Sikkiligar Bible
ದಾನಿಯಲ 7
ದಾನಿಯಲ ಚಾರ ಜಾ಼ನವರೊನೆ ದೆಕಲ
ಪೈಲಾ ಮನೆ ದಿಕ್ಹಲ ಕ್ಹಪನ ನೈಸೊ ರಾಜೊ಼ ಥಯಲ ಬೆಲ್ಶಚ್ಚರನಾ ಆಳ್ವಿಕೆನಾ ತನ್ವಾ ವರಕ್ಹಮಾ ವರಿ ಯಕ್ಕ ಕ್ಹಪನ ದಾನಿಯಲ ಥಯಲ ಮನೆ ಪಡ್ಯು. ಮಿ ದೆಕಲ ಕ್ಹಪನಮಾ ಎಲಾಮ ಸಂಸ್ಥನನಾ ಶುಷನ ಕೊಟೆಮಾ ವ್ಹತ್ತೊ; ಕ್ಹಪನಮಾ ಉಲಾ ಕಾಲುವೆನಾ ದಂಡಿನಾ ಉಪ್ಪರ ಹುಬ್ರಯಲ ನಿಂಗತ ದಿಕ್ಯು. ಮಿ ಡೊಳಾ ಉಚೈನ ದೆಕ್ತಾಮಾ, ಬೆ ಶಿಂಗ್ಡಾವೊನು ಯಕ್ಕ ಟಗರ ಕಾಲುವೆನಾ ಬಾಜು಼ಮಾ ಹುಬ್ರಯುತು; ತಿನಾ ಬೆ ಶಿಂಗ್ಡಾ ಲಾಂಬಾ ರ್ಹಯಾತಬಿ ಯಕ್ಕತಿ ಯಕ್ಕ ಮ್ಹೊಟಾ ವ್ಹೈ, ತೆ ಮ್ಹೊಟು ಶಿಂಗ್ಡು ನ್ಹಾನು ಶಿಂಗ್ಡು ಹುಟ್ಟಿನ ಆಯಲ್ಪರ ಹುಟ್ಟಿನ ಆಯಲ ವ್ಹೈ. ಮಿ ದೆಕ್ತೊ ರ್ಹತಾಮಾ ತೆ ಟಗರ ಪಚ್ಚಿಮ ದಿಕ್ಕೆಬಿ, ಉತ್ತರ ದಿಕ್ಕೆಬಿ, ದಕ್ಷಿಣ ದಿಕ್ಕೆಬಿ ಫರಾಡುತು; ಕಯುಜ಼ ಜಿವಜಂತ ತಿನಾ ಕ್ಹಾಮು ಹುಬ್ರಯು ನೈ; ತಿನಾ ಹತ್ತತು ಛೊಡೈ ಲಿವಾನೆ ಕಯಾಜ಼ ಜಾನವರನೆ ತಾಕತ ನ್ಹೊತು; ತೆ ಮನಸ ಆಯಲ ತಿಮ್ಮ ಚಾ಼ಲಿನ ತಿನೆ ತೆ ಹೆಚ್ಚ ಕರಿ ಲಿದ್ಯು. ಮಿ ದೆಕ್ತಾಮಾ, ಯಕ್ಕ ಬಕ್ರು ಪಚ್ಚಿಮ ದಿಕ್ಕತು ಭುಮಂಡಲ ಕ್ಹಾರು ದಾಟಿನ ಜಿಮಿನನೆ ಮುಟ್ಯಾ ಬಗರ ನ್ಹಾಟಿನ ಐಯು; ತಿನಾ ಡೊಳಾನಾ ವಚ್ಮಾ ಕ್ಹಾಸ ರ್ಹಯಲ ಯಕ್ಕ ಶಿಂಗ್ಡೊ ವ್ಹತ್ತೊ. ಮಿ ಕಾಲುವೆನಾ ಬಾಜು಼ಮಾ ದೆಕಲ ಬೆ ಶಿಂಗ್ಡಾ ರ್ಹಯಲ ಟಗರಕನ ತೆ ಬಕ್ರು ಐಯು. ತಾಕತಕ್ಹು ಫುಗ್ಗಿನ ಶಿಟ್ಟ ಥೈನ ತಿನಾ ಉಪ್ಪರ ಪಡು ಕೈನ ನ್ಹಾಟ್ಯು. ತೆ ಮಾರಾ ಕ್ಹಪನಮಾ ಟಗರಕನ ಗೈನ ತಿನಾ ಉಪ್ಪರ ಶಿಟ್ಟಕ್ಹು ಬಳತು ತಿನೆ ಮಾರಿನ ತಿನಾ ಬೆ ಶಿಂಗ್ಡಾವೊನೆ ತೊಡಿ ಪಡ್ಯು; ತಿನಾ ಕ್ಹಾಮು ಹುಬ್ರ್ಯವಾನೆ ಟಗರನೆ ತಾಕತ ನ್ಹೊತಿ; ತೆ ಟಗರನೆ ಜಿಮಿನಪರ ಪಾಡಿನ ಕ್ಹುಂದ್ಯು; ಟಗರನೆ ತಿನಾ ಹತ್ತಕ್ಹು ಛೊಡಾವಾನೆ ಕಯುಜ಼ ಜಾನವರ ನ್ಹೊತು; ತೆ ಬಕ್ರು ತಿನೆ ತೆಜ಼ ಘನ್ನ ಹೆಚ್ಕಿ ಕರಿ ಲಿದ್ಯು, ತೆನೈಸೊ ತೆ ಅದಿಕಾರಮಾ ಆತಾಮಾಜ಼ ತಿನು ಮ್ಹೊಟೊ ಶಿಂಗ್ಡೊ ತುಟಿ ಗಯು; ತಿನಾ ಜ಼ಗಾಪರ ಚಾರ ಅದ್ಬುತ ರ್ಹಯಲ ಶಿಂಗ್ಡಾ ಚಾರೆ ದಿಕ್ಕೆ ಫೈಲ್ಯಾ.
ಹಮೆಶ್ಯಾ ಜಿವ್ತೊ ರ್ಹವಾನು ದರ್ಶನ
ತಿನಾಮಾ ಯಕ್ಕಮಾ ಯಕ್ಕ ನ್ಹಾನೊ ಶಿಂಗ್ಡೊ ಹುಟ್ಟಿನ ಘನ್ನಾ ಮ್ಹೊಟಾ ಥೈನ ಬೆಳದಿನ ದಕ್ಷಿಣ ದಿಕ್ಕೆಬಿ ಪುರ್ವ ದಿಕ್ಕಮಾಬಿ ಚೊ಼ಕಾ ದೆಶಮಾಬಿ ತಾಕತವರ ಥಯು. ತೆ ಚಿಕ್ಕಿಯೊನಾ ಗುಂಪನಾ ಉಪ್ಪರ ಹತ್ತ ಕರಾವರ್ಕ್ಹು ಜಾಸ್ತ ಥಯನ ತೆ ಗುಂಗನಾ ದಕ್ಹಾ ಚಿಕ್ಕಿಯೊನೆ ಜಿಮಿನಪರ ನಶ ಕರಿನ ಕ್ಹುಂದಿ ಪಡ್ಯು. ಎನೈಸೊ ತೆ ಗುಂಪನಾ ಅದಿಪತಿನೆ ಕ್ಹಾಮು ಹುಬ್ರ್ಯವಾರ್ಕ್ಹು ಫುಗ್ಗಿನ ಹಮೆಶಾನು ಹೊಮ ತಿನೆ ಥಯಾ ಬಗರ ಕರಿನ ತಿನು ಪವಿತ್ರ ಜ಼ಗಾನೆ ನಾಶ ಕರಿನ ಹಮೆಶಾನು ಹೊಮಾ ಹುಬ್ರಾಡಾನೆ ಕೆಟ್ಟತನಾಕ್ಹು ಯಕ್ಕ ಸೈನ್ಯನೆ ಹುಬ್ರಾಡಿನ ಸತ್ಯ ಧರ್ಮನೆ ಜಿಮಿನಪರ ಢಕ್ಲಿನ ತಿನಾ ಪಸಂದನೆ ಪುರಾ ಕರಿಲೆತು ಮ್ಹೊಟು ಥಾತು ಐಯು. ತೆಳಾಮಾ ಯಕ್ಕ ದೆವದುತ ಬೊಲಾನು ಐಕ್ಯೊ; ಬೊಲಾಲಾನೆ ವರಿಯಕ್ಕ ದೆವದುತ ಬೊಲಿನ- ಹಮೆಶಾನು ಹೊಮಾ ಹುಬ್ರಡಾನು, ಭಯಾನಕ ಥಯಲ ಕ್ಹುದಾನೆ ದ್ರೊಹ ಕರಾನು, ಪವಿತ್ರ ಆಲಯನೆ ಕ್ಹುದಾನಾ ಭಕ್ತೊನಾ ಗುಂಪನೆ ಕ್ಹುಂದಾನು ಕವಾನು ಕ್ಹಪನನಾ ಕಾಮೊ ಕಕ್ಲಾ ದಿನ್ನ ಥಾವಸ ಕೈನ ಸವಾಲ ಕರಾಕ್ಹು ತೆ ತಿನೆ - ದಿನ್ನ ರಾತನಾಹುತಿ ಬೆ ಹಜಾ಼ರ ತನ್ನ ಕ್ಹೊ ಲಕ್ಕಾ ಚಾ಼ಲಸ; ಪಾಚ಼ಲ್ತು ಪವಿತ್ರ ಆಯಲನೆ ವರಿ ನ್ಯಾಯ ಸ್ಥಾಪನೆ ಥಾವಸ ಕೈನ ಕದ್ಯೊ.
ಕ್ಹಪನಮಾ ಆಯಲ ದರ್ಶನೆ ತಿಳ್ಸಾಯಲ
ದಾನಿಯಲ ಥಯಲ ಮಿ ಕ್ಹಪನನೆ ದೆಕಿನ ತಿನೆ ತಿಳ್ದಿಲಿವಾನೆ ಕೊಶಿಶ ಕರ್ತಾಮಾ, ನೈ ದಿಕ್ಹಾನು ಮನಕ್ಹ ಯಕ್ಕ ಮಾರಾ ಕ್ಹಾಮೊ ಹುಬ್ರಯೊತೊ. ತೆಳಾಮಾ ಗಬ್ರಿಯಲ, ಕ್ಹಪನನು ಮತ್ಲಬ ಅನೆ ತಿಳ್ಸಾ ಕೈನ ಮನಕ್ಹನಿ ಅವಾಜ಼ ನಿಂಗತ ಯಕ್ಕ ಅವಾಜ಼ ಊಲಾ ಕಾಲುವೆನಾ ದಂಡಿನಾ ವಚ್ಮಾ ಮನೆ ಐಕು ಐಯು. ತಿನಾ ನಿಂಗತ ತೆ ಮಕನ ಆಯೊ; ತೆ ಆತಾಮಾ ಮಿ ಭೆಂಕ್ಹು ಘಾಬ್ರೊ ಥೈನ ಅಡ್ಡ ಪಡ್ಯೊ; ಮನೆ ತೆ- ಮನಕ್ಹನಾ ದಿಕ್ರಾ,ಆಂ ತುನೆ ಶೆಂ ತೆನೈಸೊ ರಾಜ್ಯ ಸರ್ವಶಕ್ತ ಥಯಲ ಕ್ಹುದಾನಾ ಭಕ್ತೊನೆ ಮಳಾನು ತೆ ತ್ಯುನೊನೆ ಹಮೆಶಾಬಿ ಅನಭವ ಕರಸ. ತೆಳಾಮಾ ಮಿ ಚಾರವಾ ಜಾನವರನಾಹುತಿ ತಿಳ್ದಿಲಿವಾನೆ ಮನಸ ಕರ್ಯೊ. ತೆ ಬಿಜಾ ಜಾನವರೊತಿ ಬಿಜುಜ ವ್ಹತ್ತು. ಎ ಘನ್ನು ಖತರನಾಕ ವ್ಹತ್ತು ತಿನಾ ಲ್ಹೊಡಾನಾ ದಾತೊ ಕ್ಹಾರುಜ಼ ತುಕ್ಡಾ ತುಕ್ಡಾ ಕರಸ. ಉಗ್ರಲಕ್ಹಾರು ಕ್ಹುಂದಿನ ಛೆಟಿ ಪಡಸ. ತಿನಾ ಮಾತಾಪರ ರ್ಹಯಲ ದಕ್ಹ ಶಿಂಗ್ಡಾ ವರಿ ಉಪ್ಪರ ಆವಾನು ತನ್ನ ಶಿಂಗ್ಡಾ ವ್ಹತ್ತಾ. ತಿನೆ ಡೊಳಾ ವರಿ ಮ್ಹೊಡು ವ್ಹತ್ತು. ವರಿ ಸೊಕ್ಕ ಕರಲಿವಾಡುತು. ತೆ ಪೈಲಾನಾ ಜಾನವರತಿಬಿ ಘನು ಖತರನಾಕ ವ್ಹತ್ತು. ಮಿ ದೆಕ್ತಾಮಾ ತೆ ಶಿಂಗ್ಡು ಕ್ಹುದಾನಾ ಭಕ್ತೊನೆ ಯುದ್ದ ಕರಿನ ತ್ಯುನೊನೆ ಬಂದಿ ಕರಲಿದ್ಯುತು. ತೆಳಾಮಾ ಹಮೆಶಾಬಿ ಜ್ಯುತೊ ರ್ಹವಾಲೊ ಥೈನ ಯಕ್ಲೊ ಆಯೊ.ಸರ್ವಶಕ್ತ ಥಯಲ ಕ್ಹುದಾನಾ ಮನಕ್ಹೊನಾಹುತಿ ನ್ಯಾಯ ತಿರ್ಪ ಹೊರಡಿಸ್ಯೊ. ತೆಳಾಮಾ ಕ್ಹುದಾನಾ ಮನಕ್ಹೊ ವಪಸೈನ ದಿದ್ಯೊ. ತೆಳಾಮಾ ತೆ ಚಾರವಾ ಜಾನರನಾಹುತಿ ಕೌ ಕದ್ಯಾಮ ದುನಿಯಾಪರ ಚಾರವಾ ಹುಕುಮನು ರಾಜ್ಯ ಆವಸ.ಎ ಉಗ್ರಲ ಕ್ಹಾರಾ ರಾಜ್ಯಾವೊತಿ ಬಿಜು಼ಜ಼ ರ್ಹವಸ ತೆ ಪೂರಾ ದುನಿಯಾನೆ ನಾಶ ಕರಸ. ತೆ ಕ್ಹುಂದಿನ ಪುಡಿಪುಡಿ ಕರಸ. ದಕ್ಹಾ ಶಿಂಗ್ಡಾ ಕದ್ಯಾರೆ ಆಂ ರಾಜ್ಯಾವೊಮಾ ದಕ್ಹಾ ರಾಜಾ಼ ಉಟಸ.ವರಿ ತೆ ಥಯಲ್ಪರ ಹಜಿಯಕ್ಲೊ ಆವಸ.ತೆ ರಾಜೊ಼ ತೆ ಉಗ್ರಲ ರಾಜಾ಼ವೊತಿ ಬಿಜ಼ೊಜ಼ ಥಯಲ ರ್ಹವಸ. ತೆ ತನ್ನ ರಾಜಾ಼ವೊನೆ ಹರಾಡಸ. ತೆ ಘನೊ ಉನ್ನತ ರ್ಹಯಲವಾಲಾನಾ ವಿರುದ್ದ ಬೊಲಸ. ವರಿ ತಿನಾ ಮನಕ್ಹೊನೆ ಭಾರೊ ಢಕ್ಲಸ. ಟೈಮ ವರಿ ನಿಯಮೊ ಬದ್ಲಿ ಕರಾನೆ ವಿಚಾರ ಕರಸ.ತೆ ತಿನಾ ಹತ್ಮಾ ದಿವಾ ವರಕ್ಹು ಥಾವಸ. ಯಕ್ಕ ಕಾಲ ಅರ್ದೊಕಾಲ ವರಿ ಕಾಲೊ ತ್ಯಾಲಕ್ಕಾ ತ್ಯುನೆ ಕ್ಹುದಾನೆ ದಿವಸ. ತೆಳಾಮಾ ಪರಲೊಕನಾ ಫೈಸಲಾನಾ ಸಭೆಮಾ ಫೈಸನಾಹುತಿ ಬೈಟಸ. ವರಿ ತಿನಿ ರ್ಹಯಲ ಅದಿಕಾರ ಕಾಳ್ಳಿವಸ. ಘನ್ನಿ ಕಿಳತನಾಕ್ಹು ನಾಶ ಕರಸ ಇಮ್ಮ ರಾಜ್ಯಭಾರ ವರಿ ಮ್ಹೊಟಿತನಾ ಕ್ಹುದಾನಾ ಮನಕ್ಹೊನಾ ಹತ್ಮಾ ವಪಸೈನ ದಿವಸ. ತಿನು ರಾಜ್ಯನು ಆಡಳಿತ ಅಂತ್ಯಜ಼ ರ್ಹತು ನೈ. ವರಿ ಕ್ಹಾರಾ ಆಡಳಿತೊ ತಿನೆ ವಿದೆಯೆ ಥೈನ ಸೆವೆ ಕರಸ. ಆಂ ಎ ವಿಶಮಾ ಲಾಸ್ಟ ವ್ಹೈ. ದಾನಿಯಲ ಥಯಲ ಮಿ ಘನೊ ಕಾಪಾ ವರಕ್ಹೊ ಕರಸ ಮಾರೊ ಕಲರ ಬದ್ಲಿ ಥಯೊ ತೆನೈಸೊ ತೆ ವಿಶಯ ಮಾರಾ ಮನಸಮಾ ಮ್ಹೆಲ್ಲಿದ್ಯೊ. ಬೆಲ್ಸಚ್ಚರ ಆಳ್ವಿಕಾನಾ ತನವಾ ವರಕ್ಹಮಾ ಬಿಜೆಕ ಕ್ಹಪನ ದೆಕ್ಯೊ.
Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.