Sikkiligar Bible
ಯಜಕೆಲಾ 31
ಐಗುಪ್ತನೆ ದೆವದಾರು ಝಾಡನು ಹೊಲಸಲ
ಯೆಹೊಯಾಕಿನ ಸೆರೆ ಥಯಲ ಗ್ಯಾರವಾ ವರಕ್ಹನಾ ತನ್ವಾ ಮ್ಹೈನಾನಾ ಯಕ್ವಾ ದಿನ್ನಮಾ ಯಹೊವಾ ಎ ವಾಕ್ಯಾ ಮನೆ ದಿದ್ಯೊ. ಮನಕ್ಹನಾ ದಿಕ್ರಾ, ತು ಐಗುಪ್ತನೊ ರಾಜೊ಼ಥಯಲ ಫರೊಹನನೆ ತಿನಾ ನೈ ಮೊಜಾ಼ನೆ ಥಾವಾನಾ ಮನಕ್ಹೊನೆ ಅಮ್ಮ ಕೆ- ಮ್ಹೊಟಪನಮಾ ತುನೆ ಸಮಾನ ಕುನ್ನ ಛೆ? ಆಹಾ, ತಿಲಕ ದೆವದಾರ ಯಕ್ಕ ಝಾಡ ಲೆಬನೊನಮಾ ವ್ಹತ್ತು; ತಿನಾ ಠೊಂಗಿಯೊ ಚೊ಼ಕಾ ಛೆ, ತಿನಿ ಛೌಲಿ ಮ್ಹೊಟಿ, ತೆ ಉಚ್ಚು ಘನ್ನು ಛೆ, ತಿನಿ ತುದಿ ಹಬಾಳನೆ ಮುಟ್ಟಸ. ತಿನೆ ಪಾನಿನಾ ತುಫಾನೊ ಬೆಳಸಾಯಾ, ಮಹಾನದಿ ವೃದ್ದಿ ಕರಿ, ನದಿನಾ ಶಾಕೆ ತ್ಯಾನಾ ಮಳಾವೊನೆ ಸುತ್ತಿಲಿದ್ಯಾ, ಭುಮಿನಾ ಕ್ಹಾರಾ ಝಾಡೊನೆ ನದಿ ತಿನಾ ಕಾಲುವೆನೆ ದಿದ್ಯು. ಇಮ್ಮ ರ್ಹವಾಕ್ಹು ತೆ ಝಾಡ ರಾನನಾ ಕ್ಹಾರಾ ಝಾಡೊತಿಬಿ ಚೊ಼ಕು ವ್ಹತ್ತು; ತಿನಾ ಠೊಂಗಿಯೊ ನಿಬಿಡ ವ್ಹತ್ತಿಯೊ; ತ್ಯಾ ನಿರಾವರಿ ರ್ಹಯಲಕ್ಹು; ತಿನಾ ಠೊಂಗಿಯೊ ಲಾಂಬಾ ಥೈನ ಬೆಳದ್ಯಾತಾ. ಕ್ಹಾರಾ ಹಬಾಳನಾ ಪಕ್ಷಿಯೊ ತಿನಾ ಠೊಂಗಿಯೊಪರ ಗುಡ ಕರಿ ಲಿದ್ಯಾತಾ; ಜಾನವರೊ ತಿನಾ ಠೊಂಗಿಯೊನಾ ಹೆಟಾ ರ್ಹೈನ ಬಚ್ಚಾ಼ ಜನ್ನಾಡಾತಾ; ಕ್ಹಾರಾ ಮಹಾಜನಾಂಗೊ ತಿನಿ ಛೌಲಿಮಾ ಆಶ್ರಯ ವ್ಹತ್ತಾ. ತಿನಾ ಬೆರನೆ ಜಲಾಸರೆ ರ್ಹಯಲಕ್ಹು ತೆ ಝಾಡ ಉಚ್ಚಾ಼ತುಬಿ ಠೊಂಗಿಯೊನಾ ತುದಿತಾಬಿ ಕಂಗೊಳಸಾಡುತು. ಕ್ಹುದಾನಾ ಮಳಾಮಾನಾ ದೆವದಾರು ತಿನೆ ಪಸಂದ ಕರ್ಯಾ ಬಗರ ರ್ಹಯಾ; ತರಾಯಿನಾ ಝಾಡೊ ತಿನಾ ಠೊಂಗಿಯೊ ಅಕ್ಲಾ ಲಾಂಬಾ ನ್ಹೊತಾ; ಕಾಪುಕನಾ ಝಾಡೊ ತಿನಾ ಠೊಂಗಿಯೊ ಅಕ್ಲಾ ಜಾ಼ಡಾ ನ್ಹೊತಾ; ಕ್ಹುದಾನಾ ಮಳಾಮಾನು ಕಯು ಝಾಡಬಿ ತಿನಾ ನಿಂಗತ ಚೊ಼ಕು ನ್ಹೊತು. ಮಿ ತಿನೆ ಘನ್ನಾ ಶಾಕೆಕ್ಹು ಚೊ಼ಕೊ ಕರ್ಯೊ; ಕ್ಹುದಾನು ಮಳೊ ರ್ಹಯಲ ಎದೆನನಾ ಕ್ಹಾರಾ ಝಾಡೊ ತಿನೆ ಅಸುಯೆ ಥಾತಾತಾ. ಇಮ್ಮ ರ್ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ತೆ ಝಾಡ ಘನ್ನು ಉಚ್ಚು಼ ಬೆಳ್ದಿನ ತಿನಿ ತುದಿನೆ ಮ್ಹಾಡನೆ ಲಗಾಡಿನ ತಿನಾ ನಿಳನಾ ವಿಷಯಮಾ ಫುಗ್ಯಲಕ್ಹು ಮಿ ತಿನೆ ಜನಾಂಗೊಮಾ ಘನ್ನೊ ತಾಕತವರ ಥಯಲವಾಲಾನಾ ಹತ್ಮಾ ದಿ ಪಡ್ಯೊಸ. ತೆ ತಿನಾ ಕೆಟ್ಟತನಾ ನಿಂಗತ ತಿನೆ ಶಿಕ್ಷಾ ದಿವಸಜ಼; ಮಿ ತಿನೆ ಢಕ್ಲಿಪಡ್ಯೊ. ಘನ್ನಾ ಭಯಾನಕ ಥಯಲ ಜನಾಂಗವಾಲಾ ಬಿಜಾ಼ ದೆಶನಾ ಮನಕ್ಹೊ ತಿನೆ ಕಾಟಿನ ಗೈ ಪಡ್ಯಾಸ; ತಿನಾ ಠೊಂಗಿಯೊ ಡೊಂಗರೊಮಾಬಿ ಕ್ಹಾರಾ ತಳಾವೊಮಾ ಪಡ್ಯಾಸ; ತಿನಾ ಠೊಂಗಿಯೊ ದೆಶನಾ ಕ್ಹಾರಾ ತೊರೆನಾ ಬಾಜು಼ ತುಟಿನ ಪಡ್ಯಲ ಛೆ; ಲೊಕನಾ ಕ್ಹಾರಾ ಜನಾಂಗೊ ತಿನಾ ಛೌಲಿಕ್ಹು ಭಾರಾ ತಿನೆ ಛೊಡಿನ ಗಯಾಸ. ಪಡಲ ಬುಡನಾ ಉಪ್ಪರ ಕ್ಹಾರಾ ಹಬಾಳನಾ ಪಕ್ಷಿಯೊ ಎರಗಸ; ತಿನಾ ಠೊಂಗಿಯೊನೆ ಕ್ಹಾರಾ ಜಾನವರೊ ಕ್ಹುಂದಸ.
ನಿರಾವರಿನಾ ಕಯಾ ಝಾಡೊ ತ್ಯುನಾ ಉಚ್ಚಾ಼ನೆ ಹೆಚ್ಕಿ ಕರಿಲಿನ ತ್ಯುನಿ ತುದಿನೆ ಮ್ಹಾಡನೆ ಲಾಗು ನೈಸೊ ಪಾನಿನೆ ಪಿತಾ ರ್ಹಯಲ ಮ್ಹೊಟಾ ಮ್ಹೊಟಾ ಝಾಡೊ ಉಚ್ಚಾ಼ ಥೈನ ಬೆಳ್ದೆ ನೈಸೊ ಅಮ್ಮ ಥಯು; ತೆ ಕ್ಹಾರಾ ಮರಣನಾ ಪಾಲ ಥಾವಸ; ಪಾತಾಳನೆ ತ್ಯುನಿ ಗತಿ ವ್ಹೈ; ಪಾತಾಳೆ ಉತ್ರಿನ ಗಯಲವಾಲಾವೊಕನ ನರ ಜನ್ಮವಾಲಾವೊನೆ ಯಕ್ಕ ಗುಂಪ ಥೈನ ಮಳಸ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ತೆ ಝಾಡ ಪಾತಾಳೆ ಉತ್ರಿನ ಗಯಲ ದಿನ್ನಮಾ ಮಿ ದುಕ್ಕನಾ ನಿಶಾನಾ ಕರ್ಯೊ; ತಿನಾ ದುರಥಾವಾನಾಹುತಿ ಮ್ಹೊಟಿ ನದಿ ಝಾಕಿನ ನದಿನಾ ಶಾಕೆ ಕಾಡಿ ಪಡ್ಯೊ, ಪಾನಿನು ತುಫಾನ ಹುಬ್ರೈ ಗಯು; ತಿನಾಹುತಿ ಲೆಬನೊನ ಗೊಳಾಡೆ ನಿಂಗತ ಕರ್ಯೊ ಭುಮಿನಾ ಕ್ಹಾರಾ ಝಾಡೊ ತೆ ದುಕ್ಕಕ್ಹು ಕುಕ್ಹೈ. ಮಿ ತಿನೆ ಭುತ್ಡಾವೊನಾ ಕ್ಹಾತೆ ಮಳೌ ಕೈನ ಪಾತಾಳನೆ ಢಕ್ಲಿಪಡ್ಯಲ ಪರ ತೆ ಪಡ್ಯಲ ಅವಾಜ಼ನೆ ಕ್ಹಾರಾ ಜನಾಂಗವಾಲಾ ಕಾಪ್ಯಾ; ವರಿ (ಪೈಲಾನಾ ಕಾಲಮಾ) ಅಧೊಲೊಕನಾ ಪಾಲ ಥಯಲ ಎದೆನನಾ ಕ್ಹಾರಾ ಝಾಡೊ, ಲೆಬನೊನನಾ ಚೊ಼ಕಾತಿ ಚೊ಼ಕಾ ಝಾಡೊ, ತೆನೈಸೊ ನಿರಾವರಿನಾ ಕ್ಹಾರಾ ತರಾನಾ ಝಾಡೊ ತ್ಯಾ ಸಂತೈಸಿ ಲಿದ್ಯಾ. ಎನೈಸೊ ತಿನೆ ರಟ್ಟಾನಿ ತಾಕತ ಥೈನ ಜನಾಂಗೊನಾ ವಚ್ಮಾ ತಿನಿಛೌಲಿನೆ ಆಶ್ರಯ ಕರಿ ಲಿದ್ಯಲವಾಲಾ ತಿನಾ ಕ್ಹಾತೆ ಪಾತಾಳನೆ ಉತ್ರಿನ ತಲ್ವಾರಕ್ಹು ಕ್ಹಲಾಸ ಕರಾಲಾವೊನಾ ಕ್ಹಾತೆ ಮಳ್ಯಾ. ತಿನಿ ಶ್ರಿಂಗಾರತನಾಕ್ಹು ಮಹಿಮಾಕ್ಹು ಮಳಲ ತು ಎದೆನನಾ ಝಾಡೊಮಾ ಕಿಕ್ಹು ಕಮ್ಮ ಛೆ? ತೆನೈಸೊ ತು ಎದೆನನಾ ಝಾಡೊನಾ ಕ್ಹಾತೆ ಪಾತಳಮಾ ಢಕ್ಲೈನ ಅನ್ಯ ಮನ್ಕಹೊ ರ್ಹಯಲವಾಲಾವೊನಾ ವಚ್ಮಾ ತಲ್ವಾರಕ್ಹು ಕ್ಹಲಾಸ ಕರಾಲಾವೊನಾ ಕ್ಹಾತೆ ಒರಗಿ ಜಾ಼ಶಿ. ಫರೊಹನ ತಿನಾ ಕ್ಹಾರಾ ಮನಕ್ಹೊ ಎಜ಼ ಗತಿ ವ್ಹಂದಿಲಿವಸ ಕವಾನು ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.