Sikkiligar Bible
ಯಜಕೆಲಾ 9
ಜೆರುಸಲಿಮನೆ ಶಿಕ್ಷಾದಿದಲ
ಪಾಚಾ಼ತೊ ತೆ ಗಾಮನೆ ದಂಡ ದಿವಾಲಾ ತುಮೆ ಕ್ಹಾರಾ ತುಮಾರಾ ಹತ್ಯಾನಾ ಆಯುದೊನೆ ಧರಲವಾಲಾ ನಜಿಕ ರ್ಹವೊ” ಕೈನ ಘಟ್ಟ ಥೈನ ಅಡ್ಡಿನ ಕದಲ ವಾತ ಮಾರಾ ಕಾನೆ ಪಡ್ಯು. ತೆಳಾಮಾಜ಼ ಖತರನಾಕ ಆಯುಧೊ ಧರಲಿನ ಛೆ ಜನಾ ದಾಣ್ಗಾವೊ ಉತ್ತರನು ಮ್ಹೊಡು ಥಯಲ ಉಪ್ಪರಲ್ಯಾ ಬಾಕಲನೆ ವಾಟ ಥೈನ ಆಯಾ; ಕಿಮ್ಮತನಾ ವಣ್ಣಾವೊನಾ ಲಿಂಗೈನ ಲೆಖಕನಿ ವಚ್ಮಾ ಭಾಂದಿಲಿದಲ ಹಜಿಯಕ್ಕ ದಾಣ್ಗೊ ತ್ಯುನಾ ವಚ್ಮಾ ವ್ಹತ್ತೊ. ಅವ್ನೊಕ್ಹಾರಾ ಮ್ಹೈ ಹೊಕ್ಕಿನ ತಾಂಬಾನು ಬಲಿನೊ ಕಟ್ಟಾನಾ ಬಾಜು಼ಮಾ ಹುಬ್ರಯಾತಾ. ಅಕ್ಲಾಜ಼ ಇಸ್ರಾಯಲನಾ ಕ್ಹುದಾನಾ ತೆಜಸ್ಸನೆ ತಿನಾ ಕೆರುಬಿನೆ ಛೊಡಿನ ಉಪ್ಪರ ಚಡಿನ ಆಲಯನಾ ಪಾಳಿನಾ ಉಪ್ಪರ ಹುಬ್ರಯುತು; ತೆಳಾಮಾ ನಾರಿನಾ ವಣ್ಣಾವೊನೆ ಲಿಂಗೈನ ಲೆಖಕನ ದೌತಿನಾ ವಚ್ಮಾ ಭಾಂದಿಲಿದಲ ದಾಣ್ಗಾನೆ ಯಹೊವಾ ಬಲೈನ. ತಿನೆ ತು ಯೆರುಸಲೆಮ ಕ್ಹಾರಾ ಗಾಮ್ಮಾ ಫರಿನ ತಿಮಾ ಮ್ಹೈ ಚಾ಼ಲಾನು ಸಮಸ್ತ ಅಸ್ಯಯ ಕಾಮೊನಾಹುತಿ ನರಳಿನ ಗೊಲಾಟಾ ಥಾವಾನಾ ಮನಕ್ಹೊನಾ ಕಪ್ಪಾಳಪರ ವಳಕ ಕರ ಕದ್ಯೊ. ಉಗ್ರಲವಾಲಾವೊನೆ ತುಮೆ ಗಾಮಾ ಕ್ಹಾರಾ ಅನಾ ಪಾಚಾ಼ ಫರತಾ ಖಲಾಸ ಕರೊ. ಕಿನೆಜ಼ ಮುಲಾಜೊ಼ ಮ್ಹೆಲೊ ನಕೊ, ಉಗ್ರಾಡೊನಕೊ, ಗಡಿಯಾ, ಜಾಂಜಿಮಾನೊ, ಛೊಕ್ರಿಯೊ, ಬಾಕ್ಡಿ, ಮಾವೊನೆ ಪಟ್ಟಾವೊನೆ ಬಚ್ಚಾ಼ವೊನೆ ಕಯೆವಾಚಿ ಕ್ಹಾರಾವೊನೆ ಕತ್ರಿಪಡ್ಯೊ; ತೆ ನೈಸೊ ತೆ ವಳಕ ಕರಲವಾಲಾವೊನೆ ಕಿನೆಜ ಮುಟ್ಟೊನಕೊ; ಮಾರಾ ಆಲಯಮಾ ಪ್ರಾರಂಬ ಕರೊ ಕವಾನು ತೆ ಮನೆ ಐಕಾವರಕ್ಹು. ತೆಳಾಮಾ ದೆವಾಲಯನಾ ಕ್ಹಾಮಾ ರ್ಹಯಲ ಮ್ಹೊಟಾವೊನೆ ಪೈಲಾಲಿನ ಖಲಾಸ ಕರ್ಯಾ. ತೆ ತ್ಯುನೊನೆ ಜಾ಼ವೊ, ಅಂಗ್ಳಾವೊನೆ ಮುರ್ದಾವೊಕ್ಹು ಭರಿನ ದೆವಾಲಯನೆ ಹೊಲಸ ಕರ್ಯೊ ಕೈನ ಅಪ್ಪಣೆ ದೆತಾಮಾ ತ್ಯುನೆ ಗೈನ ಗಾಮವಾಲಾವೊನೆ ಖಲಾಸ ಕರ್ಯಾ. ತ್ಯುನೊನೆ ಮಾರಾತಾ ಟೈಮಾ ತ್ಯಾ ಮಿ ಯಕ್ಲೊ ಉಗ್ರಲ ಮಿ ಡಬ್ಬ ಪಡಿನ ಅಯ್ಯೊ, ಕರ್ತಾ ಥಯಲ ಯಹೊವಾ ತು ಯೆರುಸಲೆಮನಾ ಉಪ್ಪರ ಸಿಟ್ಟ ಅಗ್ನಿನೆ ಲಿಂಗೈನ ಇಸ್ರಾಯಲನಾ ಸಂಖ್ಯಾನಾ ಕ್ಹಾರಾ ನಾಶಕರ ಕೈನ ಮೊರೆ ಮ್ಹಲ್ತಾಮಾ ತೆ ಮನೆ
ಇಸ್ರಾಯಲೊ ವರಿ ಯೆಹುದ ವಂಶವಾಲಾ ಅಧರ್ಮಬಿ ಅತ್ಯಂತ ಥಯುಸ; ದೆಶಬಿ ರಗತನು ಪುರ್ಣ ಥಯು, ಯೆರುಸೆಲಿಮ ಗಾಮಬಿ ಅಪರಾಧಕ್ಹು ಭರಿಗಯುಸ ಭರಿತ ಥಯುಸ; ತೆ ವಂಶವಾಲಾ ಅಪ್ನಾ ದೆಶವಾಲಾ ಯಹೊವಾ ಛೊಡಿಪಡ್ಯೊಸ ಯಹೊವಾ ದೆಕ್ತೊ ನೈ ಕೈನ ಬೊಲ್ಲಿವಾಡಾಸ ಕೈನ ಮಿ ತೊಬಿ ತ್ಯುನೊನೆ ಆಸಿರ್ವಾದ ಕರಸ, ಮರ್ಗ್ಯಾವಾಚಿ ದಯಾಕರ್ಯಾವಾಚಿ, ತ್ಯುನಾ ಕೆಟ್ಟ ಕಾಮೊನು ತ್ಯುನೊನೆ ಶಿಕ್ಷಾ ದ್ಯುಸ. ತೆಳಾಮಾ ಚೊಕಾ ವಣ್ಣಾವೊನೆ ಘಾಲ್ಲಿನ ದೌತಿನಾ ವಚ್ಮಾ಼ಜ಼ ಭಾಂದಿಲಿವಸ ದಾಣ್ಗಾಬಿ ತಾರಾ ಅಪ್ಪಣೆ ನಿಂಗತಜ಼ ಕರ್ಯೊಸ ಕೈನ ಅರಕೆ ಕರ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.