Sikkiligar Bible
ವಿಮೊಚನ 21
ಗುಲಾಮೊನೆ ದೆಕಿಲಿವಾನೊ ತರಿಕೊ
"ಹಮ್ನಾ ಮಿ ತ್ಯುನಾ ಕ್ಹಾಮಾ ಮ್ಹೆಲಾನಾ ನ್ಯಾಯ ವಿದಿಯೊ ಕಯಾ ವ್ಹೈ ಕದ್ಯಾಮ; "ತುಮಾರಾ ಕಯೊಬಿ ಇಬ್ರಿಯಮಾ ಯಕ್ಲಾನೆ ದಾಸತ್ವಮಾ ಇಕ್ಕಾತೊ ಲಿದ್ಯಾಮ ತೆ ಇಬ್ರಿಯೊವಾಲೊ ಛೆ ವರಕ್ಹ ದಾಸ ಥಯಲ ಕ್ಹಾತವಾ ವರಕ್ಹಮಾ ಸುಜ ದಿದೆವಾಚಿ ಬಿಡುಗಡೆ ಥೈನ ಜೌ಼. ದಾಣ್ಗೊ ಹಿವಾ ನೈ ಥೈನ ಆಯಾಮ ಯಕ್ಲೊಜ ಗೈ ಪಡ್ಯೊ. ಹಿವಾ ಥೈನ ಆಯಾಮ ತಿನಾ ಬೈಕೊನಾ ಕ್ಹಾತೆಜ಼ ಜೌ಼. ತಿನೊ ಮಾಲಕ ತಿನೆ ಹಿವಾ ಕರಾಯಲ ಪಮಾಫ ತೆ ಬೈಕೊಮಾ ಗಂಡ ನೈತೊ ಹೆಣ್ಣ ಬಚ್ಚಾ ಹುಟ್ಯಾಮ, ತೆ ಬೈಕೊಬಿ ತಿನಾ ಬಚ್ಚಾಬಿ ಮಾಲಕನಾ ಆಸ್ತಿ ಥಾವಸ. ದಾಸಬಿ ಯಕ್ಲೊಜ ಥೈನ ಗೈ ಪಡ್ಯೊ.”’ ತೆನೈಸೊ ದಾಸಬಿ, "ಮಿ ಮಾರಾ ಮಾಲಕನೆ, ಮಾರಾ ಬೈಕೊ ಬಚ್ಚಾ಼ವೊನೆ ಮಾಯಾ ಕರುಸ. ತಿನಾಹುತಿ ಮಿ ಬಿಡುಗಡೆ ಥೈನ ಜಾ಼ವಾನಾಹುತಿ ಮನೆ ಮನಸ ನತ್ತಿ” ಕೈನ ಕರೆಟ್ಟ ಕದ್ಯಾಮ, ತಿನೊ ಮಾಲಕ ಕ್ಹುದಾಕನ ಬಲೈಲಿನ ಐನ ಬಾಕಲಕನ ನೈತೊ ಬಾಕಲನಾ ಚೌಕಟ್ಟನಾ ಪಟ್ಟಿಯೊನಾ ಬಾಜು಼ಮಾ ಹುಬ್ರಾಡಿನ ತಿನೊ ಕಾನ ಚೊಟೈನ ಗುರತ ಕರು. ತೆಳಾಮಾ ತೆ ಶಾಶ್ವತ ಥೈನ ತಿನೆ ದಾಸ ರ್ಹಯಲ ರ್ಹವಸ.
ಕುನಬಿ ತಿನಾ ದಿಕ್ರಿನೆ ದಾಸಿ ಕರ್ಯಾಮ, ದಾಸೊ ಬಿಡುಗಡೆ ಥೈನ ಜಾ಼ವಾನಾ ನಿಂಗತ ತೆ ಬಿಡುಗಡೆ ಥೈನ ಜೌ಼ನೈ. ತಿನೆ ಘಟ್ಟ ಕರಲ ಮಾಲಕನೆ ಯಕ್ಕ ಟೈಮ ಪಸಂದ ನೈ ಆಯಾಮ ತಿನೆ ಛೊಡಿನ ಕತ್ರಾನಾ ಹುತಿ ತೆ ಅನುಮತಿ ದ್ಯೂ. ತೆ ದಿದಲ ವಾತೆ ತಪ್ಪಲ ವಾಲೊ ಥಯಲಕ್ಹು ಅನ್ಯ ಮನಕ್ಹೊನೆ ತಿನೆ ಇಕ್ಕಾನು ತಿನೆ ಅದಿಕಾರ ನತ್ತಿ. ಯಕ್ಕ ಟೈಮ ತೆ ತಿನಾ ದಿಕ್ರಾನೆ ತಿನೆ ಘಟ್ಟ ಕರ್ಯಾಮ ದಿಕ್ರಿ ನಿಂಗತ ತಿನೆ ದೆಕಿಲ್ಯೂ. ಮಾಲಕ ಹಿಯಕ್ಲಿನೆ ಹಿವಾ ಥಯಾರೆ ಪಸ್ಟವಾಲಿನೆ ಅನ್ನ, ವಣ್ಣಾ, ದಾಂಪತ್ಯನಾ ಹಕ್ಕನೆ ಕಮ ಕರು ನೈ. ಆ ತನ್ನಮಾ ಕಯುಬಿ ನೈ ಕರ್ಯಾಮ ತೆ ಸುಜ ದಿದೆವಾಚಿ ಬಿಡುಗಡೆ ಥೈನ ಜಾ಼ಸಕಸ.
ತ್ರಾಸ ದಿವಾನಾಹುತಿ ನಿಯಮ
ಕುನ್ನಬಿ ಮನಕ್ಹನೆ ಮಾರಿನ ಕಲಸ ಕರಲವಾಲೊನೆ ಮರಣನಿ ಶಿಕ್ಷಾ ದ್ಯು. ತೆನೈಸೊ ಕಲಾಸ ಕರುಕೈನ ಸೊಚ ನೈ ರ್ಹಯಾಮ ಕ್ಹುದಾನಾ ಸಂಕಲ್ಪಕು ತೆ ಮೌತ ಥಯುಸ ತಬಿ, ತೆ ಕ್ಹಲಾಸ ಕರಲವಾಲೊ ನ್ಹಾಟಿನ ಜೌ಼ ಕೈನ ತಿನೆ ಮಿ ಯಕ್ಕ ಜ಼ಗಾ ನೆಮ್ಸುಸ. ತೆನೈಸೊ ಯಕ್ಲೊ ತಿನಾ ನೆರೆಯವಾಲಾನೆ ಕಲಾಸಕರಾನಾ ಉದ್ದೆಶಕ್ಹು ತಿನೆ ಮೊಸಕ್ಹು ಕಲಾಸ ಕರ್ಯಾಮ, ತೆ ಮರಾ ವರಕ್ಹೊ ತು ತಿನೆ ಮಾರಾ ಯಜ್ಞ ವೆದಿ ಕಂತೊ ಬಲೈಲಿನ ಗೈನ ಕತ್ರಿಪಡು. ಕುನಬಿ ತಿನಾಬಾನೆ ರ್ಹೈತಬಿ ತಿನಿಯಾನೆ ರ್ಹೈತಬಿ ಮಾರ್ಯಾರೆ ಕ್ಹರಿಬಿ ತಿನೆ ಮರಣನಿ ಶಿಕ್ಷಾ ಥೌ. ಕುನಬಿ ಯಕ್ಲೊ ಮನಕ್ಹನೆ ಕಿಡನ್ಯಾಪ ಕರಿನ ಗೈನ ಇಕ್ಕ್ಯಾಮ ನೈತೊ ತೆ ಬಂದಮಾ ರ್ಹತಾಮಾ ಕಿಡನ್ಯಾಪ ಥಯಲವಾಲೊ ತಿನಾ ಕ್ಹಾತೆ ರ್ಹಯಾಮ ತಿನೆಬಿ ಮರಣನಿ ಶಿಕ್ಷಾ ಥವೊ. ಕುನಬಿ ತಿಯಾನೆ ರ್ಹೈತಬಿ ತಿಬಾನೆ ರ್ಹತಬಿ ಕ್ಹರಾಪಾವಾಲಾನೆ ಮರಣನಿ ಶಿಕ್ಷಾ ಥವೊ. ಬೆ ಜ಼ನಾ ಲೈಡೈ ಕಡ್ತಾಮಾ ಯಕ್ಲೊ ಹಜಿಯಕ್ಲೊ ದಗ್ಡಾಕ್ಹು ರ್ಹೈತಬಿ, ಮುಷ್ಠಿಕ್ಹು ರ್ಹೈಬಿ ಮಾರಾಲಕ್ಹು ಮಾರ ಕ್ಹಾದಲವಾಲೊ ಮರೆವಾಚಿ ದಕ್ಹಾ ದಿನ ವಚ್ಚಾನಾ ಧರಿನ, ಪಾಚಾತೊ ತೆ ಉಟಿನ ಲಾಕಡಿ ಧರಲಿನ ಫರಾನೆ ರ್ಹಯಾಮ ತಿನೆ ಮಾರಲವಾಲಾನೆ ಶಿಕ್ಷಾ ದ್ಯು ನೈ. ತೆ ನೈಸೊ ಮಾರ ಕ್ಹಾದಲವಾಲೊ ಮನಕ್ಹ ಗುಣ ಹೊಂದಲ ವಾಲಾವೊನೆ ಥಾವಾನೊ ಕ್ಹರ್ಚ ಮಾರಲವಾಲಾನೆ ದ್ಯೂ ವರಿ ತೆ ಪೂರಾ ಚೊಕೊ ಥೌಕೈನ ಕರು. ಯಕ್ಲೊ ತಿನಾ ದಾಸ ರ್ಹವಾದೆ, ದಾಸಿನೆ ರ್ಹವಾದೆ ಲಾಕಡಿಕ್ಹು ಮಾರಿನ ಮರಾ ವರಕ್ಹಾ ಮಾರ್ಯಾಮ, ತಿನಾ ನೀಂಗತಜ ಶಿಕ್ಷಾ ಥವೊ. ತೆ ದಾಸ ತೆಳಾಮಾಜ಼ ಮರ್ಯಾರೆ ಯಕ್ಕ ಬೆ ತನ್ನ ದಿನ ವಾಚ್ಯಾಮ, ಮಾಲಕನೆ ಶಿಕ್ಷಾನೆ ದ್ಯು ನೈ . ಕಾ ಕದ್ಯಾಮ ತೆ ದಾಸ ತಿನೊ ಆಸ್ತಿ ಥಯೊಸ. ಮನಕ್ಹೊ ಲಡೆ ಕಡ್ತಾಮಾ ಪೆಟೆ ರ್ಹಯಲ ಬಾಕ್ಡಿನೆ ಮಾರ ಲಾಗಲಕ್ಹು ತಿನೆ ಪೆಟ ದುಕ್ಯಾಮ, ತೆ ಬಾಕ್ಡಿನೊ ಮಾಟಿ ಪುಚ್ಚಲ ಅಕ್ಲು ವರಿ ನ್ಯಾಯಾಲಯನಾ ವಿದಿಸನಾ ದಂಡ ಮಾರಲವಾಲಾನೆ ದ್ಯೂ. ಬಿಜಾ಼ ಹಾನಿ ಥಯಲ ಪಮಾಫ ಜಿವನೆ ಪ್ರತಿ ಥೈನ ಜ಼ಲಮ ದ್ಯು. ಡೊಳಾನೆ ಡೊಳಾ, ದಾತನೆ ದಾತೊ, ಹತ್ತನೆ ಹತ್ತ, ಪಗ್ಗನೆ ಪಗ್ಗ, ಬರಿನೆ ಬರಿ, ದುಖನೆ ದುಖ, ಮಾರನೆ ಮಾರ, ಪ್ರತಿ ಥೈನ ದ್ಯೂ. ಕುನಬಿ ರ್ಹೈತಬಿ ತಿನಾ ನೈತೊ ದಾಸಿನಾ ಡೊಳೊ ಫೊಡಿನ ನಷ್ಟ ಕರ್ಯಾಮ ತೆ ಡೊಳಾನೆ ಬದಲ ತ್ಯುನೊನೆ ತೆ ಬಿಡುಗಡೆ ಕರಿನ ವಳೌ. ಯಕ್ಲೊ ದಾಸ ರ್ಹೈತಬಿ ನೈತೊ ದಾಸಿ ರ್ಹೈತಬಿ ದಾತೊ ಪಾಡ್ಯಾಮ ದಾತೊನಾ ಬದಲ ತ್ಯುನೊನೆ ಬಿಡುಗಡೆ ಕರಿನ ವಳೌ.
ಮಾಲಕೊನಾ ಜಿಮ್ಮೆದಾರಿಯೊ
ಕಿಯಾಬಿ ಯಕ್ಕ ಬೈಲ ದಾಣ್ಗಾನೆ ರ್ಹವಾದೆ, ಬಾಕ್ಡಿನೆ ರ್ಹವಾದೆ, ತಿವಿನ ಕತ್ರ್ಯಾಮ ತೆ ಬೈಲನೆ ಕ್ಹರಿಜ಼ ದಗ್ಡೊ ಭಿರಕೈನ ಮಾರು. ತಿನಾ ಮಾಕ್ಹನೆ ಕ್ಹೌ ನೈ. ತೆ ನೈಸೊ ತೆ ಬೈಲನಾ ಮಾಲಕ ನಿರಪರಾದಿ ಥವು. ತೆನೈಸೊ ತೆ ಬೈಲ ಪೈಲಾತಿಜ ಹಾಯಸ ಕೈನ ಮಾಲಕನಿ ತಿಳದ್ಯಾಮ ತೆ ತಿನೆ ಭಾಂದಿನ ಘಾಲಲ ಹುತಿ ತೆ ದಾಣ್ಗಾನೆ ರ್ಹವಾದೆ, ಬಾಕ್ಡಿನೆ ರ್ಹವಾದೆ ಕಲಾಸ ಕರ್ಯಾಮ ತೆ ಬೈಲನೆ ದಗ್ಡೊ ನಾಕಿನ ಕ್ಹಲಾಸ ಕರು.ತೆ ನೈಸೊ ತಿನೊ ಮಾಲಕ ಮರಣನಾ ದಂಡನೆ ಗುರಿ ಥಯೊ. ತೆ ನೈಸೊ ತೆ ಮಾಲಕನೆ ದೊಕ್ಡಾ ದಿದ್ಯಾಮ ತೆ ತಿನೆ ನೆಮಕ ಥಯಲ ದೊಕ್ಡಾದಿನ ತಿನೊ ಜ಼ಲಮ ವಚಾ಼ಡಿ ಲಿವಾದೆ. ತೆ ಬೈಲ ದಿಕ್ರಾನೆ ರ್ಹವಾದೆ ನೈತೊ ದಿಕ್ರಿನೆ ರ್ಹವಾದೆ ತಿವಿದ್ಯಾಮ ನ್ಯಾಯ ತಿರ್ಪಿನಾ ನಿಂಗತ ತಿನಾ ಮಾಲಕನೆ ಕರು. ದಾಸನೆ ರ್ಹವಾದೆ ದಾಸಿನೆ ರ್ಹವಾದೆ ಬೈಲ ತಿವದ್ಯಾಮ ದಾಸನಾ ನೈತೊ ದಾಸಿನಾ ಮಾಲಕನೆ ಮೂವತ್ತ ರುಪ್ಪಾನಾ ಘಟ್ಟಾ ದ್ಯೂ, ವರಿ ತೆ ಬಯಲನೆ ದಗ್ಡೊ ನಕಿನ ಕಲಾಸ ಕರುಸ. ಯಕ್ಲೊ ಕ್ಹಾಡಿ ಕ್ಹಂದ್ಯಾಮ ನೈತೊ ಕ್ಹಂದಿನ ತೆ ನೈ ಝಾಕಿನ ತಿಮಾ ಬೈಲ ರ್ಹವಾದೆ, ಗದ್ಡೂ ರ್ಹವಾದೆ ತೆ ಕ್ಹಾಡಿಮಾ ಪಡಿನ ಮರ್ಯಾರೆ, ತೆ ಕ್ಹಾಡಿ ಕ್ಹಂದಲವಾಲೊ ಥಯಲ ನಷ್ಟನೆ ಪ್ರತಿ ಥೈನ ಇಡು ದ್ಯೂ. ಬೈಲನಾ ಮಾಲಕನೆ ತೃಪ್ತಿ ಥಾವಾ ವರಕ್ಹು ಕ್ರಯ ದ್ಯೂ. ಮರಲ ಬೈಲನೆ ತೆಜ಼ ಕಾಡಿ ಲೆಸಕಸ. ಯಕ್ಲಾನಿ ಬೈಲ ಹಜಿಯಕ್ಲಾನಿ ಬೈಲನೆ ಹಾಯಿದಿನ ಮಾರ್ಯಾರೆ ಜಿವತಿ ರ್ಹಯಲ ಬೈಲನೆ ಇಕ್ಕಿನ ತಿನೊ ಕ್ರಯ ದ್ಯೂ. ತೆ ಮರಲ ಬೈಲನೆ ಭಂಬಿ ಜ಼ನಾ ಬರಾಬರ ವಾಟಿ ಲ್ಯು. ತೆನೈಸೊ ತೆ ಬೈಲ ಪೈಲಾತಿಬಿ ಹಾಯ್ದಾನಿಂಗತ ಕೈನ ತಿನಾ ಮಾಲಕನೆ ತಿಳದ್ಯು ತಬಿ ತಿನೆ ನಯ ಭಾಂದಲಕ್ಹು ತಿನಾ ಬೈಲನೆ ಪ್ರತಿ ಥೈನ ಬಯಲನೆ ಕ್ಹರಿಜ಼ ಬದಲಿನ ದ್ಯೂ. ತೆ ನೈಸೊ ಮರಲ ಬೈಲನೆ ತೆಜ಼ ಲೆಸಕಸ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.