Sikkiligar Bible
ಯಜಕೆಲಾ 38
ಗೊಗ ಕ್ಹುದಾನಿ ಅಸ್ತ್ರ
ಯಹೊವಾ ಎ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ, ಮೆಷೆಕವಾವೊನೆಬಿ ತುಬಲಿನವಾಲಾವೊನೆ ಆಳಾನಾ ಮಾಗೊಗ ದೆಶನಾ ರಾಜೊ಼ ಥಯಲ ಗೊಗನಕನ ಮ್ಹೊಡು ಕರಿನ ತಿನೆ ಎ ಕ್ಹುದಾನಿ ವಾತ ಕೆ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮೆಷೆಕ ತುಬಲ ಜನಾಂಗೊನೊ ಪ್ರಭು ಥಯಲ ಗೊಗನ ಮಿ ತುನೆ ವಿರುದ್ದ ಥಯೊಸ. ತುನೆ ಫರಿನ ತಾರಾ ದಾಡನೆ ಕೊಂಕಿ ಘಾಲಿನ ಹೈಂ ಜಗ್ಗಿಲಿನ ಅಶ್ವಾರುಧವಾಲಾ ಕ್ಹೆಡ್ಯ ಜಾನವರೊ ಕುನ್ನಜ಼ ಚು಼ಕ್ಯಾವಾಚಿ ವಿಚಿತ್ರಾಂಬವಾಲಾ ಕ್ಹಡ್ಗಹಸ್ತವಾಲಾ ಥಯಲ ರಾಹುತರ ಮ್ಹೊಟಾ ತಂಡಕ್ಹು ಮಳಲ ತಾರಿ ಕ್ಹಾರಿ ಸೈನ್ಯನೆ, ಕುನ್ನಜ಼ ಚು಼ಕ್ಯಾವಾಚಿ ಖೆಡ್ಯಶಿರಸ್ತ್ರಾಣಧಾರಿ ಥಯಲ ಪಾರಸಿಯೊ ಕೊಷ್ಯವಾಲಾ ಪುಟ್ಯವಾಲಾ ತ್ಯುನಾ ಕ್ಹಾತೆ ಆಯಾ. ಇವ್ನೊನೆ ಕ್ಹಾರಿ ಬಗಲ್ತಾ ಥಯಲ ಗೊಮೆರ್ಯವಾಲಾವೊನೆ, ಉತ್ತರ ದಿಕ್ಕನಾ ಕಟ್ಟಕಡೆತಾ ಆಯಲ ಗುಮ್ಮಿಗುಮ್ಮಿ ಥಯಲ ತೊಗರ್ಮವಾಲಾವೊನೆ ಕಿಮ್ಮೆಬಿ ಘನ್ನಾತಿ ಘನ್ನಾ ಜನಾಂಗೊನೆ ತಾರಾ ಕ್ಹಾತೆ ಆವಾಲಗಾಡುಸ. ತಯ್ಯಾರ ರ್ಹೆ, ತುಕನ ಮಳಿನ ಆಯಲವಾಲಾ ಕ್ಹಾರಾ ತಂಡನಾ ಕ್ಹಾತೆ ತುನೆ ತಯ್ಯಾರ ಕರಿಲೆ; ತು ತ್ಯುನೊನೆ ಪಾಲಕ ಥೈನ ರ್ಹೆ. ಘನ್ನಾ ದಿನ್ನ ಥಯಲ್ಪರ ತುನೆ ಅಪ್ಪಣೆ ಥಾವಸ; ತಲ್ವಾರಕ್ಹು ನಾಶ ಥೈನ ಪುನರ್ಜಿವಿತ ಥಯಲ ದೆಶಮಾ ತು ಕಾಲಾನು ಕಾಲನೆ ವ್ಹಕ್ಕಿನ ಘನ್ನಾ ಜನಾಂಗೊಮಾತೊ ಒಟ್ಟಗುಡ್ಯಲ (ಮಾರಾ) ಮನಕ್ಹೊನಾ ಉಪ್ಪರ ಪಡಶಿ; ಹೊ, ಜನಾಂಗೊಮಾತೊ ಪಾರ ಥಯಲ ತೆ ಕ್ಹಾರಾ ಮನಕ್ಹೊ ಬಹುಕಾಲ ಹಾಳ ಥಯಲ ಇಸ್ರಾಯೆಲನಾ ಡೊಂಗರೊಮಾ ನೆಮ್ಮದಿ ಥೈನ ರ್ಹವಾಕ್ಹು ತು ತ್ಯುನಾ ಉಪ್ಪರ ಪಡಶಿ. ತು ತಾರಾ ಕ್ಹಾರಾ ಗುಮ್ಮಿಯೊ ತಾರಾ ಕ್ಹಾತೆ ರ್ಹವಾನಾ ಘನ್ನಾ ಜನಾಂಗೊ ಬಿರುಗಾಳಿ ನಿಂಗತ ಐಪಡೊಶಿ; ಕಾರ್ಮುಗಿಲಿನೊ ಪಾದಿಮಾ ದೆಶನೆ ಝಾಕಿ ಪಡೊಶಿ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ತೆಳಾಮಾ ತಾರಾ ಮನಸಮಾ ವಿಚಾರೊ ಹುಟ್ಟಸ. ತು- ಆಹಾ, ಮಿ ಪೌಳಿಗೊಡಿ ನೈ ರ್ಹಯಲ ಕ್ಹೆಡಾ ಗಾಮೊ ಭರ್xಯಲ ದೆಶನೆ ವ್ಹಕ್ಕಿನ ಅಗಳಿ ಬಾಕಲ ಗೊಡಿಯೊ ನೈಸೊ ನೆಮ್ಮದಿಕ್ಹು ಭೆವಾಚಿ ರ್ಹಯಲವಾವೊನಾ ಉಪ್ಪರ ಪಡುಸ ಕೈನ ಕೈಲಿನ, ಸುಲಿಗೆ ಕರಿನ ಚೊ಼ರಿ ಕರು ಕೈನ ನಿರ್ಜನ ರ್ಹಯಲಕ್ಹು ಮನಕ್ಹೊ ಭರಿಗಯಲ ಜ಼ಗಾವೊನಾ ಉಪ್ಪರ ಹತ್ತ ಕರು ಕೈನಬಿ ಜನಾಂಗೊಮಾತೊ ಮಳಿನ ಭಯಲ ಎ ಕ್ಹಾರಿ ಆಸ್ತಿನೆ ಮಳೈಲಿನ ಲೊಕನಾ ವಚ್ನಾ ರ್ಹವಾಲಾವೊನೆ ಕಹಲಾಸ ಕರು ಕೈನಬಿ ವಿಚಾರ ಕರಶಿ. ಶೆಬೆದವಾಲಾ ದೆದಾನವಾಲಾ ತಾರ್ಷಿಷನಾ ವ್ಯಾಪಾರ ಕರಾಲಾ ತಿನಾ ಸಿಂಹಪ್ರಾಯವಾಲಾ ಕ್ಹಾರಾ ತುನೆ ದೆಕಿನ- ತು ಸುರೆ ಕರಾನೆ ಆಯೊಸ ಸು? ಚೊ಼ರಿ ಕರಿನ ಕ್ಹೊನು ರುಪ್ಪಾನೆ ಕಾಳ್ಳಿನ ಬೈಲೊ ವರಿ ಬಿಜಾ಼ ಸೊತ್ತನೆ ಅಪಹರಸಿನ ಆಯೊಸ ಸು ಕೈನ ಪುಚ್ಚಸ.
ಇಮ್ಮ ರ್ಹತಾಮಾ, ಮನಕ್ಹನಾ ದಿಕ್ರಾ, ತು ಗೊಗನೆ ಎ ಕ್ಹುದಾನಿ ವಾತ ಕೆ- ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಮಾರಾ ಮನಕ್ಹೊ ಥಯಲ ಇಸ್ರಾಯೆಲವಾಲಾ ನೆಮ್ಮದಿಕ್ಹು ರ್ಹವಾನಾ ಟೈಮಮಾ ತೆ ನೆಮ್ಮದಿ ತುನೆ ಗೊತ್ತ ಥಾವಸ ನೈ. ತು ತಾರಿ ಜ಼ಗಾನೆ ಛೊಡಿನ ಘೊಡಾನಾ ಸವಾರೊ ಮ್ಹೊಟಿ ಸೈನ್ಯ ಥೈನ ಗುಂಪ ಮಳಲ ಘನ್ನಾ ಜನಾಂಗೊನಾ ಕ್ಹಾತೆ ಉತ್ತರ ದಿಕ್ಕನಾ ಕಟ್ಟಕಡೆತೊ ಐನ. ಮಾರಾ ಮನಕ್ಹೊ ಥಯಲ ಇಸ್ರಾಯೆಲೊಪರ ಪಡಿನ ಕಾರ್ಮುಗಿಲಿನೊಪಾದಿಮಾ ದೆಶನೆ ಝಾಡಿ ಪಡಶಿ; ಎ, ಗೊಗ, ಜನಾಂಗೊನಾ ಡೊಳಾ ಕ್ಹಾಮಾ ತಾರಾ ನಾಶನಕ್ಹು ಮಾರಿ ಗೌರವ ವಚಾ಼ಡಿಲಿನ ಮಿಜ಼ ಯಹೊವಾ ವ್ಹೈ ಕೈನ ಜನಾಂಗೊನೆ ಗ್ವತ್ತ ಥಾಯೆ ನಿಂಗತ ಮಿ ತುನೆ ಟೈಮತೊ ಟೈಮಮಾ ಮಾರಾ ದೆಶನಾ ಉಪ್ಪರ ಪಡೆ ನಿಂಗತ ಕರುಸ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಮಾರಾ ಸೆವಕೊ ಥಯಲ ಇಸ್ರಾಯೆಲನಾ ಪ್ರವಾದಿಯೊ ಪೈಲಾನಾ ಕಾಲಮಾ ಘನ್ನಾ ವರಕ್ಹ ಪ್ರವಾದನೆ ಕರ್ತೊ ಮಿ ಯಕ್ಲಾನೆ ಇಸ್ರಾಯೆಲೊನಾ ಉಪ್ಪರ ಪಡೆ ನಿಂಗತ ಕರುಸ ಕೈನ ಅಗಾ ತಿಳ್ಸಾಯಾಸ ತೆಕ್ಲುಜ಼ ವ್ಹೈ. ಮಿ ತ್ಯುನಾ ಮುಲಕ ಅಗೊ ತಿಳ್ಸಾಯಲ ತುಜ಼ ನ್ಹವೈ ಸು.
ಗೊಗನೆ ಕ್ಹುದಾನಿ ಶಿಕ್ಷಾ
ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಗೊಗನ ಇಸ್ರಾಯೆಲ ದೆಶನಾ ಉಪ್ಪರ ಪಡಾನಾ ದಿನ್ನಮಾ ಮಿ ಘನ್ನೊ ಶಿಟ್ಟ ದೆಕಾಡಿನೆ ದ್ಯುಸ. ಮಿ ರೊಷಾವಿಷ್ಟ ಥೈನ ಶಿಟ್ಟಕ್ಹು ಬಳ್ತೊ ಇಮ್ಮ ಕದ್ಯೊಸ- ತೆ ದಿನ್ನಮಾ ಇಸ್ರಾಯೆಲ ದೆಶಮಾ ಅದ್ಭುತ ಕಾಪಾವರಕ್ಹು ಥಾವಸ ಕ್ಹರಿಬಿ; ಸಮುಂದರನಾ ಮಚ಼್ಲಿ಼ಯೊ ಹಬಾಳನ ಪಕ್ಷಿಯೊ ಭುಜಂತು ಜಿಮಿನಮಾ ಹರದಾಡಾಲಾ ಕ್ರಿಮಿ ಕಿಟ ಭಮಂಡಲನಾ ಕ್ಹಾರಾ ಮನಕ್ಹೊ ಮಾರಾ ಕ್ಹಾಮಾ ಕಾಪಸ; ಡೊಂಗರೊ ಉಳ್ಳಿನ ಪಡಸ, ಜರಿಯೊ ಕವಚಿ ಲಿವಸ, ಕ್ಹಾರಾ ಗೊಡಿಯೊ ಜಿಮಿನನೆ ಲಾಗಿಜಾ಼ವಸ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ತಲ್ವಾರ ಮಾರಾ ಕ್ಹಾರಾ ಡೊಂಗರೊನೆ ಗೊಗವಾಲಾವೊನೆ ಕ್ಹಲಾಸ ಕರಾದೆ ಕೈನ ಅಪ್ಪಣೆ ದ್ಯುಸ; ಯಕ್ಕಕ್ಹು ಯಕ್ಕ ಕ್ಹಲಾಸ ಥಾವಸ. ಮಿ ಗೊಗನಾ ಕ್ಹಾತೆ ವ್ಯಾಜ್ಯ ಕರತೊ ತಿನೆ ರೊಗನೆಬಿ ಮಾರನೆಬಿ ಗುರಿ ಕರಿನ ತಿನಾ ಉಪ್ಪರಬಿ ತಿನಾ ಗುಮ್ಮಿಯೊನಾ ಉಪ್ಪರಬಿ ತಿನಾ ಕ್ಹಾತೆ ರ್ಹವಾನಾ ಘನ್ನಾ ಜನಾಂಗೊನಾ ಉಪ್ಪರಬಿ ಘನ್ನು ಪಾನಿ, ಮ್ಹೊಟಾ ಮ್ಹೊಟಾ ಘಾರ್ಗಿಯೊ, ಆಗ, ಗಂಧಕ, ಎ ಕ್ಹಾರು ಚು಼ವಾವುಸ. ಇಮ್ಮ ಮಿ ಮಾರಿ ಮಹಿಮಾನೆ ದೆಕಾಡಿನ ಮಾರಿ ಗೌರವನೆ ವಚಾ಼ಡಿಲಿನ ಘನ್ನಾ ಜನಾಂಗೊ ಮಿಜ಼ ಯಹೊವಾ ವ್ಹೈ ಕೈನ ತಿಳ್ದಿ ಲಿಯೆ ನಿಂಗತ ತ್ಯುನಾ ಡೊಳಾ ಕ್ಹಾಮೊ ದಿಕ್ಹುಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.