ಯಜಕೆಲಾ 3

1ತೆ ಮನೆ ಅಮ್ಮ ಕದ್ಯೊ ಮನಕ್ಹನಾ ದಿಕ್ರಾ ತುನೆ ಮಳಲ ಆ ಸುರಳಿನೆ ತಿಳದಿಲೆ; ಅಮಾ ರ‍್ಹಯಲ ಸಂಗತಿಯೊನೆ ಇಸ್ರಾಯಲೊನಾ ವಂಶವಾಲಾವೊನೆ ಕೆ. 2ತಿನಾ ಹುತಿ ಮಿ ಮ್ಹೊಡು ಕ್ಹೊಲ್ತಾಮಾ ತೆ ಸುರಳಿ ಮನೆ ಕ್ಹಲಾಯೊ 3ತೆಳಾಮಾ ತೆ ಮನೆ ಮನಕ್ಹನಾ ದಿಕ್ರಾ, ಮಿ ದಿವಾನು ಆ ಸುರಳಿನೆ ಕ್ಹೈನ ಪೆಟ ಭರಲೆ ಕೈನ ಕತಾಮಾ ತಿನೆ ಕ್ಹೈ ಪಡೊ; ತೆ ಮಾರಾ ಮ್ಹೊಡಾಮಾ ಜೆನ ನಿಂಗತ ಗಳು ವ್ಹತ್ತು. 4ಪಾಚಲ್ತೊ ತೆ ಮನೆ ಅಮ್ಮ ಕದ್ಯೊ ಮನಕ್ಹನಾ ದಿಕ್ರಾ ತು ಇಸ್ರಾಯೆಲನಾ ವಂಶವಲಾವೊಕನ ಗೈನ ಮಿ ತಿಳಾಸಾನಾ ವಾತೊ ತ್ಯುನೆ ಕೆ. 5ಮಿ ತ್ಯುನೆ ಇಸ್ರಾಯಲಾನಾ ವಂಶವಾಲಾವೊಕನ ವಳೌಸ ತ್ರಾಸ ಥಯಲ ಬಿಜಾ಼ ಜಾ಼ತವಾಲಾ ಮನಕ್ಹೊಕನ ನೈ ವಳಾತೊ, ನೈ, 6ತ್ಯುನೆ ತಿಳಸೈ ನೈಸೊ ಕಷ್ಟ ಥಯಲ ಅನ್ಯ ಬಾಷಾ ಬೊಲಾಲಾ ಬಿಜಾ಼ ಬಿಜಾ಼ ಮನಕ್ಹೊಕನ ತು ವಳಾಯಲವಾಲೊ ನ್ಹವೈ. ಹವಾವೊ ಕನ ಮಿ ತ್ಯುನೆ ವಳಾಯಲ ಪಕ್ಷಮಾ ತ್ಯುನೆ ರೈತಬಿ ಕ್ಹರಿಮಾಜ ತಾರಾ ವಾತೊನೆ ಐಕಾಡಾತಾ. 7ಇಸ್ರಾಯಲನಾ ವಂಶವಾಲಾ ತುನೆಬಿ ಐಕ್ತಾ ನೈ; ತ್ಯುನೆ ಮನೆಬಿ ಐಕ್ತಾ ನೈ; ತ್ಯುನೆ ಕ್ಹಾರಾ ಸರಮ ನೈಸೊವಾ ವ್ಹೈ ಹಟಾ ಕರಾಲಾ ಥಯಾಸತೊ. 8ದೆಕ, ಮಿ ತ್ಯುನಾ ಘಟ್ಟ ಮನಸೊನೆ ವಿರುದ್ದ ತಾರು ಮನಸ ಘಟ್ಟ ಕರ‍್ಯೊಸ. ತ್ಯುನೆ ಹಟಮಾರಿ ರ‍್ಹಯಲಕ್ಹು ತುನೆಬಿ ಮಿ ಹಟಮಾರಿ ಕರ‍್ಯೊಸ. 9ತಾರು ಮನಸ ದಗ್ಡಾತಿಬಿ ಘಟ್ಟ ವರಿ ಹಿರಾ ಅಕ್ಲು ಘಟ್ಟ ಕರ‍್ಯೊಸ; ತ್ಯುನೆ ದಂಗೊ ಕರಾಲಾ ವ್ಹೈ ತ್ಯುನೊನೆ ಬುಚ್ಕು ನಕೊ; ಡೊಳಾ ಕಾಡಿನ ದೆಕ್ಯಾತಬಿ ಭುಚ್ಕು಼ ನಕೊ.

10ತೆ ನೈಸೊ ತೆ ಮನೆ ಅಮ್ಮ ಕದ್ಯೊ ಮನಕ್ಹನಾ ದಿಕ್ರಾ, ಮಿ ತುನೆ ಕವಾನಾ ವಾತೊನೆ ಕಾನೆ ಐಕಿನ ಮನಸ್ಸಮಾ ಮ್ಹೆಲ್ಲೆ. 11ಬಂದಿ ಥಯಲ ತಾರಾ ಸ್ವಂತ ಮನಕ್ಹೊಕನ ಗೈನ ತ್ಯುನೆ ಐಕಾದೆ ಯಾ ನೈ ಐಕಾದೆ ತ್ಯುನೊನೆ ಕೈನ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಕೈನ ತ್ಯುನೊನೆ ಕೆ.

12ತೆಳಾಮಾ ಕ್ಹುದಾನಿ ಆತ್ಮಾ ಮನೆ ಉಚೈಲಿನ ಗಯಲ್ಪರ ಮಹಿಮಾಕ್ಹು ಭರಲ ಯಹೊವಾನೆ ತಿನಾ ರ‍್ಹವಾನಾ ಜ಼ಗಾಮಾ ಸ್ತೊತ್ರಾ ಥಾವಾದೆ ಕೈನ ಜೊ಼ರ ಅವಾಜ಼ ಮಾರಾ ಪಾಚು ಐಕೊ ಆಯು. 13ಜಿವಿಯೊನಾ ರೆಕ್ಯಾ ಯಕ್ಕನೆ ಯಕ್ಕ ಲಾಗಾನಿ ಅವಾಜ ತ್ಯುನಾ ಬಾಜು಼ಮಾ ಗೊಲ ಗೊಲ ಫರಾನಿಯೊ ಗಾಲಿಯೊನಾ ಅವಾಜ಼ ಅಮ್ಮ ಗಿರ ಕವಾನಿ ಜೊ಼ರ ಬೊಕಂಪ ನಿಂಗತ ಅವಾಜ ಮಾರಾ ಕಾನೆ ಪಡಿ. 14ಕ್ಹುದಾನಿ ಆತ್ಮಾ ಮನೆ ಉಚೈಲಿನ ದುರ ಗೈ. ಚಿಂತಾ ಕರ್ತೊ ವೈಥೈ ಪಡತೊ ಮನಸ್ತಾಪ ಪಡ್ತೊ ಚಾಲ್ಯೊ ವರಿ ಯೊಹೊವಾನೊ ಹತ್ತ ಮಪರ ವ್ಹತೊ. 15ತೆಳಾಮ ಬಂದಿ ಥೈನ ಲಿಂಗೈನ ಕೆಬಾರ ನದಿನಾ ನಜಿಕ ತೆಲ ಆಬಿಬಿಮಾ ರ‍್ಹಯಲ ವಾಲಾವೊಕನ ಐನ ತ್ಯುನೆ ಬೈಟಲ ಜ಼ಗಾಕನ ಐನ ಬೈಟ್ಯೊ; ಕ್ಹಾತ ದಿನ ತ್ಯಾಜ ತ್ಯುನಾ ವಚ್ಮಾ಼ಜ಼ ಸ್ತಬ್ದ ಥೈನ ರ‍್ಹೈ ಪಡ್ಯೊ.

ಕರ್ತಾ ಹೆಜಿಕೆಲನೆ ಕೈದಾಲೊ ಕೈನ ನೆಮ್ಸಲ

16ಕ್ಹಾತ ದಿನ ಥಯಲ್ಪರ ಯಹೊವಾ ಆ ವಾತ ಮನೆ ಕದ್ಯೊ. 17ಮನಕ್ಹನಾ ದಿಕ್ರಾ, ಮಿ ತುನೆ ಇಸ್ರಾಯಲೊನಾ ವಂಶನಾ ಉಪ್ಪರ ಕಾಯ್ದಾಲೊ ವ್ಹೈ ಕೈನ ನೆಮಸ್ಯೊಸ. ಇಮ್ಮ ಮಾರಾ ಮ್ಹೊಡಾಕ್ಹು ನಿಕ್ಹಳಾನಾ ವಾತನೆ ಐಕಿನ ಮಾರಾಹುತಿ ತ್ಯುನೊನೆ ಎಚ್ಚರ ಕರ. 18ಮಿ ದುಷ್ಟನೆ ‘ಕ್ಹರಿಮಾಜ಼ ಮರಸಿ ಕೈನ ಕತಾಮಾ ತು ತ್ಯುನೆ ಹುಶಾರ ಕರಾನು ತೆ ತಿನಾ ಕೆಟ್ಟ ವಾಟ ಛೊಡಿನ ತಿನಾ ಜಿಂದಗಿ ವಚಡಲ್ಯು ಕೈನ ತಿನೆ ಗ್ಯಾನ ಕದ್ಯಾವಾಚಿ ರ‍್ಹಯೊಮ ತೆ ದುಷ್ಟ ತಿನಾ ಪಾಪಕ್ಹು ಮರಾಲೊ ವ್ಹೈ; ತಿನಾ ಮರಣನೆ ತುಜ಼ ಕಾರಣ ಥಾಸಿ. 19ತು ದುಷ್ಟನೆ ಹುಶಾರ ಕರ‍್ಯಾಮ ತೆ ತಿನಾ ದುಷ್ಟತನನಾ ಕೆಟ್ಟ ವಾಟನೆ ನೈ ಛೊಡ್ಯೊಮ ತಿನಾ ಅಪರಾಧಕ್ಹು ಮರಸ; ತು ತಾರಿ ಜಿಂದಗಿ ವಚಾ಼ಡಲೆಸಿ. 20ತೆ ನೈಸೊ ನಿತಿವಂತವಾಲೊ ತಿನಿ ನಿತಿನೆ ಛೊಡಿನ ಅನಿತಿ ಕರಿನ ಮಿ ತಿನಾ ಕ್ಹಾಮೊ ಒಡ್ಡಲ ಆಟಂಕನೆ ಪಾಡ್ಯೊಮ ತೆ ಕ್ಹರಿಜ಼ ಮರಿಜಾ಼ವಸ; ತು ತಿನೆ ಹುಶಾರ ಕರಿನ ಗೈಯಲಕ್ಹು ತೆ ತಿನಾ ಪಾಪಕ್ಹು ಮರುಲಾಗ್ಯೂ. ತೆ ಕರಲ ಚೊ಼ಕಾ ಕಾಮೊ ಲೆಕ್ಕಾನೆ ನೈ ಆತು; ತಿನಾ ಮರಣಕ್ಹು ತುನೆ ಮುಯ್ಯಿ ತಿರಸುಸ. 21ತು ಶಿಷ್ಟನೆ ಪಾಪ ಕರಲ ನಿಂಗತಜ಼ ಹುಶಾರ ಥಯಲ್ಪರ ತೆ ಪಾಪ ಕರ‍್ಯಾವಾಚಿ ಗಯಾಮ ಹುಶಾರ ಥಯಲ ಕಾರಣ ಜಿವಕ್ಹು ಉಗ್ರಸ; ತು ತಾರಾ ಜಲಮ ವಚಾ಼ಡೆಲಸಿ.

ಯೆಜಿಕೆಲನೆ ಬೊಲು ನೈಸೊ ಥಾವಾನು

22ತೆ ಜ಼ಗಾಪರ ಮಿ ಯಹೊವಾನಾ ಹಸ್ತನಾ ಸ್ಪರ್ಶಕ್ಹು ತೆ ಮನೆ ತು ಉಟಿನ ಖಾಲಿ ಜ಼ಗಾ ಜಾ಼, ತ್ಯಾ ಮಿ ತಾರಾಕ್ಹಾತೆ ಬೊಲುಸ ಕೈನ ಕದ್ಯೊ. 23ತೆಳಾಮ ಮಿ ಉಟಿನ ಖಾಲಿ ರ‍್ಹಯಲ ಜ಼ಗಾಪರ ಗಯಲ್ಪರ ಕೆಬಾರ ನದಿನಾ ನಜಿಕ ಮನೆ ಮಹಿಮಾ ಅದ್ಬುತ ದರ್ಶನ ಥಯಲ ನಿಂಗತ ಆಹಾ, ತ್ಯಾ ಯಹೊವಾನೆ ಮಹಿಮಾ ಪ್ರತ್ಯೆಕ ಥಯು. ತೆ ದೆಕಿನ ಡಬ್ಬ ಪಡ್ಯೊ. 24ತೆಳಾಮಾ ಕ್ಹುದಾನಿ ಆತ್ಮಾ ಮಾರಾಮಾ ಐನ ಮಿ ಉಟಿನ ಹುಬ್ರಯಲ ನಿಂಗತ ಕರಲ್ಪರ ತೆ ಮನೆ ಅಮ್ಮ ಕದ್ಯೊ ತು ಗೈನ ತಾರಾ ಘರಮಾ ದಡೈಲೆ. 25ಮನಕ್ಹನಾ ದಿಕ್ರಾ ಹಮ್ನಾ ತಾರಾ ಮನಕ್ಹೊಜ಼ ತುನೆ ಭಾಂದಿನ ಘಾಲಸ, ತು ಹೈತಿ ಫರತೊ ನೈ. 26ತೆ ನೈಸೊ ತಾರಿ ಜಿಬ್ಬಬಿ ಸೆದಿನ ಗೈನ ತು ಮೂಕ ಥಯಲ ನಿಂಗತ ಕರುಸ; ತು ತ್ಯುನೊನೆ ದೆಕಲ ರಶಿ ತ್ಯುನೆ ದಂಗೊ ಕರಾಲಾ ವಂಶವಾಲಾ ವ್ಹೈ. 27ಮಿ ತಾರಾ ಕ್ಹಾತೆ ವರಿ ಬೊಲಾಲಾನಾ ಕಾಲಮಾ ತಾರು ಮ್ಹೊಡು ಕ್ಹೊಲುಸ; ತು ತೆಳಾಮ ತ್ಯುನೊನೆ ಕರ್ತಾಥಯಲ ಯಹೊವಾ ಅಮ್ಮ ಕವಸ ಕೈನ ಕೌ; ಐಕಾಲೊ ಐಕಾದೆ. ನೈಐಕಾಲೊ ಛೊಡಾದೆ; ಕಾ ಕದ್ಯಾಮ ಫರಿ ಪಡಾಲಾ ಮನಕ್ಹೊ ವ್ಹೈ.