Sikkiligar Bible
ಯಜಕೆಲಾ 36
ಇಸ್ರಾಯೆಲೊನಿ ಅಗ್ಲಿ ಸೌಭಾಗ್ಯ ಮನಸ್ಸನಿ ಶುದ್ದಿ
ಮನಕ್ಹನಾ ದಿಕ್ರಾ, ತು ಇಸ್ರಾಯೆಲನಾ ಡೊಂಗರೊನೆ ಎ ಕ್ಹುದಾನಿ ವಾತ ಕೆ- ಇಸ್ರಾಯೆಲನಾ ಡೊಂಗರೊ, ಯಹೊವಾನಿ ವಾಕ್ಯಾ ಐಕೊ. ದುಷ್ಮನ ತುಮೊನೆ ದೆಕಿನ ಆಹಾ, ಕತಾ ಎ ಜು಼ನ್ನಾ ಘರೊ ಹಮಾರಾ ವಶ ಥಯಾಸ ಕೈನ ಫುಗ್ಯಲಕ್ಹು ಎ ಕ್ಹುದಾನಿ ವಾತ ಕೌ ಕೈನ ಕರ್ತಾ ಥಯಲ ಯಹೊವಾನಿ ಅಪ್ಪಣೆ ಥಯಸ ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಅಯ್ಯೊ, ಕ್ಹಾರಿ ಬಗಲಬಿ ಕ್ಹುಂದೈಲಿನ ಹಾಳ ಥಯಲ ತುಮೆ ಜನಾಂಗೊಮಾ ಉಗ್ರಲವಾಲಾವೊನಾ ವಶ ಥಯಾಸತೊ! ಹರಟೆ ಕರಾಲಾವೊನಾ ಮ್ಹೊಮಾ ಪಡಿನ ಮನಕ್ಹೊನಾ ದುಷಣೆನೆ ಗುರಿ ಥಯಾಸತೊ! ತಿನಾಹುತಿ ಇಸ್ರಾಯೆಲನಾ ಡೊಂಗರೊ, ಕರ್ತಾ ಥಯಲ ಯಹೊವಾನಿ ವಾಕ್ಯಾ ಐಕೊ- ಡೊಂಗರೊ ತೊರೆ ತಗ್ಗುನೆಬಿ ರಾನ ಥಯಲ ಹಾಳ ಜ಼ಗಾವೊನೆಬಿ ಸುತ್ತೆ ಜನಾಂಗೊಮಾ ಉಗ್ರಲವಾಲಾ ಚೊ಼ರಿ ಕರಿನ ಅಣಕಿಸಾನು ಹಾಳ ಗಾಮೊನೆಬಿ ಯಹೊವಾ ಕರ್ತಾ ಅಮ್ಮ ಕವಸ. ಆಹಾ, ಮಾರಾ ದೆಶನೆ ತ್ಯುನಿ ಸ್ವಾಸ್ತ್ಯ ಕರಿಲಿನ ಪುರಾ ಮನಸ್ಸಕ್ಹು ಕ್ಹುಷಿ ಥಯಲವಾಲಾ ತಿನೆ ಪುರಾ ಮನಸ್ಸಕ್ಹು ತಿರಸ್ಕಾರ ಕರಿನ ಸುರೆನೆ ಢಕ್ಲಿ ಪಡ್ಯಲವಾಲಾ ಥಯಲ ಕ್ಹಾರಾ ಎದೊಮವಾಲಾವೊನೆ ಬಿಜಾ಼ ಜನಾಂಗೊಮಾ ಉಗ್ರಲವಾಲಾವೊನೆ ಮಿ ರೊಷಕ್ಹು ಶಿಟ್ಟ ಥಾತೊ ಶಪಿಸ್ಯೊಸ; ಇಮ್ಮ ರ್ಹತಾಮಾ ಇಸ್ರಾಯೆಲ ದೆಶನಾ ವಿಷಯನಿ ಎ ಕ್ಹುದಾನಿ ವಾತನೆ ತಿನಾ ಡೊಂಗರೊ ತೊರೆ ತಗ್ಗುನೆ ಕೌ ಕೈನ ಅಪ್ಪಣೆ ಥಯುಸ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಆಹಾ, ಮಿ ಶಿಟ್ಟಕ್ಹು ರೊಷಾವೆಶಕ್ಹು ಬೊಲ್ಯೊಸ, ತುಮೆ ಬಿಜಾ಼ ಜನಾಂಗೊಕ್ಹು ಅವಮಾನ ಅನುಭವಿಸ್ಯಾಸತೊ! ತಿನಾಹುತಿ ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ತುಮಾರಾ ಸುತ್ತೆ ಬಿಜಾ಼ ಜನಾಂಗೊ ತ್ಯುನಾ ಉಪ್ಪರ ಥಯಲ ಅವಮಾನನೆ ಅನುಭವಿಸಾನು ಕ್ಹರಿಜ಼ ವ್ಹೈ ಕೈನ ಹತ್ತ ಉಚೈನ ಕ್ಹಮ್ಮ ಘಾಲ್ಯೊಸ. ಇಸ್ರಾಯೆಲನಾ ಡೊಂಗರೊ, ತುಮಾರಾ ಝಾಡೊ ಠೊಂಗಿಯೊ ಫಾಡಿಲಿನ ಮಾರಾ ಮನಕ್ಹೊ ಥಯಲ ಇಸ್ರಾಯೆಲೊನೆ ಫಲ ದಿವಸ; ತ್ಯುನು ಆವಾನು ನಜಿಕ ಛೆ. ದೆಕೊ, ಮಿ ತುಮಾರಾ ಪಕ್ಷನೊ ವ್ಹೈ; ತುಮೊಕನ ಫರುಸ; ತುಮೊಮಾ ಉಳಾನಾ, ಬಿತ್ತಸ; ತುಮೊಮಾ ಘನ್ನಾ ಜ಼ನಾ ಕದ್ಯಾಮ ಇಸ್ರಾಯೆಲ ಪುರಾ ವಂಶ ರ್ಹಯೆ ನಿಂಗತ ಕರುಸ; ಗಾಮೊ ಮನಕ್ಹೊಕ್ಹು ಭರಿ ಜಾ಼ವಸ, ಹಾಳ ಜ಼ಗಾವೊಪರ ಕಟ್ಟಡ ಉಟಸ; ತುಮೊಮಾ ಘನ್ನಾ ಮನಕ್ಹೊನೆ ಜಾನವರೊನೆ ವೃದಿ ಕರುಸ; ತೆ ಘನ್ನಾ ಅಭಿವೃದ್ದಿ ಥಾವಸ; ಪೈಲಾ ನಿಂಗತ ತುಮೊಮಾ ರ್ಹವಾಲಾವೊನೆ ಭರೈನ ಪೈಲಾತಿ ತುಮೊನೆ ಚೊ಼ಕಿ ಸ್ಥಿತಿನೆ ಲೌಸ; ಮಿಜ಼ ಯಹೊವಾ ವ್ಹೈ ಕೈನ ತುಮೊನೆ ಗ್ವತ್ತ ಥಾವಸ. ಡೊಂಗರನು ಸಿಮೆ, ಮಿ ತಾರಾಮಾ ಮನಕ್ಹೊನು ಸಂಚಾರ ಉಂಟ ಕರುಸ; ಮಾರಾ ಮನಕ್ಹೊ ಥಯಲ ಇಸ್ರಾಯೆಲೊ ತರಾಮಾ ಸಂಚಾರ ಕರ್ತಾ ತುನೆ ಸ್ವಾಸ್ತ್ಯ ಥೈನ ಅನುಭವಿಸಸ; ತು ಹಬ್ದಾ ತ್ಯುನೊನೆ ಬಚ್ಚಾ಼ ದಿದ್ಯಾ ಬಗರ ರ್ಹಶಿ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತು ನರಭಕ್ಷಕ ಥೈನ ತಾರಾ ಮನಕ್ಹೊನೆ ಪುತ್ರಶೊಕ ದಿದಿ ಕೈನ ತುನೆ ಗಾಳೊ ದಿವಸತೊ; ಹಬ್ದಾ ತು ಮನಕ್ಹೊನೆ ಖಲಸ ಕರಾಲೊ ಥಾತಿ ನೈ, ತಾರಾ ಮನಕ್ಹೊನೆ ಹಬ್ದಾ ಪುತ್ರಶೊಕ ನೈ ದೆತಿ; ಮ್ಲೆಚ್ಛರ ಧಿಕ್ಕಾರನೆ ಹಬ್ದಾ ತಾರಾ ಕಾನೆ ನೈ ಪಾಡ್ತೊ; ತು ಜನಾಂಗೊಕ್ಹು ಹಬ್ದಾ ಅವಮಾನ ನೈ ಅನುಭವಿಸ್ತಿ; ತಾರಾ ಮನಕ್ಹೊ ಮುಗ್ಗರಿಸಾನೆ ಹಬ್ದಾ ತು ಕಾರಣ ನೈ ಥಾತಿ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.
ಇಸ್ರಾಯೆಲನು ನಯಿ ಜಿವನ
ಯಹೊವಾ ಎ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ, ಇಸ್ರಾಯೆಲ ವಂಶವಾಲಾ ಸ್ವಂತ ದೆಶಮಾ ರ್ಹತಾಮಾ ತ್ಯುನಾ ಕೆಟ್ಟ ವಾಟೊ ಕೆಟ್ಟ ವಿಚಾರೊಕ್ಹು ತಿನೆ ಹೊಲೆಗೈದ್ಯಾ; ತ್ಯುನಿ ನಡತೆ ಮುಟ್ಟಿನಿ ಹೊಲಸ ನಿಂಗತ ಮನೆ ಹಸೈ ಥಯುತು. ತ್ಯುನೆ ದೆಶನಾ ಉಪ್ಪರ ರಗತ ಚು಼ವೈನ ತ್ಯುನಿ ಗೊಂಬಿಯೊಕ್ಹು ತಿನೆ ಹೊಲೆಗೈದ್ಯಲಕ್ಹು ಮಿ ತ್ಯುನಾ ಉಪ್ಪರ ಮಾರಿ ರೊಷಾಗ್ನಿನೆ ಸುರಸಿನ. ಜನಾಂಗೊಮಾ ತ್ಯುನೊನೆ ಚದರಸಿನ ದೆಶ ದೆಶನೆ ತುರಿನ ತ್ಯುನಾ ಕೆಟ್ಟ ವಾಟೊ ಕೆಟ್ಟ ವಿಚಾರೊನೆ ಕರೆಟ್ಟ ದಂಡ ದಿದ್ಯೊ. ತ್ಯುನೆ ತೆ ಜನಾಂಗೊಮಾ ಮಳಲ್ಪರ ಒಹೊ, ಇವ್ನೆ ಯಹೊವಾನಾ ಮನಕ್ಹೊ ವ್ಹೈ, ತಿನಾ ದೆಶತಾ ಭ್ರಷ್ಟ ಥೈನ ಆಯಾಸ ಕೈನ ಕವೈಲಿನ ಮಾರಾ ಪರಿಶುದ್ದ ನಾಮನೆ ಅಪಕಿರ್ತಿನೆ ಲಾವಾನೆ, ಇಸ್ರಾಯೆಲ ವಂಶವಾಲಾ ಜನಾಂಗೊಮಾ ಮಳಿನ ತ್ಯಾ ಅಪಕಿರ್ತಿನೆ ಗುರಿ ಕರಲ ಮಾರಾ ಪರಿಶುದ್ದ ನಾಮನಾ ಹುತಿ ಮಿ ಮರಗ್ಯೊ. ತಿನಾಹುತಿ ತು ಇಸ್ರಾಯೆಲ ವಂಶವಾಲಾವೊನೆ ಇಮ್ಮ ಕೆ- ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಇಸ್ರಾಯೆಲ ವಂಶವಾಲಾವೊ, ತುಮಾರಾಹುತಿ ನ್ಹವೈ, ತುಮೆ ಜನಾಂಗೊನಾ ಕ್ಹಾತೆ ಮಳಿನ ಅಪಕಿರ್ತಿನೆ ಗುರಿ ಕರಿನ ಮಾರಾ ಪರಿಶುದ್ದ ನಾಮನಾ ಹುತಿಜ಼ ಎ ರಕ್ಷಣೆನಾ ಕಾಮನೆ ಕರುಸ. ಜನಾಂಗೊಮಾ ಅಪಕಿರ್ತಿನೆ ಗುರಿ ಥಯಲ, ಕದ್ಯಾಮ ತುಮೆ ಜನಾಂಗೊನಾ ವಚ್ಮಾ ಅಪಕಿರ್ತಿನೆ ಗುರಿ ಕರಲ ಮಾರಾ ಘನ ನಾಮನೆ ಗೌರವನೆ ಮಿ ವಚಾ಼ಡಿಲ್ಯುಸ; ಇಮ್ಮ ಮಿ ತ್ಯುನಾ ಡೊಳಾ ಕ್ಹಾಮಾ ತುಮಾರಾ ರಕ್ಷಣೆನಾ ಮುಲಕ ಮಾರಿ ಗೌರವ ವಚಾ಼ಡಿಲೆತಾಮಾ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥಾವಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಮಿ ತುಮೊನೆ ಜನಾಂಗೊಮಾತೊ ಛೊಡೈನ ಕ್ಹಾರಾ ದೆಶೊತೊ ಮಳೈನ ಸ್ವಂತ ದೆಶನೆ ಬಲೌಸ. ಮಿ ತುಮಾರಾ ಉಪ್ಪರ ನಿರ್ಮಲೊದಕನೆ ಪ್ರೊಕ್ಷಣೆನೆ ತುಮೆ ನಿರ್ಮಲ ಥಾವೊಶಿ; ತುಮಾರಾ ಕ್ಹಾರಾ ಮುರ್ತಿಯೊಕ್ಹುಬಿ ಕ್ಹಾರಾ ವಿದನಾ ಹೊಲಸಕ್ಹುಬಿ ತುಮೊನೆ ಶುದ್ದ ಕರುಸ. ಮಿ ತುಮೊನೆ ನವು ಮನಸ್ಸ ದಿನ ತುಮೊಮಾ ನಯಿ ಆತ್ಮಾ ಹುಟ್ಟಿಸೌಸ; ದಗ್ಡಾ ರ್ಹಯಲ ಮನಸನೆ ತುಮೊಕ್ಹು ಕಾಡಿನ ನರಮ ರ್ಹಯಲ ಮನಸನೆ ತುಮೊನೆ ದ್ಯುಸ. ಮಾರಿ ಆತ್ಮಾನೆ ತುಮೊಮಾ ರ್ಹಯೆ ನಿಂಗತ ಅನುಗ್ರಹ ಕರಿನ ತುಮೆ ಮಾರಾ ನಿಯಮೊನೆ ಅನುಸರಣೆ ಕರೆ ನಿಂಗತ ಕರುಸ. ತುಮೆ ಮಾರು ಆಗನ್ಯಾ ಕೈದಿಲಿನ ಆಚರಣೆ ಕರೊಶಿ. ಮಿ ತುಮೊನೆ ಪಿತೃವೊನೆ ಅನುಗ್ರಹ ಕರಲ ದೆಶಮಾ ತುಮೆ ರ್ಹವೊಶಿ. ತುಮೆ ಮನೆ ಮನಕ್ಹೊ ಥೈನ ರ್ಹವೊಶಿ, ಮಿ ತುಮೊನೆ ಕ್ಹುದಾ ಥೈನ ರೌಸ. ಮಿ ತುಮೊನೆ ತುಮಾರಾ ಕ್ಹಾರಾ ಹೊಲಸಕ್ಹು ಉದ್ದಾರ ಕರಿನ ಬೆಳೆ ಬೆಳ್ಧಾದೆಕೈನ ಅಪ್ಪಣೆ ದಿನ ತಿನೆ ವೃದ್ದಿ ಕರುಸ; ತುಮೊನೆ ಬರಗಾಲ ಹಬ್ದಾ ಆವಾನೆ ನೈ ದೆತೊ. ತುಮೆ ಬರಗಾಲ ದೆಶವಾಲಾ ವ್ಹೈ ಕೈನ ಜನಾಂಗೊ ತುಮೊನೆ ನಿಂದಾ ಕರ್ಯಾ ಬಗರ ಮಿ ಝಾಡನಾ ಫಲನೆ ಕ್ಹೆತರನಾ ಬೆಳೆನೆ ಹೆಚ್ಕಿ ಕರುಸ. ತೆಳಾಮಾ ತುಮೆ ತುಮಾರಾ ಕೆಟ್ಟ ವಾಟೊ ದುರಾಚಾರೊನೆ ಶೆಂ ಕರಿನ ತುಮಾರಾ ಅಪರಾಧೊನಾ ವರಿ ಅಸಹ್ಯ ಕಾಮೊಕ್ಹು ತುಮೊಕ್ಹು ತುಮೆಜ಼ ಹೆಸಿ ಲಿವೊಶಿ.
ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ಮಿ ಎ ರಕ್ಷಣೆನಾ ಕಾಮನೆ ಕರಾನು ತುಮಾರಾಕ್ಹು ನ್ಹವೈ ಕೈನ ತುಮೊನೆ ಗ್ವತ್ತ ರ್ಹವಾದೆ; ಇಸ್ರಾಯೆಲ ವಂಶವಾಲಾ, ತುಮಾರಾ ದುರ್ಮಾರ್ಗೊನೆ ಲಜ್ಜ ಪಡೊ, ಸರಮೊ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಮಿ ತುಮೊನೆ ತುಮಾರಾ ಕ್ಹಾರಾ ಅಪರಾದೊಕ್ಹು ಶುದ್ದ ಕರಾನಾ ದಿನ್ನಮಾ ಗಾಮೊನೆ ರ್ಹವಾಲಾವೊಕ್ಹು ಭರುಸ, ಹಾಳ ಜ಼ಗಾವೊಪರ ಘರೊ ಥಾವಸ. ಹೈದಿನ ಜಾ಼ವಾಲಾವೊನಾ ಡೊಳಾ ಕ್ಹಾಮಾ ಹಾಳಪಡಲ ಜಂಗಲನಿ ಜಿಮಿನನೆ ಕ್ಹಂದಸ. ತೆಳಾಮಾ ಮನಕ್ಹೊ- ಜಂಗಲ ರ್ಹಯಲ ಎ ದೆಶ ಎದೆನ್ ಗಾರ್ಡನ ನಿಂಗತ ಚಮ್ಕಸ; ಪಡಿನ ಹಾಳ ಥಯಲ ಗಾಮೊ ಕೊಟೆಕೊತ್ತಲಕ್ಹು ಮಳಿನ ಮನಕ್ಹೊಕ್ಹು ಭರಿ ಗಯುಸ ಕೈನ ಕವಸ. ಯಹೊವಾ ಥಯಲ ಮಿಜ಼ ಪಡಿ ಗಯಲನೆ ಭಾಂದಿನ ಹಾಳ ಥಯನೆ ಬೆಳಸ್ಯೊಸ ಕವಾನು ತುಮಾರಾ ಸುತ್ತೆ ಉಗ್ರಲ ಜನಾಂಗೊನೆ ಗ್ವತ್ತ ಥಾವಸ; ಯಹೊವಾ ಥಯಲ ಮಿಜ಼ ಕದ್ಯೊಸ, ಕರುಸ.
ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಮಿ ವರಿ ಯಕ್ಕ ವಿಷಯಮಾ ಇಸ್ರಾಯೆಲ ವಂಶವಾಲಾವೊನಾ ವಿಜ್ಞಾಪನೆ ಐಕಿನ ಪುರಾ ಕರುಸ; ಕದ್ಯಾಮ ತ್ಯುನಿ ಜನಸಂಕ್ಯಾನೆ ಹಿಂಡ-ಹಿಂಡ ಥೈನ ಹೆಚ್ಚ ಕರುಸ. ಮಿಸಲ ಥಯಲ ಮಂದೆ ನಿಂಗತ, ಸನ್ನೊಮಾ ಯೆರುಸಲೆಮೆ ಐನ ಮಳಾನಾ ಹಿಂಡ ನಿಂಗತ ಮನಕ್ಹೊ ಹಾಳ ಥಯಲ ಗಾಮೊಮಾ ಹಿಂಡ ಹಿಂಡ ಥೈನ ಭರಿ ಜಾ಼ವಸ; ತೆಳಾಮಾ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥಾವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.