Skip to content
BibleKenya

Sikkiligar Bible

ಯಜಕೆಲಾ 22

ಯೆರುಸೆಲಿಮನಾ ಪಾಪೊ

ಯಹೊವಾ ಹಜಿಯಕ್ಕ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ ರಕ್ತಮಯ ಥಯಲ ತೆ ಗಾಮೆ ಫೈಸಲೊ ಕರಾನೆ ತಾರು ಮನಸ ತಯ್ಯಾರ ಛೆಸು, ತಯ್ಯಾರ ಥಯುಸು? ತಿನಾ ಕ್ಹಾರಾ ಕೆಟ್ಟ ಕಾಮೊನೆ ತಿನೆ ತಿಳ್ಸಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತಾರಾ ವಚ್ಮಾ ರಗತನೆ ರಿಚಾ಼ ದಂಡ ದಿವಾನು ಕಾಲ ನಜಿಕ ಲಾಯಲ ಗಾಮ! ತಾರಾ ಕೆಡನಾಹುತಿ ಮೊರ್ತಿಯೊ ಕರಿನ ತುನೆ ಅಶುದ್ದ ಕರಲಿನ ಗಾಮ! ತು ರಿಚಾ಼ಯಲ ರಗತಕ್ಹು ಅಪರಾದಿ ಕರಿಲಿದಲ ಗೊಂಬಿಯೊಕ್ಹು ಹೊಲಸ ಥೈನ ಶಿಕ್ಷಾನೊ ಟೈಮನೆ ನಜಿಕ ಲೈನ ದಂಡನಾ ಕಾಲನೆ ಐಯುಸ; ತಿನಾಹುತಿ ತುನೆ ಜನಾಂಗೊನಾ ದೊಷಣೆನೆ ಘನಾ ದೆಶೊಪರಬಿ ಹಾಸ್ಯನೆ ಗುರಿ ಕರ‍್ಯೊಸ. ಗಲಿಜಿ ವರಿ ಅಪವಿತ್ರ ಥಯಲ ಗಾಮ ತಯ್ಯಾರ ಥಯಲ ನಜಿಕವಾಲಾ ದುರವಾಲಾ ತುನೆ ಅಸಯ್ಯ ಕರಸ. ಹಮ್ನಾ ಇಸ್ರಾಯಲನಾ ಮಾಲಕೊ ತ್ಯುನಾ ತ್ಯುನಾ ಶಕ್ತಿನಾಹುತಿ ತಾರಾಮಾ ರಗತ ರಿಚಾ಼ತಾಜ಼ ಛೆ. ತಾರಾ ಮನಕ್ಹೊ ಮಾ ಬಾಪನೆ ಕಿಳ ಕರ್‍ಯಾಸ, ತಾರಾ ಮನಕ್ಹೊ ಬಿಜಾ಼ ದೆಶವಾಲಾವೊನೆ ತ್ರಾಸ ಕರಾಡ್ಯಾಸ, ತಾರಾ ಮನಕ್ಹೊ ಅನಾಥೊನೆ ರಾಂಡಿಯೊನೆ ತ್ರಾಸ ಕರ್‍ಯಾಸ. ತು ತಾರಾ ಪವಿತ್ರ ಸಾಮ್ನೊನೆ ಅಲಕ್ಷ್ಯ ಕರಿನ ಮಿ ನೆಮಸಲ ಸಬ್ಬತ ದಿನೊನೆ ಹೊಲಸ ಕರ‍್ಯೊಸ. ತಾರಾಮಾನಾ ಚಾಡಾ ಕವಾಲಾ ರಗತ ಚು಼ವಾಯಾಸ; ತಾರಾ ಮನಕ್ಹೊ ಡೊಂಗರೊಪರ ಬಲಿ ದಿದಲ ಅನ್ನ ಕ್ಹಾದ್ಯಾಸ; ತಾರಾ ವಚ್ಮಾ ಕೆಟ್ಟ ಕಾಮೊನೆ ಕರ್‍ಯಾಸ. ತಾರಾಮಾ ಬಾಪನೆ ಬಲಾತ್ಕಾರ ಕರ್‍ಯಾಸ ; ತಾರಾಮಾ ಭಾರಾ ಘಾಲಲ ರ‍್ಹಯಲವಾಲಿಯೊನೆ ಮಳಾಯಾಸ. ತಾರಾಮಾ ಯಕ್ಲೊ ಬಾಜು಼ವಾಲಾನಿ ಬೈಕೊನಾಕ್ಹಾತೆ ಕೆಟ್ಟಕಾಮ ಕರ‍್ಯೊಸ; ಹಜಿಯಕ್ಲೊ ಅತ್ಯಾಚಾರ ಕರಿನ ವ್ಹಾವುನೆ ಕೆಡಸ್ಯೊಸ; ಬಿಜೆಯಕ್ಲೊ ಖಾಸ ಭೆನನೆ ಕೆಡಶ್ಯುಸ ಕರ‍್ಯೊಸ. ತಾರಾ ಮನಕ್ಹೊ ರಗತ ಚು಼ವಾಡಾನೆ ಲಂಚಾ ಲಿದ್ಯಾಸ; ತಾರಾ ಮನಕ್ಹೊ ಸಾಲಾನೆ ಬಡ್ಡಿ ಲಿನ ಫೈದಾನೆ ದೊಕ್ಡಾ ದಿನ ತಿನಾ ಬಾಜು಼ವಾಲಾನೆ ಭಾದಸಿನ ದೊಚಿಲಿನ ಮನೆ ಇಕ್ಹರಿ ಪಡ್ಯಾಸ; ಎ ಕರ್ತಾ ಯಹೊವಾನಿ ವಾತ ವ್ಹೈ. ಹಮ್ನಾ ದೊಚಿಲಿದಲ ಫೈದಾನೆ ತಾರಾ ರಿಚಾ಼ಯಲ ರಗತನೆ ಮಿ ದೆಕಿನ ಹತ್ತ ಮಾರಲಿದ್ಯೊಸ. ಮಿ ತುನೆ ದಂಡ ದಿವಾನಾ ಕಾಲಮಾ ಮನಸನೆ ಘಟ್ಟ ಕರಲಿದ್ಯೊಸು? ಹತೊನೆ ತಾಕತವರ ಕರಲಿದ್ಯೊಸು? ಯಹೊವಾ ಥಯಲ ಮಿ ಎ ಕದ್ಯೊಸ, ಚ಼ಲೌಸ. ಮಿ ತುನೆ ಜನಾಂಗೊಮಾ ಭಿಕ್ಹರೈನ ದೆಶದೆಶೊನೆ ತುರಿನ ತಾರಾ ಹೊಲಸನೆ ತಾರಾಮಾತೊ ಕಾಡಿನ ನಾಶ ಕರುಸ. ಜನಾಂಗೊನಾ ಡೊಳಾನಾ ಕ್ಹಾಮೊ ತಾರಾಕ್ಹು ತುಜ಼ ಅಪರ್ಕಿತಿನೆ ಗುರಿಥಾಸಿ; ಮಿಜ಼ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ.

ಕ್ಹುದಾನು ಭಟ್ಟಿ

ಪಾಚಾ಼ತೊ ಯಹೊವಾ ಎ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ ಇಸ್ರಾಯಲ ವಂಶ ಕವಾನು ಲ್ಹೊಡು ಮಾರಾ ನಜ಼ರಮಾ ಕಲ್ಮಶ ಥಯುಸ; ಭಟ್ಟಿಮಾ ಕ್ಹಾರು ತಾಂಬು , ಪಿತ್ತೊಳ, ಲ್ಹೊಡು, ಸಿಸ, ತೆ ರುಪ್ಪು. ಇಮ್ಮ ರ್‍ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತು ಕ್ಹಾರಾ ಕಸರ ಥಯಲಕ್ಹು ಹಮ್ನಾ, ತುಮೊನೆ ಯರುಸಲೆಮನಾ ಮ್ಹೈ ಮಳೌಸ. ರುಪ್ಪು, ತಾಂಬು, ಲ್ಹೊಡು, ಸಿಸ, ಪಿತ್ತೊಳ ಎ ಕ್ಹಾರಾವೊನೆ ಭಟ್ಟಿಮಾ ಮಳೈನ ಫುಕ್ಕಿನ ಆಗ ಲಗಾಡಿನ ಕರಗಾವಾ ನಿಂಗತ ಮಿ ತುಮೊನೆ ಮಾರಾ ಘನ್ನಿ ಶಿಟ್ಟಮಾ ಮಳೈನ ಮ್ಹೆಲಿನ ಕರಗೌಸ. ಹೊ ಮಿ ತುಮೊನೆ ಮಾರಾ ಶಿಟ್ಟನಿ ಆಗಮಾ ಮಳೈನ ಫುಕ್ಕಾನೆ ತುಮೆ ತಿಮಾ ಕರಗೈ ಜಾ಼ವೊಸಿ. ರುಪ್ಪು ಭಟ್ಟಿಮಾ ಕರಗಾವಾ ನಿಂಗತ ತುಮೆ ಮಾರಿ ಶಿಟ್ಟನಿ ಆಗಮಾ ಕರಗೊಸಿ; ತುಮೊಪರ ಶಿಟ್ಟನಿ ಆಗನೆ ರಿಚಾ಼ಯಲವಾಲೊ ಯಹೊವಾ ಥಯಲ ಮಿಜ಼ ವ್ಹೈ ಕೈನ ತುಮೊನೆ ಗೊತ್ತ ಥಾವಸ.

ಇಸ್ರಾಯೆಲನ ಮ್ಹೊಟಾ ಮನಕ್ಹೊನು ಪಾಪ

ಯಹೊವಾ ಎ ವಾಕ್ಯಾ ಮನೆ ದಿದ್ಯೊ. ಮನಕ್ಹನಾ ದಿಕ್ರಾ, ತೆ ರಾಜ್ಯನೆ ಇಮ್ಮ ಕೆ ಕ್ಹುದಾನಾ ಶಿಟ್ಟನಾ ಆ ದಿನಮಾ ತು ಶುದ್ದ ನೈ ಥಯಲ ದೆಶ, ಪಾನಿನೈಸೊ ದೆಶ. ತೆ ರಾಜ್ಯಮಾ ಪ್ರವಾದಿಯೊ ಮ್ಹೈನಾ ಮ್ಹೈ ಬೊಲಿದ್ಯಾಸ. ಬೆಟೆನೆ ಚಿರತಾ ಗರ್ಜನೆ ಕರಾನಾ ಸಿಂಹಾಡಾ ನಿಂಗತ ಛೆ, ನರನಾ ಪ್ರಾಣಿಯೊ ಗಳ್ಯಾಸ, ಆಸ್ತಿನೆ ಚೊ಼ಕಾ ಸಾಮ್ನೊನೆ ದೊಚಿಲಿದ್ಯಾಸ; ದೆಶಮಾ ಘನಾ ಮನಕ್ಹೊನೆ ರಾಂಡಿಯೊ ನಿಂಗತ ಕರ್‍ಯಾಸ. ತ್ಯಾನಾ ಯಾಜಕೊ ಮಾರಾ ವಿದಿಯೊನೆ ಭಂಗ ಕರ್‍ಯಾಸ ಮಾರಾ ಪರಿಶುದ್ದ ಸಾಮ್ನೊನೆ ಹೊಲಸ ಕರ್‍ಯಾಸ; ಮಿಸಾನಾಹುತಿ ಮಿಸಲಕ್ಹು ಭೆದ ಥಯು ನೈ, ಶುದ್ದ ರ‍್ಹಯಲ ವಿಚಾರೊನೆ ಬೊದನೆ ಕರ‍್ಯಾ ನೈ; ಮಿ ನೆಮ್ಸಲ ಸಬ್ಬತ ದಿನೊನೆ ವಿಮುಖ ಥಯಾಸ; ಇನಾಕ್ಹು ಮಿ ತ್ಯುನಾ ವಚ್ಮಾ ಅಪಕಿರ್ತಿನೆ ಗುರಿ ಥಯಾಸ. ತ್ಯಾನಾ ಪ್ರಧಾನೊ ಸುಲಿಗೆನಾಹುತಿ ರಗತ ಚು಼ವಾನು ನರನಾ ಪ್ರಾಣಿಯೊನೆ ಗಳಾಲಾ ಥೈನ ಬೆಟೆನೆ ಚಿರಾಲಾ ತೊಳಾ ನಿಂಗತ ಛೆ. ತ್ಯಾನಾ ಪ್ರವಾದಿಯೊ ಇವ್ನಾಹುತಿ ಮಿಥ್ಯಾನಾ ದರ್ಶನೆ ಸುಳ್ಳ ಕಣಿನೆ ಯಹೊವಾ ಬೊಲ್ಯಾವಾಚಿ಼ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಕೈನ ಕತೊ ಉಪ್ಪರ-ಉಪ್ಪರ ಚು಼ನ್ನೊ ಲಗಾಡ್ಯಾಸ. ಸಾದಾ ಮನಕ್ಹೊ ಹಿಮ್ಸಾ ಕರಿನ ಸೊರೆ ಕರ್‍ಯಾಸ, ದಿನ ದರಿದ್ರೊನೆ ಭಾದಸಿನ ಬಿಜಾ಼ ದೆಶೊನೆ ಅನ್ಯಾಯ ಥೈನ ಅರದಿನ ಛೊಡ್ಯಾಸ. ಮಿ ದೆಶ ಹಾಳ ಕರಾಕ್ಹು ಮಾರಾ ಕ್ಹಾಮಾ ದೆಶನಾ ರಕ್ಷಣೆನಾಹುತಿ ಪೌಳಿನಾ ಒಡಕಿಮಾ ಹುಬ್ರ್ಯಾವಾನಾಹುತಿ ಗೊಡಿನೆ ಘಟ್ಟ ಕರಲಿವಾನಾಹುತಿ ತಿನಾ ತಕ್ಕವಾಲಾನೆ ಮಿ ಹುಡ್ಕಾನೆ ಕುನ್ನಜ಼ ಮಳ್ಯು ನೈ. ತಿನಾಹುತಿ ಮಿ ಮಾರಾ ಶಿಟ್ಟನೆ ತ್ಯುನಾ ಉಪ್ಪರ ರಿಚೈನ ಮಾರಿ ಶಿಟ್ಟನಿ ಆಗಕ್ಹು ತ್ಯುನೊನೆ ದ್ವಂಸ ಕರಿನ ತ್ಯುನಿ ಕೆಟ್ಟ ವಾಟನೆ ತ್ಯುನಾ ಮಾತೆ ಭಾಂದ್ಯೊಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.