Sikkiligar Bible
ಯಜಕೆಲಾ 8
ಹೆಜೆಕೆಲನೆ ಥಯಲ ಕ್ಹುದಾನು ಬೆವಾ ದರ್ಶನ
ಯೆರುಸೆಲಿಮನೆ ಮೊರ್ತಿಯೊನಿ ಪುಜಾ
ಯೆಹೊಯಾಖಿನ ಆಳಥೈನ ಛೆವಾ ವರಕ್ಹನಾ ಛೆವಾ ಮ್ಹೈನಾನಾ ಪಾಂಚ಼ವಾ ದಿನ್ನಮಾ ಮಿ ಯೆಹುದನಾ ಶಾನಾ ಮಾರಾ ಘರಮಾ ಯದರ ಬದರ ಥೈನ ಬೈಟತಾಮಾ ಕರ್ತಾ ಥಯಲ ಯಹೊವಾನಾ ಹತ್ತ ಮಪರ ಮ್ಹೆಲಲ ಹುತಿ ಮಿ ಮಹಿಮಾ ಕ್ಹು ಭರ್ಯೊ. ಹಮ್ನಾ, ಮಿ ದೆಕ್ತಾಮಾ ಆಗ ಲಾಗಲ ನಿಂಗತ ಮನೆ ಮನಕ್ಹ ನಿಂಗತ ತೆಜನೂ ರುಪ ದಿಕ್ಹ್ಯು; ಕಂಬರ ನಿಂಗತ ದಿಕ್ಹಾನು ತಿನಾ ವಚ್ಮಾನಾ ಭಾಗತು ಹೆಟಿ ಆಗ ಲಾಗಿತಿ; ತಿನಾ ವಚ್ಮಾನಾ ಭಾಗತು ಉಪ್ಪರ ಕ್ಹೊನಾನಿಂಗತ ಚಮ್ಕಾಡುಸ ಕವಾನು ಅದ್ಬುತ ಕಾಂತಿ ಚಮಕ್ಯು. ತೆಳಾಮಾ ತೆ ತೆಜನು ರುಪಬಿ ಮನಕ್ಹನಾ ಹತ್ತ ನಿಂಗತ ಹತ್ತಬಿ ಧರಿನ ಮಾತು ಧರಾನೆ ಕ್ಹುದಾನಿ ಮನೆ ಉಚೈಲಿನ ಜಿಮಿನ ಹಬಾಳನಾ ವಚ್ಮಾ ಯೆರುಸಲೆಮ ಲಕ್ಕಾ ಲಿಂಗೈನ ಮ್ಹೈ ನಾ ಪ್ರಕಾರ ಉತ್ತರ ದಿಕ್ಕಾನಾ ಬಾಕಲನಾ ಕ್ಹಾಮು ಕ್ಹುದಾನೆ ರೊಷಲಾವಾನು ವಿಗ್ರಹಬಿ ಪೈಲಾ ಜ಼ಗಾ ನೈ ಹುಬ್ರಾಡಲ ನಿಂಗತ ಕ್ಹುದಾನಾ ದರ್ಷನ ದಿಕ್ಹಿನ ಐಯು; ಆಹಾ
ಇಸ್ರಾಯಲನಾ ಕ್ಹುದಾನಾ ಮಹಿಮಾದ್ಬುತನಾ ದರ್ಶನಬಿ ಬೈಲು ಸಿಮೆಮಾ ಥಯಲಜ಼ ಮನೆ ಥಯು . ತೆಳಾಮಾ ತೆ ಮನೆ ಮನಕ್ಹನಾ ದಿಕ್ರಾ, ಉತ್ತರ ದಿಕ್ಕನಾ ಬಗಲ ಡೊಳೊ ಉಚೈನ ದೆಕ ಕೈನ ಕದ್ಯೊ; ತಿಮ್ಮಜ಼ ಮಿ ದೆಕ್ತಾಮಾ ಹಮ್ನಾ ಕ್ಹುದಾನೆ ರೊಷಕರಾನು ತೆ ವಿಗ್ರಹ ಯಜ್ಞವೆದಿನು ಬಾಕಲನಾ ಉತ್ತರ ದಿಕ್ಕನಾ ಬಾಕಲನಾ ಕ್ಹಾಮು ಹುಬ್ರಯುತು. ತೆಳಾಮಾ ತೆ ಮನೆ ತೆ ಕದ್ಯೊ ಮನಕ್ಹನಾ ದಿಕ್ರಾ, ಔನೆ ಕರಾನು ದೆಕ್ಯೊಸ? ಇಸ್ರಾಯಲನಾ ವಂಶವಾಲಾ ನ್ಹ್ಯಾ ಕರಾನು ದುರಾಚಾರೊನೆ ದೆಕ್ಯೊಸ? ಇನಾಕ್ಹು ಮಿ ಮಾರು ಪವಿತ್ರಾಲಯನೆ ಚೊಡಿನ ದುರ ಜೌ಼ ಲಾಗ್ಯೂ. ಆ, ಆನಾತಿಬಿ ಹಜಿಬಿ ಹೆಚ್ಚ ಥಯಲ ದುರಾಚಾರೊನೆ ತು ದೆಕಸಿ ಕದ್ಯೊ.
ಪಾಚಾ಼ತೊ ತೆ ಮನೆ ಅಂಗ್ಳಾನಾ ಬಾಕಲನೆ ಆವಾ ಲಗಾಡ್ಯೊ; ಹಮ್ನಾ ತೆ ಗೊಡಿಮಾ ಯಕ್ಕ ಭೊಕಾಡೊ ದಿಕ್ಯ್ಹು. ತೆಳಾಮ ತೆ ಮನೆ ಮನಕ್ಹನಾ ದಿಕ್ರಾ ಗೊಡಿನೆ ಖಂದ ಕೈನ ಕದ್ಯೊ. ಮಿ ಗೊಡಿ ಭಾಂದತಾಮಾ ದೆಕ, ಯಕ್ಕ ಬಾಕಲ ದಿಕ್ಹ್ಯು. ತೆ ಮನೆ ತು ಮ್ಹೈ ಹೊಕ್ಕಿನ ಮನಕ್ಹೊ ಯ್ಹಾ ಚಲಾವಾನು ಅಸ್ಯಯ ಥಯಲ ದುಷ್ಕಾರ್ಯೊನೆ ದೆಕ ಕೈನ ಕದ್ಯೊ. ಮಿ ಹೊಕ್ಕಿನ ದೆಕ್ಯೊ ಕ್ಹಾರಾ ಜಾ಼ತನಾ ಜಿವ ಜಂತು ಅಸ್ಯಯ ಮೃಗೊ ಇಸ್ರಾಯಲನಾ ವಂಶವಾಲಾ ಪೂಜಾಕರಾನು ಹರಯಕ್ಕ ಮೂರ್ತಿಯೊನಾ ಸುತ್ತೆಬಿ ಗೊಡಿಯೊಪರ ಚಿತ್ರಾ ಕಾಡಲ ವ್ಹತ್ತು. ಇಸ್ರಾಯೆಲನಾ ವಂಶನಾ ಸತ್ತರ ಜನಾ ಮ್ಹೊಟಾ ಮನಕ್ಹೊ ತ್ಯುನಾ ವಚ್ಮಾ ಶಾಫನನೊ ದಿಕ್ರೊ ಥಯಲ ಯಾಜನ್ಯಬಿ ತ್ಯುನಾ ತ್ಯುನಾ ಹತೊಮಾ ಉದ ಧವಾಂಡೊ ವರಿ ಆರತಿ ಧರಲಿನ ಚಿತ್ರಾನಾ ಕ್ಹಾಮಾ ಹುಬ್ರಯಾತಾ; ಧವಾಂಡಾನಿ ಚೊಕಿಬಾಸ ಧವಾಂಡೊಬಿ ಮ್ಹಾಡ ನಿಂಗತ ಉಪ್ಪರ ಚಾಲ್ಯೊತೊ. ತೆಳಾಮಾ ತೆ ಮನೆ ಮನಕ್ಹನಾ ದಿಕ್ರಾ, ಇಸ್ರಾಯಲ ವಂಶನಾ ಮ್ಹೊಟಾ ಮನಕ್ಹೊ ಕ್ಹಾರಾ ಬಿಜಾ಼ ಬಿಜಾ಼ ರುಪಕ್ಹು ಚಿತ್ರಾ ಕಾಡಲ ತ್ಯುನಾ ತ್ಯುನಾ ಕ್ಹೊಲಿಯೊಮಾ ಅಂದಾರಾಮಾ ಚಲಾವಾನು ಕಾಮ ದೆಕ್ಯೊಸು? ಯಹೊವಾ ಅಪೊನೆ ನೈ ದೆಕ್ತೊ. ಯಹೊವಾ ದೆಶನೆ ಛೊಡಿ ಪಡ್ಯೊಸ ಕೈನ ಕ್ಹಾಲಿ ಬೊಲ್ಲಿವಸ. ಕೈನ ಕದ್ಯೊ. ಪಾಚಾ಼ತೊ ತೆ ಮನೆ ಆನಾತಿಬಿ ಘನ್ನಾ ದುರಾಚಾರೊನೆ ದೆಕಸಿ. ಕೈನ ಮನೆ ಯಹೊವಾನಾ ಉತ್ತರ ದಿಕ್ಕನಾ ಬಾಕಲನಾ ಕ್ಹಾಮೊ ಆವಾಲಗಾಡ್ಯೊ; ದೆಕ, ತ್ಯಾ ಹೆಣ್ಣ ಮನಕ್ಹೊ ತಮ್ಮೂಜ್ ಕವಾಲೊ ಕ್ಹುದಾ ಹುತಿ ರೊತಾ ಬೈಟ್ಯಾತಾ.
ಪಾಚಾ಼ತೊ ತೆ ಮನೆ ಮನಕ್ಹನಾ ದಿಕ್ರಾ, ಆ ದೆಕ್ಯೊಸು? ಆನಾತಿಬಿ ವರಿ ಹೆಚ್ಕಿ ರ್ಹಯಲ ದುರಾಚಾರೊ ದೆಕ್ಸಿ ಕೈನ ಯಹೊವಾನಾ ಆಲಯನಾ ಮ್ಹೈ ಪ್ರಕಾರನಾ ಮ್ಹೈ ಮನೆ ಆವಾಲಗಾಡ್ಯೊ; ಆಹಾ, ಯಹೊವಾನಿ ಗುಡಿನೂ ಬಾಕಲನಾ ಕ್ಹಾಮು ಮಂಟಪನೆ ವರಿ ಬಲಿನು ಕಟ್ಟೊ ವಚ್ಮಾ ಸುಮಾರ ಪಚ್ಚಕ್ಹ ಮನಕ್ಹೊ ಯಹೊವಾನಾ ಗುಡಿನೆ ಪಟ್ಟ ಕರಿನ ಮೂಡಲನಾ ಮ್ಹೊಡು ಥೈನ ಪಾಟಲ್ಯಾ ಟೈಮನಾ ಸುರ್ಯಾನೆ ಪೂಜಾ ಕರತಾತಾ. ತೆಳಾಮ ತೆ ಮನೆ ಮನಕ್ಹನಾ ದಿಕ್ರಾ, ದೆಕ್ಯೊಸು? ಯೆಹುದ ವಂಶವಾಲಾ ತ್ಯುನೆ ಯ್ಹಾ ಕರಾನಾ ಅಸ್ಯಯ ಕಾಮೊ ಅಲ್ಪ ಥೈನ ಭಾವಸಿ ಲಿದ್ಯಾಮ? ದೆಶನೆ ಹೆಂಸ್ಸೆಕ್ಹು ಭರಲ ನೈಸೊ ಮನೆ ಕೆಣಕಿನ ಚಾಯೆಕೈನ ವರಿ ಪ್ರಯತ್ನ ಕರಾಡಾಸ; ದೆಕ, ಠೊಂಗಿಯೊಕ್ಹು ನಾಕನೆ ಝಾಕಿಲಿವಸ; ತೆ ಥಯಲ್ಪರ ಮಿ ಸಿಟ್ಟಕ್ಹು ಬೊಲುಸ, ಕಟಾಕ್ಷ ಕರುಸ, ಉಗ್ರಾತೊ ನೈ; ತ್ಯುನೆ ವದ್ರಾನಿ ಜೊ಼ರ ಅವಾಜ ಮಾರಾ ಕಾನೆ ಪಡಿತಬಿ ಐಕ್ತೊ ನೈ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.