Skip to content
BibleKenya

Sikkiligar Bible

ದಾನಿಯಲ 12

ತಾರಾ ಮನಕ್ಹೊನೊ ಪಕ್ಷ ಧರಿಲಿದಲ ಮಹಾಪಾಲಕ ಥಯಲ ಮಿಕಾಯೆಲ ತೆ ಕಾಲಮಾ ಉಟಸ ಪೈಲಾತಿ ಪೈಲಾ ಜನಾಂಗ ಹುಟ್ಟಲ ದಿನತಾಬಿ ತಯಾಲಕ್ಕಾ ಥಾವಾನಿ ತ್ರಾಸ ಥಾವಸ; ತೆಳಾಮಾ ತಾರಾ ಮನಕ್ಹೊಮಾ ಕಯಾ ನಾಮೊ ಸುರಳಿಮಾ ರ‍್ಹವಸತೊ ತ್ಯುನೆ ಕ್ಹಾರಾಜ಼ ವಾಚ಼ಸ. ಧುಳನಿ ಜಿಮಿನ್ಮಾ ಘನ್ನಿ ನಿಂದರ ಕರಾಲಾವೊಮಾ ಘನ್ನಾ ಜ಼ನಾ ಉಟಿನ ದಕ್ಹಾಜ಼ನಾ ಹಮೆಶಾನೊ ಜ಼ಲಮ ಹೊಂದಿನ ದಕ್ಹಾಜ಼ನಾ ಹಮೆಶಾ ಠುಕ್ರಾವಾನು ಅನುಭವಿಸಸ. ಗ್ಯಾನಿಯೊ ಘನ್ನು ಉಜಾಲು ರ‍್ಹಯಲ ಹಬಾಳನಿಂಗತ ಮಿಂಚ಼ಸ ಘನಾ ಜ಼ನಾವೊನೆ ನಿತಿವಂತವಾಲಾ ಕರಸ. ಹಮೆಶಾಬಿ ಚಿಕ್ಕಿಯೊನಾ ನಿಂಗತ ಮಿಂಚ಼ಸ. ದಾನಿಯಲ, ತು ಎ ವಾತೊ ಝಾಕಿನ ಮ್ಹೆಲ, ತೆ ಬರ್ದಾನಾ ಗ್ರಂಥೊನೆ ಚಾವಿ ಘಾಲ, ಲಾಸ್ಟಲಕ್ಕಾ ಝಕೈನ ರ‍್ಹವಾದೆ; ಘನ್ನಾ ಮನಕ್ಹೊ ಹೈತಿ-ಹೈತಿ ಫರಸ, ತಿಳಿವಳಕಿ ಘನ್ನಿ ಥಾಸಕಸ. ತೆಳಾಮಾಜ಼ ‘ದಾನಿಯಲ ಥಯಲ ಮಿ ವರಿ ಬೆಜ಼ನಾವೊನೆ ದೆಕ್ಯೊ; ತ್ಯುನೊಮಾತು ಯಕ್ಲೊ ನದ್ದಿನಿ ದಂಡಿಪರ, ಬಿಜೆಕ್ಲೊ ಹಜಿಯಕ್ಕ ದಂಡಿಪರ ಹುಬರಯೊತೊ. ಇವ್ನಾನೊಮಾನೊ ಯಕ್ಲೊ ಎ ಕಾಮ ಪುರಾ ಥಾವಾನೆ ಕೆಕ್ಲೊ ಟೈಮ ಥಾವಸ ಕೈನ ನದ್ದಿನಾಮಾ ನಾರು ಮಡಿನಾ ವಣ್ಣಾ ಘಾಲ್ಲಿನ ಪಾನಿಯೊಪರ ಹುಬ್ರಯಲ ದಾಣಗಾನೆ ಎ ಕ್ಹಾರು ಕೆಳಾಮಾ ಥಾವಸ? ಕೈನ ಪುಚ್ತಾ಼ಮಾ. ತೆ ದಾಣಗೊ ಭಂಬಿ ಹತೊ ಉಚೈನ ಹಬಾಳನೆ ದೆಕಾಡಿನ ಹಮೆಶಾಬಿ ರ‍್ಹವಾಲೊ ಹಮೆಶಾಬಿ ಜ್ಯುತೊ ರ‍್ಹವಾಲಾನಿ ಕ್ಹಮ, ಯಕ್ಕಕಾಲ ಅರ್ಧುಕಾಲ ಕ್ಹಾರು ಕಾಲ ಜೌ಼; ಕ್ಹುದಾನಾ ಮನಕ್ಹೊಪರ ತ್ರಾಸೊನಿ ತಾಕತ ಭಗಾಯ್ಪರ ಎ ಕ್ಹಾರುಜ಼ ಪುರಾ ಥಾವಸ. ಕವಾನು ಮನೆ ಐಕು ಆವಾವರಕ್ಹು ಕದ್ಯೊ. ತೆ ಕದಲ ಮನೆ ಐಕು ಆಯುತಬಿ ತೆ ಮನೆ ಕಳ್ಯು ನೈ; ತೆಳಮಾ ಮಿ ಮಾರಾ ಮಾಲಕ ಎಕಾಮೊನಾ ಮರಿಣಾಮ ಸು ವೈ ಕೈನ ಪುಚ್ತಾ಼ಮಾ ತೆ ದಾನಿಯಲ ಎ ವಾತೊ ಅಂತ್ಯಕಾಲಲಕ್ಕಾ ಝಾಕಿನ ಶಿಕ್ಕೊ ಮಾರಿನ ಜಾ಼. ಘನ್ನಾ ಜ಼ನಾ ತ್ಯುನಾಕ್ಹು ತ್ಯುನೆಜ಼ ಶುದ್ದಕರಿಲಿನ ಹಸಾ ಕರಿಲಿನ ಶುದ್ದಥಾವಸ; ದುಷ್ಟೊ ದುಷ್ಟೊಮಾ ತೆ ಕಿನೆಜ಼ ಗ್ವತ್ತ ಥಾತು ನೈ. ಗ್ಯಾನಿಯೊನೆ ಯಕ್ಕಜ಼ ಗ್ವತ್ತ ಥಾವಸ. ಹಮೆಶಾನು ಹೊಮಾ ಕರಿನ ಹಾಳಕರಾನು ಹಸೈ ಸಾಮನ ಮುಕ್ಕಲ್ಪರ ಥಯಲ್ಪರ ಯಕ್ಕ ಹಜಾ಼ರ ಬೆಕ್ಹೊನ ನವ್ವದ ದಿನೊ ಥೌ. ಕೈದಿಲಿನ ಯಕ್ಕ ಹಜಾ಼ರ ತನಕ್ಹೊನೆ ಮುವತೈದದಿನೊನಾ ಲಾಸ್ಟಲಕ್ಕಾ ಕೈದಿನ ವರಿ ತಡ್ದಿಲಿವಾಲೊ ಧನೈ ವ್ಹೈ. ತು ಗೈನ ಲಾಸ್ಟಲಕ್ಕಾ ರ‍್ಹೆ; ತು ಘನ್ನಿ ನಿಂದರಮಾ ರ‍್ಹೈನ ದುನಿಯಾ ಮುಗ್ದೆಲಕ್ಕಾ ಉಟಿನ ತು ಥಾವಾನು ತುನೆ ಮಳಾನಿ ಜ಼ಗಾಪರ ಹುಬರೆಸಿ ಕದ್ಯೊ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.