Skip to content
BibleKenya

Sikkiligar Bible

ವಿಮೊಚನ 30

ಉದನೆ ಬಾಳಾನು ಬಲಿನೊ ಕಟ್ಟೊ

ತೆನೈಸೊ ಬಾಸನಾ ತೆಲಕ್ಹು ಕಾಟಾವೊನಾ ಝಾಡನು ಉದನೊ ಧವಾಂಡೊ ದಿವಾನಾಹುತಿ ಯಕ್ಕ ಕಟ್ಟೊ ಭಾಂದ. ಯೆ ಕಟ್ಟಾನಾ ಸುತ್ತೆ ಯಕ್ಕ ಮಳಾ ಲಾಂಬಾಮಾ, ಯಕ್ಕ ಮೊಳ ರುಂದ, ಬೆ ಮೊಳಾ ಉಚ್ಚು ರxಹೌ. ತಿನಾ ಚಾರೆ ಮೂಲಾವೊಮಾ ಶಿಂಗ್ಡಾವೊ ರ್ಹೌ. ಆ ಶಿಂಗ್ಡಾ ತೆ ಕಟ್ಟಾನಾ ಭಾಗ ಥೈನ ರ್ಹೌ. ಧವಾಂಡಾನಾ ಕಟ್ಟಾನಾ ಉಪ್ಪರಲ್ಯಾ ಭಾಗನೆ ಶಿಂಗ್ಡಾನಾ ತುದಿಯೊನೆ ತಿನಾ ಶಿಂಗ್ಡಾವೊನೆ ಚೊಕಾ ಕ್ಹೊನಾನಾ ತಗಡೊಕ್ಹೊ ಝಾಕು ವರಿ ಸುತ್ತೆಬಿ ಕ್ಹೊನಾನೊ ಕಟ್ಟೊ ಭಂದೌ. ಧುವಾಂಡೊನಾ ಕಟ್ಟಾನಾ ಆಜು಼ ಬಾಜು಼ ಥೈಯಲ ಭಂಬೆ ಗೊಡಿಯೊಮಾ ಕಟ್ಟನಾ ಹೆಟಾ ಬೆ ಕ್ಹೊನಾನಾ ಬೆ ಭಾಂಗ್ಡೊಯೊನೆ ಕರೌ. ಧುವಾಂಡಾನಾ ಕಟ್ಟನಾ ಉಚಾವಾನಾ ಲಾಕ್ಡಿಯೊ ಆ ಬಾಂಗ್ಡಿಯೊ ಧರ್ಲಿಲಿದಲ ರ‍್ಹವಸ. ಲಾಕ್ಡಿಯೊ ಕಾಟಾವೊನಾ ಝಾಡಕ್ಹು ಕರೌ. ಕ್ಹೊನಾನಾ ತಗ್ಡೊಕ್ಹು ತೆ ಲಾಕ್ಡಿಯೊ ವರಾಡು. ಚೊಕಾ ಪಡ್ದಾನಾ ( ಒಡಂಬಡಿಕೆನಾ ಪಟ್ಟಗಿನಾ ಸೆುತ್ತೆ ರ‍್ಹಯಲ) ಕ್ಹಾಮಲ್ಯಾ ಬಾಗಮಾ ಧವಾಂಡಾನಾ ಕಟ್ಟಾನಾ ಮ್ಹೆಲ. ಧವಾಂಡಾನಾ ಕಟ್ಟಾನಾ ಒಡಂಬಡಿಕೆನಾ ಪೆಟಗಿನಾ ಕೃಪಾಸನನಾ ಕ್ಹಾಮಲ್ಯಾ ಭಾಗಮಾ ರ‍್ಹವಸ. ಆ ಮಿ ತುನೆ ದಿವಾನಿ ಜ಼ಗಾ ಥಯಿಸ. ಆರೊನ ದಿನ್ನೆ ಪಾಟೆ ಕಟ್ಟಾನಾ ಉಪ್ಪರ ಚೊಕು ಬಾಸನು ಉದ ಘಾಲು. ತಿನಾ ದಿವಾವೊನೆ ಕರೆಟ್ಟ ಕರಾನೆ ಆತಾಮಾ ಆ ಕರುಸ. ಫರಿನ ಕ್ಹಾಂಜ಼ನಾ ಟೈಮಾ ಉದನೆ ಘಾಲು. ಆ ಕ್ಹಾಂಜ಼ನಾ ಟೈಮೊಮಾ ತೆ ದಿವಾ ಲಗಾಡಾನೊ ಟೈಮ ಥಯಲ ರ‍್ಹವಸ. ಅಮ್ಮಜ ದಿನ್ನೆಬಿ ಯಹೊವಾನಾ ಕ್ಹಾಮೂ ಚೊಕು ರ‍್ಹಯಲ ಉದನೂ ಧೂವಾಂಡೊ ರ‍್ಹವಸ. ಆ ಕಟ್ಟಾನೆ ಬಿಜಾ಼ ಧುವಾಂಡಾನಾ ಬಲಿನಾಹುತಿ ರ‍್ಹವಾದೆ ಜಾನವರೊನಿ ಸರವಾಂಗೊ ಹೊಮನೆ ದಿವಾನಾಹುತಿ ರ‍್ಹವಾದೆ ಕಯಾಜ಼ ಅನ್ನ ಪಾನನಾ ಕಯಾಜ಼ ಎಡಿನಾ ಹುತಿ ಉಪಯೊಗ ಕರು ನೈ. ಆರೊನ ವರಕ್ಹಾ ಯಕ್ಕೆಮ ಯಹೊವಾನೆ ಚೊಕು ಯಜ್ಞನೆ ಚಡೌ. ಮನಕ್ಹೊನಾ ಪಾಪನ ಪಶ್ಚಾತಾಪನಾ ಹುತಿ ಆರೊನಬಿ ದೊಷನಾ ಪರಿಹಾರನಾಹುತಿ ಯಜ್ಞನಾ ರಗತನೆ ಉಪಯೊಗ ಕರಸ. ಆರೊನ ಆ ಯಜ್ಞವೆದಿಕೆನಾ ಶಿಂಗ್ಡಾವೊಮಾ ಕರಸ. ತೆ ದಿನ್ನೆ ದೊಷಪರಿಹಾರನಾ ದಿನ ವ್ಹೈ ಕೈನ ಕವೈಲಿವಸ. ಯಹೊವಾನೆ ಆ ಅತಿ ಪರಿಶುದ್ದ ಥಯಲ ಚೊಕೊ ದಿನ ಥಯೊಸ.

ಯಹೊವಾನಿ ಗುಡಾರನಿ ತೆರಗೆ

ಯಹೊವಾ ಮೊಶೆನೆ ಕದಲ ಸುವೈ ಕದ್ಯಾಮ: ಇಸ್ರೆಲನೊ ಲಕ್ಕಾ ಕರಾ. ಅಮ್ಮ ಥೈನ ಕೆಕ್ಲಾ ಜ಼ನಾ ಮನಕ್ಹೊ ರ‍್ಹವಸ ಕೈನ ತು ತಿಳ್ಇಲೆಸಿ. ಹರಸಲಾ ಆ ಕರ್ತಾಮಾ, ಹರಯಕ್ಲೊ ತಿನಾಹುತಿಜ಼ ಯಹೊವಾನೆ ತೆರಿಗೆನೆ ದ್ಯೂ. ತೆಳಾಮಾ ಮನಕ್ಹೊನೆ ಕಯಾಜ಼ ತ್ರಾಸವೊ ಥಾತಾನೈ. ಲಕ್ಕಾ ಕರಲ ಹರಯಕ್ಲೊ ಅದಿಕೃತನಾ ಅಳತಿನಾ ನಿಂಗತ ಇಕ್ಹ ‘ಗೆರಾ’ ಅಳತಿನಾ ದೊಕ್ಡಾನಾ ನಿಂಗತ ಅರ್ದು ಶೆಕೆಲ ಕಾಣಿಕೆ ದ್ಯೂ. ಆ ಅರ್ಧಾ ಅಕ್ಲು ಯಹೊವಾನೆ ಪವಿತ್ರ ಕಾಣಿಕೆ ಥಯಲ ರ‍್ಹವಸ. ಲೆಕ್ಕಾ ಕರಲವಾಲೊಮಾ ಇಕ್ಹ ವರಕ್ಹವಾಲಾ ತಿನಾತಿ ಹೆಚ್ಕಿ ರ‍್ಹಯಲ ಆ ಕಾಣಿಕೆನೆ ಯಹೊವಾನೆ ದ್ಯೂ. ಸವಕಾರ ರ‍್ಹಯಲವಾಲಾ ಅರ್ದಾ ನಂಗತ ಹೆಚ್ಕಿ ದ್ಯಯೂ ನೈ; ಗರಿಬ ಮನಕ್ಹೊ ಅರ್ದಾ ಅಕ್ಲು ಕಮ್ಮ ದ್ಯೂ ನೈ. ಮನಕ್ಹೊ ಕ್ಹಾರಾ ಆ ಕಾಣಿಕೆನೆ ಯಹೊವಾನೆ ದ್ಯೂ. ಆ ತುಮಾರಾ ಜಿವನಾ ರಕ್ಷನೆಯ ತೆರಿಗೆ ಥಯುಸ. ಇಸ್ರೆಲಕ್ಹು ಆ ದೊಕ್ಡಾನೆ ಪೂರಾ ಜಮಾ ಕರು. ಕ್ಹುದಾನಾಾ ದರ್ಶನಾ ಝೊಪ್ಡಾನಾ ಸೆವೆನಾಹುತಿ ದೊಗ್ಡಾವೊನೆ ಉಪಯೊಗ ಕರು. ಯಹೊವಾ ತಿನಾ ಮನಕ್ಹೊನೆ ಸ್ಹೆ ಮ್ಹೆಲಾನಾಹುತಿ ಆ ಕಾಳು ಯಕ್ಕ ವಾಟ ಥಯಿಸ. ತ್ಯುನೆ ತ್ಯುನಾ ಜಿವನಾ ರಕ್ಷಣೆನಾಹುತಿ ದೊಕ್ಡಾ ದಿವಾವಾಲಾ.''

ತಾಂಬಾನಿ ಪರಾತ

ಯಹೊವಾ ಮೊಶೆನೆ ಕದಲ ಸುವಯ ಕದ್ಯಾಮ: ತಾಂಬಾನೊ ಥಾಳೊ ಕರಿನ ತಿನೆ ತಾಂಬಾನಾ ಪಿಟನಾ ಉಪ್ಪರ ಮ್ಹೆಲ. ಕಾಡಿಲಿವಾನಾಹುತಿ ತುಮೆ ಆ ಉಪಯೊಗ ಕರೊಸಿ ಥಾಳಾನೆ ಕ್ಹುದಾನಾ ದರ್ಶನಾ ಝೊಪ್ಡಾನಾ ವರಿ ಯಜ್ಞ ವೆದಿಕೆನಾ ವಚ್ಮಾ ಮ್ಹೆಲ. ಥಾಳಾಮಾ ಪಾನಿನೆ ಭರ. ಆರೊನ ವರಿ ತಿನಾ ಗಂಡ ಬಚ್ಚಾ ಆ ಥಾಳಾಮಾ ತುಮಾರಾ ಹತೊ ಪಗೊ ಧ್ಯಲಿಲಿವು. ಹರಸಲಾ ಕ್ಹುದಾನಾ ದರ್ಶನಾ ಝೊಪ್ಡಾಮಾ ಜಾ಼ತಾ ಟೆಮಾ ನೈತೊ ಯಹೊವಾನಾಹುತಿ ಸರವಾಂಗ ಹೊಮನೆ ದಿವಾನೆ ಯಜ್ಞವೆದಿನಾ ಕ್ಹಾಮೊ ಆತಾಮಾ ತ್ಯುನೆ ಪಾನಿಕ್ಹು ಧ್ಯಲಿಲಿಯು. ತೆಳಾಮಾ ತ್ಯುನೆ ಮರತಾ ನೈ. ತ್ಯುನೆ ತ್ಯುನಾ ಹತೊ ಪಗೊ ಧ್ಯಲಿದ್ಯಾ ಬಗರ ಆಯಾರೆ ತ್ಯುನೆ ಮರಿ ಜಾ಼ವಸ. ಆರೊನನೆ ವರಿ ಕ್ಹಾಂದಾವಾಲಾನೆ ಆ ಶಾಶ್ವತ ಥಯಲ ನಿಯಮ ವ್ಹೈ. ಪಿಳಿಗೆ ಲಕ್ಕಾ ಆರೊನನಾ ಖಾಂದಾನವಾಲಾವೊನೆ ಕ್ಹಾರಾ ಎ ಆಜ್ಞಾ ರ‍್ಹವಸ.''

ಅಬಿಷೆಕನು ತೆಲ

ತೆ ಥಯಲ್ಪರ ಯೆಹೊವ ಮೊಶೆನೆ ಕದಲ ಸುವೈ ಕದ್ಯಾಮ: ''ಚೊಕೊಥಯಲ ಬಾಸನೂ ತೆ ಕರಾ. ಛೆ ಕಿಲೊ ಅಕ್ಲು ಚೊಕೊ ರಕ್ತ ಬೊಳ, ತಿನಾ ಅರ್ದಾ ಅಕ್ಲು ಕದ್ಯಾಮ ತನ್ನ ಕಿಲೊ ಅಕ್ಲು ಲೊಂಗ ವರಿ ಚಕ್ಕಿನೆ ಲಿನ ಆ. ತನ್ನ ಕಿಲೊ ಅಕ್ಲು ಚೊಕು ಬಾಸ ರ‍್ಹಯಲ ಬಜೆ, ಛೆ ಕಿಲೊ ಚೊಕಿ ಬಾಸ ರ‍್ಹಯಲ ದಾಲ್ಚಿನಿ, ಆ ಕ್ಹಾರು ಅದಿಕೃತ ಅಳತಿನಾ ಮಾಪಕ್ಹು ಅಳತಿ ಕರ. ಛೆ ಕಿಲೊ ಆಲಿವನೂ ತೆಲ ಲಿನ ಆ. ಚೊಕಿ ಬಾಸ ರ‍್ಹಯಲ ಪವಿತ್ರ ಅಬಿಷೆಕನಾ ತೆಲನೆ ಕರಾನೆ ತೆ ಕ್ಹಾರು ಮಳಾ. ಕ್ಹುದಾನಾ ದರ್ಶನಾ ಝೊಪ್ಡಾನೆ ವರಿ ಒಡಂಬಡಿನಕೆನಾ ಪೆಟ್ಟಿಗಿನೆ ಅಬಿಷೆಕ ಕರಾನೆ ಆ ತೆಲನೆ ಉಪಯೊಗಸ. ಆ ತೆಲನೆ ಮೆಜನಾ ಉಪ್ಪರ ರ‍್ಹಯಲ ಕ್ಹಾರಾ ಸಾಮ್ನೊನೆಪರ ವರಿ ದಿವೊ, ತಿನಾ ಸಾಮ್ನೊಪರ ಉದನಾ ಧವಾಂಡಾನಾ ಕಟ್ಟಾಪರ, ಕ್ಹುದಾನೆ ಆಗನಾ ಮೂಕಾಂತರ ದಿವಾನಾ ಬಲಿನಾ ಉಪ್ಪರ ತೆಲನೆ ರಿಚಾ. ಆ ತೆಲನೆ ಥಾಳಾನಾ ಉಪ್ಪರಬಿ ವರಿ ಥಾಳಾನಾ ಹೆಟಾ ರ್ಹಯಲ ಪಿಟನಾ ಉಪ್ಪರಬಿ ರಿಚಾ. ತೆಳಾಮಾ ತು ಆ ಸಾಮ್ನೊನೆ ಕ್ಹಾರಾ ಪವಿತ್ರ ಕರಸಿ. ತೆ ಯಹೊವಾನೆ ಘನೂ ಚೊಕು ಥಯುಸ. ತೆ ಸಾಮ್ನೊನೆ ಸೊಂಕೆಲ ಕ್ಹಾರು ಪವಿತ್ರ ಥಾವಸ. ಆರೊನಬಿ ತಿನಾ ಬಚ್ಚಾಬಿ ಆ ತೆಲಕ್ಹು ಅಬಿಷೆಕ ಕರ. ತ್ಯುನೆ ಚೊಕಾ ರಿತಿಮಾ ಮಾರಿ ಸೆವಾ ಕರಸ ಕೈನ ಆ ದೆಕ್ಲಾಡಸ. ತೆಳಾಮಾ ತ್ಯುನೆ ಅಬಿಷೆಕ ಕರಲ ಯಾಜಕೊನಾ ಹುತಿ ಮಾರಿ ಸೆವಾ ಕರಸಕೊಸಿ. ಅಬಿಷೆಕನೂ ತೆಲಬಿ ಪವಿತ್ರ ಥಯಲ ವ್ಹೈ ತಿನೆ ಮ ಕೆಳಾಮಾಬಿ ಮನೆ ಯಕ್ಲಾನೆಜ ಉಪಯೊಗ ಕರು ಕೈನ ಇಸ್ರಾಯೆಲೊನೆ ಕೆ. ಕುನಬಿ ಅನೆ ಸಾಮನ್ಯ ಥಯಲ ಚೊಕು ಬಾಸನೂ ಥಯಲ ತೆಲ ಥಯಲ ಉಪಯೊಗ ಕರು ನೈ. ಕ್ಹಾಸ ಬಾಸನೂ ತೆಲನೆ ಕರಾನಾ ತರಿಕಾಮಾ ಮಾಮೂಲಿ ಥಯಲ ಬಾಸನೂ ತೆಲನೆ ಕರು ನೈ. ಆ ತೆಲಬಿ ಪವಿತ್ರ ಥಯಲ ವ್ಹೈ. ಆ ತುಮೊನೆ ಘನ್ನು ಕ್ಹಾಸ ಥಯಲ ರ‍್ಹೌ. ಕುನಬಿ ಚೊಕಿ ಬಾಸನೂ ತೆಲನೆ ಆ ಪವಿತ್ರ ತೆಲ ನಿಂಗತ ಕರಿನ ಯಾಜಕ ನೈ ರ‍್ಹಯಲ ಯಕ್ಲಾನೆ ತಿನೆ ದಿದ್ಯಾರೆ. ತಿನೆ ತಿನಾ ಜಾ಼ತಾ ಬ್ಹಾರಾ ಕಾಡೂ. ಕ್ಹುದಾ ಮೊಶೆ ಸು ಆಗನ್ಯಾ ದಿದ್ಯೊ ಕದ್ಯಾಮ ತು ದುದ್ದ ಗುಗ್ಗುಲ ಗಂದಾನಿ ಛೆಕ್ಕಿ ಕವಾನು ದ್ರವ್ಯನೆವರಿ ಶುದ್ದ ರ‍್ಹಯಲ ಧವಾಂಡೊ ಯಕ್ಕ ಸಮಾ ಲಿನ ಸುವಾಸನೆ ರ‍್ಹಯಲ ಬುಕ್ಕಿರ ರ‍್ಹಯಲನಿಂಗತ ಪರಿಮಳ ದ್ರವ್ಯವಾಲಾ ಕರಲನಿಂಗತ ಕಲಾವೊ ಮಿಟ್ಟು ಘಾಲಿನ ಕ್ಹುದಾನಿ ಸೆವೆನೆ ಶುದ್ದ ರ‍್ಹಯಲ ಧುಪ ದ್ರವ್ಯ ಕರೌ. ತಿಮಾ ದಕ್ಹು ಪುಡಿ ಕರೈನ ಕ್ಹುದಾನು ದರ್ಶನನಾ ಗುಡಾರಮಾ ಆಜ್ಞಾಶಾಸನ ರ‍್ಹಯಲ ಮಂಜುಸನಾ ಕ್ಹಾಮಾ ಮಿ ತುನೆ ದಿಕ್ಹಾನಾ ಜಗಾಪರ ಮ್ಹೆಲು. ತುಮೆ ತೆ ಧುಪ ದ್ರವ್ಯನು ಪದ್ದತನಿಂಗತ ತುಮಾರಾ ಸ್ವಂತ ಉಪಯೊಗನಾ ನಿಂಗತ ದುಪ ದ್ರವ್ಯ ಕರಾವೌಜ಼ ನೈ. ತೆ ಕ್ಹುದಾ ಥಯಲ ಮಾರಾ ಸೆವೆನೆ ಉಪಯೊಗ ಕರಾನು ರ‍್ಹಯಲ ಮಿಸಲ ವ್ಹೈ ಕೈನ ತಿಲದಿಲಿದಲ ರ‍್ಹೌ. ಕ್ಹಾಲಿ ಸುವಾಸನೆ ಹುತಿ ಕರಿಲಿವಾಲಾನೆ ತೆವಾನೆ ಖಾಂದಾನಮಾತಾ ಬಹಿಶ್ಕಾರ ಕರು.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.