Sikkiligar Bible
ಪ್ರಸಂಗಿ 10
ಮರಲ ಮಾಕ್ಹಿಯೊಕ್ಹು ಗಂದಾನು ತೆಲ ಕ್ಹಡಿನ ಬಾಸ ಆವಸ. ತಿಮ್ಮಜ಼ ದಕ್ಹು ಪಿಸಾಳುಪನ ಗ್ಯಾನನೆ ವರಿ ಘನತೆನೆ ಕೆಡಸಸ. ಗ್ಯಾನಿನೆ ಬುದ್ದಿ ತಿನಾ ಸಿದಾ ಬಗಲ ರ‍್ಹವಸ. ಅ ಗ್ಯಾನಿನಿ ಬುದ್ದಿ ತಿನಾ ರೊಡ್ಡಾ ಬಗಲ ರ‍್ಹವಸ. ತೆ ನೈಸೊ ಪಿಸಾಳೊ ಬುದ್ದಿ ತಪ್ಪಿನ ಫರಾನಾ ವಾಟಮಾ ತಿನು ಪಿಸಾಳುಪನ ಕ್ಹಾರಾವೊನೆ ದೆಕಾಡಸ. ಸೌಕಾರ ತಾರಾ ಉಪ್ಪರ ಸಿಟ್ಟ ಥಯಾರೆ ಕಾಮನೆ ಛೊಡು ನಕೊ. ತಾಳ್ಮೆ ಮ್ಹೊಟಿ ಸಿಟ್ಟನೆ ಝಕಾಡಸ. ಲೊಕಮಾ ಯಕ್ಕ ಸಂಕಟ ದೆಕ್ಯೊಸ. ತೆ ಆಳಾವಾಲಾನಾ ಮ್ಹೊಡಾತು ಆವಾನು ನಿಂಗತ ದಿಕ್ಹಸ. ಪಿಸಾಳಾವೊನೆ ಮ್ಹೊಟಿ ಪದವಿ ಮಳಸ. ಪದವಿ ರ‍್ಹಯಲವಾಲೊ ಕೆಟ್ಟ ಸ್ಥಿತಿಮಾ ರ‍್ಹವಸ. ಆಳೊ ಘೊಡಾನಿ ಸವಾರಿ ಕರಾನು ಪ್ರಬು ಜಿಮಿನ್ಪರ ಚಾ಼ಲಾನು ದೆಕ್ಯೊಸ. ಖಾಡಿ ಕ್ಹಂದಾಲೊ ತೆಜ಼ ತಿಮಾ ಪಡಸ, ಗೊಡಿ ಫೊಡಾಲಾನೆ, ಕ್ಹಾಪ ಕಡ್ಡಸ. ದಗ್ಡಾಕ್ಹು ಕಾಮ ಕರಾಲಾನೆ ದಗ್ಡಾಕ್ಹು ಮಾರ ಬೆಟಸ. ಯಕ್ಕೆಳೆ ಲಾಕ್ಡಾ ಕತ್ರಾಲಾನೆ ಲಾಕ್ಡಾಕ್ಹುಜ಼ ಮಾರ ಬೈಟಸ. ಮಂಡ ಕೊಡ್ಲಿನು ಮ್ಹೊಡು ಚ಼ುಪ ನೈ ಕರ‍್ಯಾರೆ ತೆ ಹೆಚ್ಚ ತಾಕತನೆ ಉಪಯೊಗ ಕರು. ಕಾಮಪುರಾ ಥಾವಾನೆ ಗ್ಯಾನಜ಼ ಮದತ ವ್ಹೈ. ಕ್ಹಾಪನೆ ಮಳ್ಳಕರಾಲಾನೆ ಕ್ಹಾಪ ಕಡ್ಯಾರೆ, ಕ್ಹಾಪ ಮಳ್ಳಕರಾಲಾನೆ ಸುಜ಼ ಫೈದೊ ನತ್ತಿ. ಗ್ಯಾನಿನಿ ವಾತ ಚೊ಼ಕು ವ್ಹೈ ಅ ಗ್ಯಾನಿನು ಮ್ಹೊಡು ತಿನೆಜ಼ ಗಳಿಜಾ಼ವಸ. ಅ ಗ್ಯಾನಿನಾ ವಾತೊ ಶುರವಾತಮಾ ಚೊಕಾವ್ಹೈ, ಲಾಸ್ಟಮಾ ತ್ರಾಸನಾ ಉಸುಕ ವ್ಹೈ. ಮನಕ್ಹನಾ ಕ್ಹಾಮು ಥಾವಾನು ತಿಳದ್ಯೊಸ. ತೆ ಟೈಮ ಥಯಲ್ಪರ ಅಮ್ಮಜ಼ ಥಾವಸ ಕೈನ ಕಿನಾಕ್ಹು ತಿಳ್ದಿಲಿವಸ? ಅ ಗ್ಯಾನಿನಾ ವಾತೊ ಘನ್ನಾ.
ಗಾಮನಿ ವಾಟ ನೈ ಗೊತ್ತ ರ‍್ಹಯಲವಾಲಾನೆ ಪಿಸಾಳಾ ತಿಳ್ಸಾಯಲ್ಪರ, ಕರಾನಿ ಕೊಶಿಸಕ್ಹು ವ್ಯರ್ಥಜ಼ ವ್ಹೈ. ದೆಶನೊ ರಾಜ಼ೊ ಜಾಂನಜಿಮಾನ ಥಯಾರೆ ಪ್ರಬುವೊ ಕ್ಹಾರಾ ಕ್ಹಾವಾನೆ ಬೈಟ್ಯಾರೆ ತುನೆ ಕೆಟ್ಟ ನಶಿಬ ವ್ಹೈ! ರಾಜೊ಼ ಅಂಗ ರಾಕು ನೈ ರ‍್ಹೈನ ತಿನಾ ಸ್ವಂತ ಫೈಸಲಾ ಲಿವಾಲೊ ಥೈನ ತಿನು ಅದಿಕಾರಿಯೊ ಕರೆಟ್ಟ ಟೈಮಮಾ ಕ್ಹಾವಾನೆ ಬೆಟಾಲಾ ರ‍್ಹಯಾಮ ತುನೆ ಕಕ್ಲುಕಿ ಚೊ಼ಕು ವ್ಹೈ ಕುನ್ನತಬಿ ತಿನಾ ಘರನಿ ಛತ್ತ ಸಿದಾ ಕರಾನೆ ಘನ್ನೊ ಅಂಗರಾಕು ಥಯಾರೆ. ತಿನಾಹುತಿ ಘರ ಚ಼ುವಸ. ಅಕ್ಹಾನಾಹುತಿ ಕ್ಹೌ, ದ್ರಾಕ್ಷಿನಾ ರಕ್ಹಕ್ಹು ಜಿವನನೆ ಕ್ಹುಸಿ ವ್ಹೈ, ದೊಕ್ಡಾ ಕ್ಹಾರುಜ಼ ದಿವಸ ಮನಸಮಾಜ಼ಬಿ ರಾಜ಼ಾನೆ ದೊಷ ದ್ಯು ನಕೊ.ಕ್ಹುರವಾನಿ ಕ್ಹೊಲಿಮಾಬಿ ಸೌಕಾರನೆ ಗಾಳೊ ದ್ಯು ನಕೊ. ಹಬಾಳನಾ ಪಕ್ಷಿಯೊ ತೆ ಅವಾಜ಼ನೆ ಮುಟ್ಟಸಾವಸ; ಪಕ್ಷಿಬಿ ತೆ ವಿಷಯನೆ ತಿಳಸಾವಸ
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.