Skip to content
BibleKenya

Sikkiligar Bible

ಯಜಕೆಲಾ 10

ಕ್ಹುದಾನಿ ಮಹಿಮಾ ದೆವಾಲಯನೆ ಛೊಡಿನ ಗಯಲ

ಹಮ್ನಾ ಮಿ ದೆಕ್ತಾಮಾ ಕೆರೊಬಿಯೊನಾ ಮಾತಾನಾ ಉಪ್ಪರ ರ‍್ಹಯಲ ಗಗನ ಮಂಡಳ ಉಪ್ಪರ ಕಿಮ್ಮತನೊ ನಿಲಮಣಿ ನಿಂಗತ ಮಿಂಚಾನು ಸಿಂಹಾಸನನಾ ನಿಂಗತ ದಿಕ್ಹ್ಯು. ತೆ ಚೊಕಾ ವಣ್ಣಾವೊನೆ ಲಿನ ಗೈನ ತೆ ದಾಣ್ಗಾನೆ ತು ಗಿರಗಿರ ಫರಾನು ಗಾಲಿಯೊನಾ ವಚ್ಮಾ ಕೆರುಬಿನಾ ಹೆಟಾ ಗೈನ ಕೆರುಬಿನಾ ವಚ್ಮಾತೊ ಬೊಗಸೆಮಾ ಕೆಂಡಾವೊನೆ ಭರಿನ ಲೈನ ಗಾಮ್ನಾ ಉಪ್ಪರ ನಾಕ ಕೈನ ಅಪ್ಪಣೆ ದೆತಾಮಾ ತೆ ಮಾರಾ ಡೊಳಾ ಕ್ಹಾಮೊ ಗೈನ ತ್ಯಾ ಪ್ರವೆಶ ಕರ‍್ಯೊ. ತೆ ಸೆರತಾಮಾ ಕೆರುಬಿಯೊ ದೆವಾಲಯನಾ ಅಂಗಳಮಾ ಹುಬ್ರಯಾತಾ, ಮೆಘನಾ ಮ್ಹೈ ಪ್ರಕಾರಬಿ ಭರ‍್ಯುತು. ತೆ ನೈಸೊ ಯಹೊವಾನಾ ತೆಜಸ್ಸ ಕೆರುಬಿಯೊನೆ ಛೊಡಿನ ಉಪ್ಪರ ಚಡಿನ ದೆವಾಲಯನಾ ಪಾಳಿನಾ ಉಪ್ಪರ ಹುಬ್ರಯುತು; ದೆವಾಲಯಮಾಬಿ ಮೆಘಬಿ ಭರಿತಿ; ಯಹೊವಾನಿ ತೆಜಸ್ಸನಿ ಅದ್ಬುತ ಕಾಂತಿಬಿ ಅಂಗ್ಳಾಮಾಬಿ ಭರಿಗಯುತು. ತೆಳಾಮಾ ಕೆರುಬಿಯೊನಾ ರೆಕ್ಯಾನು ಅವಾಜ ಸರ್ವಶಕ್ತಥಯಲ ಕ್ಹುದಾ ಬೊಲಾನಾ ಅವಾಜ ನಿಂಗತ ಗಂಭಿರ ಥೈನ ಭಾರಾ ಪ್ರಕಾರನಾ ಪರ್ಯಂತಬಿ ಐಕಾಯು.

ತೆ ಚೊಕಾ ವಣ್ಣಾವೊನೆ ಲಿಂಗೈಲ ದಾಣ್ಗಾನೆ ತು ಗರಗರ ಫರಾನಾ ಗಾಲಿಯೊನಾ ವಚ್ಮಾ ಮ್ಹೆ ಗೈನ ಕೆರುಬಿನಾ ವಚ್ಮಾತೊ ಆಗನೆ ಕಾಡಿಲೆ ಕೈನ ಅಪ್ಪಣೆ ದಿವಾನೆ ತೆ ಮ್ಹೈ ಗೈನ ಯಕ್ಕ ಗಾಲಿನಾ ಬಾಜು಼ಮಾ ಗೈನ ಹುಬ್ರೆ. ತೆಳಾಮಾ ಯಕ್ಕ ಕೆರುಬಿ ಕೆರುಬಿಯೊನಾ ವಚ್ಮಾ ಹತ್ತ ಘಾಲಿನ ತಿನಾ ವಚ್ಮಾ ರ‍್ಹಯಲ ಆಗನೆ ಲಿನ ಚೊಕಾ ವಣ್ಣಾವೊನೆ ಲಿಂಗೈಲ ಬೊಗಸೆಮಾ ಘಾಲ್ಯು; ತೆ ತಿನೆ ಲಿನ ಹೆಂಗೆ ಚಾಲ್ಯೊ. ಕೆರುಬಿನಾ ಯಕ್ಕ-ಯಕ್ಕ ರೆಕ್ಯಾನಾ ಹೆಟು ಮನಕ್ಹನಾ ಹಸ್ತ ನಿಂಗತ ಯಕ್ಕ ಯಕ್ಕ ಹಸ್ತ ದಿಕ್ಯೂ. ಹಮ್ನಾ ಮಿ ದೆಕ್ತಾಮಾ ಆ ಕೆರುಬಿಯೊನಾ ಬಾಜು಼ಮಾ ಯಕ್ಕ ಯಕ್ಕ ಕೆರುಬಿನಾ ಬಾಜು಼ ಯಕ್ಕ ಯಕ್ಕ ಗಾಲಿ ನಿಂಗತ ಚಾರ ಗಾಲಿಯೊ ವ್ಹತ್ತಾ; ತೆ ಗಾಲಿಯೊನ ರಂಗ ಪಿತ ರತ್ನನಿಂಗತ ಮಿಂಚ್ಯು. ತಿನು ರುಪ ಕಿಮ್ಮ ಕದ್ಯಾಮ ಯಕ್ಕ ಗಾಲಿಮಾ ಹಜಿಯಕ್ಕ ಗಾಲಿಬಿ ಅಡ್ಡ ಥೈನ ಕಾಡಲ ವ್ಹತ್ತು, ತೆ ಯಕ್ಕಜ ಮಾದರಿ ಥಯಾತಾ. ತೆ ಫರತಾಮಾ ಚಾರೆ ಜ಼ಗಾಬಿ ಕಿ ಬಗಲಬಿ ಫರತಾತಾ. ಒರೆ ಥೈನ ಫರತಾ ನ್ಹೊತಕ್ಹಾಮಾಲ್ಯಾ ಮ್ಹೊಡಾತಾ ಜಯೆಸ ನೈತೊ ಒರೆ ಥೈನ ಜಾ಼ತಾ ನ್ಹೊತಾ. ಕೆರುಬಿಯೊನಾ ಪಿಟ್ಟ, ಹತ್ತ, ರೆಕ್ಯಾ, ಸರ್ವಂಗೊಮಾ ಗಾಲಿಯೊಮಾ ಡೊಳಾವೊ ಭರಿ ಗಯಾತಾ; ಚಾರೆ ಕೆರುಬಿನಾ ಯಕ್ಕನೆ ಯಕ್ಕ ಯಕ್ಕ ಯಕ್ಕ ಗಾಲಿ ವ್ಹತ್ತಿ . ಮಿ ಐಕಲ ನಿಂಗತ ತೆ ಗಾಲಿಯೊನು ನಾಮ ಗರಗರ ಗಾಲಿ ನಿಂಗತ.

ಯಕ್ಕ ಕೆರುಬಿನೆ ಚಾರಚಾರ ಮ್ಹೊಡಾ ವ್ಹತ್ತಾ; ಪೈಲಾನು ಕೆರುಬಿನು, ಬೆವಾನು ಮನಕ್ಹನು, ತನವಾನು ಸಿಂಹಾಡಾನು, ಚಾರವಾನು ಗರುಡ ಪಕ್ಷಿನು. ತೆ ಕೆರುಬಿಯೊ ಉಪ್ಪರ ಚಡ್ಯಾ; ಮಿ ಕೆಬಾರ ನದಿಕನ ದೆಕಲ ಜಿವಿಯೊ ಆಜ ವ್ಹೈ. ಕೆರುಬಿಯೊ ಅಗಾ ಜಾ಼ತಾಮಾ ಗಾಲಿಯೊಬಿ ತಿನಾ ಬಾಜು಼ಮಾ ಅಗಾ ಜಾ಼ತಾತಾ, ಕೆರುಬಿಯೊ ಜಿಮಿನತಾ ಉಪ್ಪರ ಜೌ಼ ಕೈನ ರೆಕ್ಯಾವೊ ಫೈಲೈಲೆತಾಮಾ ಗಾಲಿಯೊಬಿ ಒರೆ ಥಯೆವಾಚಿ ತ್ಯುನಾ ಕ್ಹಾತೆಜ ಉಪ್ಪರ ಗಯಾ. ಜಿವಿಯೊನಿ ಆತ್ಮಾ ಗಾಲಿಮಾಬಿ ರ‍್ಹಯಲ ಕಾರಣಕ್ಹು ತೆ ಹುಬ್ರನ ಜಾ಼ತಾಮಾ ತೆಬಿ ಹುಬ್ರೈನ ಗಯಾ, ತೆ ಚಡ್ತಾಮಾ ತೆಬಿ ತ್ಯುನಾ ಕ್ಹಾತೆಜ ಉಪ್ಪರ ಗೈಪಡ್ಯಾ.

ತೆ ಥಯಲ್ಪರ ಯಹೊವಾ ತೆಜ್ಜಸ ದೆವಾಲಯನಾ ವ್ಹಚ್ಚಲ ಛೊಡಿನ ಕೆರುಬಿನಾ ಉಪ್ಪರ ಹುಬ್ರಯುತು. ತೆಳಾಮಾ ಮಾರಾ ಡೊಳಾನಾ ಕ್ಹಾಮೊ ಕೆರುಬಿಯೊನಾ ರೆಕ್ಯಾವೊನೆ ಫೈಲೈಲಿನ ಗಾಲಿಯೊಬಿ ಜಿಮಿನತಾ ಚ಼ಡಿನ ಗೈನ ಯಹೊವಾನಾ ಆಲಯನಾ ಪುರ್ವ ಬಾಕಲಕನ ಹುಬ್ರಯಾತಾ, ತಿನಾ ಉಪ್ಪರ ಇಸ್ರಾಯಲೊನೊ ಕ್ಹುದಾನಿ ಮಹಿಮಾನಿ ತೆಜಸ್ಸ ತ್ಯುನೊಪರ ವ್ಹತಿ. ಇಸ್ರಾಯಲನಾ ಕ್ಹುದಾನ ವಶಮಾ ರ‍್ಹತಾಮ ಕೆಬಾರ ನದಿಕನ ಮನೆ ದಿಕ್ಹಲ ತೆ ಜಿವಿಯೊ ಆಜ ವ್ಹೈ; ತೆ ಕೆರುಬಿಯೊ ವ್ಹೈಕೈನ ಹಮ್ನಾ ಮನೆ ತಿಳ್ದಿನ ಐಯು.

ಯಕ್ಕನೆ ಯಕ್ಕ ಚಾರಚಾರ ಮ್ಹೊಡಾ ಚಾರಚಾರ ರಕ್ಯಾವೊ ವ್ಹತ್ತಾ. ತಿನಾ ರೆಕ್ಯಾವೊನಾ ಹೆಟಾ ಮನಕ್ಹನಾ ಹತೊ ನಿಂಗತ ಹತೊ ವ್ಹತಾ. ವ್ಹತ್ತು; ತ್ಯುನಾ ಮ್ಹೊಡಾ ಕೆಬಾರ ನದಿನಾ ಬಾಜು಼ ಮಿ ದೆಕಲ ಮ್ಹೊಡಾವೊ ನಿಂಗತ ಮನೆ ದಿಕ್ಹಿನ ಐಯು, ತೆ ತೆ ಮ್ಹೊಡಾ ಹರಯಕ್ಕ ಜಿವಿಬಿ ಗಯಲಶಿದಾ ವ ಮ್ಹೊಡು ಥೈನ ಜಾ಼ತುತು.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.