Skip to content
BibleKenya

Sikkiligar Bible

ಪ್ರಸಂಗಿ 9

ಎ ಕ್ಹಾರುಜ಼ ಮಾರಾ ಮನಸಮಾ ವಿಚಾರ ಕರಲಿನ ಯಕ್ಕಜ಼ ಫೈಸ್ಲಾನೆ ಆಯೊ. ತೆ ಸುವೈ ಕದ್ಯಾಮ ನಿತಿವಂತನಾ ವರಿ ಗ್ಯಾನಿಯೊನಾ ಕಾಮೊ ಕ್ಹುದಾನಾ ಹತ್ಮಾ ಛೆ. ಕಯೊಜ಼ ಮನಕ್ಹ ತಿನಾ ಕ್ಹಾಮು ರ‍್ಹವಾನು ಮಯಾನೆ ನೈತೊ ದ್ವೆಷನೆ ಗೊತ್ತ ಕರಲಿವಾನೆ ಥಾತು ನೈ. ಕ್ಹಾರುಜ಼ ಕ್ಹಾರಾವೊನೆ ಯಕ್ಕಜ಼ ತರಾ ಥಾವಸ. ನಿತಿವಂತನೆ ವರಿ ದುಷ್ಟನೆ, ಚೊಕಾ ರ‍್ಹಯಲವಾಲಾನೆ ವರಿ ಕೆಟ್ಟ ರ‍್ಹಯಲವಾಲಾನೆ, ಶುದ್ದವಾಲಾನೆ ವರಿ ಅಶುದ್ದವಾಲಾನೆ, ಬಲಿ ಚ಼ಡಾವಾಲಾನೆ ವರಿ ಚ಼ಡಾಯಲವಾನೆ ಯಕ್ಕಜ಼ ಗತಿ ಥಾವಸ. ಚೊ಼ಕೊ ಕಿಮ್ಮ ತಿಮ್ಮಜ಼ ಪಾಪಿಜ಼ ರ‍್ಹವಸ. ಕಮ್ಮ ಘಾಲಾಲೊ ಕಿಮ್ಮ ತಿಮ್ಮಜ಼ ಕಮ್ಮನೆ ಬುಚ್ಕಾಲೊ ರ‍್ಹವಸ. ಎ ಲೊಕಮಾ ಥಾವಾನು ಕ್ಹಾರಾ ಸಂಗತಿಯೊನೆ ಕೆಟ್ಟ ಫಲ ಛೆ ವರಿ ಕ್ಹಾರಾವೊನೆ ಯಕ್ಕಜ಼ ಗತಿ ಥಾವಸ. ತೆನೈಸೊ ಮನಕ್ಹೊನಾ ಮನಸೊಮಾ ಕೆಟ್ಟಜ಼ ಭರ‍್ಯುಸ. ತ್ಯುನೆ ಜ್ಯುತಾ ರ‍್ಹಯೆಲಕ್ಕಾ ಪಿಸಾಳು ತ್ಯುನಾ ಮನಸೊನೆ ಧರಲ ರ‍್ಹವಸ. ತೆ ಥಯಲ್ಪರ ತ್ಯುನೆ ಭೆಗಿನ ಮರಸ. ತೆನೈಸೊ ಜ್ಯುತಾ ರ‍್ಹಯಲ ಗುಂಪಮಾ ಸೆರಲವಾಲಾನೆ ನಿರಿಕ್ಷೆ ರ‍್ಹವಸ. ಮರಲ ಸಿಂಹಾಡಾತಿಬಿ ಜ್ಯುತು ರ‍್ಹಯಲ ಕುತ್ರುಜ಼ ಚೊ಼ಕು ವ್ಹೈ. ಯಕ್ಕೆಳೆ ಜ್ಯುತಾ ರ‍್ಹಯಲವಾಲಾವೊನೆ ಮರಿಯೆಸಕೈನ ಗೊತ್ತ ಛೆ ಮರಲವಾಲಾವೊನೆ ಕಯುಜ಼ ತಿಳವಳಿಕೆ ನತ್ತಿ. ತ್ಯುನೆ ಅಭ್ದಾತು ಪ್ರತಿಫಲ ನತ್ತಿ. ತ್ಯುನೊನೆ ಗ್ಯಾನ ನತ್ತಿ. ತ್ಯುನೆ ಮರಲ್ಪರ ತ್ಯುನಿ ಮಯಾಬಿ, ವರಿ ಹಗೆಬಿ, ವ್ಹಚ್ಚಿ಼ಗಿಟ್ಟಿ ಅಳದಿನ ಜಾ಼ವಸ. ಲೊಕಮಾ ಥಾವಾನಾ ಕಯಾಜ಼ ಕಾಮಮಾಬಿ ತ್ಯುನೊನೆ ಹಜಿ಼ಯಕ್ಕ ಪಾಲ ನತ್ತಿ. ಜಾ಼ ತಾರಾ ಅನ್ನನೆ ಕ್ಹುಶಿಕ್ಹು ಕ್ಹಾ. ತಾರು ದ್ರಾಕ್ಷಿನು ರಕ್ಹ ಚೊ಼ಕಾ ಕ್ಹುಶಿಕ್ಹು ಪಿ. ಕ್ಹುದಾ ತಾರಾ ಕಾಮೊನೆ ಹಮ್ನಾ ಒಪ್ಪಿಲಿವಸ. ತಾರಾ ವಣ್ಣಾ ಕೆಳಾಮಾಬಿ ಧೊಳಾಜ಼ ರ‍್ಹವಾದೆ. ತಾರಾ ಮಾತಾನೆ ತೆಲನು ಅಭಿಶೆಕ ರ‍್ಹವಾದೆ. ಲೊಕಮಾ ಕ್ಹುದಾ ತುನೆ ನೆಮ್ಸಲ ವ್ಯರ್ಥ ಜಿವಮಾನನಾ ವ್ಯರ್ಥ ದಿನೊಕ್ಹಾರಾ ತಾರಿ ಮಯಾನಿ ಬೈಕೊನಾ ಕ್ಹಾತೆ ಸುಕಾಕ್ಹು ವಾಚ಼. ತಾರಾ ಬಾಳೊಮಾಬಿ, ತು ಲೊಕಮಾ ಪಡ್ದಾನೆ ಕೊಶಿಸಮಾಬಿ ಎಜ಼ ತಾರು ಪಾಲ ಥಯುಸ ತಾರಾ ಹತೆ ಮಳಲ ಕಾಮನೆ ತಾರಾ ಪೂರಾ ತಾಕತಕ್ಹು ಕರ. ಕಾ ಕದ್ಯಾಮ ತು ಸೆರಾನಿ ಸಮಾಧಿಮಾ ಕಯುಜ಼ ಕಾಮಬಿ, ಯುಕ್ತಿಬಿ, ತಿಳವಳಿಕಿಬಿ, ಗ್ಯಾನಬಿ ರ‍್ಹತು ನೈ. ಮಿ ಲೊಕಮಾ ವರಿ ದೆಕ್ತಾಮಾ ಕ್ಹಿಲಾಡಿಯೊನಿ ನ್ಹಾಟಾಮಾ ಜಿ಼ತ್ತ ನತ್ತಿ. ಬಲಿಷ್ಠೊನೆ ಯುದ್ದಮಾ ಜಯಾ ನತ್ತಿ. ಗ್ಯಾನಿಯೊನೆ ಅನ್ನ ಮಳತು ನೈ. ಶ್ಯಾಣ್ಯಾವೊನೆ ಆಸ್ತಿ ಮಳತಿಜ಼ ನೈ ಪ್ರವಿಣನೆ ದಯಾ ಮಳತಿ ನೈ. ಕಾಲಬಿ, ಗತಿಬಿ ಕ್ಹಾರಾವೊನೆ ಗೊತ್ತ ಥಾವಸ. ಮನಕ್ಹಬಿ ತಿನಾ ಟೈಮ ಗತಿ ತಿಳದೆವಾಚಿ. ಮಚ಼್ಲಿ಼ಯೊ ಕೆಟ್ಟ ಬಲಿನೆಬಿ, ಪಕ್ಷಿಯೊ ಉರುಲಮಾ ಕ್ಹಾಪ್ಡಾ ನಿಂಗತ ಮನಕ್ಹೊ ಜಾನವರೊ ನಿಂಗತ ತ್ಯುನಾ ಉಪ್ಪರ ಗಪ್ಪನಾ ಪಡಾನಾ ತ್ರಾಸನಾ ಟೈಮನೆ ಕ್ಹಾಪ್ಡಿ ಜಾ಼ವಸ.

ಗ್ಯಾನನಾಹುತಿ ವರಿ ಪಿಸಾಳಾವೊನಿಯೊ ವಿಚಾರೊ

ಮಿ ಲೊಕಮಾ ಗ್ಯಾನನೆ ಆಂ ತರಾ ದೆಕ್ಯೊ. ತೆ ಮ್ಹೊಟು ವ್ಹೈ ಕೈನ ಮನೆ ಗೊತ್ತ ಥಯು. ಹಮ್ನಾ, ಯಕ್ಕ ನ್ಹಾನು ಗಾಮ ತಿಮಾ ದಕ್ಹಾ ಮನಕ್ಹೊ ವ್ಹತ್ತಾ. ಯಕ್ಲೊ ಮ್ಹೊಟೊ ರಾಜ಼ೊ ತಿನೆ ವಿರುದ್ದ ಥೈನ ಘೆರೊ ಘಾಲಿನ ತ್ಯಾ ಮ್ಹೊಟಾ ಕ್ಹಂಬಾವೊನೆ ಘಾಲ್ಯೊ ತೆಳಾಮಾ ತ್ಯಾ ರ‍್ಹಯಲವಾಲಾ ತ್ಯುನಾಮಾ ಯಕ್ಕ ಗರಿಬ ಗ್ಯಾನಿನೆ ದೆಕ್ಯಾ. ತೆ ತಿನಾ ಗ್ಯಾನಕ್ಹು ತೆ ಗಾಮನೆ ವಚಾ಼ಡ್ಯೊ. ತನೈಸೊ ತೆ ಗರಿಬ ಗ್ಯಾನಿನೆ ಕುನ್ನಜ಼ ಸೆಂ ಕರ‍್ಯು ನೈ. ಮಿ ಆಂ ದೆಕಿನ ತಾಕತಿಬಿ ಗ್ಯಾನಜ಼ ಕ್ಹಾಸ ವ್ಹೈ, ತೆನೈಸೊ ಮನಕ್ಹೊ ಗರಿನಾ ಗ್ಯಾನನೆ ತಾತ್ಸಾರ ಕರಿನ ತಿನಾ ವಾತೊನೆ ಧ್ಯಾನ ದೆತಾ ನೈ ಕೈನ ಕೈಲಿದ್ಯೊ. ಪಿಸಾಲಾವೊನೆ ಆಳಾಲಾನಾ ಆವಾಜ಼ತಿಬಿ ಗ್ಯಾನಿನಾ ಹಲ್ಲು ಬೊಲಾನಾ ವಾತೊ ಕಾನೆ ಐಕಾವಸ. ಯುದ್ದನಾ ಆಯುಧೊತಿಬಿ ಗ್ಯಾನಜ಼ ಚೊ಼ಕು ವ್ಹೈ. ತೆನೈಸೊ ಯಕ್ಕ ಪಾಪಿ ಘನ್ನು ಚೊ಼ಕು ಹಾಳಕರಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.