Sikkiligar Bible
ಪ್ರಸಂಗಿ 12
ತ್ರಾಸನಾ ದಿನೊ ಆವಾತಿ ಪೈಲಾಜ಼, " ಇಮಾ ಮನೆ ಕ್ಹುಶಿ ನತ್ತಿ” ಕೈನ, ತು ಕವಾನಾ ವರಕ್ಹೊ ನಜಿಕ ಆವಾತಿ ಪೈಲಾಜ಼, ಜಾಂಜಿಮಾನ ರ್ಹತಾಮಾಜ಼ ತಾರಾ ಸೃಷ್ಟಿ ಕರ್ತಾನೆ ಸ್ಹೆಂ ಕರ. ಸುರ್ಯೊ, ಚಂದಪ್ಪಾ ವರಿ ಚಿಕ್ಕಿಯೊ ಅಂದಾರು ಥಾವಾತಿ ಪೈಲಾಜ಼, ಪಾನಿನಾ ಮ್ಹಾಡೊ ಫರಿನ ಆವಸ. ತಾಕತವರ ಥಯಲ ತಾರಾ ಪಗೊ ವಾಕಾ ಥಾವಸ, ದಾತೊ ಉದರಿನ ಚಾ಼ವಾನು ಕಾಮ ಹುಬ್ರೈ ಜಾ಼ವಸ. ಕಿಂಡಕಿಯೊ ನಿಂಗತ ರ್ಹಯಲ ಡೊಳಾ ಮಂಕ ಥಾವಸ. ಕಾನೊ ಕ್ಯುಡಾ ಥೈನ ಒಣಿಯೊನಿ ಅವಾಜ಼ ಐಕು ಆತು ನೈ. ವಾಟಾನು ಅವಾಜ಼ ಬಾರಿಕ ಥೈನ ಚುಮ್ಣಿನಿ ಅವಾಜ಼ ನಿಂಗತ ನ್ಹಾನು ಥಾವಸ ವರಿ ವಾಟಾಲಾವೊನಾ ಗಿದ್ದ ಬಾರಿಕ ಥೈ ಜಾ಼ವಸ. ತೆನೈಸೊ ತೆ ದಿನೊಮಾ ಮನಕ್ಹನೆ ದಿನ್ನೆನೆ ದೆಕ್ಯಾರೆ ಭೆಂ, ವರಿ ವಾಟಮಾ ತ್ರಾಸ ವ್ಹೈ, ಬಾದಾಮನು ಝಾಢ ಫುಲ್ಲೊ ಲಿಂಗತ ಮಾತಾನಾ ಬಾಲೊ ಧೊಳಾ ಥಾವಸ, ಚಿಡ್ಡೊಬಿ ವಜ್ಜೊ ಥಯಲ ರ್ಹವಸ, ಆಸ ಕುಂದಸ. ಮನಕ್ಹ ತಿನಾ ಹಮೆಶಾ ರ್ಹವಾನೆ ಜ಼ಗಾಯೆ ಜಾ಼ವಸ, ಗೊಳಾಟವಾಲಾ ಬಿದಿಮಾ ಫರಸ. ಇನಾ ಉಪ್ಪರ ರುಪ್ಪಾನಿ ಸರಾಬಿ ಕಿತ್ತಯಿ ಜಾ಼ವಸ, ಕ್ಹೊನಾನೊ ಕುಂಡೊ ಚ಼ಪ್ಟೈ ಜಾ಼ವಸ, ಹಂಡ್ಲುಬಿ ಬುಗ್ಗೆನಾ ಕ್ಹಾಮು ಫುಟಿಜಾ಼ವಸ, ಇರನಿ ರಾಟಿ ತುಟಿ ಜಾ಼ವಸ, ಮಾತಿ ಜಿಮಿನೆ ಮಳಿನ ರ್ಹಯಲ ನಿಂಗತ ಥಾವಸ, ಆತ್ಮಾ ತಿನೆ ದಯಾ ಕರಲ ಕ್ಹುದಾಕನ ಸೆರಸ. "ವ್ಯರ್ಥಜ಼ ವ್ಯರ್ಥ ವ್ಹೈ, ಪೂರಾಜ಼ ವ್ಯರ್ಥ” ಕೈನ ಪ್ರಸಂಗಿ ಕವಸ.
ಲಾಸ್ಟನಾ ವಾತೊ
ಪ್ರಸಂಗಿ ಗ್ಯಾನಿ ರ್ಹಯಲಕ್ಹು, ಮನಕ್ಹೊನೆ ತಿಳವಳಿಕೆ ಕತೊ ಆಯೊ, ಘನ್ನಾ ಗ್ಯಾನಿಯೊನೆ ದ್ಯಾನ ಕರಿನ ಪರಿಕ್ಷಾ ಕರಿನ ಚೊ಼ಕು ಕರ್ಯೊ. ತೆನೈಸೊ ಪ್ರಸಂಗಿನಾ ಯಥಾರ್ಥ ನಡತೆಕ್ಹು ಕರಲ ಒಪ್ಪಲ ಕ್ಹರಿನಾ ವಾತೊನೆ ಹುಡಕಿನ ಇನಿಲಿನ ಬರ್ದ್ಯೊ. ಗ್ಯಾನಿಯೊನಾ ವಾತೊ ಕಾಟಾನಿಯೊ ಕಂಟಿಯೊ, ಚೊಕಾ ವಾಕ್ಯಾವೊ ಬಿಗಿ ಥೈನ ಮಾರಲ ಮೂಳಾವೊ ಎಬೆ ಯಕ್ಲಾಜ಼ ಕುರಬಾಕ್ಹು ದಿವಾ ಲಗಾಡಾಸ. ಮಾರಾ ದಿಕ್ರಾ, ತೆನೈಸೊ ಉಗ್ರಲಮಾ ಹುಶಾರಕ್ಹು ರ್ಹೆ. ಘನಾ ಬುಕ್ಕೊನಾ ರಚನೆನೆ ಮಿತಿನತ್ತಿ. ಅತಿ ವ್ಯಾಸಾಂಗ ಅಂಗನೆ ಚೊ಼ಕುವ್ಹೈ. ವಿಷಯ ಮುಗ್ದ್ಯುಸ ಕ್ಹಾರುಜ ಐಕಿನ ಕ್ಹರ್ಯು, ಕ್ಹುದಾನೆ ಬುಚ್ಕಿನ ತಿನಾ ಆಗನ್ಯಾನೆ ಚಾ಼ಲಿಲಿನ, ಮನಕ್ಹೊ ಕ್ಹಾರಾ ಕರ್ತವೆ ವ್ಹೈ. ಚೊ಼ಕು ಥಾವಾದೆ ನೈತೊ ಕೆಟ್ಟ ಥಾವಾದೆ, ಘನಾ ರಹಸ್ಯ ಸಂಗತಿಯೊನೆ ಹುತಿ , ನ್ಯಾಯನಾ ವಿಚಾ಼ರನೆ ಕ್ಹುದಾ ಹರಯಕ್ಕನೆ ನ್ಯಾಯ ತಿರ್ಪನೆ ಲಾವಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.