ ಕರುಸ ಕದ್ಯಾಮ ರಗತಕ್ಹು ಮಳಲ ಮಾಕ್ಹ ಕ್ಹಾವೊ ನಕೊ. ಕುನ್ನಬಿ ತುಮೊನೆ ಕಲಾಸ ಕರ‍್ಯಾರೆ ಮಿ ತಿನು ಜುವ ಕಾಡಿ ಪಡುಸ. ಕೈಬಿ ಜಾನವರ ಮನಕ್ಹನೆ ಕಲಾಸ ಕರ‍್ಯಾರೆ ಮಿ ತೆ ಜಾನವರನೊ ಜ಼ಲಮ ಕಾಡಿಪಡುಸ ಕ್ಹುದಾ ಮನಕ್ಹನೆ ತಿನಾ ಪ್ಲ್ಯಾನ ನಿಂಗತ ತಯಾರ ಕರೊ. ತಿನಾಹುತಿ ಕುನ್ನಬಿ ಮನಕ್ಹನು ರಗತ ಚುವಾವಸ ತಿನು ರಗತ ಮನಕ್ಹಜ ಚುವಾವಸ ತುಮೆ ಅಭಿವೃಧ್ದಿಥೈನ ಜಿಮಿನ್ಪರ ಪುರಾ ಭರಿಜಾವೊ ಕೈನ ಕದ್ಯೊ.

ನೊಹಾ ತುನೆ ತಾರಾ ಬಚ್ಚಾವೊನೆ ಘನ್ನಾ ಬಚ್ಚಾ ಹುಟ್ಟಾದೆ. ಪಾಚಾ಼ತೊ ಕ್ಹುದಾ ನೊಹಾನೆಬಿ ತಿನಾ ಬಚ್ಚಾವೊನೆ ಮಿ ತುಮೊನೆ ವರಿ ಅಗಾ ಜಿವಿಸಾನೆ ತುಮಾರಾ ಮನಕ್ಹೊನೆ ವಾಗ್ದಾನ ಕರುಸ. ಹಡಗಾಮಾತಾ ಆಯೆಲ ಕ್ಹಾರಾ ಪಕ್ಷಿಯೊ ಕ್ಹಾರಾ ಪಶುವೊ ವರಿ ಪ್ರಾಣಿಯೊನೆ ಮಿ ವಾಗ್ದಾನ ಕರುಸ ಜಿಮಿನ್ಪರ ರ‍್ಹಯಲ ಜಿವಿನೆ ವಾಗ್ದಾನ ಕರುಸ. ಮಿ ತುಮೊನೆ ಕರಾನು ವಾಗ್ದಾನ ಸುವೈ ಕದ್ಯಾಮ ಜಿಮಿನ್ಪರ ರ‍್ಹಯಲ ಕ್ಹಾರಾ ಜಿವಿಯೊ ಪಾನಿನಾನ ಜಿಮಿನ್ಪರ ರ‍್ಹಯಲ ಕ್ಹಾರಾ ಜಿವಿಯೊನೆ ಹಜಿಯಕ್ಕಮ ನಾಶ ನೈಕರತೊ.ಕೈನ ಕದ್ಯೊ. ತೆನೈಸೊ ಕ್ಹುದಾ ಮಾರಾ ವಾಗ್ದಾನೆ ಸಾಕ್ಷಿಥೈನ ಮಿ ತುಮೊನೆ ಯಕ್ಕ ಗುರುತ ದ್ಯುಸ. ಮಿ ತುಮಾರಾ ಕ್ಹಾತೆ ವರಿ ಜಿಮಿನ್ಪರ ರ‍್ಹಯಲ ಹರಿಯಕ್ಕ ಜಿವಿನಾ ಕ್ಹಾತೆ ವಡಂಬಡಿಕೆ ಕರಿಲಿವಾನು ಆ ಗುರುತ ದಿಕ್ಹಸ. ಆ ಗುರುತ ಕೆಳಾಮಾಬಿ ರ‍್ಹವಸ. ಮಿ ಮ್ಹಾಡೊಮಾ ಮ್ಹೆಲೆಲ ಕಾಮನಬಿಲ್ಲ ಮನೆ ಜಿಮಿನೆ ಥಯಲ ವಡಂಬಡಿಕೆ ಗುರುತಥಾವಸ. ಮಿ ಮ್ಹಾಡನೆ ಜಿಮಿನ್ಪರ ಕವಿಸುವಾಗ ಮ್ಹಾಡಮಾ ಕಾಮನಬಿಲ್ಲ ದೆಕೊಸಿ. ಮಿ ಆ ಕಾಮನಬಿಲ್ಲ ದೆಕತಾಮಾ ಮನೆಬಿ ತುಮೊನೆ ವರಿ ಜಿಮಿನ್ಪರ ರ‍್ಹಯಲ ಕ್ಹಾರಾ ಜಿವಿಯೊನೆ ಥಯಲ ವಡಂಬಡಿಕೆ ಸೆ ಕರಲ್ಯುಸ ಪಾನಿನು ತುಫಾನ ಕೆಳಾಮಾಜ ಜಿಮಿನ್ಪರ ರ‍್ಹಯಲ ಕ್ಹಾರಾಬ ಜಿವಿಯೊನೆ ನಾಶನೈಕರತೊ ಕವಾನು ಆ ವಡಂಬಡಿಕೆ. ಮಿ ಮ್ಹಾಡೊಮಾ ರ‍್ಹಯಲ ಕಾಮನಬಿಲ್ಲನೆ ದೆಕತಾಮಾ ಶಾಶ್ವತಥಯಲ ಆ ವಡಂಬಡಿಕೆ ಸೆ ಕರಲ್ಯುಸ ಮನೆಬಿ ವರಿ ಜಿಮಿನ್ಪರ ರ‍್ಹಯಲ ಹರಿಯಕ್ಕ ಜಿವಿಯೊನೆ ಥಯಲ ವಡಂಬಡಿಕೆ ಸೆ ಕರಲ್ಯುಸ ಕೈನ ಕದ್ಯೊ. ತಿನಾಹುತಿ ಕ್ಹುದಾ ನೊಹಾನೆ ಜಿಮಿನ್ಪರ ರ‍್ಹಯಲ ಕ್ಹಾರಾ ಜಿವಿಯೊನಾ ಕ್ಹಾತೆ ಮಿ ಕರಿಲಿದಲ ವಡಂಬಡಿಕೆನೆ ಆ ಕಾಮನಬಿಲ್ಲ ಗುರುತ ಥಾವಸ ಕೈನ ಕದ್ಯೊ.

ನೊಹಾ ವರಿ ತಿನಾ ಬಚ್ಚಾ಼

ನೊಹಾನಾ ಗಂಡ ಬಚ್ಚಾ ನೊಹಾನಾ ಕ್ಹಾತೆ ಹಡಗಾಮಾತಾ ಭಾರಾ ಆಯಾ.ತ್ಯುನಾ ನಾಮೊ ಶೆಮ, ಹಾಮ,ವರಿ ಯೆಫೆತ (ಹಾಮ ಕಾನಾನನೊ ಬಾ ವ್ಹೈ.) ಆ ತನ್ನ ಜ಼ನಾ ಗಂಡ ಬಚ್ಚಾ ವ್ಹೈ. ಜಿಮಿನ್ಪರ ರ‍್ಹಯಲ ಮನಕ್ಹೊನೆ ಅವನೆಜ ಮೂಲ ದಾಣ್ಗಾ ವ್ಹೈ. ನೊಹಾ ರೈತ ಥಯೊ ತೆ ಯಕ್ಕ ದ್ರಾಕ್ಷಿನೊ ಬಗಿಚೊ ಕರ‍್ಯೊ. ಯಕ್ಕಮ ತೆ ದ್ರಾಕ್ಷನೊ ರಕ್ಹ ಪಿನ ನಶಾ ಥಯಲಕ್ಹು ತಿನಾ ಗುಡಾರಮಾ ಭೊಂಗಳೊ ಕ್ಹುರಯೊ. ಕಾನಾನನೊ ಬಾ ಥಯಲ ಹಾಮ ತಿನಬಾ ಭೊಂಗಳೊ ಕ್ಹುರಯೆಲ ದೆಕಿನ ಗುಡಾರನಾ ಭಾರಾ ರ‍್ಹಯಲ ತಿನಾ ಭಾಯೊನೆ ತಿಳಸ್ಯೊ. ತೆಳಾಮಾ ಶೆಮ್ ವರಿ ಯೆಫೆತ ಯಕ್ಕ ಝಾಡಿ ತ್ಯುನಾ ಪಿಟ್ಟಪರ ಘಾಲಿನ ಮ್ಹೊಡು ಪಾಚೊ ಫರೈಲಿನ ಗುಡಾರಮಾ ಐನ ಅಪನಾ ಬಾನೆ ವರಾಡ್ಯಾ ತ್ಯುನೆ ತಿನು ಉಗಾಡು ಅಂಗ ದೆಕ್ಯಾ ನೈ. ಪಾಚಾ಼ತೊ ನೊಹಾ ಹುಶಾರ ಥಯೊ ನ್ಹಾನೊ ದಿಕ್ರೊ ಹಾಮ ಸು ಕರ‍್ಯೊ ಕೈನ ತಿನೆ ತಿಳದ್ಯು. ತಿನಾಹುತಿ ನೊಹಾ ಕಾನಾನ ತಿನಾ ಭಾಯೊನೆ ಕಿಳನಾ ಗುಲಾಮೊ ಥಾವೊ'‘ಕೈನ ಕ್ಹರಾಪ ದಿದ್ಯೊ. ತೆನೈಸೊ ನೊಹಾ ಶೆಮನೊ ಕ್ಹುದಾ ಥಯಲ ಯಹೊವಾನೆ ಸ್ತೊತ್ರ ಥಾವಾದೆ ಕಾನಾನ ಶೆಮನೊ ಗುಲಾಮ ಥಾವಾದೆ. ಕ್ಹುದಾ ಯೆಫೆತನೆ ಹೆಚ್ಕಿ ಜಿಮಿನ ದಿವಾದೆ. ಶೆಮನಾ ಗುಡಾರೊಮಾ ಕ್ಹುದಾ ವಾಸಕರಾದೆ ವರಿ ಕಾನಾನಬಿ ತ್ಯುನೊನೆ ಗುಲಾಮ ಥಾವಾದೆ ಕೈನ ಕದ್ಯೊ. ಪಾನಿನು ತುಫಾನ ಥಯಲ್ಪರ ನೊಹಾ ತನಕ್ಹೊನಐವತ್ತ ವರಕ್ಹ ಜುತೊ ವ್ಹತ್ತೊ. ನೊಹಾ ಒಟ್ಟಜ ನೌಕ್ಹೊನ ಐವತ್ತ ವರಕ್ಹ ಜುತೊ ರ‍್ಹೈನ ಮರ‍್ಯೊ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.