Sikkiligar Bible
ಯಜಕೆಲಾ 7
ಇಸ್ರಾಯೆಲನು ನಾಶ ನಜಿಕ ಆಯು
ತೆ ನೈಸೊ ಯಹೊವಾ ಆ ವಾತ ಮನೆ ಕದ್ಯೊಸ ಮನಕ್ಹನಾ ದಿಕ್ರಾ, ಕರ್ತಾ ಥಯಲ ಯಹೊವಾ ದೆಶನೆ ಅಮ್ಮ ಕದ್ಯೊ ಭುಕಂಪ ಪುರ್ಣ ಭುಕಂಪಬಿ ದೆಶನಾ ಚಾರೆ ದಿಕ್ಕಮಾ ಸಂಭವ ಕರ್ಯೊ. ಹಮ್ನಾಜ ತುನೆ ಭುಕಂಪ ಐ ಪಡ್ಯುತು; ಮಿ ಮಾರಿ ಸಿಟ್ಟ ತುಮಾರಾ ಉಪ್ಪರ ಆವಾ ಲಗಾಡಿನ ತು ಚಾಲಲ ನಿಂಗತ ನ್ಯಾಯ ತಿರಿಸಿನ ತಾರಾ ಸಮಸ್ತ ಅಸ್ಯಯ ಕಾಮೊನಾ ಫಲ ತುನೆ ಕ್ಹಲೌಸ. ತುನೆ ಮರಗತೊ ನೈ; ತಾರಾ ದುಮಾರ್ಗನಾ ಫಲ ತುನೆ ಕ್ಹಲೌಸ; ತಾರಾ ಅಸ್ಯಯ ಕಾಮೊ ತಾರಾ ಅನುಭವನೆ ಆವಸ; ತೆಳಾಮಾ ಮಿಜ ಯಹೊವಾ ವ್ಹೈ ಕೈನ ತುನೆ ಗೊತ್ತ ಥಾವಸ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಆಹಾ, ಕೆಡ, ಕೆಳಾಮಬಿ ನೈ ದಿಕ್ಹಲ ಕೆಡ, ಹಮ್ನಾ ಆವಸ! ಅಂತ್ಯ ಐಯು, ಅಂತ್ಯ ಐಪಡ್ಯು, ತಾರು ಕ್ಹಾಜ಼ ಖಲಾಸ ಥಯು! ದೆಶನ ವಾಸಿಯೊ, ತಾರಿ ಗತಿ ಥಯು. ವಕ್ಹತ ಆಯೊ, ದಿನ ಕ್ಹಾಮೊ ವ್ಹತ್ತೊ; ಡೊಂಗರೊನಾ ಉಪ್ಪರ ಐಕಾನು ಅವಾಜ ಉತ್ಸಾಹ ಅವಾಜಕ್ಹಾರಿ, ಕಳಕಳ ವ್ಹೈ. ಹಜಿ ದಕ್ಹಾ ಟೈಮಾಜ ಮಿ ತಾರಾ ಉಪ್ಪರ ಮಾರಿ ರೊಷನೆ ರಿಚೈನ ಮಾರಿ ಸಿಟ್ಟ ತಿರಸಿಲಿನ ತಾರಾ ನಡತೆನೆ ತಕ್ಕ ದಂಡ ದಿನ ತಾರಾ ಅಸ್ಯಯ ಕಾಮೊನಾ ಫಲನೆ ತುನೆ ಕ್ಹಲೌಸ. ತುನೆ ಮರಗತೊಜ಼ ನೈ, ತಾರಾ ದುಮಾರ್ಗೊನಾ ತಕ್ಕ ಗತಿ ದ್ಯುಸ, ತಾರಾ ಅಸ್ಯಯ ಕಾಮೊ ತಾರಾ ಅನುಭವನೆ ಆವಸ; ಯಹೊವಾ ಥಯಲ ಮಿ ಶಿಕ್ಷಾ ದ್ಯುಸ ಕವಾನು ತ್ಯುನೆ ಗೊತ್ತ ಥಾವಸ.
ದೆಕ, ಶಿಕ್ಷ ದಿವಾನು ದಿನ್ನ, ಹಮ್ನಾ ಐಯು! ತುನೆ ದುರ್ಗತಿಬಿ ಐಸ, ಲಾಕಡಿ ಫುಲ್ಲೊ ಚೊಡಿಸ, ಹೆಮ್ಮನು ಚಿಗುರ ಛೆ. ಹಿಂಮ್ಸಾ ಬೆಳದಿ ಬೆಳದಿನ ಕೆಡುಕನಿ ಲಾಕಡಿ ಥೈನ ತುಮಾರಾಮಾನಾ ಕುನಬಿ ಉಗ್ರತು ನೈ, ತೆ ಮನಕ್ಹೊನಾ ಸಮುಹಮಾ ತ್ಯುನಾ ಆಸ್ತಿಯೊಮಾ ಶೆಷ ನೈ ರತು. ತ್ಯುನಾಮಾ ಕಯುಬಿ ಶ್ರೆಷ್ಠತೆಬಿ ನೈ ಹುಬ್ರೆತು. ಟೈಮ ಆಯೊ ದಿನ್ನ ಅಗೊ ಆಯೊ; ಇಕ್ಕಾತೊ ಲಿವಾಲೊ ಕ್ಹುಶಿ ಕರ್ಯಾವಾಚಿ ರ್ಹವಾದೆ, ಇಕ್ಕಾಲೊ ಸುಖಾಮಾ ರ್ಹವಾದೆ. ರೊಶ ತೆ ಸಮೂಹನಾ ಹರಯಕ್ಲಾಪರ ಚಡಿಸ. ಕಾ ಕದ್ಯಾಮ ಇಕ್ಕಲವಾಲೊ ಕೆಕ್ಲಾಬಿ ವರಕ್ಹ ಜ್ಯುತೊ ರೈತಬಿ ಇಕ್ಕಲ ಸೊತ್ತಬಿ ತಿನಾ ವಶನೆ ಫರು ನೈ; ಉಂಟ ಥಯಲ ದಿವ್ಯ ದರ್ಶನಬಿ ಸಮೂಹನಾ ಕ್ಹಾರಾವೊನೆ ಸಂಬಂದ ಛೆ, ಕುನಬಿ ಪಾಚಾ಼ ಜಾ಼ತಾನೈ,ಕುನ್ನಜ ತ್ಯುನಾ ಕೆಟ್ಟತನಾಕ್ಹು ತ್ಯುನು ಜಿನವಬಿ ವಚಾ಼ಳೆತಾ ನೈ; ತ್ಯುನೆ ಲಕಾಡಿನೆಬಿ ಸರ್ವನಾಶ ಕರ್ಯಾ ಕುನಬಿ ಯುದ್ದನೆ ಚಾಲ್ಯಾ ನ್ಹೊತಾ; ಮಾರಿ ರೊಷ ತೆ ಸಮೂಹನಾ ಹರಯಕ್ಲಾಪರ ಚಡಿಸ.
ಇಸ್ರಾಯಲೊನಾ ಪಾಪನೆ ಶಿಕ್ಷಾ
ಗಾಮ್ನಾ ಭಾರು ತಲ್ವಾಕ್ಹು ಮರಸ. ಗಾಮ್ನಾ ಮ್ಹೈನಾ ವ್ಯಾದಿನಾ ಕ್ಷಾಮೊ; ವ್ಯಾದಿನಾ ಕ್ಷಾಮನೆ ಬೊಂದೊ ಥಾವಸ. ತ್ಯುನಾಮಾ ಪಲಾಯನ ಕರಲವಾಲಾ ಚುಕೈಲಿನ ತ್ಯುನಾ ಅರ್ಧಮಾಜ ರೈನ ಡೊಂಗರಮಾ ರ್ಹಯಲ ಕ್ಹಬುತರೊ ನಿಂಗತ ಡೊಂಗರೊಪರ ವರಿ ಖಣವಿಮಾ ರವಾ ಧವಾನು ಕರಸ. ಕ್ಹಾರೊವೊನಾ ಹತೊ ಜೊತ ಪಡಲ ರೈಸ ಕ್ಹಾರಾವೊನಾ ಗುಡ್ಗಾವೊ ಪಾನಿ ನಿಂಗತ ಹಲ್ತಾ ರ್ಹವಸ. ತ್ಯುನೆ ಕೊತ್ಳಾವೊನೆ ಸುತ್ತಿ ಲಿವಸ, ಭೆ ತ್ಯುನೊನೆ ಝಾಕಿ ಪಡಸ; ಕ್ಹಾರಾವೊನಾ ಮ್ಹೊಡಾವೊಪರ ಸರಮ ರ್ಹವಸ. ಕ್ಹಾರಾಜನಾ ಮಾತು ಕಡೈಲಿದಲ ರ್ಹವಸ. ತ್ಯುನೆ ತ್ಯುನಾ ರುಪ್ಪಾನೆ ರೊಡೊಪರ ಭಿಕಕಾವಸ, ತ್ಯುನು ಕ್ಹೊನು ಅಶುದ್ದ ಪದಾರ್ಥ ನಿಂಗತ ರ್ಹವಸ; ಯಹೊವಾ ತಿನಾ ರೊಷನೆ ತಿರಸಾನಾ ದಿನಮಾ ತ್ಯುನು ಕ್ಹೊನು ರುಪ್ಪುಬಿ ತ್ಯುನೊನೆ ವಚಾ಼ಡತು ನೈ ತ್ಯುನಾ ಇಷ್ಟಾ ಥಯಲ ನೈ ನೆರವೆರತು ತ್ಯುನು ಪೆಟಬಿ ನೈ ಭರತು; ಕಾ ಕದ್ಯಾಮ ತ್ಯುನಿ ಆಸ್ತಿಬಿ ತ್ಯುನೊನೆ ಪಾಪಮಾ ಜ಼ಲಾವಸ. ತ್ಯುನಾ ಆಭರಣೊನಾ ಚೊಕಾ ತ್ಯುನೊನೆ ಗರ್ವಸ್ಪದ ಥಯು; ತೆ ನೈಸೊ ಹೆಯಬಿ ಅಸ್ಯಯಬಿ ಥಯಲ ತ್ಯುನಾ ದೆವತೆನಾ ಪ್ರತಿಮೆನೆ ಕ್ಹೊನಾ ರುಪ್ಪಾಕ್ಹು ರಡಿ ಕರತಾತಾ;
ತೆ ಥಯಲ್ಪರ ತಿನೆ ತ್ಯುನೊನೆ ಅಶುದ್ದ ಪದಾರ್ಥನೆ ಕರಿನ ಅನ್ಯನಾ ಹತೊಕ್ಹೊ ಕೊಳ್ಳೆ ಫೊಡಾಲಗಾಡಿನ ಲೊಕನಾ ಅತಿ ದುಷ್ಟಕ್ಹು ಹಾಳ ಕರಾಲಗಾಡುಸ; ತ್ಯುನೆ ತಿನೆ ಅಪವಿತ್ರ ಕರಸ. ಮಿ ತ್ಯುನೊ ಕಂತು ಮಾರು ಮ್ಹೊಡು ಒರೆ ಕರಾನೆ ಮಾರಾ ಪಸಂದ ಮಂದಿರನೆ ಅಪವಿತ್ರಕರಸ. ಚೊಟ್ಟಾ ತಿಮಾ ಹೊಕ್ಕಿನ ಹೊಲಸ ಕರಸ.
ಯಕ್ಕ ಸರಪಣಿ ಕರ! ಕಾ ಕದ್ಯಾಮ ದೆಶ ಮನಕ್ಹೊನೆ ಖಲಾಸ ಕರಾಲಾವೊಕ್ಹು ಭರಿಗಯುಸ, ಗಾಮಬಿ ಹಿಂಸಾಕ್ಹು ಭರಿಗಯುಸ. ಅಮ್ಮ ರ್ಹತಾಮಾ ಮಿ ಅತಿ ದುಷ್ಟ ಜನಾಂಗನೆ ಆವಾಲಗಾಡುಸ, ತ್ಯುನೆ ಮನಕ್ಹೊನೆ ಘರೊ ವಶ ಕರಲಿವಸ. ಮಿ ಬಲಿಷ್ಠಾನಾ ಸೊಕ್ಕನೆ ದಡೈಪಡುಸ, ತ್ಯುನಾ ಪವಿತ್ರ ಜ಼ಗಾವೊ ಹೊಲೆ ಗೆಡಸುಸ. ಸಂಕಟ ಆತಾಮಾ; ತ್ಯುನೆ ಸಮಾಧಾನೆ ಹುಡ್ಕಿತರಿ ದಕ್ಹುಬಿ ನೈ ಮಳತು. ಉಪ ತ್ರಾಸ್ಪರ ತ್ರಾಸ, ಸುದ್ದಿನಾ ಉಪ್ಪರ ಸುದ್ದಿ, ಆವಸ; ದಿವ್ಯ ದರ್ಶನ ಥಯು ಕೈನ ಪ್ರವಾದಿನಾ ಐಕೈತಾಜ ರ್ಹವಸ; ಯಾಜಕೊಮಾ ಧರ್ಮ ಉಪದೆಶ ನೈಸೊ ಥಾವಸ, ಮ್ಹೊಟಾವೊಮಾ ಸಲಹೆ ನೈಸೊ ಥಾವಸ. ರಾಜೊ಼ಬಿ ದುಖಮಾ ರ್ಹವಸ ರಾಜಾ಼ನೊ ದಿಕ್ರೊ ಬರೊಕ್ಹೊ ಛೊಡಿಪಾಡಸ; ಮನಕ್ಹೊನಾ ಲಕ್ವೊ ಮಾರಲನಿಂಗತ ಕಾಪಸ; ಮಿ ತ್ಯುನಾ ದುರ್ನಡತೆನೆನಾ ತಕ್ಕ ಶಿಕ್ಷಾ ದ್ಯುಸ ಕರಿನ ತ್ಯುನಾ ದುಷ್ಕರ್ಮನೆ ಕರೆಟ್ಟ ಶಿಕ್ಷಾ ದ್ಯುಸ; ತೆಳಾಮಾ ಮಿಜ಼ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.