Sikkiligar Bible
ಆದಿ 8
ಜಲ ಪ್ರಳಯನು ಅಂತ್ಯ
ವರಿ ಕ್ಹುದಾ ನೊಹಾನೆ ವರಿ ಹಡಗಾಮಾನಾ ಕ್ಹಾರಾ ಜಾನವರೊನೆ ಇಕ್ಹರ್ಯೊ ನೈ . ತೆ ವಾರೊ ಅಯೆ ನಿಂಗತ ಕರ‍್ಯೊ ಇಮ್ಮ ಪಾನಿ ಉತರಾನು ಶುರು ಥಯು. ಹಬಾಳಮಾನು ಆವಾನು ಪಾನಿ ಹುಬ್ರಯು ಹಬಾಳ ಆವಾನು ಪಾನಿ, ಜಿಮಿನಮಾತಿ ಶಲಿಯೊಮಾತು ಆವಾನು ಪಾನಿ ಹುಬ್ರಯು. ಇಮ್ಮ ಯಕ್ಹೊನ ಯವ್ವತ್ತ ದಿನ್ನ ಥಯಲ್ಪರ ಕಮ್ಮ ಥಾತು ಐಯು. ಕ್ಹಾತವಾ ಮ್ಹೈನಾನಾ ಕ್ಹತ್ರಂವಾ ದಿನ್ನೆ ಹಡಗೊ ಅರಾರತ ಕವಾನಾ ಗಾಮನಾ ಡೊಂಗರ ಪರ ಐನ ಹುಬ್ರಯು. ಕಿಮ್ಮ ಕಿಮ್ಮ ಪಾನಿ ಕಮ್ಮ ಥಾತು ಐಯು ದಕ್ಹವಾ ಮ್ಹೈನಾನೊ ಯಕ್ವಾ ದಿನ್ನೆ ಕ್ಹಾರಾ ಡೊಂಗರೊನಾ ತುದಿಯೊ ದಿಕ್ಹಾಡಾತಾ. ಚಾಳಕ್ಹ ದಿನ ಥಯಲ್ಪರ ನೊಹಾ ಹಡಗಾನಿ ಖಿಡಕಿ ಕಾಡಿನ ದೆಕ್ಯೊ. ನೊಹಾ ಯಕ್ಕ ಕೌಳಾನೆ ಭಾರೊ ಛೊಡ್ಯೊ ಜಿಮಿನ್ಪರ ಪಾನಿ ರ‍್ಹಯಲ ವರಾಯೆಲಕ್ಕಾ ತೆ ಕೌಳೊ ಆವಾ ಜಾ಼ವಾನು ಕರಾಡುತು. ತಿನಾಹುತಿ ಜಿಮಿನಪರ ರ‍್ಹಯಲ ಪಾನಿ ಕಮ್ಮ ಥಯು ಸು ನೈ ಕೈನ ದೆಕಾನು ಹುತಿ ನೊಹಾ ಯಕ್ಕ ಕ್ಹಬುತರನೆ ಭಾರೊ ಛೊಡ್ಯೊ. ತೆನೈಸೊ ಪಾನಿ ಹಜು಼ನ ಕಮ್ಮ ಥಯು ನ್ಹೊತು, ತಿನಾಹುತಿ ಕ್ಹಬುತರನೆ ಉತರಾನೆ ಕಿಜಾ಼ಜ಼ ಜ಼ಗಾ ಮಳಿ ನೈ. ತಿನಾಹುತಿ ತೆ ಕ್ಹಬುತರ ಉಡತು ಹಡಗಾಮಾ ಐಯು ವರಿ ನೊಹಾ ತಿನೆ ಹತ್ತ್ ಅಗೊ ಕರಿನ ತಿನೆ ಧರಿನ ಹಡಗಾಮಾ ಛೊಡಸ. ಕ್ಹಾತ ದಿನ ಥಯಲ್ಪರ ನೊಹಾ ವರಿ ಕ್ಹಬುತರನೆ ಭಾರೊ ಛೊಡ್ಯೊ. ತೆ ದಿನ ಕ್ಹಾಂಜೆ ತೆ ಕ್ಹಬುತರ ನೊಹಾಕನ ಫರಿನ ಐಯು ತಿನಾ ಚೊಂಚಮಾ ಆಲಿವ ಝಾಡುನು ಪಾನ ವ್ಹತ್ತು ತೆ ದೆಕಿನ ನೊಹಾ ಜಿಮಿನ ವರೈಸ ಕೈನ ಕಳಿಲಿದ್ಯೊ. ವರಿ ಕ್ಹಾತ ದಿನ ಥಯಲ್ಪರ ನೊಹಾ ವರಿ ಕ್ಹಬುತರನೆ ಛೊಡ್ಯೊ ಮಾತ್ರ ಆ ಟೈಮಾ ತೆ ಕ್ಹಬುತರ ವಾಪಸ ಐಯುಜ ನೈ. ತಿನಾಹುತಿ ನೊಹಾ ಹಡಗಾನು ಬಾಕಲ ಕಾಡಿನ ಹೈಬಿ ತಿಬಿ ದೆಕ್ಯೊ ಜಿಮಿನ ವರಾವಾಡಿತಿ ತೆ ದಿನ ಯಕ್ವಾ ವರಕ್ಹನೊ ಯಕ್ವಾ ದಿನ ವ್ಹತ್ತೊ ತೆಳಾಮಾ ನೊಹಾನೆ 601 ವೈಸ ವ್ಹತ್ತಿ. ಬೆವಾ ಮ್ಹೈನಾನಾ ಇಕ್ಹಪರ ಕ್ಹಾತವಾ ದಿನ್ನೆ ಜಿಮಿನ ಪುರಾ ವರೈ ಗೈತಿ ತೆಳಾಮಾ ಕ್ಹುದಾ ನೊಹಾನೆ ತು ತಾರಿ ಬೈಕೊ ತಾರಾ ಬಚ್ಚಾ ತಾರಾ ವ್ಹೌವೊ ಹಡಗಾಮಾತಾ ಭಾರಾ ಆವೊ. ತಾರಾ ಕ್ಹಾತೆ ರ‍್ಹಯಲ ಹರಿಯಕ್ಕ ಜಾನವರ ಪಕ್ಷಿಯೊ ವರಿ ಹರಯಕ್ಕ ಕಿಡು ಕಾಟು ಹರಿಯಕ್ಕ ಜುವ ಭಾರು ಆವಾದೆ ತಾರು ಸಂತಾನ ಬಡತು ಜಾ಼ವಾದೆ ಜಿಮಿನ್ಪರ ತ್ಯುನೆ ಪುರಾ ಫೈಲಾದೆ ಕೈನ ಕದ್ಯೊ. ತಿನಾಹುತಿ ನೊಹಾ ತಿನಿ ಬೈಕೊ ಬಚ್ಚಾ ವರಿ ವ್ಹೌವೊನಾ ಕ್ಹಾತೆ ಹಡಗಾಮಾತೊ ಭಾರೊ ಆಯೊ. ತಿನಾ ಪಾಚಾ಼ ಪಾಚಾ಼ ತಿನಾ ಕ್ಹಾತೆ ರ‍್ಹಯಲ ಹರಯಕ್ಕ ಜಾನವರ ಕಿಡು ಕಾಟು ತ್ಯುನಾ ತ್ಯುನಾ ಜಾ಼ತನಾ ಗುಂಪನಾ ಪ್ರಕಾರ ಪಕ್ಷಿಯೊ ಭಾರಾ ಆಯಾ.
ನೊಹಾ ದಿದಲ ಬಲಿ
ತಿನಾಕ್ಹು ತೆ ನೊಹಾ ಯಹೊವಾನಾ ಹುತಿ ಯಕ್ಕ ಬಲಿನೊ ಕಟ್ಟೊ ಭಾಂದಿನ ಶುದ್ದ ರ‍್ಹಯಲ ದಕ್ಹಾ ಪಶು ಪಕ್ಷಿ ಲಿನ ಕ್ಹುದಾನೆ ಬಲಿನಾ ಕಟ್ಟಾಪರ ಹೊಮ ಕರೊ ತೆ ಬಲಿನಿ ಚೊ಼ಕಿ ಬಾಸ ಕ್ಹುದಾನೆ ಮೆಚ್ಚಿಕೆ ಥೈ. ತೆಳಾಮಾ ಕ್ಹುದಾ ತಿನಾಮಾ ಅಮ್ಮ ಕೈಲಿದ್ಯೊ: ಇತ್ತಿ ಉಪ್ಪರ ಮಿ ಮನಕ್ಹೊನೆ ಶಿಕ್ಷಾ ದಿವಾನಾ ಹುತಿ ಜಿಮಿನೆ ಕ್ಹರಾಪ ನೈ ದೆತೊ. ತೆ ಮನಕ್ಹೊನಾ ವಿಚಾರೊ ನ್ಹಾನಪಂತಾಜ಼ ಕೆಟ್ಟ ವ್ಹೈ. ತಿನಾಹುತಿ ಮಿ ಬಿಜಿಯಕ್ಕ ಸಲಾ ಜಿಮಿನಪರ ರ‍್ಹಯಲ ಹರಯಕ್ಕ ಜಲಮನೆ ನಾಶ ನೈ ಕರತೊ. ಜಿಮಿನ ರ‍್ಹಯಲಕ್ಕಾ ಬಿತ್ತಾನೊ-ಕಾಟಾನೊ ದಿನ ರ‍್ಹವಸ ಕೆಳಾಮಾಬಿ ರ‍್ಹವಸ ಥಂಡ-ತಡಕೊ ರ‍್ಹವಸ ಥಂಡನೊ ಕಾಲ-ಪಾನಿನೊ ಕಾಲ ವರಿ ದಿನ್ನ-ರಾತ ಕೆಳಾಮಾಬಿ ರ‍್ಹವಸ ಕೈನ ಕದ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.