Sikkiligar Bible
ಯಜಕೆಲಾ 20
ಕ್ಹುದಾನಿ ಚಿತ್ತ ವರಿ ಮನಕ್ಹನು ಪ್ರತಿಭಟನಾ
ಯೆಹೊಯಾಖಿಯನ ಜೆಲ್ಮಾ ರ್ಹಯಲ ಕ್ಹಾತವಾ ವರಕ್ಹನಾ ಪಾಂಚ಼ವಾ ಮ್ಹೈನಾನಾ ದಕ್ಹವಾ ದಿನ್ನಮಾ ಇಸ್ರಯಲನಾ ಮ್ಹೊಟಾವೊಮಾ ದಕ್ಹಾಜನಾ ಯಹೊವಾನೆ ಪ್ರಶ್ನೆ ಪುಚ್ಚಾನೆ ಐನ ಮಾರಾ ಕ್ಹಾಮಾ ಬೈಟ್ಯಾ. ತೆಳಾಮಾ ಯಹೊವಾ ಆಂ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ ಇಸ್ರಾಯಲನಾ ಮ್ಹೊಟಾವೊಮಾ ತಿಳಸೈನ ಅಮ್ಮ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮನೆ ಪ್ರಶ್ನೆ ಪುಚ್ಚಾನೆ ಆಯಾಸು? ಮಾರಾ ಕ್ಹಮ್ಮಬಿ, ಮಿ ತುಮೊನೆ ಉತ್ತರ ನೈ ದೆತೊ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಮನಕ್ಹನಾ ದಿಕ್ರಾ, ಇವ್ನೊನೆ ಫೈಸಲೊ ಕರಾನೆ ತಾರು ಮನಸ ತಯ್ಯಾರ ಛೆ? ಇವ್ನಾ ಪಿತೃವೊನು ಕೆಟ್ಟ ಕಾಮ ಇವ್ನೊನೆ ಅಮ್ಮ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ. ಕಯಾ ದಿನಮಾ ಮಿ ಇಸ್ರಾಯಲೊನೆ ಇನಿಲಿನ ಯಾಕೊಬ ಕ್ಹಾಂದಾನವಾಲಾವೊನೆ ವಾತ ದಿದಲ ಮಿ ತುಮಾರೊ ಕ್ಹುದಾ ಥಯಲ ಯಹೊವಾ ವ್ಹೈ ಕೈನ ಐಗುಪ್ತ ದೆಶಮಾ ಪ್ರಮಾಣ ಕರಿನ ತಿಳಸಾಯೊಸು ಕ್ಹಾರಾ ದೆಶೊತಿ ಸುಂದರ ಥಯಲ ದೆಶನೆ ತುಮೊನೆ ದೆಕ್ಯೊಸ; ಮಿ ತುಮೊನೆ ಐಗುಪ್ತ ದೆಶತೊ ಉದ್ದಾರ ಕರಿನ ದುದ್ದ ಜೆನ ವೈನ ಜಾವಾನಾ ತೆ ದೆಶನೆ ವಳೌಸ ಕೈನ ವಾತ ದಿದ್ಯೊಸ. ತುಮೆ ಕ್ಹಾರಾ ತುಮಾರಾ ಡೊಳಾವೊನೆ ಪಸಂದ ರ್ಹಯಲ ಅಸಹ್ಯ ಸಾಮ್ನೊನೆ ಭಿರಕೈ ಪಡೊ, ಐಗುಪ್ತನಾ ವಿಗ್ರಹೊಕ್ಹು ತುಮೊನೆ ಹೊಲಸ ಕರಲಿವೊ ನಕೊ; ಮಿ ತುಮಾರೊ ಕ್ಹುದಾ ಥಯಲ ಯಹೊವಾ ವ್ಹೈ ಕವಾನು ತ್ಯುನೊನೆ ಹುಶಾರ ಕರ್ಯೊ. ತ್ಯುನೆ ರ್ಹೈತಬಿ ಮಾರಾ ವಾತೊ ಐಕ್ಯಾವಾಚಿ ಮಾರಾ ಉಪ್ಪರ ಫರಿನ ಪಡ್ಯಾ; ತ್ಯುನಾ ಡೊಳಾನೆ ಪಸಂದ ರ್ಹಯಲ ಅಸಹ್ಯ ಸಾಮ್ನೊನೆ ಕುನ್ನಜ ಭಿರಕಾಯಾ ನೈ. ಐಗುಪ್ತನಾ ವಿಗ್ರಹೊನೆ ಇನ್ಕಾರ ಕರ್ಯಾ ನೈ; ತೆಳಾಮಾ ಮಿ ಇವ್ನಾ ಉಪ್ಪರ ಐಗುಪ್ತ ದೆಶನಾ ಮ್ಹೈ ಮಾರಿ ರೊಷಾ ಅಗ್ನಿನೆ ರಿಚೈನ ಮಾರಿ ಶಿಟ್ಟನೆ ತಿರಸಿ ಲ್ಯುಸ ಕೈಲಿದ್ಯೊ. ತೆನೈಸೊ ತುಮೊನೆ ಐಗುಪ್ತ ದೆಶಮಾತೊ ಪಾರ ಕರುಸ ಕವಾನು ಜನಾಂಗ ಕ್ಹಾಮು ಮನೆ ಇವ್ನೊನೆ ಪ್ರಕಟ ಕರಲಿದ್ಯೊತೊ ಕೈನ ವಿಚಾರ ಕರಿನ ತ್ಯುನಾ ಸುತ್ತೆ ತೆ ಜನಾಂಗ ಕ್ಹಾಮಾ ಮಾರು ನಾಮ ಅಪ ಕಿರ್ತಿನೆ ಗುರಿ ಥಯೆವಾಚಿ ಮಾರಾ ನಾಮನಾ ನಿಮಿತ್ತ ಸಹಿಸಿ ಲಿದ್ಯೊ.
ತೆಳಾಮಾ ಮಿ ತ್ಯುನೊನೆ ಐಗುಪ್ತ ದೆಶಮಾತೊ ಛೊಡೈನ ಜಂಗಲನೆ ಬಲೈಲಾವಾನೆ ಪಾಲ್ಸಾವಾಲಾವೊನೆ ಜಿವ ಧಾರ ಥಯಲ ಮಾರಾ ಆಗನ್ಯಾ ವಿದಿಯೊನೆ ತ್ಯುನೊನೆ ತಿಳಸೈನ ದಿದ್ಯೊ. ತೆನೈಸೊ ಹಮೊನೆ ಕ್ಹುದಾನಾ ಮನಕ್ಹೊ ಥಯನ ಕರಲ ಯಹೊವಾ ಮಿಜ ವ್ಹೈ ಕವಾನು ತ್ಯುನೆ ತಿಳ್ದಿಲಿಯು ಕೈನ ಮನೆ ವರಿ ತ್ಯುನೊನೆ ಗುರತ ಥಯಲ ಸಬ್ಬತ ದಿನೊನೆ ತ್ಯುನೊನೆ ನೆಮಸ್ಯೊ. ತೆನೈಸೊ ಇಸ್ರಾಯಲನಾ ವಂಶವಾಲಾ ಜಂಗಲಮಾ ಮಾರಾ ಉಪ್ಪರ ಫರಿನ ಪಡ್ಯಾ. ಪಾಲ್ಸಾವಾಲಾವೊನೆ ಜಿವ ಧಾರನೆ ಮಾರಾ ಆಗನ್ಯಾನಾ ವಿದಿಯೊನೆ ಪಾಲ್ಸಾವಾಚಿ ಇನ್ಕಾರ ಕರ್ಯಾ. ಮಿ ನೆಮ್ಸಲ ಸಬ್ಬತ ದಿನೊನೆ ಕ್ಹಾಸ ಕರಿನ ಹೊ ಕರ್ಯಾ; ತೆಳಾಮಾ ಮಿ ತ್ಯುನಾಪರ ಜಂಗಲಮಾ ಮಾರಿ ರೊಷಾ ಅಗ್ನಿನೆ ರಿಚೈನ ಇವ್ನೊನೆ ಧ್ವಂಸ ಕರುಸ ಕೈನ ಕೈಲಿದ್ಯೊ. ವರಿಬಿ ತಿನಾಹುತಿ ಕಯಾ ಜನಾಂಗನಾ ಕ್ಹಾಮೊ ತ್ಯುನೊನೆ ಪಾರ ಕರ್ಯೊಸತೊ ತೆ ಜನಾಂಗನಾ ಕ್ಹಾಮೊ ಮಾರು ನಾಮ ಅಪಕಿರ್ತಿನೆ ಗುರಿ ಥವು ನೈಕೈನ ಮಾರಾ ನಾಮನಾ ನಿಮಿತ್ತಜ ತಡದಿಲಿದ್ಯೊ. ಪಾಚಾ಼ತೊ ಘಾನಾ ದೆಶೊ ಶಿರಮಣಿ ಥಯಲ ಕಯಾ ದೆಶನೆ ತ್ಯುನೊನೆ ವಾಗ್ದಾನ ಕರ್ಯೊ ದುದ್ದ ವರಿ ಜೆನ ಜಾವಾನಾ ತುಮೊನೆ ತೆ ದೆಶೆ ಸೆರಸು ಕೈನ ಜಂಗಲಮಾ ತ್ಯುನೊನೆ ಪ್ರಮಾಣ ಕರ್ಯೊ. ಕಾ ಕದ್ಯಾಮ ತ್ಯುನು ಮನಸ ತ್ಯುನಾ ಮೊರ್ತಿಯೊಮಾ ಆಸಕ್ತಿಕ್ಹು ತ್ಯುನೆ ಮಾರಾ ಆಗನ್ಯಾ ವಿದಿಯೊನೆ ಪಾಲ್ಶಾವಾಚಿ ಇನ್ಕಾರ ಕರಿನ ಮಿ ನೆಮ್ಸಲ ಸಬ್ಬತ ದಿನೊನೆ ಹೊಲೆ ಕರಾಲಾ ಥಯಾತಾ. ತೆನೈಸೊ ಮಿ ತ್ಯುನೊನೆ ನಾಶ ಕರೆವಾಚಿ ತಿಮ್ಮಜ಼ ಮಾರಿ ಕಾಳಜಿ ತ್ಯುನೊನೆ ವಚಾ಼ಡಿ; ಮಿ ತ್ಯುನೊನೆ ಜಂಗಲಮಾ ನಾಶ ಕರ್ಯೊ ನೈ.
ಪಾಚಾ಼ತೊ ಮಿ ಜಂಗಲಮಾ ತ್ಯುನಾ ಕ್ಹಾಂದಾನವಾಲಾವೊನೆ ತುಮೆ ತುಮಾರಾ ಬಾಪೊನಾ ಆಗನ್ಯಾವಿದಿಯೊನೆ ಪಾಲ್ಸೆವಾಚಿ ತ್ಯುನಾ ವಿದಿಯೊನೆ ಪಾಲ್ಸೆವಾಚಿ ತ್ಯುನಾ ಗೊಂಬಿಯೊಕ್ಹು ತುಮೊನೆ ಹೊಲಸ ಕರಲೆಯೆವಾಚಿ ರ್ಹೌ; ಮಿ ತುಮಾರೊ ಕ್ಹುದಾ ಥಯಲ ಯಹೊವಾ ವ್ಹೈ; ತುಮೆ ಮಾರಾ ಆಗನ್ಯಾವೊನೆ ಪಾಲ್ಸಿನ ಮಾರಾ ವಿದಿಯೊನೆ ಚಾಲಿನ ರ್ಹವೊ; ಮಿ ನೆಮ್ಸಲ ಸಬ್ಬತ ದಿನೊನೆ ಮಾರಾ ದಿನೊ ವ್ಹೈಕೈನ ಕರೊ; ಮಿ ತುಮಾರೊ ಕ್ಹುದಾ ಥಯಲ ಯಹೊವಾ ವ್ಹೈ ಕೈನ ತುಮೆ ತಿಳದಿ ಲಿವು ಕೈನ ತೆ ತುಮೊನೆ ವರಿ ಮನೆ ಗುರತ ಥಾವಾಸ ಕೈನ ಕದ್ಯೊ.
ತೆ ಕ್ಹಾಂದಾನವಾಲಾ ಮಾರಾ ಉಪ್ಪರ ಫರಿನ ಪಡ್ಯಾ; ಮಾರಾ ಆಗನ್ಯಾವೊನೆ ಪಾಲ್ಸ್ಯಾ ನೈ; ಚಾಲಲವಾಲಾವೊನೆ ಜಿವ ಧಾರ ಥಯಲ ಮಾರಾ ವಿದಿಯೊನೆ ಚಾಲಿನ ಕರ್ಯಾ ನೈ; ಮಿ ನೆಮ್ಸಲ ಸಬ್ಬತ ದಿನೊನೆ ಹೊಲೆ ಕರ್ಯಾ; ತಿನಾಹುತಿ ಮಿ ಜಂಗಲಮಾ ಇವ್ನಾಪರ ಮಾರಿ ರೊಷಾ ಅಗ್ನಿನೆ ರಿಚೈನ ಮಾರಿ ಶಿಟ್ಟ ತಿರಸಿ ಲಿಯುಸ ಕೈ ಲಿದ್ಯೊ ತೆನೈಸೊ ಮಿ ತ್ಯುನೊನೆ ಕಯಾ ಜನಾಂಗನಾ ಕ್ಹಾಮೊ ಪಾರ ಕರ್ಯೊಸ ತೆ ಜನಾಂಗನಾ ಕ್ಹಾಮೊ ಮಾರು ನಾಮ ಕೆಟ್ಟು ನೈ ಕೈನ ಮಾರಾ ನಾಮನಾ ಹುತಿ ತಡ್ದಿಲಿನ ಹತ್ತ ಪಾಚೊ ಸರಕೈ ಲಿದ್ಯೊ. ಮಿ ತುಮೊನೆ ಜನಾಂಗೊಮಾ ಭಿಕ್ಹರೈನ ದೆಶದೆಶೊನೆ ತುರಿ ಪಡುಸ ಕೈನ ಜಂಗಲಮಾ ತ್ಯುನೊನೆ ಪ್ರಮಾಣ ಕರ್ಯೊಸ. ಪಾಚಾ಼ತೊ ತ್ಯುನೆ ಮಾರಾ ಆಗನ್ಯಾವೊನೆ ನೈ ಚಾಲಿನ ಮಾರಾ ವಿದಿಯೊನೆ ಇನ್ಕಾರಿನ ಮಿ ನೆಮ್ಸಲ ಸಬ್ಬತ ದಿನೊನೆ ಹೊಲೆ ಕರಿನ ತ್ಯುನಾ ಪಿತೃವೊನಾ ಗೊಂಬಿಯೊನಾ ಉಪ್ಪರ ಡೊಳೊ ಘಾಲಲಕ್ಹು
ತೆನೈಸೊ ಮಿಜ ಮಿ ತ್ಯುನೊನೆ ಆಗನ್ಯಾವೊನೆ ಜಿವ ಧಾರವಾಚಿ ವಿದಿಯೊನೆ ಹಿತರ್ಹಯಲ ಅಗನ್ಯಾ ದಿದ್ಯೊ ತ್ಯುನೆ ತ್ಯುನು ಪಸ್ಟ ಬಚ್ಚಾವೊನೆ ಆಹುತಿ ದಿನ ಚಡಾಯಲ ಬಲಿಕ್ಹು ತ್ಯುನೊನೆ ಹೊಲೆ ನೈ ಕರಿನ ಕೆಟ್ಟ ಪರಸ್ಥಿತಿನೆ ಲಾಯೊ. ತ್ಯುನೆ ಮಿ ಯಹೊವಾ ವ್ಹೈ ಕವಾಹುತಿ ಮಿ ಇಮ್ಮ ಕರ್ಯೊ. ಇಮ್ಮ ರ್ಹತಾಮಾ, ಮನಕ್ಹನಾ ದಿಕ್ರಾ, ಇಸ್ರಾಯಲ ವಂಶವಾಲಾವೊನೆ ಎ ವಾತ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತುಮಾರಾ ಪಿತೃವೊ ಹಜಿಯಕ್ಕ ದ್ರೊಹ ಕರಿನ ಮನೆ ದೊಷ ದಿದ್ಯಾಸ. ಮಿ ಪ್ರಮಾಣ ಪೂರ್ವಕ ಥೈನ ತ್ಯುನೊನೆ ವಾಗ್ದಾನ ಕರಲ ದೆಶೆನೆ ಸೆರಸಲಪರ ತ್ಯುನಾ ಉಚ್ಚಾ ಥಯಲ ಕ್ಹಾರಾ ಡೊಂಗರೊನೆ ಚೊಕಾ ಥೈನ ಉಟಲ ಕ್ಹಾರಾ ಝಾಡೊನೆ ದೆಕಿನ ತ್ಯಾ ಬಲಿನಾ ಪಶುನೆ ವದಿಸಿನ ಮನೆ ಶಿಟ್ಟ ಆವಾನಾ ನೈವದ್ಯನೆ ಚಡೈನ ಚೊಕಿ ಬಾಸನು ಹೊಮಾ ಕರಿನ ಪಾನ ದ್ರವ್ಯನೆ ರಿಚೈನ ವಪ್ಸಾವಾಡಾತಾ. ತುಮೆ ಜಾವಾನಾ ಬಾ ಮಾ ಕವಾನಾ ಪೂಜಾನಿ ಜ಼ಗಾ ಸು ಜ಼ಗಾ ಹಮ್ನಾಲಕ್ಕಾ ಹವಾ ಪೂಜಾನಾ ಜ಼ಗಾವೊನೆ ಬಾಮಾ ಇಬ್ರಿಯ ಜಾತಾಮಾ ಬಾಮಾ ಕವಾನಾ ಶಬ್ದಾನೆ ಜಾ ಸು ಕವಾನು ಅರ್ಥ ವ್ಹೈ. ಕವಾನು ನಾಮ ವ್ಹೈ. ಇಸ್ರಾಯಲ ವಂಶವಾಲಾವೊನೆ ಅಮ್ಮ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತುಮಾರಾ ಪಿತೃವೊ ನಿಂಗತ ತುಮೊನೆ ತುಮೆಜ ಹೊಲಸ ಕರಲಿವಾಡಾಸ? ತ್ಯುನಾ ಪೂಜಾ ಕರಾ ಅಸಹ್ಯ ಸಾಮ್ನೊನೆ ತುಮೆಬಿ ಪೂಜಾ ಕರಿನ ದೆವದ್ರೊಹ ಕರೊಸಿತೊ? ತುಮೆ ಬಲಿ ಚಡಾತಾ ತುಮಾರಾ ಬಚ್ಚಾವೊನೆ ಆಹುತಿನೆ ದಿನ ಹಮ್ನಾ ಲಕ್ಕಾ ತುಮೊನೆ ಅಶುದ್ದ ಕರಲಿವಾಡಾಸ? ಇಸ್ರಾಯಲನಾ ವಂಶವಾಲಾ, ಮಿ ತುಮಾರಾ ಹವಾವೊನೆ ಕ್ಹುದಾನು ಉತ್ತರ ದೆಸಕುಸ? ಮಾರಾ ಕಮ್ಮಬಿ, ತುಮೊನೆ ಕ್ಹುದಾನು ಉತ್ತರ ದಿದ್ಯೊಸ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಮಿ ಜನಾಂಗ ನಿಂಗತ , ಬಿಜಾ ದೆಶವಾಲಾ ನಿಂಗತ ಝಾಡ ವರಿ ದಗ್ಡಾವೊನಾ ಗೊಂಬಿಯೊನೆ ಪೂಜಾ ಕರಯೆಸ ಕೈನ ತುಮಾರಾ ಮನಸಮಾ ಹುಟ್ಟಾನು ವಿಚಾರ ಕೆಕ್ಲು ವ್ಹೈ ಸಾಗತು ನೈ.
ಶಿಕ್ಷಾ ದಿವಾಲೊ ವರಿ ಮಾಫ ಕರಾಲೊ ಕ್ಹುದಾ
ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಾರಾ ಕ್ಹಮ್ಮಬಿ ಮಿ ಶಿಕ್ಷಾ ಹಸ್ತನೆ ಉಚೈನ ಬುಜ್ಜೊ಼ನಿ ತಾಕತ ದೆಕಾಡಿನ ರೊಷಾನಿ ಅಗ್ನಿನೆ ರಿಚಾತೊ ತುಮಾರಾ ಉಪ್ಪರ ದೊರೆತನಾ ಕರುಸ. ಹೊ, ಮಿ ಶಿಕ್ಷಾ ಹಸ್ತನೆ ಉಚೈನ ಬುಜ ಪರಾಕ್ರಮನೆ ದೆಕಾಡಿನ ರೊಷಾ ಅಗ್ನಿನೆ ರಿಚಾತೊ ತುಮೊನೆ ಜನಾಂಗೊಮಾತೊ ಪಾರ ಕರಿನ ತುಮೆ ಭಿಕ್ಹರೈ ಗಯಲ ದೆಶೊಮಾತೊ ತುಮೊನೆ ಮಳೈನ ಜನಾಂಗೊನಾ ವಚ್ಮಾನಾ ಜಂಗಲನೆ ಬಲೈನ ತ್ಯಾಜ ಯದ್ರಾ ಬದ್ರಾ ಥೈನ ವಾದಸುಸ. ಮಿ ಐಗುಪ್ತನಾ ಜಂಗಲಮಾ ತುಮಾರಾ ಪಿತೃವೊನಾ ಕ್ಹಾತೆ ವಾದಸಲ ನಿಂಗತ ತುಮಾರಾ ಕ್ಹಾತೆಬಿ ವಾದಸುಸ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. ಮಿ ತುಮೊನೆ ಇಸಾಬ ಕರಾ ವರಕ್ಹು ಲಾಕ್ಡಿನಾ ಹೆಟಾ ಧವಾಡೊ ಕರಿನ ಒಡಂಬಡಿಕೆನಾ ಕಟ್ಟಕ್ಹು ಭಾಂದಿನ ಮನೆ ಫರಿನ ಪಡ್ಯಾ ದ್ರೊಹಿಯೊ ಥಯಲವಾಲಾವೊನೆ ತುಮಾರಾಮಾತೊ ಝಾಡಿಪಡುಸ; ತ್ಯುನೆ ಪ್ರಸಿದ್ದಿಯೊ ಥೈನ ದೆಶತೊ ಮಿ ತ್ಯುನೊನೆ ಪಾರ ಕರಿತಬಿ ತ್ಯುನೆ ಇಸ್ರಾಯಲ ದೆಶೆ ಜಾತಾಜ ನೈ; ಮಿಜ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ.
ಇಸ್ರಾಯಲನಾ ವಂಶವಾಲಾ, ಕತಾ ಥಯಲ ಯಹೊವಾ ಅಮ್ಮ ಕವಸ ಜಾವೊ ತುಮರ ಗೊಂಬಿಯೊನೆ ಲಿವೊ; ಅಗಾತೊ ಮಾರಿ ವಾತ ಐಕೊಸಿಜ, ಇನಾ ಉಪ್ಪರ ಮಾರಾ ಪರಿಶುದ್ದ ನಾಮನೆ ತುಮಾರಾ ಬಲಿಯೊಕ್ಹುಬಿ ವರಿ ಗೊಂಬಿಯೊಕ್ಹುಬಿ ತುಮೆ ಅಪಕಿರ್ತಿನೆ ಗುರಿ ಕರ್ತಾ ನೈ. ಕರ್ತಾ ಥಯಲ ಯಹೊವಾ ಅಮ್ಮ ಕವಸ ದೆಶಮಾ ಇಸ್ರಾಯಲ ವಂಶನಾ ಕ್ಹಾರಾ ಮಾರಾ ಪರಿಶುದ್ದ ಡೊಂಗರಪರ, ಇಸ್ರಾಯಲನಾ ಡೊಂಗರೊಪರ ಮನೆ ಮಳೈ ಲಿವಸ; ತ್ಯಾಜ ತ್ಯುನೊನೆ ಪ್ರಸನ್ನ ಥೌಸ, ತ್ಯಾಜ ತುಮಾರಾ ಕಾಣಿಕೆಯೊನೆ ವರಿ ನೈವೆದ್ಯನೆ ಮಿಸಾನೆ ನೈ ಥಯಲನೆ ಆವಾ ಲಗಾಡುಸ. ಮಿ ತುಮೊನೆ ಜನಾಂಗಮಾತೊ ಪಾರ ಕರಿನ ತುಮೆ ಭಿಕರೈ ಗಯಲ ದೆಶೊತ ಲೈನ ಮಳತಾಮಾ ತುಮಾರಿ ಚೊಕಿ ಬಾಸನಿ ಹೊಮಾನೆ ವಪ್ಪಿಲಿನ ತುಮೊನೆ ಪ್ರಸನ್ನ ಥೌಸ; ಘನಾ ಜನಾಂಗೊನಾ ಕ್ಹಾಮಾ ತುಮಾರಾ ರಕ್ಷಣೆನಾ ಮೂಲಕ ಮಾರಿ ಮರ್ಯಾದಿನೆ ವಚಾ಼ಡಿ ಲಿವುಸ. ಮಿ ಪ್ರಮಾಣ ಕರಿನ ತುಮಾರಾ ಪಿತೃವೊನೆ ಕಯು ದೆಶ ದಿದ್ಯೊಸತೊ ತೆ ಇಸ್ರಾಯಲ ದೆಶನೆ ಆವಾಲಗಡಾತಾಮಾ ಮಿಜ ಯಹೊವಾ ವ್ಹೈ ಕೈನ ತುಮೊ ಗೊತ್ತ ಥಾವಸ. ತುಮೆ ತುಮೊನೆ ಹೊಲಸ ಕರಲಿದಲಕ್ಹು ತುಮಾರಿ ನಡತೆನೆ ವರಿ ಕ್ಹಾರಾ ಕಾಮೊನೆ ತ್ಯಾ ಸ್ಹೆಂನೆ ಲೈನ ತುಮೆ ಕರಲ ಘನಾ ಕೆಟ್ಟ ಕಾಮೊನಾ ನಿಮಿತ್ತ ತುಮೊನೆ ದೆಕಿನ ತುಮೆಜ ಅಸಹ್ಯ ಕರೊಸಿ. ಇಸ್ರಾಯಲನಾ ವಂಶವಾಲಾ, ತುಮಾರಿ ಕೆಟ್ಟ ಚಾಲನೆ ವರಿ ಕೆಟ್ಟ ಕಾಮೊನೆ ತಿನಾ ತಕ್ಕ ತಿಮ್ಮಜ಼ ಮಿ ತುಮೊ ದಂಡ ದಿದೆವಾಚಿ ಮಾರಾ ನಾಮನ ನಿಮಿತ್ತ ಮಿ ತುಮೊನೆ ತಡ್ದಿ ಲೆತಾಮಾ ಮಿಜ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ; ಆ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.
ದಕ್ಷಿಣ ದಿಕ್ಕನಿ ಆಗ
ಪಾಚಾ಼ತೊ ಯಹೊವಾ ಆಂ ವಾಕ್ಯಾ ಮನೆ ದಿದ್ಯೊ ಮನಕ್ಹನಾ ದಿಕ್ರಾ, ತು ದಕ್ಷಿಣಕನ ಮ್ಹೊಡು ಕರಿನ ಬೊಲ್ತಾಮಾ ದಕ್ಷಿಣ ಸಿಮೆನಾ ಮಳಾಮಾ ಪ್ರಸ್ತಾಪ ಉಚೈನ ತೆ ಮಳಾನೆ ಅಮ್ಮ ತಿಳಸೈನ ಕೆ ಯಹೊವಾನಿ ಆಂ ವಾತ ಐಕಿನ, ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಆಹಾ, ಮಿ ತಾರಾಮಾ ಆಗ ಲಗಾಡುಸ, ತೆ ತಾರಾಮಾನಾ ಹಸರ ಝಾಡೊನೆ ವರಿ ಕುಕ್ಹಾಯಲ ಝಾಡೊನೆ ಗಳಿಜಾ಼ವಸ; ಧಗಧಗ ಲಾಗಲ ಇಜ್ಜಾಯೆವಾಚಿ ಉತ್ತರತು ದಕ್ಷಿಣ ಲಕ್ಕಾ ಕ್ಹಾರುಜ಼ ಬಳಿ ಜಾ಼ವಸ. ತೆ ಲಾಗಾಡಲವಾಲೊ ಯಹೊವಾ ಥಯಲ ಮಿ ಕವಾನು ಘನಾ ನರ ಜಾನವರೊನೆ ಗೊಚರ ಥಾವಸ; ತೆ ಇಜ್ಜಾತಿಜ ನೈ. ತೆಳಾಮಾ ಮಿ ಅಯ್ಯೊ ಕರ್ತಾ ಥಯಲ ಯಹೊವಾ, ಆಂ ಒಡಪೊ ಕವಾಲೊ ನವೈಸು? ಕೈನ ಆಂ ಮನಕ್ಹೊ ಮಾರಾಹುತಿ ಕೈಲಿವಾಡಾಸ ಕವಾನು ಅರಕೆ ಕರ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.