Sikkiligar Bible
ಯಜಕೆಲಾ 23
ಪಾಪಿ ಭೆನೊ
ಯಹೊವಾ ವರಿಯಕ್ಕ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ, ಯಕ್ಕ ‘ಮಾನಾ ಬಚ್ಚಾ ಥಯಲ ಬೆ ದಿಕ್ರಿಯೊ ವ್ಹತ್ತಾ; ತ್ಯುನೆ ಐಗುಪ್ತಮಾ ಸುಳೆತನಾ ಕರಾಡಾತಾ, ನ್ಹಾನಪಂತಮಾ ಸುಳೆಯೊ ಥೈನ ಚಾ಼ಲಾಡಾತಾ; ತ್ಯಾ ತ್ಯುನಾ ಸ್ತನೊ ಚಿಕಲ್ಯಾ, ಎಳೆನಾ ತೊಟ್ಟವೊ ನಸುಕ್ಯಾ. ತ್ಯುನಾ ನಾಮೊ ಸುವೈ ಕದ್ಯಾರೆ, ಒಹೊಲ ಕವಾನು ಮ್ಹೊಟಿ ಭೆನು ವ್ಹೈ ಒಹೊಲಿಬ ಕವಾನು ನ್ಹಾನಿ ಬ್ಹೆನು ವ್ಹೈ; ತ್ಯುನೆ ಮಾರಾ ಬೈಕೊವೊ ಥೈನ ಗಂಡ ಬಚ್ಚಾವೊನೆ ಜ಼ನ್ನ್ಯಾ. ಒಹೊಲ ಕವಾನು ಸಮಾರ್ಯನೆ, ಒಹೊಲಿಬ ಕವಾನು ಯರುಸಲೆಮನೆ ಸುಚನೆ ಕರಾನಾ ನಾಮೊ ಥಯಾಸ. ಒಹೊಲ ಮಾರಿ ಬೈಕೊ ಥೈತಬಿ ಸುಳಿಥೈನ ಚಾ಼ಲಿನ ತಿನಾ ಮಿಂಡಾವೊನೆ ಕದ್ಯಾಮ ಅಸ್ಸಿರಿಯಾವಾಲಾ ಯೊದೊ ನಿಲಾಂಬರೊ ನಾಯಕೊ ಶಿಟ್ಟನಾ ನಾಯಕೊ ಕುನಬಿ ಚುಕ್ಯಾವಾಚಿ ಮನೊಹರನಾ ಜಾ಼ಂಜಿಮಾನೊ ಥಯಲ ಅಶ್ಶುರ್ಯರೊನೆ ಮೊಹಿಸಿನ ತ್ಯುನೊನೆ ತಿನೆ ಸುಳಿ ಥೈನ ಒಪ್ಪಸಿ; ತ್ಯುನೆ ಕ್ಹಾರಾ ಅಶ್ಶುರ್ಯರಮಾ ಚೊ಼ಕಾ ಘನಾ ಚೊ಼ಕಾ ವ್ಹೈ; ತೆ ಕಿನೆ ಮೊಹಿಸಿತೊ ತ್ಯುನಾ ವಿಗ್ರಹೊಕ್ಹೊ ತಿನೆ ಹೊಲಸ ಕರಲಿದಿ. ತೆ ಐಗುಪ್ತತಿಬಿ ತಿನಿ ಸುಳೆತನಾನೆ ಛೊಡಿ ನೈ; ತಿನಾ ನ್ಹಾನಪಂತಮಾಜ಼ ತ್ಯಾನಾ ಮನಕ್ಹೊ ತಿನಾಕ್ಹಾತೆ ಕ್ಹುರೈನ ತಿನಾ ಎಳೆನಾ ತೊಟ್ಟೊನೆ ನಸುಕಿನ ತಿನಾಕ್ಹಾತೆ ಸುಳೆಗಾರಿಕೆನೆ ಹೆಚ್ಚ-ಹೆಚ್ಚ ಕರ್ಯಾ. ತಿನಾಹುತಿ ಮಿ ತಿನೆ ತಿನಾ ಮಿಂಡಾವೊನಾ ಹತೆ ಕದ್ಯಾಮ ತೆ ಮೊಹಿಸೆಲ ಅಶ್ಶುರ್ಯರನಾ ಹತೆ ಒಪ್ಸಾಯೊ. ಇವ್ನೆ ತಿನೆ ಕೆಡ್ಸಿನ ತಿನಾ ಗಂಡ ಹೆಣ್ಣ ಬಚ್ಚಾವೊನೆ ಉಚೈಲಿನ ಗೈನ ತಿನೆ ತಲ್ವಾರಕ್ಹು ಕ್ಹಲಾಸ ಕರ್ಯಾ. ಇವ್ನೆ ತಿನೆ ದಂಡ ದಿದಲಕ್ಹು ಬಾಕ್ಡಿಯೊಮಾ ತಿನೆ ಕೆಟ್ಟ ನಾಮ ಐಯು. ತಿನಿ ಭೆನ ಥಯಲ ಒಹೊಲಿಬನೆ ಎ ದೆಕಿನಬಿ ತಿನಾತಿಬಿ ಅದಿಕ ಥೈನ ಮೊಹ ಥೈನ ಮ್ಹೊಟಿ ಭೆನಾ ಸುಳಿತನಾತಿಬಿ ಹೆಚ್ಚ ಸುಳೆತನಾ ಕರಿನ ತಿನೆ ಮಿರಿ ಘನಿ ಕೆಟ್ಟ ಥಯಿ. ಎ ನಾಯಶಿಟ್ಟನಾ ನಾಯಕೊ ಯೊದೊ ವಿಚಿತ್ರವಾಲಾ ಅಶ್ವಾರುಢೊ ಕುನಬಿ ತಪ್ಪೆವಾಚಿಮನೊಹನಾ ಜಾ಼ಂಜಿಮಾನೊ ಥಯಲ ಅಶ್ಶುರ್ಯರೊನೆ ಮೊಹಿಸಿ. ತೆ ಹೊಲಸಥೈನ ಗಯಲನೆ ದೆಕ್ಯೊ, ಭಂಬೆಜ಼ನಾ ಯಕ್ಕಜ಼ ವಾಟೆ ಧರ್ಯಾ. ಎ ತಿನಾ ಸುಳೆತನಾನೆ ಹಜಿ಼ ಹೆಚ್ಚ ಕರಿ; ಹಮ್ನಾ , ಕಸ್ದಿಯೊನಾ ಚಿತ್ರಾವೊ ಕದ್ಯಾಮ ಗೊಡಿಪರ ಕಿರಮಂಜಿಕ್ಹು ಚಿತ್ರಾ ಪಾಡಾನು ದೆಕಲ್ಪರ ಕಂಬರನೆ ಪಟ್ಟಾನೆ ಭಾಂದಿನ ಮಾತಾನೆ ಚು಼ಂಗನಾ ಟುವಾಲನೆ ಭಾಂದಿನ ಕುನಬಿ ಚು಼ಕ್ಯಾವಾಚಿ ನಜ಼ರನೆ ಸರದಾರೊ ನಿಂಗತ ರ್ಹೈನ ತ್ಯುನಿ ಹುಟ್ಟಲ ಜಿಮಿನ ಥಯಲ ಬಾಬೆಲನಾ ಥೈನ ದಿಕ್ಹಿನ ಆಯಲ ಮನಕ್ಹೊನು ಆಕಾರ. ಎ ಮೊಹಥೈನ ಕಸ್ದಿಯ ದೆಶನೆ ತೆ ಮನಕ್ಹೊಕನ ಸುದ್ದಿ ಕವಾಲಾನೆ ವಳಾಯೊ. ತೆಳಾಮಾ ಬಾಬೆಲೆವಾಲಾ ಇನಾ ರತಿಮಂಚ಼ಪರ ಚ಼ಡಿನ ತ್ಯುನಾ ಸುಳೆಗಾರಿಕೆಕ್ಹು ಇನೆ ಕೆಡಸ್ಯಾ; ಎ ತ್ಯುನಾಕ್ಹು ಹೊಲಸ ಥಾವಾನೆ ಇನಿ ಆಸ ತ್ಯುನಾಕ್ಹು ಗೈ. ಎ ಮುಚ್ಚಮರೆಮಾ ಸುಳಿತನಾ ಕರಿನ ತಿನಿ ಇಜ್ಜತನೆ ಕೆಡಸಿಲೆತಾಮಾ ಮಾರು ಅನುರಾಗಬಿ ಪೈಲಾ ಇನಾ ಮ್ಹೊಟಿ ಭೆನಕ್ಹು ಅಗಲಿದ ನಿಂಗತ ಇನಾಕ್ಹುಬಿ ಅಗಲ್ಯುಸ. ತೆ ರ್ಹೈತಬಿ ತೆ ಐಗುಪ್ತಮಾ ಸುಳಿ ಥಯಲ ತಿನಾ ಎಳೆ ಪ್ರಾಯನೆ ಸ್ಹೆಂ ಕರಲಿನ ತಿನಾ ಸುಳಿತನಾನೆ ಹಜು಼ ಹೆಚ್ಕಿ ಕರಿನ ಗದ್ಡಾವೊ ನಿಂಗತ ಬೆದವಾಲಾ ಘೊಡಾವಿ ನಿಂಗತ ದಾಟಸ. ತೆನೈಸೊ ಕಸ್ದಿಯೊನಾ ಮಿಂಡಾವೊನೆ ಮೊಹಿಸಿ. ಒಹೊಲಿಬ ತಾರಾ ನ್ಹಾನಾ ಸ್ತನೊನೆ ಆಶಪಡಲ ಐಗುಪ್ತೊಕ್ಹು ತೊಟ್ಟುವೊನೆ ನಸುಕಿಲಿದಲ ತಾರಾ ಎಳೆ ಪ್ರಾಯನಾ ಕಾಮನೆ ತು ಸ್ಹೆಂನೆ ಲೈನ ತೆ ಮಿಂಡಾವೊನೆ ಮೊಹಿಸಿಸ್ತೊ.
ನ್ಹಾನಿ ಭೆನನೆ ಕ್ಹುದಾನಿ ಫೈಸಲೊ
ಇಮ್ಮ ರ್ಹತಾಮಾ ಒಹೊಲಿಬ ಕರ್ತಾ ಥಯಲ ಯಹೊವಾ ಅಮ್ಮ ಕವಸ. ಆಹಾ ಕಯಾ ಮಿಂಡಾವೊಕ್ಹು ತಾರಿ ಆಸ ಕ್ಹರಿ ತೆ ಮಿಂಡಾವೊನೆ ಕದ್ಯಾಮ ಚೊ಼ಕಾ ಜಾ಼ಂಜಿಮಾನೊ ಕುನಬಿ ಚು಼ಕ್ಯಾವಾಚಿ ನಾಯಕೊ ಉಪ ನಾಯಕೊ ಪ್ರಭು ಪ್ರದಾನೊ ಅಶ್ವಾರುಡೊ ಬಾಬೆಲೊನವಾಲಾ ಕ್ಹಾರಾ ಕಸ್ದಿವಾಲಾ, ಪೆಕೊದಿನವಾಲಾ, ಷೊಯವಾಲಾ, ಕೊಯವಾಲಾ, ಇವ್ನೊನೆ ಇವ್ನಾಕ್ಹಾತೆ, ಕ್ಹಾರಾ ಅಶ್ಶುರ್ಯರೊನೆ ಮಿ ತುನೆ ವಿರುದ್ದ ಥೈನ ಉಟಾಡಿನ ಕ್ಹಾರಿ ಜ಼ಗಾತಾ ತಾರಾ ಉಪ್ಪರ ಪಡಾ ವರಕ್ಹು ಕರುಸ. ತ್ಯುನಾ ಆಯುದೊ ರಥ, ಗಾಡಿ, ಜನಾಂಗೊನು ಸಮೂಹ ಇವ್ನಾಕ್ಹಾತೆ ತಾರಾ ಉಪ್ಪರ ಪಡಸ; ಗುರಾಣಿ, ಖೆಡ್ಯ, ಶಿರಸ್ತ್ರಾಣ, ಎ ಕ್ಹಾರು ಘಾಲಿನ ತುನೆ ವಿರುದ್ದ ಥೈನ ಸುತ್ತೆಬಿ ವ್ಯುಹ ಭಾಂದಸ; ಫೈಸಲೊ ಕರಾನು ಅದಿಕಾರನೆ ಮಿ ತ್ಯುನೊನೆ ವಪ್ಸಾವಾನೆ ತ್ಯುನೆ ತ್ಯುನಾ ಪೈಸಲಾನಾ ನಿಂಗತ ಪೈಸಲೊ ಕರಿನ ತುನೆ ತ್ಯುನೆ ದಂಡ ದಿವಸ. ಮಿ ಮಾರಿ ಶಿಟ್ಟನೆ ತಾರಾ ಉಪ್ಪರ ರಿಚಾ಼ವಾನೆ ತ್ಯುನಾ ತಾರಾಮಾ ಶಿಟ್ಟ ಕಾಳ್ಳಿವಸ; ತಾರಾ ನಾಕ ವರಿ ಕಾನೊನೆ ಕಿತ್ತಿ ಪಡಸ; ತಾರಾಮಾ ಉಗ್ರಲವಾಲಾ ತಲ್ವಾರನೆ ಬೊಂದೊ ಥಾವಸ; ತಾರಾ ಗಂಡ ವರಿ ಹೆಣ್ಣ ಬಚ್ಚಾವೊನೆ ಅಪಹರಿಸಸ; ತಾರಾ ಮನಕ್ಹೊನಿ ಶೆಷ ಆಗನೆ ಅಹುತಿ ಥಾವಸ. ತಾರಾ ವಣ್ಣಾವೊನೆ ಯಳದಿನ ತಾರಾ ಚಂದ ರ್ಹಯಲ ಕ್ಹೊನಾನಾ ಸಾಮ್ನೊನೆ ಕಾಡಿಪಡಸ. ಇಮ್ಮ ಮಿ ತಾರು ಪುಂಡಾಟನೆ ತು ಐಗುಪ್ತತಿ ಚಾ಼ಲಿನ ಆಯಲ ತಾರಾ ಸುಳೆತನಾನೆ ತಾರಾತೊ ಕಾಡುಸ; ಪಾಚಾ಼ತೊ ತು ತ್ಯುನೊಕನ ಹಜಿ಼ ಡೊಳೊ ಉಚಾಯೆವಾಚಿ ಐಗುಪ್ತನೆ ಸ್ಹೆಂನೆ ಲಾಯೆವಾಚಿ಼ ರ್ಹಸಿ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಹಮ್ನಾ ತು ಕಿನೆ ಹಗೆ ಕರಸಿತೊ ತಾರಿ ಆಸ ಕಿನಾಕ್ಹು ಪಾಚಿ ಫರಿ ತ್ಯುನಾ ಹತೆ ತುನೆ ಮಿ ವಪ್ಸಾವಾನೆ ತ್ಯುನೆ ತಾರಾಮಾ ಹಗೆ ತಿರಸಿಲಿನ ತು ರಾಬಲ ಕ್ಹಾರು ಅಪಹರಸಿನ ತುನೆ ಬಟ್ಟ ಬರಿದ ಕರಿನ ಛೊಡಿ ಪಡಸ; ಇಮ್ಮ ಸರಮ ಇಡ ಥಯಲ ತಾರಿ ಸುಳಿತನಾ ವ್ಹೈ, ತಾರು ಪುಂಡಾಟಬಿ ಸುಳೆತನಾ ಬೈಲಿನೆ ಆವಸ. ತೆ ತ್ರಾಸೊಕ್ಹು ತುನೆ ಅನುಭವ ಥಾವಾನಾಹುತಿ ತು ಜನಾಂಗೊನೆ ಮೊಹಿಸಿನ ತ್ಯುನಾ ಗೊಂಬಿಯೊಕ್ಹು ತುನೆ ಹೊಲಸ ಕರಲಿದಿಸ ಕಾರಣ. ತು ತಾರಾ ಭೆನಾ ವಾಟಮಾ ಚಾ಼ಲಲಕ್ಹು ತೆ ಪಿದಲ ಫೈಸಲಾನಿ ಪಾತ್ರೆ ತಾರಾ ಹತ್ಮಾ ದ್ಯುಸ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಉಂಡಾ ರುಂದ ಘನು ಧರಸ ಥಯಲ ತರಾ ಭೆನಾ ಸಾಮನಮಾ ತು ಪಿದಲ ಹಾಸ್ಯನೆಬಿ ಕುಚೊದ್ಯನೆ ಗುರಿ ಥಾಸಿ ಸಮಾರ್ಯ ಥಯಲ ತಾರಾ ಭೆನ ಪಿದಲ ನಿಶಾಮ ಬೆಚ್ಚುಬೆರಗಿನ ಥಾಳಾಮಾ ತು ಪಿನ-ಪಿನ ಪೂರಾ ನಶಾಥೈನ ದುಕ್ಕ ಭರಲವಾಲಿ ಥಾಸಿ ತಿಮಾ ಯಕ್ಕ ಗುಟುಕ ಛೊಡ್ಯಾವಾಚಿ ಪಿನ ತಿನಾ ಬೊಕಿಯೊನೆ ಕಡ್ಡಿನ ಚಾ಼ಟಿನ ತಾರಾ ಸ್ತನೊನೆ ಬಗಿದಿ ಲೆಸಿ; ಎ ಮಾರಿ ಆಗನ್ಯಾ ಕವಾನಿ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಇಮ್ಮ ರ್ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತು ಮನೆ ಪಿಟ್ಟ ಪಾಚೊ಼ ಭಿರಕೈನ ಇಕ್ಹರಲಕ್ಹು ತಾರಾ ಪುಂಡಾಟನಾ ವರಿ ಸುಳಿತನಾನಾ ಫಲನೆ ತು ಅನುಭವಿಸು.
ಭಂಬಿ ಭೆನೊನೆ ಥಯಲ ಶಿಕ್ಷಾ
ವರಿ ಯಹೊವಾ ಮನೆ ಅಮ್ಮ ಕದ್ಯೊ ಮನಕ್ಹನಾ ದಿಕ್ರಾ ಒಹೊಲನೆಬಿ ಒಹೊಲಿಬನೆಬಿ ಫೈಸಲೊ ಕರಾನೆ ತಾರು ಮನಸ ಸಿದ್ದ ಛೆಸು? ತಿನಾ ಕೆಟ್ಟ ವಿಚಾರೊನೆ ತ್ಯುನೊನೆ ತಿಳ್ಸಾ. ತ್ಯುನೆ ವ್ಯಬಿಚಾರ ಕರಾಲಾ ವ್ಹೈ, ತ್ಯುನೊ ಹತ್ತ ರಗತ ಥಯೊಸ, ತ್ಯುನಾ ಗೊಂಬಿಯೊಕ್ಹು ವ್ಯಬಿಚಾರ ಕರ್ಯಾಸ, ಮನೆ ಹುಟ್ಟಲ ತಾಮಾರಾ ಗಂಡ ಬಚ್ಚಾವೊನೆ ತೆ ಗೊಂಬಿಯೊನೆ ಬಲಿಥೈನ ಆಹುತಿ ದಿದ್ಯಾಸ. ಎ ನೈಸೊ ಮನೆ ಎ ಅಪರಾಧನೆ ಕರ್ಯಾಸ; ಆಹುತಿ ದಿದಲ ದಿನ್ನಮಾ ಮಾರಾ ಪವಿತ್ರ ಆಲಯನೆ ಅಪವಿತ್ರ ಕರಿನ ಮಿ ನೆಮಸಲ ಸಬ್ಬತ ದಿನನೆ ಹೊಲಸ ಕರ್ಯಾಸ. ತ್ಯುನಾ ಬಚ್ಚಾವೊನೆ ಕ್ಹಲಾಸ ಕರಿನ ತ್ಯುನಾ ಗೊಂಬಿಯೊಕ್ಹು ಅರ್ಪಿಸಲ ದಿನಮಾ ಮಾರಾ ಪವಿತ್ರ ಆಲಯಮಾ ಸೆರಿನ ಹೊಲಸ ಕರ್ಯಾಸ; ಹಮ್ನಾ ಮಾರಾ ಗುಡಿನಾ ವಚ್ಮಾ ಎ ಕ್ಹಾರು ಕರ್ಯಾ. ತೆಕ್ಲು ನೈಸೊ ಸುದ್ದಿ ಕವಾಲಾನೆ ವಳೈನ ದಣ್ಗಾವೊನೆ ದುರತಾ ಬಲೈಲಿದ್ಯಾ; ಹಮ್ನಾ ತ್ಯುನೆ ಆಯಾ; ಎ ಬಾಕ್ಡಿ, ತ್ಯುನಾಹುತಿ ತು ಅಂಗ ಧ್ವಲಿನ ಡೊಳೆ ಅಂಜೊ಼ನ ಲಗಾಳಿನ ತುನೆ ಕ್ಹೊನಾನಾ ಸಮ್ನೊಕ್ಹು ತಯ್ಯಾರ ಕರಲಿನ ವೈಭವನಾ ಪಲಂಗಾನಾ ಉಪ್ಪರ ಬೈಟಲ; ತಿನಾ ಕ್ಹಾಮು ಕ್ಹಾವಾನೆ ತಯ್ಯಾರ ಥಯಲ ಟೆಬಲಪರ ಮಾರಾ ಬಾಸನಾ ತೆಲೊನೆ ಮ್ಹೆಲಿಸ. ತ್ಯಾ ಕ್ಹುಸಿ ಥಾವಾಲಾ ಮ್ಹೊಟಾ ಗುಂಪನಾ ಕಳಕಳ ಥಯು; ರಾನಮಾತು ಮಂಗೈಲಿನ ಪಿದ್ಯಾ ರಾಜ್ಯವೊನಾ ಕ್ಹಾತೆ ಮಳಿನ ತೆ ಭಂಬಿಜ಼ನಾ ಹತ್ಮಾ ಕಡಾವೊನೆ ಘಾಲಿನ ತ್ಯುನಾ ಮಾತಾನೆ ಸುಂದರ ಕಿರಿಟನೆ ಮ್ಹೆಲ್ಯಾ. ತೆಳಾಮಾ ಮಿ ಕಳಾ ನೈ ರ್ಹಯಲವಾಲಿನೆ ಹಜಿ ವ್ಯಬಿಚಾರ ವ್ಹೈಸು! ಇವ್ನೆ ತಿನಾಕ್ಹಾತೆ ತೆ ಇವ್ನಾಕ್ಹಾತೆ ಜಾರತನಾ ಕರಸತೊ ಕೈ ಕೈಲಿದ್ಯಾ. ಸುಳಿನೆ ಸೆರಾನಾನಿಂಗತ ಎ ಮನಕ್ಹೊ ತಿನೆ ಸೆರ್ಯಾ; ಹೊ, ಕೆಟ್ಟ ಬಾಕ್ಡಿಯೊ ಥಯಲ ಒಹೊಲನೆ ಒಹೊಲಿಬನೆ ಸೆರ್ಯಾ. ಸದ್ದರ್ಮಿಯೊ ತ್ಯುನೊನೆ ಫೈಸಲೊ ಕರಿನ ವ್ಯಬಿಚಾರಿಯೊನೆ ರಗತ ಚು಼ವಾಲಾ ಬಾಕ್ಡಿಯೊನೆ ತಕ್ಕ ದಂಡನೆ ತ್ಯುನೊನೆ ದಿವಸ; ತ್ಯುನೆ ವ್ಯಬಿಚಾರ ಕರಾಲಾ ವ್ಹೈ, ತ್ಯುನೊ ಹತ್ತ ರಗತ ಥಯೊಸ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಿ ಆಂ ಬಾಕ್ಡಯೊನಾ ದಂಡನಾಹುತಿ ಪಂಚಾತಿ ಮಳೈನ ತ್ಯುನೊನೆ ಸೊರೆಮಾ ಕ್ಹಾಪಡೈನ ಕ್ಹಾರಾವೊನೆ ಭಯಾಸ್ಪದ ಥಾವಾನಿಂಗತ ಕರುಸ. ಸಬೆವಾಲಾ ಇವ್ನಾ ಉಪ್ಪರ ದಗ್ಡಾ ಭಿರಕೈನ ತಲ್ವಾರೊಕ್ಹು ಇನೊನೆ ಕ್ಹಲಾಸ ಕರಿನ ಇವ್ನಾ ಗಂಡ ಹೆಣ್ಣ ಬಚ್ಚಾವೊನೆ ಮಾರಿನ ಇವ್ನಾ ಘರೊ ಆಗಕ್ಹು ಬಾಳಿಪಡಸ. ಇಮ್ಮ ಮಿ ದೆಶೊಮಾತೊ ಪುಂಡಾಟನೆ ಕಾಡುಸ; ಇನಾಕ್ಹು ಕ್ಹಾರಾ ಬಾಕ್ಡಿಯೊನೆ ತುಮಾರಾ ಪುಂಡಾಟನೆ ಅನುಸರಿಸು ನೈಕೈನ ಗ್ಯಾನ ಆವಸ. ತುಮಾರಾ ಪುಂಡಾಟನೆ ಫಲನೆ ತುಮೊನೆ ಕ್ಹಲಾವಸ; ತುಮಾರಾ ಗೊಂಬಿಯೊಕ್ಹು ಥಯಲ ತುಮಾರಾ ಪಾಪೊನೆ ತುಮೆ ಅನುಭವಿಸಿನ ಮಿಜ಼ ಕರ್ತಾ ಥಯಲ ಯಹೊವಾ ವ್ಹೈ ಕೈನ ತಿಳದಿ ಲಿವೊಸಿ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.