Sikkiligar Bible
ಯಜಕೆಲಾ 1
ಕ್ಹುದಾನಿ ಸಿಂಹಾಸನ
ಕೆಬಾರ ನದಿನಾ ನಜಿಕ ಗುಲಾಮ ಥೈನ ರ್ಹಯಲ ಯೆಹುದ್ಯೊನಾ ವಚ್ಮಾ ಮಳಲಕ್ಹು ಮೂವತ್ತನಾ ವರಕ್ಹನಾ ಚಾರವಾ ಮ್ಹೈನಾನಾ ಪಾಂಚ಼ವಾ ದಿನ್ನೆ ಹಬಾಳ ಕ್ಹುಲಿನ ಮನೆ ದೆವದರ್ಶನವೊ ಥಯಾ. ರಾಜೊ಼ ಥಯಲ ಯೆಹೊಯಾಖಿನ ಬಂದಿ ಥೈನ ಪಾಂಚ಼ವಾ ವರಕ್ಹನಾ ಚಾರವಾ ಮ್ಹೈನಾನಾ ಪಾಂಚ಼ವಾ ದಿನ್ನೆ ಯಹೊವಾನಿ ವಾಕ್ಯಾ ಕಸ್ದಿಯ ದೆಶನಾ ಕೆಬಾರ ನದಿನಾ ನಜಿಕ ಬುಜಿನು ದಿಕ್ರೊ ಯಾಜಕ ಥಯಲ ಯೆಹೆಜ್ಕೆಲಾನೆ ಸಾಕ್ಷಿ ಥೈನ ದಿಕ್ಹ್ಯು; ತ್ಯಾ ಯಹೊವಾನೊ ಹತ್ತ ಮನೆ ಮುಟ್ಟಲಹುತಿ ತೆಳಾಮಾ ತಿಮಾ ತಾಕತ ಐ.
ಹಮ್ನಾ ಮಿ ದೆಕಲ ದರ್ಶನ ಅಮ್ಮ ವ್ಹತೊ. ಉತ್ತರ ದಿಕ್ತೊ ಜೊ಼ರವಾರೊ ಐನ, ಛೊಡೆವಾಚಿ ಧಗ-ಧಗ ಲಾಗಲ ಆಗ ಮ್ಹೊಟು ಮ್ಹಾಡ ದಿಕ್ಹ್ಯು. ತಿನಾ ಸುತ್ತೆಬಿ ಮಿಂಚ ದಿಕ್ಹಿ, ತಿನಾ ವಚ್ಮಾ ತೆ ಆಗನಾ ವಚ್ಮಾ ಕ್ಹೊನಾನು ಉಜಾಲಾ ನಿಂಗತ ಉಟ್ಯು. ತಿನಾ ವಚ್ಮಾ಼ತು ಚಾರ ಜಿವಿಯೊನಾ ಆಕಾರೊ ದಿಕ್ಹಿನ ಆಯಾ. ತ್ಯುನಾ ರುಪೊ ಮನಕ್ಹನಾ ರುಪೊ ನಿಂಗತ ವ್ಹತ್ತಾ.
ಯಕ್ಕ ಯಕ್ಕನೆ ಚಾರ ಮ್ಹೊಡಾ ವರಿ ಚಾರ ರಕ್ಯಾ ವ್ಹತ್ತಾ. ತ್ಯುನಾ ಪಗೊ ಸಿದಾ ವ್ಹತ್ತಾ ಹೆಜ್ಜಿವೊ ಗೈನಾ ಬಚ್ಚಾ಼ನಾ ಪಗೊ ನಿಂಗತ ವ್ಹತ್ತಾ. ತಿಕ್ಕಲ ಪಿತ್ತೊಳ ನಿಂಗತ ಮಿಂಚಾಡಾತಾ. ಯಕ್ಕ ಯಕ್ಕ ಜಿವಿನೆ ಚಾರ ಪಾರ್ಶ್ವವೊಮಾನಾ (ಬಾಜು಼ವೊಮಾ) ರೆಕ್ಯಾವೊನೆ ಮನಕ್ಹನಾ ಹತೊ ನಿಂಗತ ಹತೊ ವ್ಹತ್ತಾ; ತೆ ಚಾರೆ ಜಿವಿಯೊನಾ ಮ್ಹೊಡಾವೊ ರೆಕ್ಯಾವೊ ಕಿಮ್ಮ ವ್ಹತಾ ಕದ್ಯಾಮ ರೆಕ್ಯಾವೊ ಯಕ್ಕ ಯಕ್ಕನೆ ಲಾಗಾಡಾತಾ; ತೆ ಜಿವಿಯೊ ಕ್ಹಾಮಾಮಾಬಿ ಫರೆನೈಸೊ ಗೈನ ಮ್ಹೊಡಾ ಥೈನ ಚಾ಼ಲ್ಯಾತಾ.
ಮ್ಹೊಡಾ ಕಿಮ್ಮ ವ್ಹತ್ತಾ ಕದ್ಯಾಮ ಯಕ್ಕ ಯಕ್ಕನೆ ಕ್ಹಾಮಲ್ಯು ಮ್ಹೊಡು ಮನಕ್ಹನು ವ್ಹೈ, ಸಿದಾಬಗಲನು ಮ್ಹೊಡು ಸಿಂಹಾಡಾನು ವ್ಹೈ, ರೊಡ್ಡಾಬಗಲನು ಮ್ಹೊಡು ಬೈಲನು ವ್ಹೈ, ಪಾಚಲ್ಯು ಮ್ಹೊಡು ಗರುಡ ಪಕ್ಷಿನು ವ್ಹೈ, ತ್ಯುನಾ ರೆಕ್ಯೆವೊ ಉಪ್ಪರ ಹರಡಲ ರ್ಹೈ, ಯಕ್ಕ ಯಕ್ಕ ಜಿವಿನಾ ರೆಕ್ಯಾವೊ ಬಾಜು಼ ರ್ಹಯಲ ಜಿವಿನೆ ಲಾಗಾಡಾತಾ , ಹಜಿ ಬೆ ರೆಕ್ಯಾ ಅಂಗನೆ ಝಾಕ್ಯಾತಾ. ಆ ಜಿವಿಯೊ ಕ್ಹಾರಾ ಶಿದಾ ಮ್ಹೊಡಾ ಥೈನ ಚಾ಼ಲ್ಯಾತಾ, ಕ್ಹುದಾನಿ ಆತ್ಮಾ ಚ಼ಲಾಯಲ ಜ಼ಗಾಯೆ ಗಯಾ; ಫರೆವಾಚಿ ಕ್ಹಾಮಾ ಗಯಾ;
ತೆ ಜಿವಿಯೊನಾ ವಚ್ಮಾ ಅದ್ಬುತ ಕಾಂತಿ ಬಳಾನಾ ಕೆಂಡಾವೊ ಪಂಜುವೊ ನಿಂಗತ ದಿಕ್ಹ್ಯು; ತೆ ಜಿವಿಯೊನಾ ವಚ್ಮಾ ಪ್ಹರಾಡಿಯೊತ್ಯೊ ತೆ ಆಗ ಜೊ಼ರ ಥಾವಾಡಿತಿ, ತಿಮಾತು, ಚಿಣಕಿಯೊ ಚಾ಼ಲ್ಯಾತಾ. ತೆ ಜಿವಿಯೊ ಮಿಂಚ ನಿಂಗತ ಅಗಾಬಿ ಪಾಚಾ಼ಬಿ ಸರಕಾಡಿತಿಯೊ.
ದೆಕ, ಮಿ ಹಮ್ನಾ ತೆ ಜಿವಿಯೊನೆ ದೆಕ್ತಾಮಾ ಯಕ್ಕ ಯಕ್ಕ ಜಿವಿನಾ ಬಾಜು಼ಮಾ ಯಕೆಕ ಗಾಲಿಯೊ ದಿಕ್ಹಿಯೊ. ತೆ ಗಾಲಿಯೊ ರಂಗ ಕಿಮ್ಮ ವ್ಹತ್ತು ಕದ್ಯಾಮ ತಿನಾ ವರ್ಣ ಪಿತ ರತ್ನನಾ ನಿಂಗತ ಥಳ-ಥಳ ಮಿಂಚಾ಼ಡಿತಿಯೊ. ಯಕ್ಕ ಗಾಲಿಮಾ ಹಜಿಯಕ್ಕ ಗಾಲಿ ಅಡ್ಡ ಥೈನ ರಚನೆ (ತಯ್ಯಾರ) ನಿಂಗತ ವ್ಹತ್ತು; ತೆ ಚಾರೆ ಗಾಲಿಯೊ ಯಕ್ಕ ಮಾದರಿ ಥಯುತು. ತೆ ಫರ್ತಾ ಟೈಮ್ಮಾ ಚಾರೆ ಬಗಲ ಕಯಾ ಬಗಲ ಥೈತಬಿ ಫರಾಡಾತಾ; ಮ್ಹೊಡಾ ಕ್ಹಾಮಾತಾ ಫರೈಲಿನ ಚಾಲ್ಯಾನ್ಹೊತಾ. ಗಾಲಿಯೊನಾ ಸುತ್ತೆ ಬಗಲಬಿ ಉಚ್ಚುಥಯಲಬಿ ಭಯಂಕರಥಯಲ ಥಯುತು; ಆ ಭಾಗನಾ ಕ್ಹಾರಾ ಬಗಲಬಿ ಘನ್ನಾ ಡೊಳಾ ವ್ಹತ್ತಾ; ಜಿವಿಯೊ ಅಗಾ ಜಾ಼ತಾಮಾ ಗಾಲಿಯೊ ತಿನಾ ಬಾಜು಼ಮಾ ಅಗಾ ಚಾ಼ಲ್ಯಾತಾ; ತೆ ಜಿವಿಯೊ ಜಿಮಿನತಾ ಉಪ್ಪರ ಉಟ್ತಾಮಾ ಗಾಲಿಯೊಬಿ ಉಟಾಡಿತಿಯೊ; ಕ್ಹುದಾನಿ ಆತ್ಮಾ ಕಿ ಲಿಂಜಾ಼ವಸ ತ್ಯಾ ಗಯಾ; ಜಿವಿಯೊನೆ ಆತ್ಮಾ ಗಾಲಿಯೊಮಾ ರ್ಹಯಲ ಕಾರಣಕ್ಹು ಗಾಲಿಯೊ ತಿನಾ ಕ್ಹಾತೆಜ಼ ಉಟಾಡಿತಿಯೊ. ತ್ಯುನೆ ಅಗಾ ಜಾ಼ತಾಮ ಆಬಿ ಅಗಾ ಜಾ಼ವಸ, ತೆ ಹುಬ್ರೆನ ಜಾ಼ತಾಮಾ ಆಬಿ ಹುಬ್ರೈನ ಜಾ಼ತಾತಾ,ತೆ ಜಿಮಿನತಾ ಉಪ್ಪರ ಉಟ್ತಾಮಾ ಗಾಲಿಯೊಬಿ ತಿನಾ ಕ್ಹಾತೆಜ಼ ಉಟತಿತಿಯೊ; ಕಾ ಕದ್ಯಾಮ ಜಿವಿಯೊನಾ ಆತ್ಮಾ ಗಾಲಿಯೊಮಾಬಿ ವ್ಹತ್ತಿ.
ಭಿಕರ ಥಯಲ ಬರಪನಾ ಹೆಂಟಾ ನಿಂಗತ ಧಗ ಧಗ ಲಾಗಾನಿ ಯಕ್ಕ ತರಾನು ಜಿಮಿನುತು ತೆ ಜಿವಿನಾ ಮಾತಾನಾ ಉಪ್ಪರ ಗ್ಹಾಲಲ ವ್ಹತ್ತು. ತಿನಾ ಹೆಟಾ ಜಿವಿಯೊನಾ ರೆಕ್ಯಾವೊ ಮಟ್ಟಸ ಥೈನ ಅಗು ಕರಲ ಯಕ್ಕನೆ ಯಕ್ಕ ಲಾಗಾಡಾತಾ; ತೆ ನೈಸೊ ಯಕ್ಕ ಯಕ್ಕ ಜಿವಿನೆ ಅಂಗ ಝಾಕಿಲಿವಾನೆ ಬೆ ಬೆ ರೆಕ್ಯಾ ವ್ಹತ್ತಾ. ತೆ ಅಗಾ ಜಾ಼ತಾಮಾ ರೆಕ್ಯಾವೊನೊ ಆವಾಜ ಪಾನಿನಾ ಪ್ರವಾಹನಾ ಘೊಶನಿಂಗತ, ಸರ್ವಶಕ್ತಾನಿ ಅವಾಜ ನಿಂಗತ, ಆರ್ಭಟಾನು ಸೈನ್ಯಾನಾ ಅವಾಜ಼ ನಿಂಗತ ಮನೆ ಐಕು ಆಯು; ತೆ ಹುಬ್ರೆತಾಮಾ ರೆಕ್ಯಾವೊ ಮಡಚಿಲಿವಾಡಿತಿಯೊ. ತ್ಯುನಾ ಮಾತಾನಾ ಉಪ್ಪರ ರ್ಹಯಲ ಹಬಾಳಮಾತು ಯಕ್ಕ ಆವಾಜ ಕಾನೆ ಪಡ್ಯು. ಜಿವಿಯೊ ಹುಬ್ರೆತಾಮಾ ರೆಕ್ಯಾವೊ ಮಡಚಿಲಿವಾಡಿತಿಯೊ.
ತ್ಯುನಾ ಮಾತಾನಾ ಉಪ್ಪರ ಇಂದ್ರ ನಿಲಮಣಿ ನಿಂಗತ ಮಿಂಚಾನು ಸಿಂಹಾಸನನಾ ದಿಕ್ಹ್ಯು; ತಿನಾ ಉಪ್ಪರ ಮನಕ್ಹನು ರುಪನಿಂಗತ ಯಕ್ಲೊ ಬೈಟ್ಯೊತೊ. ಕಂಬರ ನಿಂಗತ ದಿಕ್ಹಾನು ತಿನಾ ವಚ್ಮಾ ಭಾಗತು ಉಪ್ಪರ ಕ್ಹೊನಾ ನಿಂಗತ ಮಿಂಚಾ಼ಡ್ಯುತು ಧಗಧಗ ಸುತ್ತೆಬಿ ಆಗಬಿ ತೆ ರುಪಮಾ ಕ್ಹಾರಾ ಘನ್ನು ಉಜಾಲು ಥಾವಸ ಕೈನ ರ್ಹವಾನು ಅದ್ಬುತ ಮಿಂಚ ದೆಕ್ಯೊ; ಕಂಬರ ನಿಂಗತ ದಿಕ್ಹಾನು ತಿನಾ ವಚ್ಮಾನಾ ಜ಼ಗಾತಾ ಹೆಟಾ ಆಗ ಲಾಗಾಡಿತಿ ಕವಾನು ಮ್ಹೊಟು ಮಿಂಚಾನು ದೆಕ್ಯೊ; ವರಿ ಉಜಾಳು ತಿನಾ ಸುತ್ತಿ ಲಿದ್ಯುತು. ಪಾನಿನಾ ದಿನಮಾ ಮೆಘ ಮಂಡಲನಾ ಕಾಮನ ಬಿಲ್ಲ ಮಿಂಚಾನಾ ನಿಂಗತ ತಿನಾ ಸುತ್ತೆಬಿ ಉಜಾಳು ಪಡಿಗಯು. ಅಮ್ಮ ಯಹೊವಾನಿ ಮಹಿಮಾ ಅದ್ಬುತ ದರ್ಶನ ಥಯು.
ಕ್ಹುದಾ ಹೆಜಿಕೆಲನೆ ಪ್ರವಾದಿ ಥಾವಾನೆ ಬಲಾಯಲ
ಆ ಡೊಳೆ ಪಡ್ತಾಮಾ ಮಿ ಡಬ್ಬ ಪಡಿನ ಬೊಲಾವಾಲಾನಾ ಅವಾಜ಼ ಐಕ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.