Skip to content
BibleKenya

Sikkiligar Bible

ದಾನಿಯಲ 8

ದಾನಿಯಲನಾ ದರ್ಶನಮಾ ಟಗರ ವರಿ ಬಕ್ರು

ಪೈಲಾ ಮನೆ ದಿಕ್ಹಲ ಕ್ಹಪನ ನೈಸೊ ರಾಜೊ಼ ಥಯಲ ಬೆಲ್ಶಚ್ಚರನಾ ಆಳ್ವಿಕೆನಾ ತನ್ವಾ ವರಕ್ಹಮಾ ವರಿ ಯಕ್ಕ ದರ್ಶನ ದಾನಿಯಲ ಥಯಲ ಮನೆ ಪಡ್ಯು. ಮಿ ದೆಕಲ ಕ್ಹಪನಮಾ ಎಲಾಮ ಸಂಸ್ಥನನಾ ಶುಷನ ಕೊಟೆಮಾ ವ್ಹತ್ತೊ; ಕ್ಹಪನಮಾ ಒಲಾ ಕಾಲುವೆನಾ ದಂಡಿನಾ ಉಪ್ಪರ ಹುಬ್ರಯಲ ನಿಂಗತ ದಿಕ್ಯು. ಮಿ ಡೊಳಾ ಉಚೈನ ದೆಕ್ತಾಮಾ, ಬೆ ಶಿಂಗ್ಡಾವೊನು ಯಕ್ಕ ಟಗರ ಕಾಲುವೆನಾ ಬಾಜು಼ಮಾ ಹುಬ್ರಯುತು; ತಿನಾ ಬೆ ಶಿಂಗ್ಡಾ ಲಾಂಬಾ ರ‍್ಹಯಾತಬಿ ಯಕ್ಕತಿ ಯಕ್ಕ ಮ್ಹೊಟಾ ವ್ಹೈ, ತೆ ಮ್ಹೊಟು ಶಿಂಗ್ಡು ನ್ಹಾನು ಶಿಂಗ್ಡು ಹುಟ್ಟಿನ ಆಯಲ್ಪರ ಹುಟ್ಟಿನ ಆಯಲ ವ್ಹೈ. ಮಿ ದೆಕ್ತೊ ರ‍್ಹತಾಮಾ ತೆ ಟಗರ ಪಚ್ಚಿಮ ದಿಕ್ಕೆಬಿ, ಉತ್ತರ ದಿಕ್ಕೆಬಿ, ದಕ್ಷಿಣ ದಿಕ್ಕೆಬಿ ಫರಾಡುತು; ಕಯುಜ಼ ಜಾನವರೊ ತಿನಾ ಕ್ಹಾಮು ಹುಬ್ರಯು ನೈ; ತಿನಾ ಹತ್ತತು ಛೊಡೈ ಲಿವಾನೆ ಕಯಾಜ಼ ಜಾನವರನೆ ತಾಕತ ನ್ಹೊತು; ತೆ ಮನಸ ಆಯಲ ತಿಮ್ಮ ಚಾ಼ಲಿನ ತಿನೆ ತೆ ಹೆಚ್ಚ ಕರಿ ಲಿದ್ಯು. ಮಿ ದೆಕ್ತಾಮಾ, ಯಕ್ಕ ಬಕ್ರು ಪಚ್ಚಿಮ ದಿಕ್ಕತು ಭುಮಂಡಲ ಕ್ಹಾರು ದಾಟಿನ ಜಿಮಿನನೆ ಮುಟ್ಯಾ ಬಗರ ನ್ಹಾಟಿನ ಐಯು; ತಿನಾ ಡೊಳಾನಾ ವಚ್ಮಾ ಕ್ಹಾಸ ರ‍್ಹಯಲ ಯಕ್ಕ ಶಿಂಗ್ಡೊ ವ್ಹತ್ತೊ. ಮಿ ಕಾಲುವೆನಾ ಬಾಜು಼ಮಾ ದೆಕಲ ಬೆ ಶಿಂಗ್ಡಾ ರ‍್ಹಯಲ ಟಗರಕನ ತೆ ಬಕ್ರು ಐಯು. ತಾಕತಕ್ಹು ಫುಗ್ಗಿನ ಶಿಟ್ಟ ಥೈನ ತಿನಾ ಉಪ್ಪರ ಪಡು ಕೈನ ನ್ಹಾಟ್ಯು. ತೆ ಮಾರಾ ಕ್ಹಪನಮಾ ಟಗರಕನ ಗೈನ ತಿನಾ ಉಪ್ಪರ ಶಿಟ್ಟಕ್ಹು ಬಳತು ತಿನೆ ಮಾರಿನ ತಿನಾ ಬೆ ಶಿಂಗ್ಡಾವೊನೆ ತೊಡಿ ಪಡ್ಯು; ತಿನಾ ಕ್ಹಾಮು ಹುಬ್ರ್ಯವಾನೆ ಟಗರನೆ ತಾಕತ ನ್ಹೊತಿ; ತೆ ಟಗರನೆ ಜಿಮಿನಪರ ಪಾಡಿನ ಕ್ಹುಂದ್ಯು; ಟಗರನೆ ತಿನಾ ಹತ್ತಕ್ಹು ಛೊಡಾವಾನೆ ಕುನ್ನಜ಼ ನ್ಹೊತು; ತೆ ಬಕ್ರು ತಿನೆ ತೆಜ಼ ಘನ್ನ ಹೆಚ್ಕಿ ಕರಿ ಲಿದ್ಯು, ತೆನೈಸೊ ತೆ ಅದಿಕಾರಮಾ ಆತಾಮಾಜ಼ ತಿನು ಮ್ಹೊಟೊ ಶಿಂಗ್ಡೊ ತುಟಿ ಗಯು; ತಿನಾ ಜ಼ಗಾಪರ ಚಾರ ಅದ್ಬುತ ರ‍್ಹಯಲ ಶಿಂಗ್ಡಾ ಚಾರೆ ದಿಕ್ಕೆ ಫೈಲ್ಯಾ. ತಿನಾಮಾ ಯಕ್ಕಮಾ ಯಕ್ಕ ನ್ಹಾನೊ ಶಿಂಗ್ಡೊ ಹುಟ್ಟಿನ ಘನ್ನಾ ಮ್ಹೊಟಾ ಥೈನ ಬೆಳದಿನ ದಕ್ಷಿಣ ದಿಕ್ಕೆಬಿ ಪುರ್ವ ದಿಕ್ಕಮಾಬಿ ಚೊ಼ಕಾ ದೆಶಮಾಬಿ ತಾಕತವರ ಥಯು. ತೆ ಚಿಕ್ಕಿಯೊನಾ ಗುಂಪನಾ ಉಪ್ಪರ ಹತ್ತ ಕರಾವರ್ಕ್ಹು ಜಾಸ್ತ ಥಯನ ತೆ ಗುಂಗನಾ ದಕ್ಹಾ ಚಿಕ್ಕಿಯೊನೆ ಜಿಮಿನಪರ ನಶ ಕರಿನ ಕ್ಹುಂದಿ ಪಡ್ಯು. ಎನೈಸೊ ತೆ ಗುಂಪನಾ ಅದಿಪತಿನೆ ಕ್ಹಾಮು ಹುಬ್ರ್ಯವಾರ್ಕ್ಹು ಫುಗ್ಗಿನ ಹಮೆಶಾನು ಹೊಮ ತಿನೆ ಥಯಾ ಬಗರ ಕರಿನ ತಿನು ಪವಿತ್ರ ಜ಼ಗಾನೆ ನಾಶ ಕರಿನ ಹಮೆಶಾನು ಹೊಮಾ ಹುಬ್ರಾಡಾನೆ ಕೆಟ್ಟತನಾಕ್ಹು ಯಕ್ಕ ಸೈನ್ಯನೆ ಹುಬ್ರಾಡಿನ ಸತ್ಯ ನಿತಿನೆ ಜಿಮಿನಪರ ಢಕ್ಲಿನ ತಿನಾ ಪಸಂದನೆ ಪುರಾ ಕರಿಲೆತು ಮ್ಹೊಟು ಥಾತು ಐಯು. ತೆಳಾಮಾ ಯಕ್ಕ ದೆವದುತ ಬೊಲಾನು ಐಕ್ಯೊ; ಬೊಲಾಲಾನೆ ವರಿಯಕ್ಕ ದೆವದುತ ಬೊಲಿನ- ಹಮೆಶಾನು ಹೊಮಾ ಹುಬ್ರಡಾನು, ಭಯಾನಕ ಥಯಲ ಕ್ಹುದಾನೆ ದ್ರೊಹ ಕರಾನು, ಪವಿತ್ರ ಆಲಯನೆ ಕ್ಹುದಾನಾ ಭಕ್ತೊನಾ ಗುಂಪನೆ ಕ್ಹುಂದಾನು ಕವಾನು ಕ್ಹಪನನಾ ಕಾಮೊ ಕಕ್ಲಾ ದಿನ್ನ ಥಾವಸ ಕೈನ ಸವಾಲ ಕರಾಕ್ಹು ತೆ ತಿನೆ - ದಿನ್ನ ರಾತನಾಹುತಿ ಬೆ ಹಜಾ಼ರ ತನ್ನ ಕ್ಹೊ ಲಕ್ಕಾ ಚಾ಼ಲಸ; ಪಾಚ಼ಲ್ತು ಪವಿತ್ರ ಆಯಲಮಾ ಬಲಿ ದಿವಾನು ಥಾತು ನೈ. ವರಿ ನ್ಯಾಯ ಸ್ಥಾಪನೆ ಥಾವಸ ಕೈನ ಕದ್ಯೊ.

ಗ್ಯಾಬ್ರಿಯೆಲ ದುತ ದರ್ಶನ ತಿಳಸಾಯಲ

ತೆಳಾಮಾ ದಾನಿಯಲ ಥಯಲ ಮಿ ಕ್ಹಪನನೆ ದೆಕಿನ ತಿನೆ ತಿಳ್ದಿಲಿವಾನೆ ಕೊಶಿಶ ಕರ್ತಾಮಾ, ನೈ ದಿಕ್ಹಾನು ಮನಕ್ಹ ಯಕ್ಕ ಮಾರಾ ಕ್ಹಾಮೊ ಹುಬ್ರಯೊತೊ. ತೆಳಾಮಾ ಗಬ್ರಿಯಲ, ದರ್ಶನ ಮತ್ಲಬ ಅನೆ ತಿಳ್ಸಾ ಕೈನ ಮನಕ್ಹನಿ ಅವಾಜ಼ ನಿಂಗತ ಯಕ್ಕ ಅವಾಜ಼ ಉಲಾ ನದಿನಿ ದಂಡಿನಾ ವಚ್ಮಾ ಮನೆ ಐಕು ಐಯು. ತಿನಾ ನಿಂಗತ ತೆ ಮಕನ ಆಯೊ; ತೆ ಆತಾಮಾ ಮಿ ಭೆಂಕ್ಹು ಘಾಬ್ರೊ ಥೈನ ಡಬ್ಬ ಪಡ್ಯೊ; ಮನೆ ತೆ- ಮನಕ್ಹನಾ ದಿಕ್ರಾ,ಆಂ ತುನೆ ಶೆಂ ರ‍್ಹವಾದೆ, ಆಂ ಅಂತ್ಯಕಾಲಮಾ ಥಾವಾನು ಕ್ಹಪನ ವ್ಹೈ ಕೈನ ಕದ್ಯೊ. ತೆ ಮಾರಾ ಕ್ಹಾತೆ ಬೊಲ್ತೊ ರ‍್ಹತಾಮಾ ಮಿ ಬೆವೊಸ ಥೈನ ತಿನಾ ಪಗೊಪರ ಪಡ್ಯೊ. ತೆಳಾಮಾ ತೆ ಮನೆ ಮುಟ್ಟಿನ ಹುಬ್ರಾಡಿನ ಮನೆ- ದೆಕ, ಕ್ಹುದಾ ತಿನಿ ಶಿಟ್ಟನೆ ಪುರಾ ಕರಾನಾ ಅಗಲ್ಯಾ ಕಾಲಮಾ ಥಾವಾನು ತುನೆ ಕೌಸ; ತೆ ನಾಶ ಥಾವಾನಾ ಅಂತ್ಯ ಕಾಲನು ವ್ಹೈ. ತು ದೆಕಲ ಬೆ ಶಿಂಗ್ಡಾವೊನು ಟಗರ ಮೆದ್ಯನಿ ವರಿ ಪಾರಸಿವಾಲಾವೊನಿ ರಾಜ್ಯ ವ್ಹೈ. ತೆ ಬಕ್ರು ಗ್ರಿಕ ರಾಜ್ಯ ವ್ಹೈ, ತಿನಾ ಡೊಳಾನಾ ವಚ್ಮಾನು ಮ್ಹೊಟು ಶಿಂಗ್ಡೊ ತೆ ರಾಜ್ಯನು ಪಸ್ಟ ರಾಜೊ಼ ವ್ಹೈ. ತೆ ಶಿಂಗ್ಡೊ ತುಟಲ್ಪರ ತಿನಿ ಜ಼ಗಾಪರ ಚಾರ ಶಿಂಗ್ಡಾ ಉಟಲ ವಿಶಯ ಸು ವ್ಹೈ ಕದ್ಯಾಮ ತೆ ಜನಾಂಗಮಾತಾ ಚಾರ ರಾಜ್ಯ ಉಟಸ; ತನೈಸೊ ಪಸ್ಟನಾ ರಾಜಾ಼ನೆ ರ‍್ಹಯಲ ತೆಕ್ಲಿ ತಾಕತಬಿ ತ್ಯುನೊನೆ ನೈ ರ‍್ಹತಿ. ತೆ ರಾಜ್ಯವೊನಾ ಲಾಸ್ಟನಾ ಟೈಮಮಾ, ಅನಿತಿವಾವಾನು ಪುರಾ ಥಯಲ್ಪರ ಕಠಿನ ಮ್ಹೊಡಾವಾಲೊ ವಚನಾನು ಮ್ಹೈನು ಅರ್ಥ ತಿಳ್ದಿಲಿವಾಲೊ ಶಾಣೊ ರ‍್ಹಯಲ ಯಕ್ಕ ರಾಜೊ಼ ಉಟಿನ ಹುಬ್ರ್ಯವಸ. ತೆ ತಾಕತವರ ಥಾವಸ ತೆನೈಸೊ ತಾಕತಕ್ಹು ನ್ಹವೈ; ಘನ್ನೊ ಹಾಳ ಕರಿನ ಉಪ್ಪರ ಐನ ತಿನು ಪಂಸಂದನೆ ಪುರಾ ಕರಿಲಿವಸ. ಗ್ಯಾನಕ್ಹುಜ಼ ತಿನು ಮೊಸ ತಯ್ಯಾರ ಕರಿನ ಮನಸಮಾ ಫುಗ್ಗಿನ ನೆಮ್ಮದಿಕ್ಹು ರ‍್ಹವಾನೆಲಾ ಘನ್ನಾ ಮನಕ್ಹೊನೆ ನಾಶ ಕರಿನ ರಾಜಕುಮಾರೊನಾ ರಾಜ ಕುಮಾರ ವಿರುದ್ದ ಥೈನ ಉಟಸ. ಆಹಾ, ಕಿನು ಹತ್ತ ಲಾಗ್ಯಾ ಬಗರ ಹಾಳ ಥಾವಸ. ದರ್ಶನ ತಿಳ್ಸಾಯಲ ದಿನ್ನ ರಾತನಾ ವಿಶಯ ಕ್ಹರಿಜ಼ ವ್ಹೈ. ತೆನೈಸೊ ತೆ ಕ್ಹಪನ ಜ಼ಕೈನ ರ‍್ಹವಾನೆದೆ; ತೆ ಘನ್ನು ದುರನಾ ಕಾಲನು ವ್ಹೈ ಕೈನ ಕದ್ಯೊ. ತೆಳಾಮಾ ದಾನಿಯಲ ಥಯಲ ಮಿ ಡೊಗ್ಗಿನ ದಕ್ಹಾ ದಿನ್ನ ಅರಾಮ ನೈಸೊ ಪಡ್ಯೊ; ಪಾಚ಼ಲ್ತೊ ಉಟಿನ ರಾಜ್ಯನು ಕಾಮ ಕರ‍್ಯೊ; ತೆ ಕ್ಹಪನನೆ ಭುಚ್ಕಿನ ಘಾಬ್ರೊ ಥಯೊ; ತೆ ಕಿನೆಜ಼ ಗ್ವತ್ತ ಥಯು ನೈ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.