Sikkiligar Bible
ಯಜಕೆಲಾ 30
ಐಗುಪ್ತ ನೆಬುಕದ್ನೆಚ್ಚರಕ್ಹು ಹಾಳ ಥಾವಸ
ಯಹೊವಾ ವರಿಯಕ್ಕ ವಾಕ್ಯಾ ಮನೆ ದಿದ್ಯೊ. ಮನಕ್ಹನಾ ದಿಕ್ರಾ, ತು ಆಂ ಕ್ಹುದಾನಿ ವಾತನೆ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಅಡ್ಡೊ! ಅಯ್ಯೊ ದಿನ್ನ! ದಿನ್ನ ನಜಿಕ ಛೆ; ಹೊ, ಯಹೊವಾನು ದಿನ್ನ, ಕಾರ್ಮುಗಿಲನು ದಿನ್ನ ನಜಿಕ ಅಯ್ಯು; ತೆ ಜನಾಂಗೊನೆ ನ್ಯಾಯ ತಿರ್ಸಾನು ಕಾಲ ವ್ಹೈ. ತಲ್ವಾರ ಐಗುಪ್ತನಾ ಉಪ್ಪರ ಪಡಸ; ತ್ಯಾನಾ ಮನಕ್ಹೊ ಕ್ಹಲಾಸ ಥಾವಾನೆ ಕುಷಿನಮಾ ತ್ರಾಸ ಥಾವಸ; ಐಗುಪ್ತನಾ ಕೆಕ್ಲಾಕಿ ಮನಕ್ಹೊನೆ ಲಿಂಜಾ಼ವಸ; ತಿನು ಅಸ್ತಿವಾರ ಹಾಳ ಥಾವಸ; ಕುಷವಾಲಾ, ಪುಟ್ಯವಾಲಾ, ಲುದ್ಯವಾಲಾ, ಬಿಜಾ಼ ಬಿಜಾ಼ ಕ್ಹಾರಾ ವಿದೆಶವಾಲಾ, ಕುಬ್ಯವಾಲಾ, ಅರೆಬಿಯೊ, ಸ್ವಂತ ಮನಕ್ಹೊ, ಇವ್ನೆ ಕ್ಹಾರಾ ಐಗುಪ್ತವಾಲಾವೊನಾ ಕ್ಹಾತೆ ತಲ್ವಾರಕ್ಹು ಕ್ಹಲಾಸ ಥಾವಸ. ಯಹೊವಾ ಅಮ್ಮ ಕವಸ ಐಗುಪ್ತನೆ ಆಧಾರ ಥಯಲವಾಲಾ ಪಡಸ, ತಿನಿ ತಾಕತನಿ ಉತ್ರಿ ಜಾ಼ವಸ; ತ್ಯಾನಾ ಮನಕ್ಹೊ ಮಿಗ್ದೊಲತಾ ಸೆವೆನೆಯ ಲಕ್ಕಾ ತಲ್ವಾರಕ್ಹು ಕ್ಹಲಾಸ ಥಾವಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಹಾಳಥಯಲ ದೆಶಮಾ ತೆ ದೆಶ ಹಾಳ ಥಯಲ ರ್ಹವಸ, ಹಾಳ ಥಯಲ ಗಾಮೊಮಾ ತಿನಾ ಗಾಮೊ ಹಾಳ ಪಡಲ ರ್ಹವಸ. ಮಿ ಐಗುಪ್ತನೆ ಆಗ ಲಗಾಡಿನ ತಿನಾ ಕ್ಹಾರಾ ಸಹಾಯಕೊನೆ ನಾಶ ಕರಲ್ಪರ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥಾವಸ. ತೆ ದಿನ್ನೊಮಾ ಸುದ್ದಿ ಕವಾಲಾ ಮಾರಿ ಸನಿದಾನತಾ ಗೈನ ಹಡಗಾವೊಮಾ ಗೈನ ಅರಾಮ ರ್ಹಯಲ ಕುಷ್ಯವಾಲಾವೊನೆ ಭುಚ್ಕಾಡಸ; ಐಗುಪ್ತನಾ ನಾಶನನಾ ದಿನ್ನಮಾ ಕುಷ್ಯವಾಲಾವೊನೆ ತ್ರಾಸ ಥಾವಸ; ತೆ ದಿನೊ ದೆಕೊ ಐಯುಸ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಿ ಬಾಬೆಲನೊ ರಾಜೊ಼ ಥಯಲ ನೆಬುಕದ್ನೆಚ್ಚರನಾ ಹತ್ಮಾತೊ ಐಗುಪ್ತನಾ ನೈ ಮೊಜಾ಼ನೆ ಥಾವಾನಾ ಮನಕ್ಹೊನೆ ನಾಶ ಕರುಸ. ತೆ ದೆಶನೆ ನಾಶ ಕರಾನೆ ತಿನೆ ಘನ್ನಾ ಖತರನಾಕ ಜನಾಂಗವಾಲಾ ಥಯಲ ತಿನಾ ಸೈನಿಕೊನಾ ಕ್ಹಾತೆ ಆವಾ ಲಗಾಡುಸ; ತ್ಯುನೆ ಐಗುಪ್ತನಾ ಉಪ್ಪರ ತಲ್ವಾರ ಕಾಡಿನ ದೆಶನೆ ಕ್ಹಲಾಸ ಥಯಲವಾಲಾವೊಕ್ಹು ಭರಸ. ಮಿ ನೈಲ ನದಿನೆ ಕ್ಹುಕ್ಹೈನ ದೆಶನೆ ಕೆಟ್ಟ ಮನಕ್ಹೊನೆ ಇಕ್ಕ ಪಡುಸ; ಹೊ, ದೆಶನೆ ತಿಮಾ ರ್ಹಯಲ ಹರಯಕ್ಕಬಿ ಬಿಜಾ಼ವೊಕ್ಹು ಹಾಳ ಕರಾಲಗಾಡುಸ; ಯಹೊವಾ ಥಯಲ ಮಿಜ಼ ಕದ್ಯೊಸ.
ಕರ್ತಾ ಥಯಲ ಯಹೊವಾ ಅಮ್ಮ ಕವಸ. ಮಿ ನೊಫಿನ ಗಾಮಾನಿಯೊ ಮೊರ್ತಿಯೊನೆ ಫೊಡಿನ ತ್ಯುನೊನೆ ನಾಶ ಕರುಸ; ಐಗುಪ್ತದೆಶಮಾ ಹಬ್ದಾ ಕಯೊ ಪ್ರಭುಜ಼ ನೈ ರ್ಹತೊ; ಮಿ ತೆ ದೆಶನೆ ಭೆಂ ಘಾಲುಸ. ಮಿ ಪತ್ರೊಸನೆ ಹಾಳ ಕರಿನ ಚೊವನೆ ಆಗ ಲಗಾಡಿನ ನೊಪುರನೆ ಶಿಕ್ಷಾದಿನ. ಐಗುಪ್ತನೆ ರಕ್ಷಣಾ ಕೊಟೆ ಥಯಲ ಸಿನನಾ ಉಪ್ಪರ ಮಾರಿ ಶಿಟ್ಟಕ್ಹು ನೊಪುರಮಾ ರ್ಹಯಲವಾಲಾವೊನೆ ಕತ್ರಿ ಪಡುಸ. ಮಿ ಐಗುಪ್ತನೆ ಕಿಚ್ಚ ಲಗಾಡಾಕ್ಹು ಸಿನ ಜ಼ಲಮನು ತ್ರಾಸ ಕ್ಹಾವಸ; ನೊಪುರ ಭಂಗನೆ ಗುರಿ ಥಾವಸ; ನೊಫನಾ ಉಪ್ಪರ ದುಶ್ಮನೊ ದುಪ್ಪಾರೆಜ಼ ಪಡಸ. ಒನನಾ ಗಾಮನಾ ವರಿ ಪಿಬೆಸೆತನಾ ಗಾಮನಾ ಯುವಕೊ ತಲ್ವಾರಕ್ಹು ಕ್ಹಲಾ ಥಾವಸ; ತ್ಯಾ ರ್ಹವಾಲಾ ಸೆರೆ ಥೈನ ಜಾ಼ವಸ. ಐಗುಪ್ತ ಉಚಾವಾಲಗಾಡಲ ನೊಗ ಮಿ ತಹಪನೆಸಮಾ ತುಟತಾಮಾ ತ್ಯಾ ದಿನ್ನ ನಿಕ್ಹಳತೊ ನೈ, ತಿನಿ ತಾಕತನಿ ನಶಾ ಝಕೈ ಜಾ಼ವಸ, ಕಾರ್ಮುಗಿಲ ತಿನೆ ಸುತ್ತಿ ಲಿವಸ, ತಿನಿಯೊ ಬಾಕ್ಡಿಯೊ ಸೆರೆನೆ ಲಿಂಜಾ಼ವಸ. ಇಮ್ಮ ಮಿ ಐಗುಪ್ತವಾಲಾವೊನೆ ಶಿಕ್ಷಾ ದಿನ ತಿರಿಸತಾಮಾ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥಾವಸ.
ಫರೊಹನನಾ ಹತೊ ಬಾಗಾನು
ಯೆಹೊಯಾಕಿನ ಸೆ ಥಯಲ ಗ್ಯಾರವಾ ವರಕ್ಹನಾ ಯಕ್ವಾ ಮ್ಹೈನಾನಾ ಕ್ಹಾತವಾ ದಿನ್ನಮಾ ಯಹೊವಾ ಎ ವಾಕ್ಯಾ ಮನೆ ದಿದ್ಯೊ. ಮನಕ್ಹನಾ ದಿಕ್ರಾ, ಮಿ ಐಗುಪ್ತನೊ ರಾಜೊ಼ ಥಯಲ ಫರೊಹನಾ ಹತ್ತನೆ ತೊಡಿ ಪಡ್ಯೊಸ; ದೆಕ, ತಿನೆ ಕುನ್ನಜ಼ ಭಾಂದ್ಯು ನೈ, ವಕ್ಹಡ ಲಗಾಡ್ಯಾ ನೈ, ತೆ ತಲ್ವಾರ ಧರೆ ನಿಂಗತ ತಾಕತವರ ಥಯೆ ನಿಂಗತ ಕುನ್ನಜ಼ ಫಡ್ಕು ಭಾಂದಿನ ತಿನೆ ಬಿಗದ್ಯಾ ನೈ. ಇಮ್ಮ ರ್ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ಮಿ ಐಗುಪ್ತನೊ ರಾಜೊ಼ ಥಯಲ ಫರೊಹನನೆ ವಿರುದ್ದ ಥೈನ ತಿನಾ ಹತೊನೆ, ಕದ್ಯಾಮ ಕರೆಟ್ಟ ರ್ಹಯಲನೆ, ತೊಡಲನೆ ಘನ್ನೊ ತೊಡಿನ ತಲ್ವಾರ ತಿನಾ ಹತ್ತಮಾತು ಪಡೆನಿಂಗತ ಕರುಸ. ಐಗುಪ್ತವಾಲಾವೊನೆ ಜನಾಂಗೊಮಾ ಚದರಿನ ದೆಶ ದೆಶನೆ ತುರಿ ಪಡುಸ. ಮಿ ಬಾಬೆಲನಾ ರಾಜಾ಼ನಾ ಹತೊನೆ ತಾಕತ ದಿನ ಮಾರಿ ತಲ್ವಾರನೆ ತಿನಾ ಹತ್ಮಾ ದಿನ ಫರೊಹನನಾ ಹತೊ ತೊಡಾನೆ ದುಕ್ಕಕ್ಹು ಜ಼ಲಮನು ತ್ರಾಸ ಕ್ಹಾಯೆ ನಿಂಗತ ಫರೊಹನ ತೆ ರಾಜಾ಼ನಾ ಕ್ಹಾಮೊ ನೆಳ್ಳಸ. ಮಿ ಬಾಬೆಲನಾ ರಾಜಾ಼ನಾ ಹತೊ ತಾಕತಕ್ಹು ಭರುಸ; ಫರೊಹನನಾ ಹತೊ ಜೊ಼ತ ಪಡಸ; ಮಿ ಮಾರಿ ತಲ್ವಾರ ಬಾಬೆಲನಾ ರಾಜಾ಼ನೆ ದೆತಾಕ್ಹು ತೆ ತಿನೆ ಐಗುಪ್ತ ದೆಶನಾ ಉಪ್ಪರ ಉಚಾವಸ.ತೆಳಾಮಾ ಮಿಜ಼ ಯಹೊವಾ ವ್ಹೈ ಕೈನ ಕ್ಹಾರಾವೊನೆ ಗ್ವತ್ತ ಥಾವಸ. ಮಿ ಐಗುಪ್ತವಾಲಾವೊನೆ ಜನಾಂಗೊಮಾ ಚದರಿನ ದೆಶ ದೆಶನೆ ತುರತಾಮಾ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥಾವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.