Skip to content
BibleKenya

Sikkiligar Bible

ಒಬದ್ಯ 1

ಒಬದ್ಯ ದೆಕಲ ದರ್ಶನ, ಎದೊಮ ದೆಶನಾ ಹುತಿ ಯಹೊವಾ ಅಮ್ಮ ಕವಸ.

ಯಹೊವಾ ಎದೊಮನೆ ಶಿಕ್ಷಾ ದಿವಾನು

ಯಹೊವಾನಾ ಮುಕಾಂತರ ಆಯಲ ಸುದ್ದಿ ಹಮೆ ಐಕ್ಯಾಸ.

ತೆ ದುತನಾ ಮುಲಕ ಮನಕ್ಹೊನೆ ಇಮ್ಮ ಕೈನ ಮೊಕಲ್ಯೊಸ.

"ಜಾವೊ, ಎದೊಮನಾ ಉಪ್ಪರ ಯುದ್ಧ ಕರಾನೆ ಗಯ್ಯೆ!"

"ಎದೊಮ ದೆಕ, ದೆಶೊಮಾ ತುನೆ

ಘನ್ನೊ ನ್ಹಾನೊ ಕರುಸ.

ತು ಠುಕ್ರೈಲಿವಾನೆ ಗುರಿ ಥಾಶಿ.

ತಾರು ದುರಹಂಕಾರ ತುನೆಜ಼ ಮೊಸ ಕರ‍್ಯುಸ.’

ಮ್ಹೊಟಿ ಜ಼ಗಾಪರ ರ‍್ಹವಾಡ್ಯೊಸ;

ದಗ್ಡಾವೊನಾ ಬಿರುಕಮಾ ಅರಾಮಾ ಛೆ;

ಮನೆ ಜಿಮಿನ್ಪರ ಉತಾರಾಲು

ಕುನ್ನ ವ್ಹೈ?” ಕೈಲಿವಾಡ್ಯೊಸು,

"ತು ಹದ್ದನಾ ಯಕಲು ಉಪ್ಪರ ಉಡಾಡ್ಯೊತಬಿ

ಚಿಕ್ಕಿಯೊನಾ ಗುಂಪಮಾ ರ‍್ಹಯೊತಬಿ

ತ್ಯಾಂತೊಬಿ ತುನೆ ಉತಾರುಸ,”

ತೆ ವಾತೆ ಯಹೊವಾ ತಿನೆ ಕವಸ.

ತುಕನ ಚ್ವಟ್ಟಾ ರ‍್ಹವಾದೆ, ರಾತೆ

ಲುಟಿ ಕರಾಲಾ ರ‍್ಹವಾದೆ

ಆಯಾಮ ತ್ಯುನೆ ಚಾ಼ಯೆ

ಥಯಲ ತೆಕ್ಲು ಯಕ್ಕಜ಼

ಲಿನ ಜಾ಼ತಾತಾ ನೈ?

ತೆನೈಸೊ ಎಸಾವನಿ ಕ್ಹಾರಿ ಆಸ್ತಿ ಪುರಾಜ಼ ಲುಟಿ ಥೈಸ.

ತಾರಾ ದೊಸ್ತೊನಿ ಗುಂಪವಾಲಾ

ತುನೆ ಪಿಟ್ಟ ಲಾಗ್ಯಾಸ.

ತುನೆ ತಡಿಪಾರಮಾ ಢಕ್ಲಿಪಾಡ್ಯಾಸ.

ತಾರಾ ಲಾಗ್ತಾ ಭೊಕ್ತಾ ತುನೆಜ಼ ಮೊಸೆ ಹರಾಡ್ಯಾಸ.

ತಾರು ಅನ್ನ ಖಾದಲವಾಲಾ ಫರಿನ ತುನೆ ಗ್ವತ್ತವಾಚಿ ಪಾಕ್ಹು ಘಾಲಾಡ್ಯಾಸ.

ಯಹೊವಾ ಅಮ್ಮ ಕವಸ.

"ತೆ ದಿನ್ನಮಾ ಎದೊಮನಾ ಗ್ಯಾನಿಯೊನೆ ಎಸಾವನಾ

ಡೊಂಗರ್ನಾ ಶಾಣ್ಯಾವೊನೆ ಮಿ ನಾಶ ಕರ‍್ಯಾವಾಚಿ ರ‍್ಹೌಸು?

ತೆಮಾನ ಗಾಮ ತಾರಾ ಶುರೊ ಘಾಬ್ರಾಥಾವಸ;

ಎಸಾವನಿ ಪ್ರಾಂತ್ಯಮಾ ಕ್ಹಾರಾ ಖಲಾಸ ಥಾವಸ.

ಎದೊಮನು ಶಿಕ್ಷಾನೆ ಕಾರಣ

"ತಾರೊ ಭೈ ರ‍್ಹಯಲ ಯಾಕೊಬನಾ

ವಿರುದ್ದ ಕರಲ ತ್ರಾಸನಾ ಕಾಮೊನಾ ಹುತಿ

ಹಮೆಶಾನಾ ನಾಶನೆ ಪಡಸಿ.

ತಾರಾ ನ್ಹಾನಾ ಭೈನು ಆಸ್ತಿ ಚೊ಼ರಿಕರಲ ದಿನಮಾ

ತು ಗಪ್ಪಜ಼ ದೆಕ್ತೊ ಹುಬ್ರಯೊತೊ.

ಬಿಜಾ಼ ಮನಕ್ಹೊ ತಿನಾ ಗಾಮನಾ ಮ್ಹೈ ಗೈನ,

ಯೆರುಸೆಲಿಮನಾ ಆಸ್ತಿನಾ ಹುತಿ ಚಿಟಿ ಘಾಲಲ ದಿನತು

ತು ತ್ಯುನಾ ನಿಂಗತಜ಼ ವ್ಹತೊ.

ತಾರಾ ನ್ಹಾನಾ ಭೈನು ಕೆಟ್ಟ ವಕ್ಹತಮಾ,

ತಿನಾ ತ್ರಾಸನಾ ದಿನೊಮಾ

ತು ಗಪ್ಪಜ಼ ದೆಕ್ತೊ ಹುಬ್ರವಾನು ನ್ಹೊತು.

ಯೆಹುದಿಯೊನಾ ವಿನಾಶಮಾ

ಖುಶಿಕ್ಹು ರ‍್ಹವಾನು ನ್ಹೊತು.

ತ್ಯುನಾ ತ್ರಾಸಮಾ ತು ಫುಗ್ಗಾನು ನ್ಹೊತು.

ಮಾರಾ ಮನಕ್ಹೊನಾ ತ್ರಾಸೊಮಾ

ತು ತ್ಯುನಾ ಗಾಮನಾ

ಬಾಕಲೊಮಾ ಜಾ಼ವಾನು ನ್ಹೊತು.

ತ್ಯುನಿ ಆಸ್ತಿನೆ ಹತ್ತ ಘಾಲಾನು ಮ್ಹೊತು.

ಚುಕೈಲಿನ ನ್ಹಾಟಿ ಜಾ಼ತಾ ರ‍್ಹಯಲವಾಲವೊನೆ

ಖಲಾಸ ಕರಾನಾಹುತಿ ತ್ಯುನೊನೆ ಮಳಾನಿ ಕತ್ರಿಮಾ ಹುಬ್ರಾವಾನು ನ್ಹೊತು.

ಚುಕೈಲಿವಾನಿ ತ್ರಾಸನಾ ಪರಿಸ್ಥಿತಿಮಾ

ಶತ್ರುನಾ ಹತಮಾ ವಪ್ಸಾನು ನ್ಹೊತು.

ಕ್ಹುದಾ ದೆಶೊನೆ ಫೈಸಲೊ ಕರಾನು

"ಕ್ಹಾರಾ ದೆಶೊನೆ ಯಹೊವಾನೊ

ದಿನ್ನ ನಜಿಕ ಛೆ.

ತು ಕರಲಜ಼ ತುನೆಬಿ ಕರಾವಸ.

ತಾರಾ ಕೆಟ್ಟ ಕಾಮೊ

ತಾರಾ ಮಾತಾಪರ ಆವಸ.

ಮನಕ್ಹೊ, ಪವಿತ್ರ ಡೊಂಗರನಾ

ಉಪ್ಪರ ಮಾರಿ ದಂಡನೆ ಕಹಿಪಾನ-ಕಹಿಪಾನ ಕರ‍್ಯಾ.

ಕ್ಹಾರಾ ದೆಶವಾಲಾ ಕಹಿಪಾನ ಕರಸ.

ಹೊ, ಹಗ್ಲೆಲ್ಲಾ ಪಿನ ಝೊಲಾಮಾರಸ.

ಅಂತ್ಯಮಾ ತೆ ನಾಶ ಥಾವಸ.

ಇಸ್ರಾಯೆಲನಿ ಝಿತ

"ತೆನೈಸೊ ಸಿಯೊನ ಡೊಂಗರನಾ ಉಪ್ಪರ ಘನಾಜ಼ನಾ ರ‍್ಹವಸ.

ತೆ ಡೊಂಗರ ಪವಿತ್ರ ಜ಼ಗಾ ಕೈನ ಕವೈಲಿವಸ.

ಯಾಕೊಬನಾ ಸಂತತಿವಾಲಾ

ತ್ಯುನಿ ಸ್ವಂತ ಆಸ್ತಿ ಫರಿನ ಅನುಭವಿಸಸ.

ಯಾಕೊಬನಾ ವಂಶ ಆಗನಿಂಗತ ವರಿ

ಯೊಸೆಫನಾ ವಂಶವಾಲಾ ಜ್ವಾಲಾನಿಂಗತ.

ಇವ್ನೆ ಭಂಬಿಜ಼ನಾ ಮಳಿನ ಕೊಂಡೊ ರ‍್ಹಯಲ ಎಸಾವನಾ ವಂಶವಾಲಾವೊನೆ ಧಗ ಧಗ ಆಗಮಾ ಬಾಳಿನ ರಾಕ ಕರಸ.

ಎಸಾವನಾ ವಂಶಮಾ ಕುನ್ನಜ಼ ಉಗರ್ತು ನೈ. ಎ ಯಹೊವಾನಿ ವಾತ ವ್ಹೈ.

ತೆಳಾಮಾ ನೆಗವವಾಲಾ ರ‍್ಹಯಲವಾಲಾ ಎಸಾವನಾ ಡೊಂಗರನೆ ತಾಬಾಮಾ ಕರಿಲಿವಸ.

ಶೆಫೆಲ್ಹಾ ತ್ಯಾ ಸಿಮೆವಾಲಾ ಫಿಲಿಷ್ಟಿನೆ ಎಫ್ರಾಯಿಮನಿ ಜಿಮಿನನೆ

ಸಮಾರ್ಯಾನಿ ಜಿಮಿನನೆ ತಾಬಾಮಾ ಕರಿಲಿವಸ.

ಬೆನ್ಯಾಮಿನವಾಲಾ ಗಿಲ್ಯಾದನೆ ತಾಬಾಮಾ ಕರಿಲಿವಸ.

ತಾಬಾಮಾ ಥೈನ ಗಯಲ ಇಸ್ರಾಯೆಲನಾ ಸೈನಿಕೊ

ಕಾನಾನ ದೆಶ ಚಾರೆಪತಲಕ್ಕಾ ತ್ಯುನು ಕರಿಲಿಸ.

ಶೆಫಾರಮಾ ಆಳೊನು ಗುಂಪ ಯೆರುಸೆಲಿಮವಾಲಾ ನೆಗೆವ

ಪ್ರಾಂತ್ಯಮಾ ರ‍್ಹಯಲ ಗಾಮೊನೆ ತಾಬಾಮಾ ಕರಿಲಿವಸ.

ಛೊಡಾವಾಲಾ ಎಸಾವನೊ ಡೊಂಗರ ಆಳಾನಾಹುತಿ

ಸಿಯ್ಯೊನ ಡೊಂಗರ ಚ಼ಡಸ.

ತೆಳಾಮಾ ರಾಜ್ಯ ಯಹೊವಾನು ಥೈನ ರ‍್ಹವಸ.

Sikkiligar Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.