Sikkiligar Bible
ವಿಮೊಚನ 31
ಪಾಚ಼ಲ್ತೊ ಯಹೊವಾ ಮೊಶೆನೆ ಅಮ್ಮ ಕದ್ಯೊ: "ಮಿ ಯಹುದ ಕುಲಮಾತೊ ಉರಿಯನೊ ದಿಕ್ರೊ ಥಯಲ ಬೆಚೇಲನೆ ಇನಿಲಿದ್ಯೊಸ. ಉರಿ ಹುರನೊ ದಿಕ್ರೊ ವ್ಹೈ. ಮಿ ಬೆಚೆಲನೆ ಕ್ಹುದಾನಿ ಆತ್ಮಾಕ್ಹು ಭರ್xಯೊಸ. ಮಿ ತಿನೆ ಕ್ಹಾರಾ ತರಾನಾ ಕಾಮೊ ಕರಾನೆ ತಾಕತ ಗ್ಯಾನ ದಿದ್ಯೊಸ. ಬೆಚೆಲ ಘನ್ನೊ ಚೊಕೊ ಚಿತ್ರಾ ಕಾಡಾಲೊ ಥಯೊಸ. ಕ್ಹೊನು ರುಪ್ಪಾನು ವರಿ ತಾಂಬಾನಾ ಸಾಮನೊ ತೆ ಕರಸ. ತೆ ರತ್ನ ಕೆತ್ತಿನ ಚೊಕಾ ಸಾಮನೊ ಕರಸ ವರಿ ಝಾಡನಾ ಕಾಮೊಬಿ ಕರಸ. ತೆ ಕ್ಹಾರಾ ತರನಾ ಕಾಮೊ ಕರಸ. ತಿನಾ ಕ್ಹಾತೆ ಕಾಮ ಕರಾನೆ ಮಿ ಒಹೊಲಿಯಾಬನೆ ಇನಿಲಿದ್ಯೊಸ. ಒಹೊಲಿಯಾಬ ದಾನ ಕುಲನೊ ಅಹಿಸಾಮನೊ ದಿಕ್ರೊ ವ್ಹೈ. ಮಿ ತುನೆ ಆಗನ್ಯಾ ದಿದ್ಯಲ ಕ್ಹಾರು ಕರಾನೆ ಬಿಜಾ಼ ಕಾಮವಾಲಾವೊನೆ ತಾಕತ ಗ್ಯಾನ ದಿದ್ಯೊಸ: ದೆವದರ್ಶನ ಗುಡಾರ, ಒಡಂಬಡಿಕೆನಿ ಪೆಟಗಿ, ಕೃಪಾಸನ, ಗುಡಾರನಾ ಕ್ಹಾರಾ ಸಾಮನೊ, ಟೆಬಲ ವರಿ ತಿನಾ ಉಪ್ಪರಲ್ಯಾ ಸಾಮನೊ, ಚೊಕ್ಕ ಕ್ಹೊನಾನು ದಿಪಸ್ತಂಬ ವರಿ ತಿನಾ ಸಾಮನೊ, ಉದನೊ ಧವಾಂಡೊ ದಿವಾನೊ ಕಟ್ಟೊ, ಯಜ್ಞವೆದಿ ವರಿ ತಿನಾ ಸಾಮನೊ, ಗಂಗಾಳ ವರಿ ತಿನು ಪಿಟ. ಯಾಜಕ ಥಯಲ ಆರೊನನಾ ಕ್ಹಾರಾ ಕ್ಹಾಸ ವಣ್ಣಾ, ಆರೊನನಾ ದಿಕ್ರಾ ಯಾಜಕೊ ಥೈನ ಸೆವೆ ಕರ್ತಾಮಾ ಘಾಲಿಲಿವಾನಾ ಕ್ಹಾರಾ ವಣ್ಣಾ. ಚೊಕಿ ಬಾಸ ರ್ಹಯಲ ಅಭಿಶೆಕ ಕರಾನು ತೆಲ ಪವಿತ್ರ ಜ಼ಗಾಮಾ ಉಪಯೊಗ ಕರಾನು ಚೊಕಿ ಬಾಸನು ಉದ. ಎ ಕ್ಹಾರು ಮಿ ತುನೆ ಆಗನ್ಯಾ ಕರಲ ತಿಮ್ಮ ತ್ಯುನೆ ಕರಸ.
ಸಬ್ಬತ, ಅರಾಮ ಕರಾನು ದಿನ್ನ
ಪಾಚ಼ಲ್ತೊ ಯಹೊವಾ ಮೊಶೆನೆ ಅಮ್ಮ ಕದ್ಯೊ: "ಎ ಇಸ್ರಾಯೆಲೊನೆ ಕೆ: ‘ತುಮೆ ಮಾರು ಕ್ಹಾಸ ರ್ಹಯಲ ಸಬ್ಬತ ದಿನ್ನ ಚುಕ್ಯಾವಾಚಿ ಕರು. ಯಹೊವಾ ಥಯಲ ಮಿ ತುಮೊನೆ ಮಾರಾ ಕ್ಹಾಸ ಮನಕ್ಹೊ ಕರಲನೆ ತೆ ಗುರುತ ಥಯುಸ. "ಸಬ್ಬತ ದಿನ್ನ ಕ್ಹಾಸ ದಿನ್ನ ವ್ಹೈ ಕೈನ ತಿಳ್ದಿಲಿನ ಕರು. ತೆ ದಿನ್ನನೆ ಬಿಜಾ಼ ದಿನ್ನೊ ಲಿಂಗತ ತಿಳ್ದಿಲಿನ ಚಾಲಾಲಾನೆ ಮರಣನಿ ಶಿಕ್ಷಾ ಥೌ. ಸಬ್ಬತ ದಿನ್ನಮಾ ಕುನ್ನತಬಿ ಕಾಮ ಕರ್ಯೊಮ ತಿನೆ ಭಾರಾ ಘಾಲು. ಕಾಮ ಕರಾನೆ ಹಪ್ತಾಮಾ ಬಿಜಾ಼ ಛೆ ದಿನ್ನೊ ಶೆ. ತೆನೈಸೊ ಕ್ಹಾತಂವಾ ದಿನ್ನ ಅರಾಮ ಕರಾನೊ ಘನ್ನ ಕ್ಹಾಸ ರ್ಹಯಲ ದಿನ್ನ ವ್ಹೈ. ಯಹೊವಾನೆ ಸನ್ಮಾನ ಕರಾನೆ ತೆ ಯಕ್ಕ ಕ್ಹಾಸ ದಿನ್ನ ವ್ಹೈ. ಸಬ್ಬತನಾ ಟೈಮಮಾ ಕಾಮ ಕರಾಲೊ ಕಲಾಸ ಥೌ. ಇಸ್ರಾಯೆಲೊ ಸಬ್ಬತ ದಿನ್ನ ಶೆಂ ಕರಿನ ತಿನೆ ಕ್ಹಾಸ ದಿನ್ನ ಕರಿಲ್ಯು. ತ್ಯುನೆ ತಿನೆ ಹಮೆಶಾಬಿ ಕರು. ತ್ಯುನೊನೆಬಿ ತ್ಯುನಾ ಸಂತತಿವಾಲಾವೊನೆಬಿ ಎ ಹಮೆಶಾಬಿ ರ್ಹವಾನು ಒಡಂಬಡಿಕೆ ವ್ಹೈ. ಸಬ್ಬತ ಮನೆಬಿ ವರಿ ಇಸ್ರಾಯೆಲೊನಾ ವಚ್ಮಾ ಹಮೆಶಾಬಿ ರ್ಹವಾನು ಸುಚನೆ ಥೈನ ರ್ಹವಸ. ಯಹೊವಾ ಛೆ ದಿನ್ನಮಾ ಕಾಮ ಕರಿನ ಹಬಾಳನೆ ಜಿಮಿನನೆ ಕರ್ಯೊ. ಕ್ಹಾತಂವಾ ದಿನ್ನಮಾ ಕಾಮ ಕರ್ಯಾ ಬಗರ ಅರಾಮ ಕರ್ಯೊ.”’ ಇಮ್ಮ, ಯಹೊವಾ ಮೊಶೆನಾ ಕ್ಹಾತೆ ಸಿನಾಯ ಡೊಂಗರಮಾ ಬೊಲಾನು ಖರಾಯೊ. ಪಾಚ಼ಲ್ತೊ ಯಹೊವಾ ಒಡಂಬಡಿಕೆ ಲಿಕ್ಕಲ ಬೆ ದಗ್ಡಾನಾ ಹಲಗಿಯೊ ಮೊಶೆನೆ ದಿದ್ಯೊ. ತೆ ಕ್ಹುದಾನಾ ಬೊಟೆ ಲಿಕ್ಕಲ ವ್ಹತ್ತಾ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.