Skip to content
BibleKenya

Sikkiligar Bible

ಯಜಕೆಲಾ 21

ಕ್ಹುದಾನು ಫೈಸಲೊ

ಯಹೊವಾ ಎ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ, ಯರುಸಲೆಮಕನ ಮ್ಹೊಡು ಕರಿನ ತ್ಯಾನಾ ಪವಿತ್ರ ಜ಼ಗಾವೊಕನ ಬೊಲ್ತೊ ಇಸ್ರಾಯಲ ದೆಶನಾ ಪ್ರವಾದನ ಉಚೈನ ತೆ ದೆಶನೆ ಇಮ್ಮ ತಿಳಸೈನ ಕೆ ಯಹೊವಾ ಇಮ್ಮ ಕವಸ ಆಹಾ ಮಿ ತುನೆ ವಿರುದ್ದ ಥಯೊಸ, ಮಾರಾ ತಲ್ವಾರನೆ ಮ್ಯಾನಮಾತೊ ಕಾಡಿನ ತಾರಾಮಾನಾ ಶಿಷ್ಟೊನೆ ವರಿ ದುಷ್ಟೊನೆ ಕ್ಹಲಾಸ ಕರಿ ಪಡುಸ. ಮಿ ತಾರಾಮಾನಾ ಶಿಷ್ಟೊನೆ ವರಿ ದುಷ್ಟೊನೆ ಕ್ಹಲಾಸ ಕರಾನಾಹುತಿ ಮಾರಿ ತಲ್ವಾರ ಮ್ಯಾನಮಾತು ಐನ ದಕ್ಷಿಣತು ಉತ್ತರಲಕ್ಕಾ ಕ್ಹಾರಾ ಮನಕ್ಹೊನಾ ಉಪ್ಪರ ಪಡಸ; ಮಿಜ಼ ಯಹೊವಾ ವ್ಹೈ ಕೈನ ತಲ್ವಾರ ಕಾಡ್ಯೊಸ ಕೈನ ತೆಳಾಮಾ ಮನಕ್ಹೊನೆ ಗೊತ್ತ ಥಾವಸ; ತೆ ವರಿ ಮ್ಯಾನಮಾ ನೈ ಜಾ಼ತು. ಮನಕ್ಹನಾ ದಿಕ್ರಾ ಮೊರೆ ಮ್ಹೆಲ; ಕಂಬರ ತುಟಲನಿಂಗತ ದುಕ್ಕಕ್ಹು ಮನಕ್ಹೊನಾ ಕ್ಹಾಮೊ ನೆಳ್ಳ. ಕಾ ನಳ್ಳಾಡೊಸ ಕೈನ ತ್ಯುನೆ ತುನೆ ಪುಚ್ಚತ್ತಾಮಾ ತು ತ್ಯುನೊನೆ ಕೆಟ್ಟ ಸುದ್ದಿನಾ ಹುತಿ ನೆಳ್ಳುಸ; ಹಮ್ನಾ ತ್ರಾಸ ಐಯು: ಕ್ಹಾರಾವೊನಾ ಮನಸೊ ಕರಗಿನ ಪಾನಿ ಥಾವಸ; ಕ್ಹಾರಾವೊನಾ ಹತೊ ಜೊತ ಪಡಸ, ಕ್ಹಾರಾವೊನು ಮನಸ ಕುಂದಸ, ಕ್ಹಾರಾವೊನಾ ಗುಡ್ಗಾ ಕಮ್ಜೊ಼ರ ಥಾವಸ; ಹಮ್ನಾ ಐಯು, ಥಯು, ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ ಕೈನ ಜವಾಬ ದೆ.

ಪಾಚಾ಼ತೊ ಯಹೊವಾ ಆಂ ವಾಕ್ಯಾ ಮನೆ ದಿದ್ಯೊ , ಮನಕ್ಹನಾ ದಿಕ್ರಾ; ಕರ್ತಾ ಇಮ್ಮ ಕವಸ ಕವಾನು ಕೈನ ಇಮ್ಮ ಕೆ ಆಹಾ ತಲ್ವಾರ ಸಾಣ ಧರಲ ಧಾರ ತಲ್ವಾರ, ಛೆ .

ಕ್ಹಲಾಸ ಕರಾನಾ ನಿಂಗತ ಚುಪ ಛೆ ಚಮ್ಕಾ ನಿಂಗತ ತಿಕ್ಕಲ ಛೆ. ಹಮಾರಾ ಕುಮಾರನಾ ರಾಜ಼ನು ದಂಡ ಉಗ್ರಲ ಕ್ಹಾರಾ ದಂಡೊನೆ ಇನ್ಕಾರ ಕರಸತೊ ಕವಾನು ಹಮೆ ಸಂಬ್ರಹ ಪಡಿಯೆಸ? ತಲ್ವಾರ ಹತ್ಮಾ ತಯ್ಯಾರ ಥಾವಾನೆ ತಿಕ್ಕನೆ ದಿದ್ಯಾಸ, ಘಾತಕನಾ ಹತೆ ಇಡಥಾವಾ ಅಕ್ಲು ಧಾರ ರ‍್ಹಯಲ ತಿಕ್ಕಲ ಛೆ. ಎ ಮನಕ್ಹನಾ ದಿಕ್ರಾ ವದರ, ಗೊಳಾಡ! ತಲ್ವಾರ ಮಾರಾ ಮನಕ್ಹೊಪರಬಿ ಇಸ್ರಾಯಲನಾ ಕ್ಹಾರಾ ಶಾನಾವೊಪರ ಉಪ್ಪರ ಪಡ್ಯುಸ; ಮಾರಾ ಮನಕ್ಹೊನಾಕ್ಹಾತೆ ತಲ್ವಾನೆ ಬೊಂದೊ ಥಾವಾಸ: ಛಾತಿ ಬಡೈಲಿವಸ. ಕರ್ತಾ ಥಯಲ ಯಹೊವಾ ಇಮ್ಮ ಕವಸ ಶೊಧನೆ ಅನುಭವ ಥಯು; ಇನ್ಕಾರ ಕರಲ ರಾಜ಼ನಾ ಲಾಕಡಿ ನಾಶ ಥಯಾರೆ ಗತಿ ಸುವೈ?

ಮನಕ್ಹನಾ ದಿಕ್ರಾ ತು ಕ್ಹುದಾನಾ ಸಂಕಲ್ಪನೆ ಕೈನ ಚ಼ಪ್ಪಾಳ್ಯೊ ಮಾರ; ತಲ್ವಾರ ಬೆ ಅಕ್ಲು ತನ್ನ ಅಕ್ಲು ಕ್ಹಲಾಸ ಕರಾದೆ! ಪ್ರಜಾನೆ ಹತಿಸಾನು ತಲ್ವಾರ! ಸುತ್ತೆಬಿ ಭಿರಕೈನ ಅದಿಪತಿಯೊನೆ ಹತಿಸಾನು ತಲ್ವಾರ ತ್ಯುನು ಮನಸ ಪಾನಿ ಥೈನ ಘನಾ ಮನಕ್ಹೊ ಟೆಕ್ಹ ಲಾಗಿನ ಪಡುಕೈನ ಕ್ಹಲಾಸ ಕರಾನು ತಲ್ವಾರನೆ ತ್ಯುನಾ ಪುರ ಬಾಕಲೊನೆ ಲಾಯೊಸ. ಆಹಾ ಮಿಂಚ಼ ನಿಂಗತ ಮಿಂಚ಼ಸ, ವಧೆಥೈನ ತಿಕ್ಕಲ ಛೆ! ಎ ತಲ್ವಾರ, ಯಕ್ಕಥೈನ ಸಿದಾಬಗಲ ಜಾ಼ ತಯ್ಯಾರ ಥೈನ ರೊಡ್ಡಾ ಬಗಲ ಜಾ಼ ತಾರು ಮ್ಹೊಡು ರ‍್ಹಯಲ ಜ಼ಗಾಕನ ಜಾ಼. ಮಿ ಚಪ್ಪಾಳೊ ಮಾರಿನ ಮಾರಿ ಶಿಟ್ಟನೆ ತಿರಸಿಲ್ಯುಸ. ಕರ್ತಾ ಥಯಲ ಮಿಜ಼ ಆಂ ಕದ್ಯೊಸ

ಬಾಬಿಲೊನನಾ ರಾಜಾ಼

ಯಹೊವಾ ಮನೆ ವರಿಯಕ್ಕ ವಾಕ್ಯಾನೆ ದಿದ್ಯೊ ಮನಕ್ಹನಾ ದಿಕ್ರಾ ಬಾಬಿಲೊನನಾ ರಾಜಾ಼ನು ತಲ್ವಾರ ಆವಾನಾಹುತಿ ಬೆ ವಾಟನಾ ನಕ್ಷಾನೆ ಲಿಕ್ಕ; ತೆ ಭಂಬಿ ಯಕ್ಕಜ಼ ದೆಶತಾ ಗಯಲ ನಿಂಗತ ರ್ಹವಾದೆ; ಯಕ್ಕಕ್ಕ ಗಾಮನೆ ಜಾ಼ವಾನಿ ವಾಟ ಪೈಲಾ ಝಾಡಕ್ಹು ವಳಕ ಕರ. ಅಮ್ಮೊನ್ಯರ ರಬ್ಬಾ ಕವಾನಾ ಗಾಮನೆ ಯೆಹುದಮಾ ಮಳಲ ಯರುಸಲೆಮನೆ ತಲ್ವಾರ ಆವಾನಾಹುತಿ ವಾಟ ಕರ. ವಾಟ ಮಾರಾನಾ ಜ಼ಗಾಮಾ ಬೆ ವಾಟೊಮಾ ಪೈಲಾಮಾ ಬಾಬಿಲೊನನೊ ರಾಜೊ಼ ಸಕಣಾ ದೆಕಾನಾಹುತಿ ಹುಬ್ರಯೊಸ; ಬಾಣೊನೆ ಕಲಕಿ ವಿಗ್ರಹೊನೆ ಪ್ರಶ್ನೆ ಪುಚ್ಚಿನ ಕಲ್ಜಾನೆ ಪರಿಕ್ಷಾ ಕರ‍್ಯೊಸ. ಯರುಸಲೆನು ಗುರುತುನು ಬಾಣಾ ತಿನಾ ಸಿದಾ ಹತ್ಮಾ ಮಳ್ಯುಸ; ಗೊಡಿಯೊ ಪ್ಹೊಡಾನಿಯೊ ಮಶಿನೊ ಹುಬ್ರಾಡಿನ ಮ್ಹೊಡು ಕ್ಹೊಲಿನ ಸಂಹಾರ ಧ್ವನಿಗೈದು ವದರಿನ ವ್ಹೈ ಗೊಡಿಯೊ ಪ್ಹೊಡಾನಿಯೊ ಮಶಿನೊ ಪುರ ಬಾಕಲೊನಾ ಕ್ಹಾಮಾ ಹುಬ್ರಾಡಿನ ಗುಬ್ಬಾ ಘಾಲಿನ ಒಡ್ಡು ಭಾಂದುಕೈನ ತಿನಾಕ್ಹು ಸುಚನೆ ಥಯು. ಪುರ ನಿವಾಸಿಯೊ ತ್ಯುನೆ ತೆ ರಾಜಾ಼ಕ್ಹು ಕರಲಿದಲ ಪ್ರಮಾಣೊಮಾ ಭರೊಕ್ಹೊ ಮ್ಹೆಲಿನ ಎ ಸಕಣಾ ಸುಳ್ಳ ವ್ಹೈ ಕೈನ ಭಾವಸಸ ತೆನೈಸೊ ತೆ ತ್ಯುನಾ ಅರ್ಧಮನೆ ಭಾರೊ ಲಾವಾನೆ ತಿನಾ ಹತೆ ಮಳಸ. ಇಮ್ಮ ರ್‍ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತುಮಾರಾ ಅಪರಾದೊನೆ ಭಾರಾ ಲೈನ ತುಮಾರಾ ಪಾಪೊ ತುಮಾರಾ ಕಾಮೊ ಕ್ಹಾರಾ ತುಮೆ ತುಮಾರಾ ಅರ್ಧಮನೆ ಮಾರಾ ಸ್ಹೆಂನೆ ಲೈನ ಪಾಪೊಯೊ ಥೈನ ಮಾರಾ ಸ್ಹೆಂನೆ ಆಯಲ ಕಾರಣ ಶತ್ರುನಾ ಹತೆ ಮಳ್ಯೊಸಿ.

ಇಸ್ರಾಯಲನೊ ಮಾಲಕ ದುಷ್ಟ ಬ್ರಷ್ಟ ತುನೆ ಟೈಮ ನಜಿಕ ಛೆ; ಎಜ಼ ತಾರಾ ಅಪರಾದನೆ ಲಾಸ್ಟ ಶಿಕ್ಷಾ ವ್ಹೈ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮ್ಹೊಡಾಪರ ರ‍್ಹಯಲ ಟುವಾಲ ಕಿತ್ತಿಪಡ! ಕಿರಿಟನೆ ಉಚೈನ ಘಾಲ! ಕ್ಹಾರುಜ಼ ವ್ಯತ್ಯಸ್ತ ಥಾವಾದೆ; ಹೆಟಲ್ಯಾನೆ ಉಪ್ಪರ ಕರ, ಉಪ್ಪರಲ್ಯಾನೆ ಹೆಟೊ ಕರ; ಮಿ ಆ ಗಾಮನೆ ಪಳ್ಳ ಕರುಸ ಪಳ್ಳ-ಪಳ್ಳ ಕರುಸ ರಾಜ್ಯನೆ ಭಾದ್ಯ ಆಯೆಲಕ್ಕಾ ಯಕ್ಕ ರ‍್ಹಯಲ ನಿಂಗತ ರ್ಹವಸ; ತಿನೆ ರಾಜ್ಯನೆ ದ್ಯುಸ.

ಅಮೊನಿಯಾವಾಲಾ ವರಿ ತಲ್ವಾರ

ಮನಕ್ಹನಾ ದಿಕ್ರಾ ತು ಕ್ಹುದಾನಿಯೊ ವಿಚಾರೊ ದೆಕಾಡತೊ ಅಮ್ಮ ಕೆ ಅಮೊನ್ಯವಾಲಾವೊನಾ ವಿಶಯಮಾ ಅಮ್ಮ ಕೆ ತ್ಯುನೆ ಕರಾನು ದೊಶಣೆನಾ ಹುತಿ ಅಮ್ಮ ಕವಸ ಆಹಾ ತಲ್ವಾರ-ತಲ್ವಾರ ಕತ್ರಾನೆ ಭಾರೊ ಕಾಡ್ಯೊಸ ಮಿಂಚಾ಼ನಾ ಯಕ್ಲೊ ಧಾರ ಕರ‍್ಯಾಸ.

ಅಮ್ಮೊನ ತಾರಾ ಪ್ರವಾದಿಯೊ ಮಿಥ್ಯೆನೆ ಸಾಕ್ಷಾತ ಕರಿನ ಸುಳ್ಳ-ಸುಳ್ಳ ಕಣಿ ಕವಾಡಾಸ. ಟೈಮ ನಜಿಕ ಐನ ಅಪರಾದನು ಲಾಸ್ಟಟೈಮ ಸಂಬವಿಸಿನ ಹತಥೈನ ಪಡಲ ದುಷ್ಟೊನಿ ಗತಿನೆ ದೆಕ! ಜೊಯಿಸೊನೆ ನಂಬಲ ತು ತೆ ದುಷ್ಟೊನಾ ಗರ್ದನೊಪರ ಒರಗಿನ ಜಾ಼ವಸ. ತಲ್ವಾರನೆ ಮ್ಯಾನಮಾ ಘಾಲ. ತಾರಾ ಸೃಷ್ಟಿನಾ ಜ಼ಗಾಮಾ, ತಾರಾ ತುನೆ ಫೈಸಲೊ ಕರುಸ. ತಾರಾ ಉಪ್ಪರ ಮಾರಿ ಶಿಟ್ಟನೆ ರಿಚೈನ ಆಗನೆ ಫುಕ್ಕಿನ ತುನೆ ಹುಟ್ಟಲ ಜ಼ಗಾ ಜಂಗಲನಾ ಪ್ರಾಣಿಯೊ ಹಾಳ ಕರಾಮಾ ಘಟ್ಟ ರ‍್ಹಯಲವಾಲಾನಾ ಹಮಾ ಕ್ಹಾಪ್ಡೌಸ. ತು ಆಗನೆ ಪಾಲ ಥಾಸಿ; ತಾರು ರಗತ ಕ್ಹಾರಾ ದೆಶಮಾ ಭರಲ ರ‍್ಹವಸ; ತು ಹಜು಼ನ ಸ್ಹೆಂನೆ ನೈಆತೊ; ಯಹೊವಾ ಥಯಲ ಮಿ ಎ ಕದ್ಯೊಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.