Sikkiligar Bible
ಯಜಕೆಲಾ 2
ತೆ ಸು ಕದ್ಯೊ ಕದ್ಯಾಮ ಮನಕ್ಹನಾ ದಿಕ್ರಾ, ಉಟಿನ ಹುಬ್ರೆ, ತಾರಾ ಕ್ಹಾತೆ ಬೊಲುಸ ಕದ್ಯೊ. ತೆ ಆ ವಾತ ಕದಲ್ಪರ ಕ್ಹುದಾನಿ ಆತ್ಮಾ ಮಾರಾಮಾ ಐನ ಮಿ ಉಟಿನ ಹುಬ್ರ್ಯಾ ವರಕ್ಹು ಕರ್ಯು; ತೆಳಾಮ ಮಾರಾ ಕ್ಹಾತೆ ಬೊಲಲ ವಾಲಾನಿ ಅವಾಜ಼ ಐಕ್ಯೊ. ತೆ ಮನೆ ಅಮ್ಮ ಕದ್ಯೊ ಮನಕ್ಹನಾ ದಿಕ್ರಾ, ಮನೆ ವಿರುದ್ದ ಥೈನ ಫರಿನ ಮೊಸ ಕರಲ ಜನಾಂಗವಾಲಾ ಥಯಲ ಇಸ್ರಾಯಲೊಕನ ತುನೆ ವಳೌಸ; ಆ ದಿನ್ನ ಲಕ್ಕಾ ತ್ಯುನೆ ತ್ಯುನಾ ಪಿತೃವೊ ದಂಗೊ ಕರಾಲಾಜ಼ ಥಯಾಸ. ತು ತ್ಯುನೊನೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಕೈನ ಕೆ. ಮಿ ತುನೆ ಕಯಾ ಸಂತಾನವಾಲಾವೊಕನ ತುನೆ ವಳೌಸ ದೆಕ ತೆ ಸಂತಾನವಾಲಾ ಸರಮ ನೈಸೊ ವಾಲಾ ಹಟಾ ಕರಾಲಾ ಥಯಲ ರಹವಸ; ತೆ ದಂಗೊ ಕರಾಲಾ ವಂಶನಾ ವ್ಹೈ, ಯಕ್ಕ ವಕ್ಹತ ನೈ ಐಕ್ಯಾಮ; ವರಿ ಐಕ್ಯಾಮ ಯಕ್ಕ ಪ್ರವಾದಿ ವಚ್ಮಾ ಛೆ ಕೈನ ತ್ಯುನಾ ವಚ್ಮಾ಼ ತಿಳದಿದಲಿವಸ.
ಮನಕ್ಹನಾ ದಿಕ್ರಾ, ತ್ಯುನೆ ಸು ಕದ್ಯಾತಬಿ ಭುಚ್ಕುನಕೊ ತ್ಯುನೆ ತುನೆ ದಿಕ್ಕಾರ ಕರಿನ ಠುಕ್ರಾವಸ ಇಚ್ಚಿಯೊನಾ ವಚ್ಮಾ ರ್ಹೌ ಕೈನ ತ್ಯುನಾ ವಚ್ಮಾ ರೈತಬಿ ತ್ಯುನೆ ದಂಗೊ ಕರಾಲಾ ರ್ಹಯಾತಬಿ ಭುಚ಼ಕುನಕೊ; ತ್ಯುನೆ ಐಕ್ಯಾ ನೈ ಐಕ್ಯಾಮ ತು ಮಾರಾ ವಾತೊನೆ ತ್ಯುನೊನೆ ಕೌಜ಼; ತ್ಯುನೆ ದಂಗೊ ಕರಾಲಾ ವ್ಹೈ.
ತೆ ನೈಸೊ ತೆ ಮನಕ್ಹನಾ ದಿಕ್ರಾ, ಮಿ ತುನೆ ಕವಾನಾ ವಾತೊ ಐಕ; ಅವಿದೆಯ ಥಯಲ ತೆ ವಂಶನಿಂಗತ ತು ಅವಿದೆಯೆ ಥೌ ನಕೊ; ಮಿ ದಿವಾನು ಮ್ಹೊಡು ಕ್ಹೊಲಿನ ಕ್ಹೈ ಪಡ ಕೈನ ಕದ್ಯೊ. ಇಮ್ಮ ಮಿ ದೆಕಾನಾಹುತಿ ಯಕ್ಕ ಹತ ಮಕನ ಫೈಲಾಯಲ ವ್ಹತ್ತು, ಹಮ್ನಾ ತಿಮಾ ಪುಸ್ತಕನಿ ಸುರಳಿ ದಿಕ್ಹ್ಯೊ; ತೆ ಸುರಳಿನೆ ಮಾರಾ ಕ್ಹಾಮೊ ಕ್ಹೊಲ್ಯೊ; ತಿನಾ ಭಂಭೆ ಬಗಲ ಲಿಕ್ಕಲ ವ್ಹತ್ತು; ತಿಮಾ ಲಿಕ್ಕಲ ಗೊಳಾಡಾನು, ದುಖ ದುಕಕ್ಹು ಅಡ್ಡಾನು ರವಾ ಧವಾನು ಉಳ್ಳಾಡ್ಯಾನು ಎ ಕ್ಹಾರು ಬರ್ದಲ ವ್ಹತು.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.