Sikkiligar Bible
ಯಜಕೆಲಾ 19
ಇಸ್ರೆಯೆಲನಾ ರಾಜಾ಼ನಾ ಹುತಿ ದುಖನು ಗಿದ್ದ
ಇಸ್ರಾಯಲನೊ ಪ್ರಬುವೊನಾ ವಿಷಯಮಾ ಆಂ ಶೊಕ ಗಿದ್ದನೆ ಉಚಾ. ಆಹಾ, ತಾರಿಯಾ ಸಿಂಹಾಡಾವೊಮಾನಿ ಸಿಂಹಾಡೊ ವ್ಹೈ, ಪ್ರಾಯನಾ ಸಿಂಹಾಡಾನಾ ವಚ್ಮಾ ಕ್ಹುರೈತಿ, ಬಚ್ಚಾವೊನೆ ರಾಕಿ. ತೆ ಬೆಳಸಲ ಯಕ್ಕ ಬಚ್ಚು ಪ್ರಾಯನಾ ಸಿಂಹಾಡೊ ಥೈನ ಸಿಕಾರ ಕರಾನು ಶಿಕ್ಕಿನ ಮನಕ್ಹೊನೆ ಗಳಾನೆ ಚಾಲುಕರ್ಯು. ಮನಕ್ಹೊ ಕ್ಹಾರಾ ಆಂ ಸುದ್ದಿ ಐಕಿನ ತಿನೆ ಮ್ಹೊಟಿ ಖಾಡಿ ಕರಿನ ತಿಮಾ ತೆ ಪಡ್ಯೊ. ತಿನೆ ಸರಪಣಿಯೊಕ್ಹು ಬಿಗ್ದಿನ ಐಗುಪ್ತ ದೆಶನೆ ಲಿನ ಗಯಾ. ತೆ ಸಿಂಹಾಡೊ ಕಾಯ್ದೊತೊ ರೈತಬಿ ತಿನಿ ನಿರಿಕ್ಷಾ ಹಾಳ ಥಯು ಕೈನ ತಿನಾ ಬಚ್ಚಾವೊಮಾ ಹಜಿಯಕ್ಕನೆ ಕಾಡಿನ ರಾಕಿನ ಮ್ಹೊಟೊ ಕರಿ. ತೆ ಪ್ರಾಯನೊ ಸಿಂಹಾಡೊ ಥೈನ ಸಿಂಹಾಡಾನಾ ವಚ್ಮಾ ಫರ್ತು ಸಿಕಾರ ಕರಾನು ಶಿಕ್ಕಿನ ಮನಕ್ಹೊನೆ ಖಾವಾನು ಶುರು ಕರ್ಯು. ತೆ ಗಾಮೊನೆ ಹಾಳ ಕರಿನ ಘನಾ ಜನಾ ರಾಂಡಿಯೊ ರ್ಹಯಲವಾಲಿಯೊನೆ ಕೆಡಶ್ಯೊ, ತಿನಾ ಅಡ್ಡಾನಾ ಅವಾಜಕ್ಹು ದೆಶಬಿ ತಿಮಾ ರ್ಹಯಲ ಕ್ಹಾರು ಕ್ಷಿಣ ಥಯು. ತೆಳಾಮಾ ಜನಾಂಗೊ ಸುತ್ತೆನಾ ಗಾಮೊತಿ ಮಳಿನ ಐನ ತಿನೆ ವಿರುದ್ದ ಥೈನ ಹುಬ್ರೈನ ಜಾಲ ಘಾಲಿನ ಕ್ಹಾಡಿ ಕ್ಹಂದಾನೆ ತ್ಯಾ ಮಳ್ಯು. ತೆ ತಿನೆ ಸರಪಣಿಯೊಕ್ಹು ಬಿಗ್ದಿನ ಪಿಂಜರಾಮಾ ಘಾಲಿನ ಬಾಬೆಲೊನನಾ ರಾಜಾ಼ಕನ ಲಾಯಾ. ತಿನಿ ಅವಾಜ ಇಸ್ರಾಯಲನಾ ಡೊಂಗರೊಮಾ ಹಜಿ ಐಕು ಆವಾ ವರಕ್ಹು ತಿನೆ ಬಂದನಮಾ ಮ್ಹೆಲ್ಯಾ. ತುನೆ ಜ಼ನ್ನಲ ಮಾ ನಿರಾವರಿಮಾ ನಾಟಿನ ದ್ರಾಕ್ಷಿನಿ ಬಳ್ಳಿ ಥಯಿತಿ ತೆ ಬಳ್ಳಿ ಘನಾ ತಂಪಕ್ಹು ಫಲ ವರಿ ಪೊದೆ ಥೈನ ಬೆಳದ್ಯುತು. ತಿಮಾ ರಾಜಾ ದಂಡನಾ ಯೊಗ್ಯ ಥಯಲ ಘಟ್ಟ ಗೊಂಬಿಯೊ ವ್ಹತ್ತಾ, ತಿನು ಉಚ್ಚು ಬಿಜಾ ರೆಂಬೆಯೊತಿಬಿ ಹೆಚ್ಚ ವ್ಹತ್ತು. ಘನಾ ರೆಂಬೆಯೊನಾ ವಚ್ಮಾ ಲಾಂಬಾ ಥೈನ ದಿಕ್ಹ್ಯಾ. ತೆ ಲತೆನಾ ಕ್ರೊದಿಯೊ ಕಿತ್ತಿನ ಜಿಮಿನ್ಪರ ನಾಕಿ ಪಡ್ಯಾ. ಪುರ್ವ ಬಗಲತೊ ವಾರೊ ತಿನಾ ಫಲನೆ ಹಾಳ ಕರಿ. ತಿನಾ ಘಟ್ಟ ಗೊಂಬಿಯೊ ತುಟಿನ ವರೈಗಯಾ. ಆಗ ತಿನೆ ಗಳಿಪಡಿ. ಹಮ್ನಾ ತೆ ಪಾನಿ ನೈ ರ್ಹಯಲ ಹಾಳ ಜ಼ಗಾ ನಾಟಿ ಗಡಾಯೊಸ. ಆಗ ದಂಡನಾ ರುಪ ಥಯಲ ತಿನಿ ಝಳಾಕ್ಹು ಗೈನ ತಿನು ಫಲ ಗಳಲಕ್ಹು ರಾಜ ದಂಡನೆ ಯೊಗ್ಯ ಥಯಲ ಕಯಾ ಘಟ್ಟ ಕೊಂಬಿಯೊ ತಿಮಾ ಉಗ್ರ್ಯಾ ನತ್ತಿ.
ಆಂ ದುಖ ಗಿದ್ದ ವ್ಹೈ ಆಂ ದುಖ ಗಿದ್ದ ಛೆ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.