Sikkiligar Bible
ಆದಿ 7
ಜಲ ಪ್ರಳಯ
ತೆ ಕ್ಹಾರು ಥಯಲ್ಪರ ಕ್ಹುದಾ ನೊಹಾನೆ, ಹಮ್ನಾ ರ್ಹವಾನಿ ಸಂತತಿಮಾ ತು ಯಕ್ಲೊಜ ನಿತಿವಂತ ಶೆ. ತಿನಾಹುತಿ ತಾರಾ ಘರವಾಲಾವೊನೆ ಲಿನ ಹಡಗಾನಾ ಮ್ಹೈ ಜಾ. ಕ್ಹಾರಾ ತರಾನಾ ಶುದ್ದ ಪ್ರಾಣಿಯೊಮಾ ಕ್ಹಾತ ಕ್ಹಾತ ಜೊಡಿ (ಕ್ಹಾತ ಗಂಡ ಕ್ಹಾತ ಹೆಣ್ಣ ) ಲೆ. ವರಿ ಜಿಮಿನ್ಪರ ರ್ಹಯಲ ಅಶುದ್ದ ಪ್ರಾಣಿಯೊಮಾ ಯಕ್ಕ ಯಕ್ಕ ಜೊಡಿ (ಯಕ್ಕ ಹೆಣ್ಣ ಯಕ್ಕ ಗಂಡ)ಲೆ. ಹರಯಕ್ಕ ಪಕ್ಷಿಯೊಮಾ ಕ್ಹಾತ ಕ್ಹಾತ ಜೊಡಿ (ಕ್ಹಾತ ಗಂಡ ಕ್ಹಾತ ಹೆಣ್ಣ) ಲೆ. ಜಿಮಿನಪರ ಇವ್ನಿ ಸಂತತಿ ಬೆಳದಾನಾ ಹುತಿ ತು ಇಮ್ಮ ಕರ. ಹಮ್ನಾತಾ ಕ್ಹಾತ ದಿನ ಥಯಲ್ಪರ ಮಿ ಘನ್ನೊ ಜೊರೆ ಜಿಮಿನಪರ ಪಾನಿ ಆವಾಲಗಾಡುಸ ಆ ಪಾನಿ ಚಾಳಕ್ಹ ದಿನ್ನ ರಾತ ಆತು ರ್ಹಯಲ ರ್ಹವಸ ಮಿ ಕರಲ ಹರಯಕ್ಕ ಜಿವ ಜಂತು ಜಿಮಿನ ಪರ್ತೊ ನಾಶ ಕರುಸ. ಯಹೊವಾ ಕದಲ ತಿಮ್ಮ ನೊಹಾ ಪುರಾ ಕರ್ಯೊ. ಜಿಮಿನ ಪರ ಪಾನಿ ಆತಾ ಟೈಮಾ ನೊಹಾನಿ ವೈಸ ಛೆಕ್ಹೊ ವರಕ್ಹ ವ್ಹತ್ತಿ. ತೆಳಾಮಾ ಪಾನಿಕ್ಹು ವಾಚಾನಾಹುತಿ ನೊಹಾ ತಿನಿ ಬೈಕೊ ಬಚ್ಚಾ ವರಿ ವ್ಹೌವೊನಾ ಕ್ಹಾತೆ ಹಡಗಾಮಾ ಗಯೊ. ಕ್ಹಾರಾ ಶುದ್ದ ಅಶುದ್ದ ಜಾನವರೊ ವರಿ ಪಕ್ಷಿಯೊ, ಜಿಮಿನ್ಪರ ಫರಾನಾ ಜಾನವರೊ, ನೊಹಾನಾ ಕ್ಹಾತೆ ಹಡಗಾಮಾ ಗಯಾ ಕ್ಹುದಾ ಕದಲನಿಂಗತಜ಼ ಹರಯಕ್ಕ ಜಾನವರೊಮಾ ಗಂಡ ಹೆಣ್ಣ ಜೊ಼ಡಿ-ಜೊ಼ಡಿ ಹಡಗಾಮಾ ಗಯಾ. ಕ್ಹಾತ ದಿನ ಥಯಲ್ಪರ ಪಾನಿನು ತುಫಾನ. ಬೆವಾ ಮ್ಹೈನೊ ಕ್ಹತ್ರಾವಾ ದಿನ್ನೆ ಪುರಾ ಜಿಮಿನ್ಪರ ರ್ಹಯಲ ಸಮುಂದರಮಾನಾ ಶಲಿಯೊ ಫುಟ್ಯಾ. ಹಬಾಳನಾ ಬಾಕಲೊ ಖುಲ್ಯಾ, ಹಬಾಳ ಪ್ಹುಟ್ಯುಸ ಕೌ ತಿಮ್ಮ ಚಾಳಕ್ಹ ದಿನ ರಾತಮಾಬಿ ಪಾನಿ ಆತು ಗಯು. ತೆ ದಿನಮಾ ನೊಹಾ ವರಿ ತಿನಿ ಬೈಕೊ ತಿನಾ ಬಚ್ಚಾ ಶೆಮ ಹಾಮ ಯೆಫೆತ ವರಿ ಇವನಿಯೊ ಬಾಕ್ಡಿಯೊನೆ ಹಡಗಾಮಾ ಗಯಾ. ಜಿಮಿನ್ಪರ ರ್ಹಯಲ ಹರಯಕ್ಕ ಜಾನವರ ವರಿ ಪಶು ವರಿ ಹರಯಕ್ಕ ಜಾತನಾ ಕಿಡಾ ಹರಯಕ್ಕ ಜಾ಼ತನ್ಯೊ ಪಕ್ಷಿ ಹಡಗಾಮಾ ಗಯಾ. ವರಿ ಉಸುಲ ಲಿವಾನಿ ಹರಯಕ್ಕ ಜಿವಿ ತಿನಿ ತಿನಿ ಜಾತನಾ ನಿಂಗತ ಜೊಡಿ ಜೊಡಿ ವ್ಹತ್ತಾ. ಕ್ಹುದಾ ಕದಲನಿಂಗತ ಆ ಪುರಾ ಜಿವಿ ಹಡಗಾನಾ ಮ್ಹೈ ಗಯಾ ತೆಳಾಮಾ ಯಹೊವಾ ಹಡಗಾನು ಬಾಕಲ ಝಾಕಿ ಪಾಡ್ಯೊ. ಜಿಮಿನ್ಪರ ಪಾನಿನು ತುಫಾನ ಚಾಳಕ್ಹ ದಿನ ಲಕ್ಕಾ ವ್ಹತ್ತು. ಪಾನಿ ಚಡತು ಚಡತು ಹಡಗೊ ಉಪ್ಪರ ಆತು ಗಯು. ಪಾನಿ ವರಿ ಕಿಮ್ಮ ಕಿಮ್ಮ ಚಡತು ಚಾಲ್ಯುತು ತಿಮ್ಮ ತಿಮ್ಮ ಹಡಗೊ ಉಪ್ಪರ ಚಡತು ಚಾಲ್ಯೊತೊ. ಪಾನಿ ಘನ್ನು ಜೊರ ಆಯಲ ಹುತಿ ಮ್ಹೊಟಾ ಮ್ಹೊಟಾ ಡೊಂಗರೊ ಡುಬಿಗಯಾತಾ. ಡೊಂಗರೊಬಿ ಪಾನಿಕ್ಹು ಝಕೈ ಗಯಾತಾ ಪಾನಿ ಕಿಮ್ಮ ವ್ಹತ್ತು ಕದ್ಯಾಮ ಡೊಂಗರೊ ಡುಬಿನ ಡೊಂಗರೊತಿ ಇಕ್ಹಪರ ಪಾಂಚ಼ ಪುಟ ಉಪ್ಪರ ವ್ಹತ್ತು. ಜಿಮಿನ್ಪರ ರ್ಹಯಲ ಹರಯಕ್ಕ ಜಾನವರ ಮರಿಗಯುತು ಕ್ಹಾರಾ ದಾಣ್ಗಾ ವರಿ ಹೆಣ್ಣ ಮನಕ್ಹೊ ಮರಿಗಯಾ ಹರಯಕ್ಕ ಪಕ್ಷಿ ಪಶು ಜಾನವರ ವರಿ ಹರಯಕ್ಕ ಕಿಡಾಮರಿಗಯಾ. ಜಿಮಿನಪರ ರ್ಹಯಲ ಉಸುಲ ಲಿವಾನು ಹರಿಯಕ್ಲಾ ಮರಿ ಗಯಾ. ಅಮ್ಮ ಕ್ಹುದಾ ಜಿಮಿನ್ಪರ ರ್ಹಯಲ ಹರಯಕ್ಕ ಜಿವ ನಾಶ ಕರಿಪಾಡ್ಯೊ ಹರಯಕ್ಕ ಮನಕ್ಹನೆ ನಾಶಕರಿಪಾಡ್ಯೊ ಹರಯಕ್ಕ ಜಿವ ಹರಯಕ್ಕ ಕಿಡಾ ವರಿ ಪಕ್ಷಿಯೊ ನಾಶಥಯಾ ಕುನ್ನ ವಾಚ್ಯು ಕದ್ಯಾಮ ನೊಹಾನಾ ಕ್ಹಾತೆ ರ್ಹಯಲ ತ್ಯುನಾ ಘರವಾಲಾ ವರಿ ತ್ಯುನಾ ಕ್ಹಾತೆ ರ್ಹಯಲ ಜಿವ ಜಂತು ಪಕ್ಷಿಯೊ ಕಿಡಾ ಹರಯಕ್ಕ ವಾಚ್ಯಾ. ದೆಡಕ್ಹೊ ದಿನ ಲಕ್ಕಾ ಜಿಮಿನ ಪುರಾ ಪಾನಿಕ್ಹೊ ಝಕೈ ಗೈತಿ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.