Skip to content
BibleKenya

Sikkiligar Bible

ಯಜಕೆಲಾ 37

ಕ್ಹುಕ್ಹಾಯಲ ಹಡ್ಕಾವೊನು ಮಡ್ಡಿ

ಮಿ ಯಹೊವಾನಾ ಹಸ್ತಸ್ಪರ್ಶಕ್ಹು ಕ್ಹುದಾನಾ ವಶಮಾ ಥಯೊತೆ ತಿನಾ ಆತ್ಮಾನಾ ಮುಲಕ ಮನೆ ಲಿನ ಗೈನ ಹಡ್ಕಾವೊಕ್ಹು ಭರಲ ಯಕ್ಕ ಘಾಟಮಾ ಉತಾರಿನ. ಮಿ ತೆ ಹಡ್ಕಾವೊನಾ ವಚ್ಮಾ ಕ್ಹಾಡಿನೆ ಬಳಸಿಲಿನ ಆವಾ ವರ್ಕ್ಹು ಕರ‍್ಯೊ; ದೆಕ, ಕ್ಹಾಡಿನಾ ಉಪ್ಪರ ಕ್ಹಾರು ಘನ್ನು ಕ್ಹುಕ್ಹೈ ಗಯಲ ಹಡ್ಕಾ ಲೆಕ್ಕೊ ನೈಸೊ ಪಡ್ಯಾತಾ. ತೆ ಮನೆ- ಮನಕ್ಹನಾ ದಿಕ್ರಾ, ಎ ಹಡ್ಕಾವೊನೆ ಜ಼ಲಮ ಆವಸ ಸು ಕೈನ ಪುಚ್ಚಾ಼ಕ್ಹು? ಮಿ ಕರ್ತಾ ಥಯಲ ಯಹೊವಾ, ತುನೆಜ಼ ಗ್ವತ್ತ ಕೈನ ಉತ್ತರ ದಿದ್ಯೊ. ತೆಳಾಮಾ ತೆ ಮನೆ ಅಮ್ಮ ಅಪ್ಪಣೆ ದಿದ್ಯೊ. ತು ಹಡ್ಕಾವೊಪರ ಅವಾಜ಼ಕ್ಹು ತಿನೆ ಎ ಕ್ಹುದಾನಿ ವಾತ ಕೆ. ಕ್ಹುಕ್ಹೈ ಗಯಲ ಹಡ್ಕಾ, ಯಹೊವಾನಿ ವಾಕ್ಯಾ ಐಕೊ. ಕರ್ತಾ ಥಯಲ ಯಹೊವಾ ತುಮೊನೆ ಅಮ್ಮ ಕವಸ- ದೆಕೊ, ಮಿ ತುಮೊಮಾ ಶ್ವಾಸ ಆವಾಲಗಾಡುಸ; ತುಮೆ ಜಿವ್ತಾ ಥಾವೊಶಿ. ಮಿ ತುಮಾರಾ ಉಪ್ಪರ ನರ್ರೊನೆ ಆವಾ ಲಗಾಡಿನ, ಮಾಕ್ಹ ಆವಾ ಲಗಾಡಿನ, ಚಾ಼ಮ್ಡು ಆವಾ ಲಗಾಡಿನ, ತುಮೊಮಾ ಸ್ವಾಸ ಭರುಸ; ತೆಳಾಮಾ ತುಮೆ ಜಿವ್ತಾ ಥೈನ ಮಿಜ಼ ಯಹೊವಾ ವ್ಹೈ ಕೈನ ತಿಳ್ದಿಲಿವೊಶಿ. ಮನೆ ಅಪ್ಪಣೆ ಥಯಲ ನಿಂಗತ ಮಿ ತೆ ಕ್ಹುದಾನಿ ವಾತ ಕತಾಕ್ಹು ಅವಾಜ಼ ಐಯು, ದೆಕೊ, ಟಕಟಕ ಕತಾ ಹಡ್ಕಾ ಹಡ್ಕಾವೊನೆ ಜು಼ಡ್ಯಾ. ಮಿ ದೆಕ್ತಾಮಾ ಆಹಾ, ತ್ಯುನಾ ಉಪ್ಪರ ನರ್ರೊ ಆಯಾ, ಮಾಕ್ಹ ಫೈಲಿ ಗಯು, ಉಪ್ಪರ ಪುರಾ ಚಾಮ್ಡು ಐಯು; ಉಸುಲ ನ್ಹೊತು. ತೆಳಾಮಾ ತೆ ಮನೆ- ಮನಕ್ಹನಾ ದಿಕ್ರಾ, ತು ಶ್ವಾಸನೆ ಕೆ, ಕೆ; ಶ್ವಾಸ, ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ತು ಚಾರೆ ದಿಕ್ಕತಿ ಬಿಸಿನ ಮರಲ ಶರಿರೊ ಜಿವ್ತಾ ಥಯೆ ನಿಂಗತ ತ್ಯುನಾ ಉಪ್ಪರ ಫರ ಕೈನ ಉಸುಲನೆ ಕೆ.

ಕೈನ ಅಪ್ಪಣೆ ದೆತಾಮಾ ಮಿ ಅಪ್ಪಣೆ ನಿಂಗತ ಕದ್ಯೊ. ದೆಕ, ಶ್ವಾಸ ತ್ಯುನಾಮಾ ವ್ಹಕ್ಯು, ಜಿವ್ತಾ ಥಯಾ, ಪಗೊಕ್ಹು ಹುಬ್ರಯಾ, ಘನ್ನಿ ಮ್ಹೊಟಿ ಸೈನ್ಯ ಥಯು. ಪಾಚ಼ಲ್ತೊ ತೆ ಮನೆ ಅಮ್ಮ ಕದ್ಯೊ- ಮನಕ್ಹನಾ ದಿಕ್ರಾ, ಎ ಹಡ್ಕಾ ಇಸ್ರಾಯೆಲನಾ ಪುರಾ ವಂಶ ವ್ಹೈ; ದೆಕ, ತೆ ವಂಶವಾಲಾ- ಅಯ್ಯೊ, ಹಮಾರಾ ಹಡ್ಕಾ ವರೈ ಗಯಾ, ಹಮಾರಿ ನಿರಿಕ್ಷೆ ಹಾಳ ಥೈತಿ; ಹಮೆ ಬುಡನಾಶ ಥಯಾ ಕೈನ ತಿಳ್ದಿಲಿವಾಡಾಸ. ತಿನಾಹುತಿ ತು ಎ ಕ್ಹುದಾನಿ ವಾತ ತ್ಯುನೊನೆ ಕೆ- ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಮಾರಾ ಮನಕ್ಹೊ, ದೆಕೊ, ಮಿ ತುಮಾರಾ ಮಜಾ಼ರೊನೆ ಕಾಡಿನ ತಿಮಾತೊ ತುಮೊನೆ ಉಟಾಡಿನ ಇಸ್ರಾಯೆಲ ದೆಶನೆ ಮಳಾ ವರ್ಕ್ಹು ಕರುಸ. ಮಾರಾ ಮನಕ್ಹೊ, ಮಿ ತುಮಾರಾ ಮಜಾ಼ರೊನೆ ಕಾಡಿನ ತಿಮಾತೊ ತುಮೊನೆ ಉಟಾಡತಾಮಾ ಮಿಜ಼ ಯಹೊವಾ ವ್ಹೈ ಕೈನ ತುಮೊನೆ ಗ್ವತ್ತ ಥಾವಸ. ಮಿ ಮಾರು ಶ್ವಾಸ ತುಮೊಮಾ ಜಾ಼ವಾ ಲಗಾಡಿನ ತುಮೊನೆ ಜ಼ಲಮ ವಚಾ಼ಡಿನ ತುಮಾರಾ ದೆಶಮಾ ಸೆಲಸುಸ; ತೆಳಾಮಾ ಯಹೊವಾ ಥಯಲ ಮಿಜ಼ ಎ ಕೈನ ಕರ‍್ಯೊಸ ಕೈನ ತಿಳ್ದಿಲಿವೊಶಿ; ಎ ಯಹೊವಾನಿ ವಿಚಾರ ವ್ಹೈ.

ಇಸ್ರಾಯೆಲಬಿ ಯೆಹುದ ಯಕ್ಕಜ಼

ಯಹೊವಾ ವರಿಯಕ್ಕ ವಾಕ್ಯಾ ಮನೆ ದಿದ್ಯೊ. ಮನಕ್ಹನಾ ದಿಕ್ರಾ, ತು ಯಕ್ಕ ದಂಡ ಲಿನ ತಿಮಾ- ಯೆಹುದನು, ಯೆಹುದನೆ ಮಳಲ ಇಸ್ರಾಯೆಲನು ವ್ಹೈ ಕೈನ ಲಿಕ್ಕಿನ ವರಿಯಕ್ಕ ದಂಡ ಲಿನ ತಿಮಾ- ಯೊಸೆಫನು, ಎಫ್ರಾಯಿಮನು ಯೊಸೆಫನೆ ಮಳಲ ಕ್ಹಾರು ಇಸ್ರಾಯೆಲೊನು ವ್ಹೈ ಕೈನ ಲಿಕ್ಕ; ಪಾಚ಼ಲ್ತಾ ತೆ ತಾರಾ ಹತ್ಮಾ ಯಕ್ಕ ಥಾಯೆ ನಿಂಗತ ತೆ ಭಂಬಿನೆ ಯಕ್ಕನೆ ಯಕ್ಕ ಲಾಂಬಾ ಜೊಡಸಿನ ಧರ. ತಾರಾ ಮನಕ್ಹೊ - ಎ ಸುವೈ? ಹಮೊನೆ ತಿಳ್ಸಾತೊ ನೈ ಸು ಕೈನ ತುನೆ ಪುಚ಼ತಾಮಾ ತು ತ್ಯುನೊನೆ- ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ದೆಕ, ಎಫ್ರಾಯಿಮ ಧರ್xಯಲ ದಂಡನೆ ಕದ್ಯಾಮ ಯೊಸೆಫನು ವರಿ ಯೊಸೆಫನೆ ಮಳಲ ಇಸ್ರಾಯೆಲ ಕುಲನಾ ದಂಡನೆ ಮಿ ಕಾಡಿನ ಯೆಹುದನಾ ದಂಡನೆ ಲಾಂಬಾ ಮಳೈನ ತೆ ಭಂಬಿನೆ ಮಾರಾ ಹತ್ಮಾ ಯಕ್ಕಜ಼ ದಂಡ ಥೈನ ಧರುಸ ಕವಾನು ಕೆ. ಕತಾಮಾ ತು ನಾಮ ಲಿಕ್ಕಲ ದಂಡ ತ್ಯುನಾ ಡೊಳಾ ಕ್ಹಾಮಾ ತಾರಾ ಹತ್ಮಾ ರ‍್ಹವಾದೆ. ಎ ತ್ಯುನೊನೆ ಕೆ- ಕರ್ತಾ ಯಲ ಯಹೊವಾ ಅಮ್ಮ ಕವಸ- ದೆಕ, ಇಸ್ರಾಯೆಲವಾಲಾ ವಶ ಥಯಲ ಜನಾಂಗೊಮಾತೊ ಮಿ ತ್ಯುನೊನೆ ಉದ್ದಾರ ಕರಿನ ಕ್ಹಾರಾ ಭನಿತಾಬಿ ಮಳೈನ ಸ್ವಂತ ದೆಶನೆ ಬಲೌಸ. ತ್ಯಾ ಇಸ್ರಾಯೆಲನಾ ಡೊಂಗರೊನಾ ಉಪ್ಪರ ಯಕ್ಕಜ಼ ಜನಾಂಗ ಥೈನ ಕರುಸ; ಯಕ್ಲೊಜ಼ ತ್ಯುನೊನೆ ಕ್ಹಾರಾವೊನೆ ರಾಜೊ಼ ಥೈನ ರ‍್ಹಸ; ತ್ಯುನೆ ಹಬ್ದಾ ಕೆಳಾಮಾಬಿ ಬೆ ಜನಾಂಗವಾಲಾ ಥೈನಬಿ ಭಾಗ ಥೈನ ರ‍್ಹತಾನೈ; ತ್ಯುನಾ ಮೊರ್ತಿಯೊಕ್ಹೊಬಿ ರ‍್ಹವಾದೆ ಅಸೈ ಸಾಮನೊಕ್ಹು ರ‍್ಹವಾದೆ ಕಯಾಬಿ ದುರಾಚಾರಕ್ಹುಬಿ ರ‍್ಹವಾದೆ ತ್ಯುನೊನೆ ಹಬ್ದಾ ಹೊಲೆಗೆಯ್ದಿ ಲೆತಾ ನೈ; ತ್ಯುನೆ ಪಾಪ ಕರಿ ಕರಿನ ಕ್ಹಾರಾ ದೆವದ್ರೊಹಕ್ಹು ಮಿ ತ್ಯುನೊನೆ ಛೊಡೈನ ಕರಿನ ಶುದ್ದ ಕರುಸ; ತ್ಯುನೆ ಮನೆ ಪ್ರಜೆ ಥೈನ ರ‍್ಹವಸ, ಮಿ ತ್ಯುನೊನೆ ಕ್ಹುದಾ ಥೈನ ರ‍್ಹೌಸ. ಮಾರೊ ಸೆವಕ ಥಯಲ ದಾವಿದ ತ್ಯುನೊನೆ ರಾಜೊ಼ ಥೈನ ರ‍್ಹವಸ; ತ್ಯುನೊನೆ ಕ್ಹಾರಾವೊನೆ ಯಕ್ಲೊಜ಼ ದೆಕ್ರಾಣಕಿ ಕರಾಲೊ ರ‍್ಹವಸ; ತ್ಯುನೆ ಮಾರಾ ನಿಯಮೊನೆ ಅನುಸರಸಿನ ಮಾರಾ ವಿದಿಯೊನೆ ಕೈದಿ ಲಿನ ಆಚರಣೆ ಕರಸ. ಮಾರೊ ಸೆವಕ ಥಯಲ ಯಾಕೊಬನೆ ಮಿ ದಿದಲ ದೆಶಮಾ ತ್ಯುನೆ ರ‍್ಹವಸ; ಹೊ ತುಮಾರಾ ಪಿತೃವೊ ರ‍್ಹಯಲ ದೆಶಮಾ ತ್ಯುನೆ ತ್ಯುನಾ ಸಂತಾನವಾಲಾ ತಲತಲಾಂತರ ಲಕ್ಕಾ ರ‍್ಹವಸ; ಮಾರೊ ಸೆವಕ ಥಯಲ ದಾವಿದ ತ್ಯುನೊನೆ ಹಮೆಶಾ ರಾಜೊ಼ ಥೈನ ರ‍್ಹವಸ. ವರಿ ಮಿ ತ್ಯುನಾ ಕ್ಹಾತೆ ಸಮಾಧಾನನು ಒಡಂಬಡಿಕೆ ಕರಿಲ್ಯುಸ; ತೆ ಹಮೆಶಾಬಿ ರ‍್ಹವಸ; ಮಿ ತ್ಯುನೊನೆ ನೆಲೆಗೊಳಸಿನ ವೃದ್ದಿ ಕರಿನ ಮಾರಾ ಪವಿತ್ರ ಆಲಯನೆ ತ್ಯುನಾ ವಚ್ಮಾ ಯುಗಯುಗಾಂತರ ಲಕ್ಕಾ ಹುಬ್ರಾಡುಸ. ಹೊ, ಮಾರು ರ‍್ಹವಾನು ಸ್ಥಾನ ತ್ಯುನಾ ವಚ್ಮಾ ರ‍್ಹವಸ; ಮಿ ತ್ಯುನೊನೆ ಕ್ಹುದಾ ಥೈನ ರ‍್ಹೌಸ, ತ್ಯುನೆ ಮನೆ ಪ್ರಜೆ ಥೈನ ರ‍್ಹವಸ. ಮಾರಿ ಪವಿತ್ರಾಲಯ ತ್ಯುನಾ ವಚ್ಮಾ ಹಮೆಶಾ ರ‍್ಹವಾನೆ ಇಸ್ರಾಯೆಲನೆ ಮಿಸಲ ಕರಿಲಿದಲವಾಲೊ ಯಹೊವಾ ಥಯಲ ಮಿಜ಼ ವ್ಹೈ ಕೈನ ಜನಾಂಗೊನೆ ಗ್ವತ್ತ ಥಾವಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.