Skip to content
BibleKenya

Sikkiligar Bible

ಯಜಕೆಲಾ 39

ಗೊಗನಿ ಸೊಲ

ಮನಕ್ಹನಾ ದಿಕ್ರಾ, ತು ಗೊಗನೆ ವಿರುದ್ದ ಥೈನ ಎ ಕ್ಹುದಾನಿ ವಾತ ಕೆ- ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಆಹಾ ಮೆಷೆಕ್ ತುಬಲ ಜನಾಂಗೊನೊ ಪ್ರಭು ಥಯಲ ಎ ಗೊಗ, ಮಿ ತುನೆ ವಿರುದ್ದ ಥೈನ ತುನೆ ಫರಿನ ಅಗೊ ಕರಿನ ಉತ್ತರ ದಿಕ್ಕತೊ ಬಲೈನ. ಇಸ್ರಾಯೆಲನಾ ಡೊಂಗರೊಪರ ಮೊಕ್ಲುಸ, ತಾರಾ ರೊಡ್ಡಾ ಹತ್ಮಾತೊ ಬಿಲ್ಲು ಬಾಣನೆ ತೊಡಿನ ತಾರಾ ಸಿದಾ ಹತ್ಮಾತೊ ಬಾಣೊನೆ ಉದ್ರಿಪಡುಸ. ತು ತಾರಾ ಕ್ಹಾರಾ ಸೈನ್ಯಾನೆ ತಾರಾ ಕ್ಹಾತೆ ರ‍್ಹವಾಲಾ ಜನಾಂಗೊ ಇಸ್ರಾಯೆಲನಾ ಡೊಂಗರೊಮಾ ಪಡಿ ಜಾ಼ವೊಶಿ; ಮಿ ತುಮೊನೆ ಮಾಕ್ಹ ಕ್ಹಾವಾನಾ ಬಿಜಾ಼ ಬಿಜಾ಼ ಪಕ್ಷಿಯೊನೆಬಿ ಭುಜಂತೊನೆಬಿ ಅನ್ನ ಕರುಸ; ತುಮೆ ಭಾರಾ ಪಡೊಶಿ; ಮಿಜ಼ ಅಪ್ಪಣೆ ದಿದ್ಯೊಸ್ತೊ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಮಿ ಮಾಗೊಗ ದೆಶನಾ ಉಪ್ಪರಬಿ ಕರಾವಳಿನಾ ಗಾಮೊಮಾ ನಿರಭಯ ಥೈನ ರ‍್ಹಯವಾಲಾವೊನಾ ಉಪ್ಪರಬಿಆಗನೆ ವಳೌಸ; ತೆಳಾಮಾ ಮಿಜ಼ ಯಹೊವಾ ವ್ಹೈ ಕೈ ನ ತ್ಯುನೊನೆ ಗ್ವತ್ತ ಥಾವಸ. ಮಿ ಮಾರಾ ಪವಿತ್ರ ನಾಮನೆ ಮಾರಾ ಮನಕ್ಹೊ ಥಯಲ ಇಸ್ರಾಯೆಲೊನಾ ವಚ್ಮಾ ಪ್ರಕಟ ಕರುಸ, ತಿನೆ ಇತ್ತಿ ಉಪ್ಪರ ನಾಮ ಕೆಡ್ಸಾನು ಗುರಿ ನೈ ಕರ್ತೊ; ಮಿಜ಼ ಯಹೊವಾ ವ್ಹೈ, ಇಸ್ರಾಯೆಲನೊ ಪವಿತ್ರ ಕ್ಹುದಾ ವ್ಹೈ ಕೈನ ಜನಾಂಗೊಮಾ ಗ್ವತ್ತ ಥಾವಸ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ದೆಕ ಐಯು, ಥಯು; ಮಿ ಪೈಲಾಜ಼ ಕದಲ ದಿನ್ನ ಎಜ಼ ವ್ಹೈ. ಇಸ್ರಾಯೆಲನಾ ಗಾಮೊನಾ ರ‍್ಹವಾಲಾ ಭಾರಾ ಐನ ಶತ್ರುನಾ ಆಯುಧೊನೆ ಆಗ ಲಗಾಡಿನ ಬಾಳಿ ಪಡುಸ; ಹೊ, ಕ್ಹೆಡ್ಯ, ಗುರಾಣಿ, ಬಿಲ್ಲೊ, ಬಾಣೊ, ಬಡ್ಡಾ, ಬರ್ಚಿಯೊ ಎ ಕ್ಹಾರು ಕ್ಹಾತ ವರಕ್ಹ ಲಕ್ಕಾ ಬಳ್ತಾಜ಼ ಆವಸ; ರಾನಮಾ ಲಾಕ್ಡಾ ಲೌನೈ ಲಾಗ್ತು, ಜಂಗಲಮಾ ಝಾಡನೆ ಕಾಟು ನೈ ಲಾಗ್ತು; ಆಯುಧೊನೆಜ಼ ಬಾಳಸ; ತ್ಯುನೊನೆ ಸುರೆ ಕರ್xಯಲವಾಲಾವೊನೆ ತ್ಯುನೆ ಕಾಳ್ಳಿವಸ, ತ್ಯುನೊನೆ ಚೊ಼ರಿ ಕರಲವಾಲಾವೊನೆ ತ್ಯುನೆ ಚೊ಼ರಿ ಕರಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

ಗೊಗನಿ ಸಮಾಧಿ ಕರಾನು

ತೆ ದಿನ್ನಮಾ ಮಿ ಇಸ್ರಾಯೆಲಮಾ ಲವಣ ಸಮುಂದರನಾ ಪುರ್ವ ದಿಕ್ಕಮಾ ಜಾ಼ವಾಲಾವೊನಿ ವಾಟ ಥಯಲ ಕ್ಹಾಡಿನೆ ಗೊಗನೆ ಬುರಾನಿ ಜ಼ಗಾ ಥೈನ ಕರುಸ; ತ್ಯಾ ಪ್ರಯಾಣ ಕರಾನೆ ಥಾತು ನೈ; ತ್ಯಾಜ಼ ಗೊಗನೆ ತಿನಾ ಕ್ಹಾರಾ ಸಮುಹನೆ ಬುರಸ; ತೆ ಗೊಗನಾ ಸಮುಹನಿ ಕ್ಹಾಡಿ ಕವೈಲಿವಸ. ಇಸ್ರಾಯೆಲವಾಲಾ ದೆಶನೆ ಶುದ್ದ ಕರಾನಾಹುತಿ ಕ್ಹಾತ ಮ್ಹೈನಾ ತ್ಯುನೊನೆ ಬುರ್ತಾಜ಼ ರ‍್ಹವಸ. ದೆಶನಾ ಕ್ಹಾರಾ ಮನಕ್ಹೊ ತ್ಯುನೊನೆ ಬುರಿ ಪಡಸ; ಇಮ್ಮ ಮಿ ಮಶಹುರ ಥಾತಾಮಾ ಮಾರಾ ಮನಕ್ಹೊನೆ ನಾಮ ಉಚ್ಚು಼ ಥಾವಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಪಾಚ಼ಲ್ತಾ ತ್ಯುನೆ ದೆಶನೆ ಶುದ್ದಕರಾನೆ ಕರೆಟ್ಟ ರ‍್ಹಯಲವಾಲಾವೊನೆ ಇನಿನ- ತುಮೆ ದೆಶಮಾ ಫರತಾ ಜಿಮಿನಪರ ಉಗ್ರಲ ಹಡ್ಕಾವೊನೆ ಬುರಿನ ಮ್ಹೆಲೊ ಕೈನ ನಿಯತ ಥೈನ ನೆಮಸಸ; ಕ್ಹಾತ ಮ್ಹೈನಾ ಥಯಲ ಬರೊಬ್ಬರ ಇವ್ನೆ ಎ ಹುಡ್ಕಾನು ಕಾಮಮಾ ಲಾಗಸ. ವಾಟೊಮಾ ಕುನ್ನಬಿ ರ‍್ಹವಾದೆ ಪ್ರಯಾಣ ಕರ್ತಾ ರ‍್ಹತಾಮಾ ಮನಕ್ಹೊನಾ ಹಡ್ಕಾ ದಿಕ್ಹ್ಯಮ ತ್ಯಾ ಯಕ್ಕ ಗುರುತನೆ ಹುಬ್ರಾಡಸ; ಬುರಿನ ಮ್ಹೆಲಾಲಾ ಗೊಗನಾ ಸಮುಹನಾ ತಗ್ಗಮಾ ತಿನೆ ಬುರೆ ಲಕ್ಕಾ ತೆ ಗುರುತ ತಿಮ್ಮಜ಼಼ ಹುಬ್ರಯಲ ರ‍್ಹವಸ. ತೆನೈಸೊ ಯಕ್ಕ ಗಾಮನೆ ಹೆಮೊನಪುರ ಕವಾನು ನಾಮ ಥಾವಸ. ಇಮ್ಮ ದೆಶನೆ ಶುದ್ದ ಕರಸ.

ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಮನಕ್ಹನಾ ದಿಕ್ರಾ, ಕ್ಹಾರಾ ತರಾನಾ ಪಕ್ಷಿಯೊನೆಬಿ ಕ್ಹಾರಾ ಭುಜಂತೊನೆಬಿ ಇಮ್ಮ ಕೆ- ತುಮೆ ಮಳಿನ ಆವೊ; ಮಿ ಇಸ್ರಾಯೆಲನಾ ಡೊಂಗರೊಪರ ತುಮಾರಾಹುತಿ ಕರಾನಿ ಮ್ಹೊಟಿ ಯಜ್ಞನೆ ಕ್ಹಾರಾ ಭನಿತಾ ಐನ ಮಾಕ್ಹನೆ ಕ್ಹೈನ ರಗತ ಪಿವೊ. ಟಗರ ಬಕ್ರು ಪಾಡೊ ಬಾಷಾನನಾ ಕೊಬ್ಬಲ ಜಾನವರೊ, ಕದ್ಯಾಮ ಬಲಿಷ್ಟೊ, ಭುಪತಿಯೊ ಇವ್ನು ಮಾಕ್ಹಬಿ ರಗತಬಿ ತುಮೊನೆ ಮಳಸ. ಮಿ ತುಮಾರಾಹುತಿ ಕ್ಹಲಾಸ ಕರಲ ಬಲಿ ದಿದಲ ಜಾನವರೊನಾ ಮಾಕ್ಹನೆ ಪೆಟ ಭರಿನ ಕ್ಹಾವೊಶಿ, ರಗತನೆ ಘುಂಗ ಥಯೆ ನಿಂಗತ ಪಿವೊಶಿ. ಮಿ ತಯ್ಯಾರ ಕರಾನಾ ತೆ ಕ್ಹೌಮಾ ಘೊಡಾ ಚ಼ಲಾವಾಲಾ ಕ್ಹಾರಾ ಶುರ ಬಿಜಾ಼ ಬಿಜಾ಼ ಸೈನಿಕೊ ಇವ್ನೊನೆ ಚಾ಼ಯೆ ಥಯಲ ತೆಕ್ಲು ಖಾವೊಸಿ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

ಇಸ್ರಾಯೆಲನೆ ಫರಿನ ಭಾಂದಾನು

ಇಮ್ಮ ಮಿ ಜನಾಂಗೊನಾ ವಚ್ಮಾ ಮಾರಿ ಮಹಿಮಾ ಸ್ಥಾಪನೆ ಕರಾನೆ ತೆ ಸೈನಿಕೊನಾ ಉಪ್ಪರ ಹತ್ತ ಕರಿನ ನ್ಯಾಯ ದಂಡನೆ ಕರಾಲೊ ಮಿಜ಼ ವ್ಹೈ ಕವಾನು ತೆ ಕ್ಹಾರಾ ಜನಾಂಗೊನೆ ಗ್ವತ್ತ ಥಾವಸ. ವರಿ ಇಸ್ರಾಯೆಲ ವಂಶವಾಲಾ ಮಿಜ಼ ತ್ಯುನೊ ಕ್ಹುದಾ ಥಯಲ ಯಹೊವಾ ವ್ಹೈ ಕೈನ ತೆಳಾಮ್ತಾ ಕೆಳಾಮಾಬಿ ತಿಳ್ದಿಲಿವಸ. ಎನೈಸೊ ಇಸ್ರಾಯೆಲೊ ತ್ಯುನಾ ಅಧರ್ಮನಾ ನಿಮಿತಜ಼ ಸೆರೆ ಥೈನ ಗಯಾ ಕೈನಬಿ ತ್ಯುನೆ ದ್ರೊಹ ಕರಲಕ್ಹು ಮಿ ತ್ಯುನೊನೆ ವಿಮುಖ ಥೈನ ತ್ಯುನೆ ಕ್ಹಾರಾ ತಲ್ವಾರಕ್ಹು ಕ್ಹಲಾಸ ಥಯೆ ನಿಂಗತ ತ್ಯುನೊನೆ ದುಶ್ಮನೊನಾ ವಶ ಕರ‍್ಯೊ ಕವಾನು ಜನಾಂಗೊನೆ ಗ್ವತ್ತ ಥಾವಸ; ತ್ಯುನಾ ಹೊಲಸತನಾನೆಬಿ ಕೆಟ್ಟಕಾಮೊನೆಬಿ ತಕ್ಕ ಮಿ ತ್ಯುನೊನೆ ದಂಡಸಿನ ತ್ಯುನೊನೆ ವಿಮುಖ ಥಯೊ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಮಾರಾ ಪವಿತ್ರ ನಾಮನೆ ಹಬ್ದಾ ಅಪಕಿರ್ತಿ ಆಯೆ ನೈಸೊ ಮಿ ಹಮ್ನಾ ಆಗ್ರಹ ರ‍್ಹಯಲವಾಲೊ ಥೈನ ಯಾಕೊಬ್ಯವಾಲಾನಾ ಕೆಟ್ಟ ಸ್ಥಿತಿನೆ ಚು಼ಕೈನ ಇಸ್ರಾಯೆಲ ಕ್ಹಾರಾ ವಂಶವಾಲಾವೊನೆ ದಯಾ ದೆಕಾಡುಸ; ಮಿ ಮಾರಾ ಮನಕ್ಹೊನೆ ಬಿಜಾ಼ ಜನಾಂಗೊನಾ ವಶಮಾತೊ ವಚಾ಼ಡಿನ ತೆ ಶತ್ರುವೊನಾ ದೆಶತೊ ಮಳೈನ ಘನ್ನಾ ಜನಾಂಗೊನಾ ಡೊಳಾಕ್ಹಾಮಾ ತ್ಯುನಾ ರಕ್ಷಣೆನಾ ಮುಲಕ ಮಾರಿ ಮರ್ಯಾದಿನೆ ವಚಾ಼ಡಿ ಲಿನ ಪಾಚ಼ಲ್ತೊ. ಮಿ ಮಾರಾ ಮನಕ್ಹೊನೆ ಬಿಜಾ಼ ದೆಶೊತೊ ವಾಪಾಸ ಲೌಸ ಮಿ ತ್ಯುನಾ ದುಶ್ನೊನಾ ದೆಶತೊ ಮಲೌಸ ತೆಳಾಮಾ ಘನ್ನಾ ದೆಶವಾಲಾ ಮಿ ಕೆಕ್ಲೊ ಪವಿತ್ರ ವ್ಹೈ ಕೈನ ಗ್ವತ್ತ ಥಾವಸ. ಮಿ ತ್ಯುನೊನೆ ಜನಾಂಗೊಮಾತೊ ಸೆರೆ ಗಯೆ ನಿಂಗತ ಕರಿನ ಪಾಚ಼ಲ್ತೊ ಮಳೈನ ಸ್ವಂತ ದೆಶನೆ ಲಾಯಲಕ್ಹು ಮಿಜ಼ ತ್ಯುನೊ ಕ್ಹುದಾ ಥಯಲ ಯಹೊವಾ ವ್ಹೈ ಕೈನ ದೃಡ ಕರಿಲಿವಸ. ತ್ಯುನೊಮಾ ಕಿನೆಜ಼ ಸೆರೆಮಾ ನೈ ಛೊಡತೊ. ಹಬ್ದಾ ಕೆಳಾಮಾಜ಼ ತ್ಯುನೊನೆ ಮ್ಹೊಡು ಫರಾತೊ ಸನೈ ಥಾತೊ; ಇಸ್ರಾಯೆಲ ವಂಶನ ಉಪ್ಪರ ಮಾರಿ ಆತ್ಮಾನೆ ಸುರಸಾಯೊಸ ತೆಕ್ಲುಜ಼; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.