Skip to content
BibleKenya

Sikkiligar Bible

ಯಜಕೆಲಾ 32

ಐಗುಪ್ತನಾ ರಾಜಾ಼ನೆ ಮೊಸಳಿನ ಹೊಲ್ಸಲ

ಯೆಹೊಯಾಕಿನ ಸೆರೆ ಥಯಲ ಬಾರವಾ ವರಕ್ಹನಾ ಬಾರವಾ ಮ್ಹೈನಾನಾ ಯಕ್ವಾ ದಿನ್ನಮಾ ಯಹೊವಾ ಎ ವಾಕ್ಯಾ ಮನೆ ದಿದ್ಯೊ ನರನಾ ಮನಕ್ಹ, ತು ಐಗುಪ್ತನೊ ರಾಜೊ಼ ಥಯಲ ಫರೊಹನನಾ ವಿಷಯಮಾ ಶೊಕನು ಗಿದ್ದ ತಿನೆ ಅಮ್ಮ ಕೆ ತು ಜನಾಂಗೊಮಾ ಕೃರ ರಾಜೊ಼ ಕವೈಲಿದ್ಯೊಸ; ದೆಕ ಮಹಾ ನದಿಮಾನು ಮ್ಹಟೊ ಕ್ಹಾಪ ಥೈಗಯೊಸ; ತು ರ‍್ಹಯಲ ನದಿಯೊನೆ ಜು಼ದು ಕರಿನ ಐನ ಪಾನಿನೆ ತಾರಾ ಪಗೊಕಂತೊ ಸರಕೈನ ಜನಾಂಗೊನಾ ತಳಾವೊನೆ ಕ್ಹುಂದಿನ ಮಾತಿಕ್ಹು ಬುಜ್ಜಿ ಪಾಡ್ಯೊ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಗುಂಪ ಥೈನ ಮಳ್ಯಲ ಘನ್ನಾ ಜನಾಂಗೊವಾಲಾನಾ ಹತ್ಮಾತೊ ಮಿ ಮಾರಿ ಬಲಿನೆ ತಾರಾ ಉಪ್ಪರ ನಾಕುಸ; ತ್ಯುನೆ ತುನೆ ತೆ ಬಲಿತಾ ಉಪ್ಪರ ಜಗ್ಗಸ. ಮಿ ತುನೆ ಜಿಮಿನಪರ ನಾಕಿಪಡುಸ; ತುನೆ ಭಾರೊ ಭಿರ್ಕೈನ ಕ್ಹಾರಾ ಹಬಾಳನಾ ಪಕ್ಷಿಯೊನೆ ತಾರಾ ಉಪ್ಪರ ಆವಾವರ್ಕ್ಹು ಕರಿನ ಕ್ಹಾರಾ ಜಾನವರೊನೆ ತುಕ್ಹು ತೃಪ್ತ ಕರೌಸ. ತಾರು ಮಾಕ್ಹು ಡೊಂಗರೊಪರ ನಾಕಿನ ಕ್ಹಾಡಿಯೊನೆ ತಾರೊ ಅಂಗನೊ ಭಾಗೊಕ್ಹು ಭರಿನ. ತಾರು ರಗತನಾ ತುಪಾನಕ್ಹು ದೆಶನೆ ಡೊಂಗರೊ ಲಕ್ಕಾ ಭಿಂಜೌ಼ಸ; ತಳಾ ತಾರಾಕ್ಹು ಭರಸ. ಫರೊಹನ, ಮಿ ತಾರಾ ಉಜಾಲಾನೆ ಇಜ್ಜಾ಼ತಾಮಾ ಪರ್ದೊ ಘಾಲಿನ ತ್ಯಾನಾ ಮ್ಹಾಡಕ್ಹು ಝಾಕಿ ಪಡುಸ, ಚಂದಪ್ಪಾ ಉಜಾಲು ನೈ ದೆತೊ. ತಾರಾ ಉಪ್ಪರ ಹಬಾಳಮಾ ಮಿಂಚಾ಼ನಾ ಕ್ಹಾರಾ ದಿವ್ವಾವೊನೆ ಮಿ ಮಸಕ ಕರಿನ ತಾರಾ ದೆಶಮಾ ಅಂದಾರು ಕರುಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಮಿ ತಾರಾ ನಾಶನ ಸುದ್ದಿ ಜನಾಂಗೊಮಾ ತುನೆ ನೈ ತಿಳ್ದಲ ದೆಶೊನೆಬಿ ಮುಟ್ಸಾತಾಮಾ ತೆ ಘನ್ನಾ ಜನಾಂಗೊನು ಮನಸ ಕಳವಳ ಥಾವಸ. ಹೊ, ಘನ್ನಾ ಜನಾಂಗೊ ತಾರಿ ಗತಿನೆ ಭುಚ್ಕಿನ ಘಾಬ್ರಾ ಥಾವಾವರ್ಕ್ಹು ಕರುಸ; ಮಿ ಮಾರಿ ತಲ್ವಾರನೆ ತ್ಯುನಾ ರಾಜಾ಼ವೊನಾ ಡೊಳಾವೊನಾ ಕ್ಹಾಮೊ ಫರಾತಾಮಾ ತ್ಯುನೆ ತಾರಿ ಕೆಟ್ಟ ಸ್ಥಿತಿನೆ ಶೆಂ ಕರಿನ ಭೆಂಕ್ಹು ಘಾಬ್ರಾ ಥಾವಸ; ತಾರಾ ನಾಶನಾ ದಿನ್ನೆ ಹರಯಕ್ಲೊ ತ್ಯುನು-ತ್ಯುನು ಜ಼ಲಮನಾ ಹುತಿ ಪಲ ಕಾಪಸ.

ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಬಾಬೆಲನಾ ರಾಜಾ಼ನು ತಲ್ವಾರ ತಾರಾ ಉಪ್ಪರ ಪಡಸ. ಮಿ ತಾರಾ ಘನ್ನಾ ಮನಕ್ಹೊನೆ ಘನ್ನಿ ಭಯಾನಕ ಜನಾಂಗವಾಲಾ ಥಯಲ ತಾಕತವರವಾಲಾವೊನಾ ತಲ್ವಾರೊಕ್ಹು ಕ್ಹಲಾಸ ಕರುಸ; ಐಗುಪ್ತ ಹೆಚ್ಕಿ ಕರಿಲಿವಾನಾ ಸಂಗತಿಯೊ; ತಿನಾ ಮನಕ್ಹೊ ಕೆಳಾಮಾಜ಼಼ ನೈಸೊ ಥಾವಸ. ಘನ್ನಾ ತುಫಾನೊನಾ ದಂಡಿಕನನಾ ಜಾನವರೊನೆ ನಾಶ ಕರುಸ; ತೆ ಪಾನಿನೆ ಕಲಕಲಿಕೆ ಹಬ್ದಾ ಕಯೊ ಮನಕ್ಹ ತ್ಯಾ ಪಗ್ಗ ನೈ ಮ್ಹೆಲ ಸಕ್ತೊ, ಕಯು ಜಾನವರ ಗೊರಸ ನೈ ಮಳ್ತು. ತೆಳಾಮಾ ತೆ ಪಾನಿ ಪಾತಳು ಥಯೆ ನಿಂಗತ ತೆ ತುಫಾನೊ ತೆಲನಾ ನಿಂಗತ ಹರದೆ ನಿಂಗತ ಕರುಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಐಗುಪ್ತಮಾ ಭರಲ ಕ್ಹಾರಿ ಆಸ್ತಿನೆ ಮಿ ನಿಗಸಿನ ತೆ ದೆಶನೆ ಹಾಳ ಕರಿನ ತ್ಯಾನಾ ಕ್ಹಾರಾ ಮನಕ್ಹೊನೆ ಕ್ಹಲಾಸ ಕರ್xಯಲಪರ ಮಿಜ಼ ಯಹೊವಾ ವ್ಹೈ ಕೈನ ಗ್ವತ್ತ ಥಾವಸ. ಪ್ರಾಲಾಪ ಕರಾಲಾ ಎ ಶೊಕನು ಗಿದ್ದಕವಾದೆ; ಜನಾಂಗೊನಾ ಛೊಕ್ರಿಯೊ ಇಮ್ಮ ಗೊಳಾಟ ಕರಾದೆ ಐಗುಪ್ತನಾಹುತಿಬಿ ತ್ಯಾನಾ ಘನ್ನಾ ಮನಕ್ಹೊನಾಹುತಿಬಿ ದುಕ್ಕ ಥೈನ ಎ ಗಿದ್ದ ಕವಾದೆ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

ಮೌತ ಥಯಲವಾಲಾವೊನು ದುನಿಯಾ

ಯೆಹೊಯಾಕಿನ ಸೆರೆ ಥಯಲ ಬಾರವಾ ವರಕ್ಹನಾ ಬಾರವಾ ಮ್ಹೈನಾನಾ ಪಂದ್ರಾವಾ ದಿನ್ನಮಾ ಯಹೊವಾ ಎ ವಾಕ್ಯ ಮನೆ ದಿದ್ಯೊಸ. ಮನಕ್ಹನಾ ದಿಕ್ರಾ, ತು ಐಗುಪ್ತನಾ ನೈ ಮೊಜಾ಼ನೆ ಥಾವಾನಾ ಮನಕ್ಹೊನಾಹುತಿ ಗೊಳಾಡಿನ ತ್ಯುನೊನೆ ಘನ ಥಯಲ ಜನಾಂಗವಾಲಾವೊನೆ ಅಧೊಲೊಕನಾ ಉಂಡಾಮಾ ಢಕ್ಲಿ ಪಡ. ತು ಸುಂದರತಾಮಾ ಕಿಕ್ಹು ಕಮ್ಮ ಛೆ? ಉತ್ರಿನ ಗೈನ ಸುನ್ನತಿ ನೈಸೊವಾಲಾನಾ ವಚ್ಮಾ ಒರಗ. ಆಹಾ, ತಲ್ವಾರಕ್ಹು ಕ್ಹಲಸ ಕರಾಲಾವೊನಾ ವಚ್ಮಾ ಪಡಸ; ತಲ್ವಾರ ಉಚಾ಼ಯಲ ಛೆ; ಪಾತಾಳಮಾ ಐಗುಪ್ತನೆ ತಿನಾ ಘನ್ನಾ ಮನಕ್ಹೊನೆ ಎಳದಿಲಿವೊ. ಪಾತಾಳಮಾನಾ ತಾಕತವರೊ ತಿನೆ ತಿನಾ ಸಹಾಯಕೊನೆ ದೆಕಿನ ಒಹೊ, ಇವ್ನೆ ಸುನ್ನತಿ ನೈಸೊವಾಲಾ ವ್ಹೈ, ತಲ್ವಾರಕ್ಹು ಕ್ಹಲಾಸ ಕಾರಾಲಾ ವ್ಹೈ, ಉತ್ರಿನ ಐನ ಒರಗಿನ ಪಡ್ಯಾ ಕೈಲಿವಸ. ಅಶ್ಯರವಾಲಾ ತಿನಾ ಮನಕ್ಹೊ ಕೆಳಾಮಾಬಿ ತ್ಯಾ ರ‍್ಹವಸ; ತೆ ಮನಕ್ಹೊನಾ ಮಜಾ಼ರೊ ತಿನೆ ಸುತ್ತಿ ಲಿದ್ಯಾಸ; ತ್ಯುನೆ ಕ್ಹಾರಾ ಜ಼ನಾ ಸಂಹೃತವಾಲಾ, ತಲ್ವಾರಕ್ಹು ಕ್ಹಲಾಸ ಥಾವಾಲಾ ವ್ಹೈ; ತ್ಯುನಾ ಮಜಾ಼ರೊ ಅಧೊಲೊಕನಾ ಮ್ಹೈನಾ ಜ಼ಗಾವೊಮಾ ಫೈಲಿ ಗಯಾಸ; ಅಶ್ಯುಪವಾಲಾ ಅಶ್ಯರನಾ ಮಜಾ಼ರನಾ ಸುತ್ತೆ ಛೆ; ಜಿವಲೊಕಮಾ ಭಿಕರ ಥಯಲವಾಲಾ ಇವ್ನೆ ಕ್ಹಾರಾ ಜ಼ನಾ ಸಂಹೃತವಾಲಾ, ತಲ್ವಾರಕ್ಹು ಕ್ಹಲಾಸ ಥಯಲವಾಲಾ ವ್ಹೈ. ಎಲಾಮ ತ್ಯಾ ಛೆ; ತಿನಾ ಮನಕ್ಹೊ ಕ್ಹಾರಾ ತಿನಾ ಮಜಾ಼ರೊನೆ ಸುತ್ತಿ ಲಿದ್ಯಾಸ; ತ್ಯುನೆ ಕ್ಹಾರಾ ಜ಼ನಾ ಸಂಹೃತವಾಲಾ, ತಲ್ವಾರಕ್ಹು ಕ್ಹಲಾಸ ಥಯಲವಾಲಾ ವ್ಹೈ; ಜಿವಲೊಕಮಾ ಭಿಕರ ಥಯನ ತೆ ಸುನ್ನತಿ ನೈಸೊವಾಲಾ ಅಧೊಲೊಕನೆ ಉತ್ರಿನ ಭುತ್ಡಾವೊನಾ ವಚ್ಮಾ ಅವಮಾನ ಥಯಾಸ. ಕ್ಹುರ್xಯಾವಾನೆ ಕ್ಹಲಾಸ ಥಯಲ ತಿನಾ ಕ್ಹಾರಾ ಮನಕ್ಹೊನಾ ವಚ್ಮಾ ಜ಼ಗಾ ಕರ್‍ಯಾಸ, ತ್ಯುನಾ ಮಜಾ಼ರೊ ತಿನಾ ಸುತ್ತ ಮುತ್ತ ಛೆ; ತ್ಯುನೆ ಕ್ಹಾರಾ ಜ಼ನಾ ಸುನ್ನತಿ ನೈಸೊವಾಲಾ ವ್ಹೈ, ತಲ್ವಾರಕ್ಹು ಕ್ಹಲಾಸ ಥಯಲವಾಲಾ ವ್ಹೈ; ತ್ಯುನೆ ಜಿವಲೊಕಮಾ ಭಿಕರ ಥೈನ ಭುತ್ಡಾವೊನಾ ಕ್ಹಾತೆ ಮಳಿನ ಅವಮಾನ ಥಯಲವಾಲಾ ಥಯಾಸ; ಸಂಹೃತವಾಲಾವೊನಾ ವಚ್ಮಾ಼ಜ಼಼ ಎಲಾಮನೆ ಜ಼ಗಾ ತಯ್ಯಾರ ಥೈಸ. ಮೆಷೆಕ ತುಬಲ ತ್ಯುನಾ ಕ್ಹಾರಾ ಮನಕ್ಹೊ ತ್ಯಾ ರ‍್ಹವಸ; ತೆ ಮನಕ್ಹೊನಾ ಮಜಾ಼ರೊ ತ್ಯುನೊನೆ ಸುತ್ತಿ ಲಿದ್ಯಾಸ; ತ್ಯುನೆ ಕ್ಹಾರಾ ಜ಼ನಾ ಸುನ್ನತಿ ನೈಸೊವಾಲಾ, ತಲ್ವಾರಕ್ಹು ಕ್ಹಲಾಸ ಥಯಲವಾಲಾ ವ್ಹೈ; ಜಿವಲೊಕಮಾ ಭಿಕರ ಥಯಾತಾತೊ; ಸುನ್ನತಿ ನೈಸೊವಾಲಾ ಶುರೊ ಜಿವಲೊಕಮಾ ತಾಕತವರೊನೆಬಿ ಭಿಕರ ಥೈನ ಕ್ಹಲಾಸ ಥೈನ ಆಯುದ್ದನಾ ಕ್ಹಾತೆಜ಼ ಪಾತಾಳೆ ಉತ್ರಿನ ತಲ್ವಾರೊನೆ ಮ್ಹೊಟ್ಲಾ ಕರಿಲಿನ ತ್ಯುನಾ ಅಸ್ಥಯೊನಾ ಉಪ್ಪರ ತ್ಯುನಾ ಕೆಟ್ಟ ಕಾಮೊನು ವಜ್ಜು಼ ಉಚೈಲಿದ್ಯಾಸ ತ್ಯುನಾ ವಚ್ಮಾ ಮೆಷೆಕನಾವಾಲಾ ತುಬಲಿನವಾಲಾ ಪಡ್ಯಾ ಬಗರ ಜಾ಼ವಸ ಸು.

ಫರೊಹನ, ತು ಸುನ್ನತಿ ನೈಸೊವಾಲಾವೊನಾ ವಚ್ಮಾ ನಾಶ ಥೈನ ತಲ್ವಾರಕ್ಹು ಕ್ಹಲಾಸ ಥಯಲವಾಲಾವೊನಾ ವಚ್ಮಾ ಪಡಿಜಾ಼ಶಿ! ಎದೊಮ ತಿನಾ ರಾಜಾ಼ ಕ್ಹಾರಾ ಶಾನಾ ಮನಕ್ಹೊ ತ್ಯಾ ಛೆ; ತ್ಯುನೆ ತಾಕತವರ ಥೈನ ತಲ್ವಾರಕ್ಹು ಕ್ಹಲಾಸ ಥಯಲವಾಲಾವೊನಾ ಕ್ಹಾತೆ ಪಡ್ಯಲ ರ‍್ಹವಸ; ಸುನ್ನತಿ ನೈಸೊವಾಲಾವೊನಾ ಕ್ಹಾತೆ ಉಂಡು ರ‍್ಹಯಲ ಜ಼ಗಾಮಾ ವಚ್ಮಾ ಒರಗಿನ ಗಯಾಸ. ಉತ್ತರ ದೆಶನಾ ಕ್ಹಾರಾ ಪ್ರಭುವೊ ಕ್ಹಾರಾ ಚಿದೊನ್ಯವಾಲಾ ಸಂಹೃತವಾಲಾವೊನಾ ಕ್ಹಾತೆ ಉತ್ರಿನ ತ್ಯಾ ಛೆ; ಭಯಾನಕ ರ‍್ಹಯಲ ತ್ಯುನಾ ತಾಕತನೆ ಸರ್ಮಿನ ತಲ್ವಾರಕ್ಹು ಕ್ಹಲಾಸ ಥಯಲವಾಲಾವೊನಾ ವಚ್ಮಾ ಸುನ್ನತಿ ನೈಸೊವಾಲಾ ಥೈನ ಪಡಿನ ಉಂಡಾಮಾ ಪಡಲ ವಾಲಾವೊನಾ ಕ್ಹಾತೆ ವಚ್ಮಾ ಅವಮಾನ ಥಯಾಸ.

ಫರೊಹನ ಇವ್ನೆ ಕ್ಹಾರಾವೊನೆ ದೆಕಿನ ತಿನಾ ಕ್ಹಾರಾ ಮನಕ್ಹೊನಾ ವಿಷಯಮಾ ಸಮಾದಾನ ವ್ಹಂದಸ; ಹೊ, ಫರೊಹನ ತಲ್ವಾರಕ್ಹು ಕ್ಹಲಾ ಥಯಲವಾಲಾ ತಿನಾ ಕ್ಹಾರಾ ಸೈನಿಕೊ ಸಮಾದಾನ ವ್ಹಂದಸ. ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ದೆಕ, ಜಿವಲೊಕಮಾ ಮಿ ಮಾರಿ ಭೆಂ ಹುಟ್ಸಾಯೊಸ; ಫರೊಹನ ತಿನಾ ಕ್ಹಾರಾ ಮನಕ್ಹೊ ಸುನ್ನತಿ ನೈಸೊವಾಲಾವೊನಾ ವಚ್ಮಾ, ತಲ್ವಾರಕ್ಹು ಕ್ಹಲಾಸ ಥಯಲವಾಲಾವೊನಾ ವಚ್ಮಾ, ರ‍್ಹವಸ ಕವಾನು ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.