Sikkiligar Bible
ವಿಮೊಚನ 20
ದಕ್ಹ ಆಗನ್ಯಾ
ಕ್ಹುದಾ ಕದಲ ವಾತೊ: "ತುಮೆ ಗುಲಾಮೊ ರ್ಹಯಲ ಐಗುಪ್ತ ದೆಶಮಾತೊ ತುಮೊನೆ ಭಾರೊ ಲಾಯಲ ಯಹೊವಾ ಕವಾಲೊ ‘ಮಿಜ಼ ತಾರೊ ಕ್ಹುದಾ ವ್ಹೈ.’
ಮಿ ರ್ಹಯಾಮ ತುನೆ ಬಿಜಾ಼ ದೆವಸ್ಥಾನೊ ರ್ಹೌ ನೈ. ಕಯಾಜ಼ ಮೂರ್ತಿನೆ ಕರಲಿಯು ನೈ. ಹಬಾಳಮಾ ರ್ಹೈತಬಿ, ಜಿಮಿನಪರ ರ್ಹೈತಬಿ, ಜಿಮಿನಾ ಹೆಟಾ ಪಾನಿಮಾ ರ್ಹೈತಬಿ ರ್ಹವಾನಾ ಕಿನಾಬಿ ರುಪನೆ ಕರಲ್ಯು ನೈ. ತ್ಯುನೊನೆ ಅಡ್ಡ ಪಡುನೈ, ಪೂಜಾ ಕರು ನೈ. ತೆನೈಸೊ ತಾರೊ ಕ್ಹುದಾ ಥಯಲ ಯಹೊವಾ ಕವಾಲೊ ಮಿ ಮನೆ ಕರಾನು ಅಕ್ಲು ಗೌರವ ಹಜಿಯಕ್ಲಾನೆ ಚೊಡಿನ ನೈ ದೆತು. ತಿನಾಹುತಿ ಮನೆ ವಿರೊದವಾಲಾನಾ ವಿಷಯಮಾ ಬಾಪೊನೂ ದೊಷ ಫಲನೆ ಬಚ್ಚಾವೊನಾ ಉಪ್ಪರ, ತನ್ನ ಚಾರ ಮಾತಾಲಕ್ಕಾ ಆವಾಲಗಾಡುಸ. ತೆನೈಸೊ ಮನೆ ಮಯಾ ಕರಿನ ಮಾರಾ ಆಜ್ಞಾವೊನೆ ಹತೆ ಧರಲಿದ್ಯಾರೆ ಹಜಾ಼ರ ಮಾತಾಲಕ್ಕಾ ಮಯಾ ದೆಕ್ತಾಲಾಡುಸ. ತಾರೊ ಕ್ಹುದಾ ಥಯಲ ಯಹೊವಾನಾ ನಾಮನೆ ಅಯೊಗ್ಯ ಕಾಮನಾಹುತಿ. ಉಚೌ ನೈ. ಯಹೊವಾ ತಿನಾ ನಾಮನೆ ಅಯೊಗ್ಯ ಕಾಮನಾ ಹುತಿ ಉಚೈಲ ವಾಲಾನೆ ಶಿಕ್ಷಾ ದಿದೆವಾಚಿ ಛೊಡತೊ ನೈ. ಸಬ್ಬತ ದಿನನೆ ಕ್ಹುದಾನೊ ಪರಿಶುದ್ದ ದಿನ ವ್ಹೈ ಕೈನ ಆಚರಣೆನೆ ಕರಾನೆ ಶೆಂಮಾ ಮ್ಹೆಲ್ಯೂ. ಛೆ ದಿನ ತು ರಾಬಿನ ತಾರು ಕಾಮ ಕ್ಹಾರು ಕರ. ತೆನೈಸೊ ಕ್ಹಾತವಾ ದಿನ್ನ ತಾರು ಕ್ಹುದಾ ಥಯಲ ಯಹೊವಾನೆ ಮಿಸ ಥಯಲ ಅರಾಮಾ ಕರಾನು ದಿನ ಥಯೊಸ. ತೆ ದಿನ್ನಮಾ ತು ಕಯುಜ಼ ಕಾಮ ಕರು ನೈ. ತಾರಾ ಗಂಡ ಬಚ್ಚಾ, ತಾರಾ ಹೆಣ್ಣ ಬಚ್ಚಾ, ಗಂಡಾಳ, ಹೆಣ್ಣಾಳ, ಪಶು ಪ್ರಾಣಿಯೊ ತಾರಾ ಗಾಮಾ ರ್ಹಯಲ ಅನ್ಯ ಗಾಮವಾಲೊಬಿ ಕಯುಜ಼ ಕಾಮ ಕರು ನೈ. ಛೆ ದಿನೊಮಾ ಯಹೊವಾ ಜಿಮಿನ ಹಬಾಳನೆ, ಸಮಂದರನೆ, ತಿನಾಮಾನು ಸಮಸ್ತಬಿ ಕ್ಹಾರು ನಿರ್ಮಾಣ ಕರಿನ ಕ್ಹಾತವಾ ದಿನಮಾ ವಿಶ್ರಾಮ ಲಿದ್ಯೊ. ತಿನಾಹುತಿ ಯಹೊವಾ ಸಬ್ಬತ ದಿನನೆ ತಿನೊ ಪರುಶುದ್ದ ದಿನ ತಾವಾದೆ ಕೈನ ಆಶಿರ್ವಾದ ಕರ್ಯೊ. "ತಾರಾ ಮಾಬಾಪನೆ ಸನ್ಮಾನ ಕರು, ಸನ್ಮಾ ಕರ್ಯಾರೆತಾರೊ ಕ್ಹುದಾ ಥಯಲ ಯಹೊವಾ ತಿನೆ ಅನುಗ್ರಹಿಸಾನಾ ದೆಶಮಾ ತು ಘನ್ನಾ ದಿನ ಜ್ಯೂತೊ ರ್ಹಸಿ. "ಕಾಲಾಸ ಕರು ನೈ. "ವ್ಯಬಿಚಾರ ಕರು ನೈ. "ಚೊರಿ ಕರು ನೈ. "ತು ಬಿಜಾ ಯಕ್ಲಾನಾ ಉಪ್ಪರ ಸುಳ್ಳ ಸಾಕ್ಷಿ ಕೌ ನೈ. "ಬಿಜಾ ಯಕ್ಲಾನೂ ಗರ ದೆಕಿನ ಆಶೆ ಕರು ನೈ. ಬಿಜಾ ಯಕ್ಲಾನಿ ಬೈಕೊ, ಗಂಡಾಳ, ಹೆಣ್ಣಾಳ, ಬೈಲ, ಗದಡು ರ್ಹಯಲ ಕಯುಜ಼ ಆಸ ಕರು ನೈ.”
ಮನಕ್ಹೊನು ಭೆಂ
ತೆ ಬಿಜಲಿ, ಮಿಂಚ, ಪಿಪಿಯೊನಿ ಅವಾಜ ಐಕಿನ, ವರಿ ಡೊಂಗರತು ಭಾರು ಆವಾನೊ ಧವಾಂಡೊ ಮನಕ್ಹೊ ಕ್ಹಾರಾ ದೆಕಿನ, ಕಾಪ್ತಾ ದುರಜ ಹುಬ್ರಯಾ. ತ್ಯುನೆ ಮೊಶೆನೆ, "ತುಜ಼ ಹಮಾರಾ ಕ್ಹಾತೆ ಬೊಲ, ಹಮೆ ಐಕಿಯೆಸ. ತೆನೈಸೊ ಕ್ಹುದಾ ಹಮಾರಾ ಕ್ಹಾತೆ ಬೊಲ್ಯಾಮ ಹಮೆ ಮರಿ ಗಯೆಸ” ಕೈನ ಕದ್ಯಾ. ತಿನಾಹುತಿ ಮೊಶೆ ಮನಕ್ಹೊನೆ, "ಬುಚ್ಕೊ ನಕೊ, ಕ್ಹುದಾ ತುಮೊನೆ ಪರಿಕ್ಷಾ ಕರಾನಾಹುತಿ, ತುಮೆ ಪಾಪ ಕರೆವಾಚಿ ತಿನಾ ಉಪ್ಪರಲ್ಯು ಬುಚಕ ತುಮೊನೆ ರ್ಹೌ ಕೈನ ಉತ್ರಿನ ಆಯೊಸ,”’ ಕದ್ಯೊ. ಮನಕ್ಹೊ ದುರಜ ಹುಬ್ರಯಾತಾ. ಮೊಶೆ ಕ್ಹುದಾ ರ್ಹವಾನು ತೆ ಅಂದಾರಾನಾ ಮ್ಹಾಡನಾ ನಜಿಕ ಗಯೊ.
ಬಲಿನೊ ಕಟ್ಟಾನಾಹುತಿ ನಿಯಮೊ
ಯಹೊವಾ ಮೊಶೆನೆ ಅಮ್ಮ ಕದ್ಯೊ, "ತು ಇಸ್ರಾಯೆಲೊನೆ ಕವಾನು ಸುವೈ ಕದ್ಯಾಮ; ‘ಮಿ ಹಬಾಳತೊ ತುಮಾರಾ ಕ್ಹಾತೆ ಬೊಲೆಲ ತುಮೆ ದೆಕ್ಯಾಸ ತೊ. ತಿನಾಹುತಿ ತುಮೆ ಮಾರಾ ಬದಲ ಕ್ಹೊನಾನಾ ವರಿ ರುಪ್ಪಾನಾ ದೆವಸ್ಥಾನೊನೆ ಕರಲ್ಯೂ ನೈ. ತುಮೆ ಮಾರಾ ಯಜ್ಙ ವೆದಿನೆ ಮಾತಿಕ್ಹು ಕರು. ತುಮೆ ತಿನಾ ಉಪ್ಪರ ತುಮಾರಾ ಸರ್ವಂಗ ಹೊಮ, ಸಮಾದಾನು ಯಜ್ಞ, ಬೈಲೊ ಬಕ್ರಾನೆ ಸಮರ್ಪೀಸ ಕರು. ಮಿ ಮಾರಾ ನಾಮನೆ ಗೌರವ ಕರಾನು ಕ್ಹಾರಿ ಜ಼ಗಾವೊಮಾಬಿ ತುಮೊಕನ ಐನ ತುಮೊನೆ ಆಶಿರ್ವಾದ ಕರುಸ. ತುಮೆ ಮಾರಾಹುತಿ ದಗ್ಡಾಕ್ಹು ಯಜ್ಞ ವೆದಿ ಭಾಂದಾನಿ ರ್ಹಯಾಮ, ತೆ ಕೆತ್ತೆಲ ದಗ್ಡಾವೊಕ್ಹು ಭಾಂದು ನೈ. ಕಾ ಕದ್ಯಾಮ ಉಳಿ, ರ್ಹಯಲ ಅಕ್ಲು ತಿನಾ ಉಪ್ಪರ ಉಪಯೊಗಸ್ಯಾಮ ತೆ ಅ ಪವಿತ್ರ ಥಾವಸ. ತೆನೈಸೊ ಮಾರಿ ಯಜ್ಞವೆದಿನೆ ತುಮಾರಾ ನಗ್ನತೆನಾ ದಿಕ್ಹಾ ನಿಂಗತ ಪೈರಿಯೊ ಬಳಸಿನ ತಿನೆ ಚಡುನೈ”’ ಕೈನ ಆಜ್ಞಾಪಿಸೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.