Sikkiligar Bible
ಆದಿ 6
ನೊಹಾನಿ ಚರಿತ್ರ
ಮನಕ್ಹನಿ ಜಾ಼ತ ದುನಿಯಾಪರ ಫೈಲಲ ನಿಂಗತ ತ್ಯುನೊನೆ ಛೊಕ್ರಿಯೊ ಹುಟ್ಟಿಯೊ. ಎ ಮನಕ್ಹನಿಯೊ ದಿಕ್ರಿಯೊನಿ ಸುಂದರ್ತಾ ದೆಕಿನ ಕ್ಹುದಾನಾ ಗಂಡ ಪಟ್ಟಾ ತ್ಯುನಾ ಮನಸೆ ಆಯಲವಾಲಿಯೊನೆ ಹಿವಾ ಕರ್ಲಿದ್ಯಾ. ತೆಳಾಮಾ ಯಹೊವಾ, 'ಮಾರಿ ಆತ್ಮಾ ಮನಕ್ಹೊಮಾ ಹಮೆಶಾಬಿ ಮಿ ರ‍್ಹವಾನೆ ದೆತೊ ನೈ. ತ್ಯುನೆ ಕ್ಹಾಲಿ ಅಂಗ ವ್ಹೈ, ತ್ಯುನೆ ಮರಾಲಾಜ಼ ವ್ಹೈ. ತ್ಯುನಿ ವೈಸ ಕ್ಹಾಲಿ 120 ವರಕ್ಹ ರ‍್ಹವಾದೆ ಕೈನ ಕದ್ಯೊ. ಕ್ಹುದಾನಾ ಬಚ್ಚಾ಼ ಮನಕ್ಹೊನಾ ದಿಕ್ರಿಯೊನಾ ಕ್ಹಾತೆ ಕುಡತಾಮಾ ಬಚ್ಚಾ಼ ಹುಟ್ಯಾ. ತೆ ಕಾಲತಾ ತೆ ಥಯಲ ಪರಬಿ ದುನಿಯಾಮಾ ಮ್ಹೊಟಾ ಅಂಗವಾಲಾ ವ್ಹತ್ತಾ. ಇವ್ನೆಜ಼ ಪುರ್ವ ಕಾಲಮಾ ಘನ್ನಾ ಪ್ರಸಿದ್ದ ತಾಕತವರೊ, ನಾಯಕೊ ನಾಮವಾಲಾ ಥಯಾತಾ. ದುನಿಯಾಮಾನಾ ಮನಕ್ಹೊನು ಕೆಟ್ಟತನಾ ಜಾಸ್ತಿ ಥಾತುಜ಼ ವ್ಹತ್ತು. ತ್ಯುನೆ ತ್ಯುನಾ ಮನಸ್ಸಮಾ ವಿಚಾರೊ ಕರಾನು ಕೆಳಾಮಾಬಿ ಕೆಟ್ಟ ವಿಚಾರೊಜ಼ ಕರಾನು ಯಹೊವಾ ದೆಕ್ಯೊ. ಎ ದೆಕಿನ ಕ್ಹುದಾ ಮನಕ್ಹನೆ ತಯ್ಯಾರ ಕರಲ ಹುತಿ ತಿನಾ ಮನಸನೆ ಘನ್ನು ದುಖ ಥಯು. ತೆಳಾಮಾ ತೆ, 'ಮಿ ತಯ್ಯಾರ ಕರಲ ಮನಕ್ಹೊನೆ ದುನಿಯಾಮಾತೊ ನಾಮೊ ನಿಶಾನ ನೈಸೊ ಕರಿ ಪಾಡುಸ, ತ್ಯುನಾ ಕ್ಹಾತೆ ಪಶು ಪಕ್ಷಿಯೊನೆ, ಜಿಮಿನಪರ ಫರಾನಾ ಕಿಡಾ ಕಾಟುನೆಬಿ ನೈಸೊ ಕರಿಪಾಡುಸ. ತ್ಯುನೊನೆ ತಯ್ಯಾರ ಕರಲಹುತಿ ಮಾರು ಮನಸ ದುಖ ಥಾವಾಡುಸ. ತೆನೈಸೊ ಕ್ಹುದಾ ನೊಹಾನಾ ವಿಶಯಮಾ ಖುಶಿ ಥಯೊ.
ನೊಹಾ
ನೊಹಾನಿ ಚರಿತ್ರೆ ವ್ಹೈ: ನೊಹಾ ಕ್ಹರಿಕ್ಹು ರ‍್ಹವಾಲೊ ವ್ಹತ್ತೊ, ತೆ ಕಾಲನಾ ಮನಕ್ಹೊಮಾ ತೆ ನಿರ್ದೊಶಿ ವ್ಹತ್ತೊ. ತೆ ಕ್ಹುದಾನಾ ಕ್ಹಾತೆ ಅನ್ಯುನ್ಯ ರ‍್ಹೈನ ಚಾ಼ಲಿಲಿನ ಜಾ಼ತೊತೊ. ತಿನೆ ಶೆಮ, ಹಾಮ, ಯೆಫೆತ ಕವಾಲಾ ತನ್ನ ದಿಕ್ರಾ ವ್ಹತ್ತಾ. ತೆಳಾಮಾ ದುನಿಯಾ ಕ್ಹುದಾನಿ ನಜ಼ರಮಾ ಕೆಟ್ಟಿತಿ. ವರಿ ತ್ರಾಸಕ್ಹು ಭರ‍್ಯುತು. ಕ್ಹುದಾ ದುನಿಯಾನಾ ಕೆಕ್ಲಾ ಕೆಟ್ಟ ಥೈ ಗೈಸ ಕೈನ ದೆಕ್ತಾಮಾ, ಕಾಕದ್ಯಾಮ ದುನಿಯಾಮಾ ರ‍್ಹಯಲ ಕ್ಹಾರಾ ಮನಕ್ಹೊನಾ ವಾಟೊ ಕೆಟ್ಟತನಾಕ್ಹು ಭರ‍್ಯಾಸ. ತೆಳಾಮಾ ಕ್ಹುದಾ ನೊಹಾನೆ, 'ಕ್ಹಾರಾ ಮನಕ್ಹೊನೆ ಕ್ಹಾರುಜ಼ ಹಾಳ ಕರಿಪಾಡುಸ ಕೈನ ಮಿ ಫೈಸ್ಲೊ ಕರ‍್ಯೊಸ. ಕಾಕದ್ಯಾಮ ಇವ್ನಾಕ್ಹು ದುನಿಯಾ ಹಿಂಸೆಕ್ಹು ಭರಿ ಗಯುಸ. ಮಿ ಕ್ಹರಿಮಾಜ಼ ತ್ಯುನೊನೆಬಿ ದುನಿಯಾಮಾ ರ‍್ಹಯಲ ಕ್ಹಾರುಜ಼ ನಾಶ ಕರುಸ. ತು ಚೊ಼ಕಾ ಝಾಡಕ್ಹು ತಾರಾಹುತಿ ಯಕ್ಕ ಹಡಗೊ ಕರಿಲೆ, ತಿಮಾ ಘನ್ನಾ ಕ್ಹೊಲಿಯೊ ರ‍್ಹವಾದೆ, ತಿನಾ ಮ್ಹೈಬಿ ಭಾರೊಬಿ ಡಾಂಬರ ಲಗಾಡ. ತೆ ಅಮ್ಮ ಕರ, ತೆ ಹಡಗೊ ಲಾಂಬಾಮಾ 450 ಪುಟ ರುಂದಮಾ, 75 ಪುಟ ಉಚ್ಚಾ಼ಮಾ 45 ಪುಟ ತಿನಾ ಛತ್ತನಾ ಹೆಟು 18 ಇಂಚ಼ ಖುಲ್ಲಾ ರ‍್ಹವಾದೆ. ತಿನಾ ಬಾಜು಼ಮಾ ಬಾಕಲ ರ‍್ಹವಾದೆ; ಮಿ ತುನೆ ಕವಾಡೊಸ ಕಳಿಲೆ ಮಿ ಜಿಮಿನ್ಪರ ಕ್ಹಾರವೊತಿ ಮ್ಹೊಟು ಪಾನಿನು ತುಫಾನ ಲೌಸ ಹಬಾಳನಾ ಹೆಟಾ ರ‍್ಹಯಲ ಕ್ಹಾರಾವೊನೆ ಮಾರಿಪಡುಸ ಜಿಮಿನ್ಪರ ಹರಯಕ್ಕ ನಾಶ ಥಾವಸ. ಮಿ ತಾರಾ ಕ್ಹಾತೆ ಯಕ್ಕ ವಡಂಬಡಿಕೆ ಕರಲ್ಯುಸ ತೆ ಸುವೈ ಕದ್ಯಾಮ ತು ತಾರಿ ಬೈಕೊ ಗಂಡ ಬಚ್ಚಾ ವರಿ ವ್ಹೌವೊನೆಲಿನ ಹಡಗಾಮಾ ಜಾ. ತೆನೈಸೊ ತು, ಜಿಮಿನ್ಪರ ರ‍್ಹಯಲ ಹರಯಕ್ಕ ಜಿವಿನಾ ಜೊಡಿ ಯಕ್ಕ ಗಂಡ ಯಕ್ಕ ಹೆಣ್ಣ ಕೈನ ಹಡಗಾಮಾ ಬಲೈಲೆ ತಾರಾ ಕ್ಹಾತೆ ತ್ಯುನೊನೆ ಬಿ ವಚಾ಼ಡುಸ. ಜಿಮಿನ್ಪರ ರ‍್ಹಯಲ ಹರಯಕ್ಕ ಜಾತನಿ ಪಕ್ಷಿಯೊಮಾ ಯಕ್ಕ ಹೆಣ್ಣ ಯಕ್ಕ ಗಂಡ ಹರಯಕ್ಕ ಜಾನವರೊಮಾ ಯಕ್ಕ ಹೆಣ್ಣ ಯಕ್ಕ ಗಂಡ ವರಿ ಹರಯಕ್ಕ ಜಿವ ಜಂತು ತಿನು ಜಲಮ ವಚಾ಼ಡ ಲಿವಾನಾ ಹುತಿ ತಾರಾ ಕ್ಹಾತೆ ಆವಾದೆ. ಜಿಮಿನ್ಪರ ಮಳಾನು ಹರಯಕ್ಕ ಜಿವ ಜಂತು ಕ್ಹಾವಾನು ವರಿ ತಾರಾಹುತಿಬಿ ಹಡಗಾಮಾ ಭರಲೆ ಕೈನ ಕದ್ಯೊ. ಕ್ಹುದಾ ಕದಲ ನಿಂಗತ ಕ್ಹಾರು ನೊಹಾ ಕರೊ
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.